Panmaeq 22:14 - Akha

¹⁴ Yawˬ ha-euˬ pehˇ kʼahˬ pehˇ mahˇ yaw muiˬ paˬ-ehˇ tsiˬ shawˇ-eu baˬ da neh dehꞈ-eu saꞈ laˇ aˇ bawˇ-euˬ aˇ siˬ ya dzaˬ-awˇ, meuˬ kʼoeˇ meuˬ-euˬ lahˇ kʼehˬ-ahˇ neh meuˬ-ahˇ ya uˇ leˇ-eu aˬ kawˬ-aˬ za-euˬ tsawˇ haˬ deuˬ-aˬ, guiˬ lahˬ huiˬ-eu meh.

Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

¹⁴ Aqyawf nae biftaq-euq dawqdeuq-anr mrcaw-eu tsawrhaq deuq-aq, guiqlanqhuiq taef-a. Aqyawfmaf daef-eu jeq bif-eu arbawr za’nya-awr, meuq-euq lanrkhaeq-anr nae meuq-anr ya urle taef-a.

Panmaeq 22:14 ပူးပေါင်းရင်းမြစ်များ

Aˇ dahˬ 2:9

Haw muiˬ dui dui-eu aˇ bawˇ kʼaˇ ngeuˇ-eu dawˬ tawˆ luꞈ kʼoeˇ gaˇ bi dehꞈ laˇ-awˇ, muiˬ dui kuiˇ dui dui-eu aˇ siˬ deuˬ Miˬyehˇ pyeuꞈ-eu Sahˬpaˬ Miˬyehˇ neh bi siˬ le-euˬ meh. Dehꞈ-eu saꞈ laˇ aˇ bawˇ pyeuꞈ-eu yaw muiˬ yaw doeˇ tseˇ paˆ nya-eu zaˬ siˬ tsawˇ gahˇ biꞈ-eu aˇ bawˇ tiˬ bawˇ kʼawꞈ, yaˇ kmˇ kʼoeˇ kmˇ-euˬ gʼahˇ ceh bawˇ-euˬ meh.

Aˇ dahˬ 3:22

Kʼoeˇ naˇ, Miˬyehˇ pyeuꞈ-eu Sahˬpaˬ Miˬyehˇ ehˇ-eu, “Nymˬ-mˇ poˆ-aˬ, tsawˇ haˬ heu gʼaˬ aˬ dui-ahˇ duˇ laˇ gʼaˬ-awˇ, yaw muiˬ yaw doeˇ tseˇ paˆ nya-eu zaˬ siˬ tsawˇ gahˇ kʼawꞈ ahˇ laˇ gʼaˬ-euˬ meh. Heu gaˇ paˇ bi jawˇ-awˇ dehꞈ-eu saꞈ laˇ biꞈ-eu aˇ bawˇ kʼoeˇ bawˇ-euˬ aˇ siˬ pyaˆ dzaˬ pyaˆ dzaˬ-ehˇ jawˇ naˇ, mˬ maˬ maˬ byaˆ zaˇ ziˇ maˬ shiˇ ni aˬ yawꞈ dehꞈ tehꞈ-a. Kʼoeˇ loꞈ-ehˇ maˬ geuꞈ nya-a.”

Jaceuq 112:1

Sahˬpaˬ Miˬyehˇ-ahˇ ja ceuˬ-awˬ. Sahˬpaˬ Miˬyehˇ-ahˇ taˬ huiˬ-awˇ, aˬ yawꞈ-euˬ zahˇ dawˬ kʼoꞈ dawˬ-ahˇ laˬ kʼaˬ cehˇ-eu tsawˇ haˬ guiˬ lahˬ huiˬ-eu meh.

Jaceuq 118:20

Heu-aˬ, Sahˬpaˬ Miˬyehˇ-euˬ laˇ gʼoˆ pyeuꞈ-awˇ, yaw tsaˬ yaw dawˇ tsawˇ haˬ tehꞈ-ehˇ le uˇ nya-eu meh.

