Panmaeq 21:4 - Akha

⁴ Aˬ yawꞈ maꞈ-euˬ myaˆ biˇ dawˬ tawˆ luꞈ-ahˇ aˬ yawꞈ siˆ shawˇ nehˬ tehꞈ-a. Shiˇ-eu jeˬ maˬ paˇ jaˆ-ehˇ, noeˬ shaˬ noeˬ zahˬ-eu jeˬ, ngoeˇ-eu jeˬ hawˇ-eu, naˇ-eu gawˇ-eu jeˬ maˬ paˇ jaˆ meh. Yaw oeˇ kʼoeˇ deuˬ dawˬ tawˆ luꞈ byoˆ jiˇ-euˬ meh.”

Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

⁴ Miqyaer, aqyawf maf-euq myavbir dawqtawv luf-anr sivdzaenaeq taef-a. Shir-eu jeq maqpar jav-aer, noeqshaq-eu jeq hawr-eu ngoer-eu jeq maqpar jav-eu uqtaf, nar-awr gawr-eu jeq khawf maqpar jav-eu mae. Aqjeq mirnae aernar-aq, yawbae jav-euq jeq dawqtawvluf byovjir-euq mae.”

Panmaeq 21:4 ပူးပေါင်းရင်းမြစ်များ

Jaceuq 144:4

Aˬ yawꞈ-aˬ, saꞈ tiˬ poˆ gʼawˇ dah-euˬ myah ni gmˬ-eu tehꞈ meh. Aˬ yawꞈ-euˬ ziˇ-aˬ, naˇ shmˇ shmˇ-iˇ-eu naˆ ni tehꞈ meh.

Iˇsaˬyaˇ 25:8

Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ-aˬ, shiˇ-eu jeˬ-ahˇ mˬ maˬ maˬ byaˆ zaˇ ziˇ laˆ cawˆ nehˬ tehꞈ-a. Tsawˇ haˬ yawˬ gʼaˬ na luꞈ-euˬ myaˆ biˇ aˬ yawꞈ shiˆ shawˇ nehˬ-awˇ, miˇ tsaˬ kʼoeˇ taˆ kʼaˇ jawˇ-eu aˬ yawꞈ-euˬ tsawˇ haˬ deuˬ ya daˬ luꞈ-eu yaw doeˇ dawˬ tawˆ luꞈ-ahˇ, aˬ yawꞈ laˆ byoˆ nehˬ tehꞈ-a lehˇ, Sahˬpaˬ Miˬyehˇ ehˇ taˬ-eu jaˆ-eu meh.

Iˇsaˬyaˇ 30:19

Yeˬluˇsaˬlehˬ meuˬ-ahˇ jawˇ-eu tsawˇ haˬ deuˬ-oˇ, naw maꞈ tiˬ jawˇ-iˬ noeˬ shaˬ-awˇ maˬ paˇ ya ngoeˇ meh. Sahˬpaˬ Miˬyehˇ-aˬ, gʼawˬ shaˬ gaˬ nya-awˇ, caw ba nehˬ laꞈ lehˇ naw maꞈ aˬ yawꞈ-ahˇ shaˇ ngeh, naw maꞈ-euˬ shaˇ dawˬ-ahˇ naˇ haˬ nehˬ laꞈ tehꞈ-a.

Iˇsaˬyaˇ 35:10

Aˬ yawꞈ maꞈ laˬ kʼaˬ cehˇ-eu caˇ dawˬ caˇ-awˇ guˇ guˇ-ehˇ, Yeˬluˇsaˬlehˬ meuˬ-ahˇ laˬ kʼaˬ tiˬ cehˇ le keuˆ tehꞈ-a. Aˬ yawꞈ maꞈ mˬ maˬ maˬ byaˆ zaˇ ziˇ laˬ kʼaˬ cehˇ-awˇ, noeˬ shaˬ noeˬ zahˬ-eu jeˬ hawˇ-eu myaˆ biˇ doˆ-eu jeˬ-ahˇ, mˬ maˬ maˬ byaˆ zaˇ ziˇ buˬ-iˇ law-iˇ tehꞈ-a.