Doˆ-iˇ 19:10

Kʼoeˇ ngeh, Moˇseˬ-ahˇ Sahˬpaˬ Miˬyehˇ ehˇ-eu, “Iˇsaˬleˬlaˆ tsawˇ haˬ deuˬ jawˇ gaˇ iˇ-awˇ, uˬ duˬ tahˬ-eu gʼaˇ duˬ, iˬ nah hawˇ-eu ni shawˬ nah laꞈ kʼoeˇ yawˬ ha-euˬ gʼawˇ mawˇ shawˇ-awˬ lehˇ ehˇ nehˬ-awˬ. Yawˬ ha-euˬ dm gʼaˬ dm lmˇ deuˬ aˬ yawꞈ maꞈ ya lehˬ tsiˬ shawˇ meh.

Daˬyeˬlaˇ 12:12

Tiˬ heˇ smˬ yaˇ smˬ tseˇ ngaˬ nah dzeuˇ-iˇ ngeh keuˆ ni saˇ jaˇ ziꞈ-eu deuˬ laˬ kʼaˬ ya cehˇ tehꞈ-a.

Yoˇhaˬ 10:7

Kʼoeˇ miˇ neh, Yeˬsuˇ aˬ yawꞈ maꞈ-ahˇ paˇ ehˇ nehˬ-eu, “Ngaˇ-aˬ, yawˇ deuˬ gʼaˇ duˬ gʼoˆ kʼehˬ pyeuꞈ-eu ma.

Yoˇhaˬ 10:9

Ngaˇ-aˬ, gʼoˆ kʼehˬ ma. Ngaˬ-ahˇ neh kʼaˇ uˇ laˇ-eu tsawˇ haˬ-aˬ, ka kʼoꞈ-eu jeˬ za tehꞈ-a. Aˬ yawꞈ iˇ doˆ laˇ doˆ-ehˇ cah-awˇ, gaˆ dzaˬ duˬ ya mawˇ tehꞈ-a.

Yoˇhaˬ 14:15

“Naw maꞈ ngaˬ-ahˇ gaˬ naˇ, ngaˬ neh biꞈ-euˬ dawˬ deuˬ-ahˇ naˇ haˬ geuꞈ tehꞈ-a.

Yoˇhaˬ 14:6

Toˇmaˆ-ahˇ Yeˬsuˇ ehˇ nehˬ-eu, “Ngaˇ-aˬ, gaˇ ma pyeuꞈ-eu ma. Yaw tsaˬ yaw dawˇ jeˬ hawˇ-eu saꞈ laˇ dehꞈ-eu jeˬ kʼawꞈ pyeuꞈ-eu ma. Ngaˬ-ahˇ maˬ gʼoe naˇ, tsawˇ haˬ tiˬ gʼaˬ-iˬ Aˬda jawˇ gaˇ ma le keuˆ nya-a.

Yoˇhaˬ 4:12

Aˬ dui-euˬ aˬ poeˬ Yaˬkoˆ neh lah duˬ heu duˬ nga maꞈ-ahˇ biꞈ taˬ yaꞈ-euˬ meh. Aˬ yawꞈ maˬ ehˇ, aˬ yawꞈ-euˬ aˬ li deuˬ maˬ ehˇ, aˬ yawꞈ-euˬ jeˬ zaˬ deuˬ maˬ ehˇ, dawꞈ tawˆ luꞈ lah duˬ heu duˬ-ahˇ dawˇ-euˬ meh. Nawˇ Yaˬkoˆ naˆ maˬ tseˇ huiˬ dzehˬ ma lehˇ ehˇ mawꞈ-eu maˬ ngeuˇ-eu paˬ. Ngeuˇ te loˇ.”

1 Gawˇliˬtu 7:19

Aˬ jeˬ miˇ neh ehˇ naˇ, baˆ kʼoˆ mehˬ dzaˬ yehˬ-euˬ maˬ ehˇ, maˬ yehˬ-euˬ maˬ ehˇ, beu gaˇ duˬ maˬ jaˆ-a. Miˬyehˇ-euˬ zahˇ dawˬ kʼoꞈ dawˬ-ahˇ naˇ haˬ geuꞈ-eu tehꞈ-ehˇ gaˇ dahˇ tsoeˬ-eu meh.

1 Gawˇliˬtu 8:9

Ehˇ kʼawꞈ, naw maꞈ mˇ mawꞈ-eu jeˬ mˇ nya-eu aˬ kawˬ-aˬ jaˆ-eu baˬ da neh, jah-eu gʼaˬ byehˆ byehˆ-eu tsawˇ haˬ deuˬ iˬ baˇ maˬ ya bi mˇ ni yahˇ-eu tsaˬ meh.

1 Gawˇliˬtu 9:5

Gʼaˬ kʼehˇ nui deuˬ pyeuꞈ-eu Sahˬpaˬ Yeˬsuˇ-euˬ mehˇ nmˇ deuˬ hawˇ-eu Beˬtuˆluˆ maꞈ loꞈ-ehˇ, ngaˇ gʼeh Ka li-ahˇ jah-eu miˬ zaˬ tiˬ gʼaˬ sheuˬ-awˇ cah-eu aˬ kawˬ-aˬ maˬ jaˆ ta loˇ.

Gaˬlaˬtiˆ 5:6

Aˬ jeˬ miˇ neh ehˇ naˇ, Yeˬsuˇ Ka li laꞈ kʼoeˇ jawˇ-eu tsawˇ haˬ deuˬ gʼaˇ duˬ, baˆ kʼoˆ mehˬ dzaˬ yehˬ-euˬ hawˇ-eu maˬ yehˬ-euˬ tiˬ pawꞈ-iˬ beu gaˇ duˬ maˬ jaˆ-a. Gʼoeˇ-eu gaˬ-eu jeˬ mˇ doˆ shaˇ doˆ laꞈ nya-eu jah-eu kʼoeˇ tiˬ jeˬ tehꞈ-ehˇ gaˇ dahˇ tsoeˬ-eu jeˬ pyeuꞈ-eu meh.

1 Yoˇhaˬ 3:3

Ka li laꞈ kʼoeˇ, kʼoeˇ loꞈ-ehˇ kʼaˇ noeˬ tmˬ taˬ-euˬ tsawˇ haˬ deuˬ-aˬ, Ka li muiˬ-eu shawˇ-eu loꞈ-ehˇ, yawˬ ha kʼawꞈ ya bi muiˬ ya bi shawˇ meh.

1 Yoˇhaˬ 5:3

Aˬ dui Miˬyehˇ-ahˇ gaˬ-eu lehˇ ehˇ-eu kʼoeˇ-aˬ, aˬ yawꞈ-euˬ dawˬ-ahˇ naˇ haˬ geuꞈ gaˇ ehˇ-eu meh. Aˬ yawꞈ-euˬ dawˬ-aˬ, aˬ dui maˬ caw teh nya paˬ-ehˇ shaˬ-eu jeˬ maˬ ngeuˇ-a.

Panmaeq 2:7

“Nawˇ naˬ bawˇ tsoꞈ-eu ngeuˇ naˇ, Ka li zaˬ aˇ muˇ deuˬ-ahˇ Yaw sahˇ Miˬyehˇ neh ehˇ nehˬ-euˬ dawˬ-ahˇ naˇ haˬ-awˬ. “Gʼaˬ leˇ-euˬ tsawˇ haˬ deuˬ-ahˇ, Miˬyehˇ-euˬ Eˬdeˬ yaˇ kmˇ laꞈ kʼoeˇ bawˇ-eu dehꞈ-eu saꞈ laˇ biꞈ-eu aˇ bawˇ kʼoeˇ bawˇ-euˬ aˇ siˬ ngaˇ bi dzaˬ ma.