Iˇsaˬyaˇ 51:11

Nawˬ neh ka kʼoꞈ doˆ nehˬ-euˬ tsawˇ haˬ deuˬ, laˬ kʼaˬ cehˇ-eu caˇ dawˬ caˇ-awˇ guˇ-eu laꞈ kʼoeˇ, Yeˬluˇsaˬlehˬ meuˬ-ahˇ laˬ kʼaˬ tiˬ cehˇ ya gʼoꞈ keuˆ laˇ tehꞈ-a. Mˬ maˬ maˬ byaˆ zaˇ ziˇ aˬ yawꞈ maꞈ laˬ kʼaˬ ya cehˇ-awˇ, noeˬ shaˬ noeˬ zahˬ-eu jeˬ laꞈ kʼoeˇ mˬ maˬ maˬ byaˆ zaˇ ziˇ dzeuˇ-iˇ tehꞈ-a.

Iˇsaˬyaˇ 60:20

Shaˬ zahˬ naꞈ-eu nawˬ-euˬ aˇ nah aˇ yamˬ dzeuˇ-awˇ, Sahˬpaˬ Miˬyehˇ pyeuꞈ-eu ngaˇ-aˬ, mˬ maˬ maˬ byaˆ zaˇ ziˇ nawˬ-euˬ yaw shehꞈ pyeuꞈ-awˇ, nahˇ ma hawˇ-eu ba la maˬ tseˇ gmˬ ma.

Iˇsaˬyaˇ 61:3

Ziˇoˬ meuˬ-ahˇ ngoeˇ luꞈ-eu tsawˇ haˬ deuˬ, nui noeˬ shaˬ-eu dah zaˇ laˬ kʼaˬ cehˇ laˇ nya ni, shaˬ zahˬ mˇ-eu dah zaˇ ja ceuˬ-eu caˇ dawˬ caˇ nya ni, aˬ yawꞈ ngaˬ-ahˇ pyehˬ leꞈ-euˬ meh. Aˬ yawꞈ maꞈ Sahˬpaˬ Miˬyehˇ neh ka-euˬ aˇ bawˇ-ahˇ duˇ tehꞈ-a. Aˬ yawꞈ maꞈ dawˬ tawˆ yaw tsaˬ yaw dawˇ jeˬ mˇ-eu miˇ neh, Miˬyehˇ-ahˇ aˬ cawˬ ya ja ceuˬ tehꞈ-a.

Yeˬlaˬmiˇ 31:12

Aˬ yawꞈ maꞈ Ziˇoˬ gawˬ jawˬ-ahˇ laˇ-awˇ, laˬ kʼaˬ cehˇ-eu caˇ dawˬ caˇ laˇ tehꞈ-a. Ngaˬ neh biꞈ-euˬ laꞈ sawˬ pyeuꞈ-eu, dzaˬ la gʼo cehˇ, aˬ gaꞈ dzaˇ uiˇ, saˬ loˬ tsiˇ deuˬ hawˇ-eu, mawˇ nyoˬ jeˬ kaˇ deuˬ-ahˇ aˬ yawꞈ maꞈ nui kʼahˇ shiˇ tehꞈ-a. Iˇ cuꞈ tiˬ loꞈ za-eu yaˇ kmˇ tiˬ kmˇ loꞈ-ehˇ, aˬ yawꞈ maꞈ ehˇ kʼaˇ maˬ za ni dehꞈ dzaˬ tehꞈ-a.

Yeˬlaˬmiˇ 31:13

Kʼoeˇ ngeh aˬ buˇ miˬ daꞈ deuˬ gaˇ nyeh nyeh tehꞈ-a. Zaˬ guˬ tsawˇ mawˬ maˬ ehˇ laˬ kʼaˬ ya cehˇ tehꞈ-a. Aˬ yawꞈ maꞈ-euˬ nui ma-ahˇ ngaˇ laˆ saˆ nehˬ-eu miˇ neh, myaˆ biˇ yoeˇ-eu dah zaˇ laˬ kʼaˬ cehˇ-awˇ, shaˬ zahˬ dah zaˇ nui saˇ oꞈ le tehꞈ-a.

Hawˇseˬ 13:14

Shiˇ-eu jeˬ-euˬ miˇ kʼahˬ laꞈ kʼoeˇ, aˬ yawꞈ maꞈ-ahˇ ngaˇ maˬ ka kʼoꞈ. Shiˇ-eu baoˬ-euˬ uˬ moˆ shaˬ gaˇ, aˬ yawꞈ maꞈ-ahˇ ngaˇ maˬ ka kʼoꞈ, Shiˇ-eu jeˬ-oˇ nawˬ-euˬ shaˆ shiˇ, yawꞈ maꞈ kʼoeˇ taˆ bi keuˆ le-awˬ. Shiˇ-eu miˇ kʼahˬ-euˬ yaw cawˆ jeˬ, aˬ yawꞈ maꞈ-ahˇ tahˬ daˆ nehˬ-awˬ. Tsawˇ haˬ heu deuˬ-euˬ kʼoeˇ taˆ ngaˇ, gʼawˬ shaˬ gaˬ-eu maˬ paˇ ahˇ ma.

Maꞈtehˬ 24:35

Mˬ hawˇ-eu miˇ tsaˬ maˬ jaˆ coeˇ ni ya byoˆ-iˇ tehꞈ-a. Ehˇ kʼawꞈ, ngaˬ-euˬ dawˬ tiˬ jawˇ-iˬ maˬ byoˆ-iˇ-aˇ.

1 Gawˇliˬtu 15:26

Aˬ cawˬ jeˬ nah nah saˬ bi deuˆ gʼaˬ-eu muiˇ-eu gʼaˬ-aˬ, shiˇ-eu jeˬ meh.

1 Gawˇliˬtu 7:31

Miˇ tsaˬ shiˬ shaˬ jiˇ-ahˇ taꞈ leˇ-eu gaˇ mˇ-eu deuˬ kʼawꞈ, tiˬ byah tiˬ loꞈ maˬ mˇ ni jawˇ-awˬ. Aˬ jeˬ miˇ neh ehˇ naˇ, miˇ tsaˬ heu-euˬ seuˆ dzeuꞈ aˇ gʼehˇ byoˆ le luꞈ meh.

2 Gawˇliˬtu 5:17

Tsawˇ haˬ tiˬ gʼaˬ Ka li laꞈ kʼoeˇ jawˇ naˇ, yaw shuiꞈ beh paˇ-euˬ tsawˇ haˬ pyeuꞈ-eu meh. Yaw oeˇ byoˆ tsehˆ-awˇ, yaw shuiꞈ paˇ laˇ-euˬ meh.

2 Gawˇliˬtu 6:17

“Aˬ yawꞈ maꞈ-ahˇ naw maꞈ gʼawˬ-awˇ, byehˇ dzeh yaꞈ-awˇ doˆ laˇ-awˬ” lehˇ, Sahˬpaˬ Miˬyehˇ ehˇ taˬ-euˬ meh. “Maˬ shawˇ-eu jeˬ-ahˇ taˬ toeˬ ciˆ. Naw maꞈ-ahˇ ngaˇ ha geuꞈ nehˬ ma.

HeˬByehˇ 12:27

“Tiˬ poˆ paˇ gʼeu nyeh ma” lehˇ ehˇ-eu dawˬ kʼoeˇ dawˬ-aˬ, maˬ nyeh laˇ nya-eu jeˬ bi ziꞈ-awˇ, kʼaˇ beh taˬ-euˬ jeˬ bi nyeh laˇ-awˇ bi byoˆ-iˇ jiˇ ma lehˇ bya cehˆ ni ehˇ mawꞈ-eu meh.

2 Beˬtuˆluˆ 3:10

Ehˇ kʼawꞈ, Miˬyehˇ-euˬ Aˇnah-aˬ,smˇ kʼoeˬ tahˇ joe oe-eu loꞈ-ehˇ keuˆ leh tehꞈ-a. Aˇ nah kʼoeˇ nah keuˆ le ngeh, teˇ saˇ yaw kʼaˆ-ehˇ mahˇ laˇ-awˇ, mˬ byoˆ-iˇ leꞈ tehꞈ-a. Nahˇ ma, ba la, aˬ guiˇ dawˬ tawˆ luꞈ puiˆ byoˆ guiˇ byoˆ jiˇ tehꞈ-a. Miˇ tsaˬ heu hawˇ-eu miˇ tsaˬ kʼoeˇ taˆ kʼaˇ jawˇ kʼaˇ jaˆ-eu jeˬ daw tawˆ luꞈ bi puiˆ dzaˬ jiˇ tehꞈ-a.