Panmaeq 21:12

Huiˬ dui goˇ dui dui-eu meuˬ meuˬ lahˇ gawˬ taˬ-awˇ, lahˇ kʼehˬ tseˇ nyiꞈ kʼehˬ jaˆ-awˇ, mˬ taˆ gʼaˬ kʼehˇ tseˇ nyiꞈ gʼaˬ loꞈ luꞈ-eu meh. Lahˇ kʼehˬ kʼoeˇ deuˬ kʼoeˇ taˆ, Iˇsaˬleˬlaˆ tsawˇ jeuˬ tseˇ nyiꞈ jeuˬ-euˬ tsawˇ myahˇ boꞈ taˬ-euˬ meh.

Panmaeq 21:27

Ehˇ kʼawꞈ, maˬ muiˬ maˬ shawˇ-eu jeˬ tiˬ jeˬ-iˬ meuˬ kʼoeˇ meuˬ laꞈ kʼoeˇ maˬ ya hehˇ ahˇ gʼeh-a. Shaꞈ dawˇ-eu jeˬ mˇ-eu tsawˇ haˬ hawˇ-eu jaˬ myawꞈ myawꞈ-eu tsawˇ haˬ deuˬ kʼawꞈ, maˬ ya uˇ leˇ-a. Yawˇzaˬ-euˬ dehꞈ-eu saꞈ laˇ sahˬ boꞈ laꞈ kʼoeˇ tsawˇ myahˇ ahˇ-eu tsawˇ haˬ deuˬ tehꞈ-ehˇ kʼoeˇ gaˇ ya uˇ leˇ-eu meh.

Panmaeq 22:2

Lawˇ baˬ kʼoeˇ gawˆ-aˬ, meuˬ-euˬ laꞈ kʼoeˇ dahˇ-eu gaˇ jawˬ gʼahˇ ceh nyiˬ paˆ-ehˇ yoeˇ ka leꞈ-eu meh. Lawˇ baˬ-euˬ kʼoeˇ dzeˇ heu dzeˇ dehꞈ-eu saꞈ laˇ aˇ bawˇ bawˇ-awˇ, ba la tiˬ siˬ tiˬ poˆ aˇ siˬ siˬ-awˇ, tiˬ kʼoꞈ tseˇ nyiꞈ lehˆ siˬ-eu meh. Aˇ bawˇ kʼoeˇ bawˇ-euˬ aˇ paꞈ-aˬ, miˇ kʼahˬ tsawˇ jeuˬ deuˬ-ahˇ naˇ gawˇ bi taˬ leˇ-eu jaˆ gʼaˬ pyeuꞈ-eu meh.

Panmaeq 22:7

Yeˬsuˇ ehˇ-eu, “Naˇ haˬ-awˬ. Ngaˇ yaw kawˇ-ehˇ oe ma. Sahˬ boꞈ heu taꞈ laꞈ kʼoeˇ mehˬ hu paw pyeuꞈ laˇ-eu gaˇ kawˆ Miˬyehˇ gʼaˇ duˬ ngehˬ dah taˬ-euˬ dawˬ deuˬ-ahˇ naˇ haˬ geuꞈ-eu tsawˇ haˬ guiˬ lahˬ huiˬ-eu meh.”

Panmaeq 7:14

“Ngaˇ maˬ siˬ nya nya. Nawˇ siˬ nya meh” lehˇ ngaˇ ehˇ kʼoꞈ nehˬ-euˬ ma. Aˬ yawꞈ ngaˬ-ahˇ ehˇ-eu, “Tsawˇ haˬ heu deuˬ-aˬ, guˆ dui dui laˇ paˬ-ehˇ gʼeh-eu kʼehˬ-eu kʼaˆ-eu jeˬ-ahˇ daˬ dzeuˇ laꞈ-euˬ tsawˇ haˬ deuˬ meh. Aˬ yawꞈ maꞈ-euˬ pehˇ kʼahˬ pehˇ mahˇ-ahˇ Yawˇ zaˬ-euˬ shiˬ neh pyuˇ deuˬ ni tsiˬ shawˇ taˬ-euˬ meh.