1 Yoˇhaˬ 2:17

Miˇ tsaˬ heu hawˇ-eu miˇ tsaˬ heu kʼoeˇ taˆ tsawˇ haˬ zaˬ nui kʼahˇ kʼaˇ jaˆ-eu jeˬ dawˬ tawˆ luꞈ ya byoˆ-iˇ jiˇ tehꞈ-a. Ehˇ kʼawꞈ, Miˬyehˇ-euˬ nui kʼahˇ mˇ-eu tsawˇ haˬ-aˬ, mˬ maˬ maˬ byaˆ zaˇ ziˇ ya dehꞈ tehꞈ-a.

Panmaeq 20:13

Kʼoeˇ naˇ, iˬ ma laˆ shaˆ-aˬ, aˬ yawꞈ laꞈ kʼoeˇ shiˇ taˬ-euˬ tsawˇ haˬ deuˬ Miˬyehˇ-ahˇ a nehˬ-euˬ meh. Shiˇ-eu jeˬ maˬ ehˇ, shiˇ-eu miˇ kʼahˬ maˬ ehˇ, aˬ yawꞈ maꞈ neh kʼaˇ nyehꞈ tehˬ taˬ-euˬ shiˇ-euˬ tsawˇ haˬ deuˬ a nehˬ-euˬ meh. Kʼoeˇ naˇ, tsawˇ haˬ dawˬ tawˆ luꞈ yawˬ ha neh kʼaˇ mˇ dzeuˇ yaꞈ-euˬ loꞈ-ehˇ yaˇ kʼaˬ bi daˇ-euˬ meh.

Panmaeq 20:14

Shiˇ-eu jeˬ hawˇ-eu shiˇ-eu miˇ kʼahˬ kʼoeˇ nyiˬ jeˬ-ahˇ-aˬ, miˬ dzaˬ lah-ahˇ biˬ puꞈ nehˬ-euˬ meh. (Miˬ dzaˬ lah kʼoeˇ lah-aˬ, nyiˬ poˆ tiˬ poˆ shiˇ-eu jeˬ pyeuꞈ-eu meh.)

Panmaeq 21:1

Kʼoeˇ naˇ, mˬ yaw shuiꞈ hawˇ-eu miˇ yaw shuiꞈ-ahˇ ngaˇ ya mawˇ-euˬ ma. Yaw beh jaˆ-euˬ mˬ hawˇ-eu miˇ byoˆ-iˇ-awˇ, iˬ ma laˆ shaˆ maˬ paˇ jaˆ ni pyeuꞈ-iˇ-euˬ meh.

Panmaeq 22:3

Meuˬ kʼoeˇ meuˬ laꞈ kʼoeˇ Miˬyehˇ neh yaˬ kʼehˇ bi yaˬ-euˬ jeˬ tiˬ jeˬ-iˬ maˬ ya mawˇ-a. Miˬyehˇ hawˇ-eu Yawˇzaˬ-euˬ dzoeˬ dzaˬ nuiˇ mahˬ meuˬ kʼoeˇ meuˬ-ahˇ jaˆ-awˇ, aˬ yawꞈ-euˬ zaˬ kʼaˆ deuˬ aˬ yawꞈ-ahˇ uˬ duˬ tahˬ tehꞈ-a.

Panmaeq 7:17

Aˬ jeˬ miˇ neh ehˇ naˇ, dzoeˬ dzaˬ nuiˇ mahˬ-euˬ gʼahˇ ceh nuiˇ luꞈ-eu Yawˇzaˬ-aˬ, aˬ yawꞈ maꞈ-ahˇ bo-eu yawˇ bo-eu yaw sahˇ pyeuꞈ-awˇ, dehꞈ-eu saꞈ laˇ lawˇ gawˆ-ahˇ aˬ yawꞈ maꞈ-ahˇ sheuˬ gʼeh tehꞈ-a. Aˬ yawꞈ maꞈ-euˬ myaˆ biˇ dawˬ tawˆ luꞈ-ahˇ Miˬyehˇ siˆ shawˇ nehˬ tehꞈ-a.