Panmaeq 19:7 - Akha

⁷ Aˬyawꞈ huiˬ dui mahˇ dui dui gaˇ, laˬ kʼaˬ cehˇ-awˇ ja ceuˬ kaˇ-euˇ. Aˬ jeˬ miˇ neh ehˇ naˇ, Yawˇ zaˬ oeˇ mˇ baˇ-eu gʼeh-awˇ, zaˬ miˬ lehˬ hmˬ dah taˬ-euˬ meh.

Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

⁷ Aqdui laqkhaqcaer duidui-awr, lurgha caergha-eu lafkhoer aqyawf-anr ciqhuiq ciqmanr kar-eur. Aqjeq mirnae aernar-aq, Yawrzaq oermr bar-eu aryamq keuvlar-euq mae. Aqyawf-euq miqshuif, yawqha-euq mawrdo laeqhmqdan taq-euq mae.”

Panmaeq 19:7 ပူးပေါင်းရင်းမြစ်များ

Jaceuq 107:42

Yaw tsaˬ yaw dawˇ tsawˇ haˬ deuˬ kʼoeˇ gaˇ mawˇ ngeh laˬ kʼaˬ cehˇ kʼawꞈ, maˬ tsaˬ maˬ dawˇ-eu deuˬ ciˬ cuˇ ni jawˇ-eu meh.

Jaceuq 48:11

Ziˇoˬ gawˬ jawˬ-ahˇ jawˇ-eu deuˬ laˬ kʼaˬ cehˇ luꞈ-uˇ. Nawˇ dawˇ coe ni yaˇ kʼaˬ daˇ-eu miˇ neh, Yuˇdaˆ meuˬ deuˬ laꞈ kʼoeˇ laˬ kʼaˬ cehˇ-eu jeˬ byah luꞈ-uˇ.

Jaceuq 9:14

Yeˬluˇsaˬlehˬmehˬshi yawꞈ-awˇ, gaˇkawˆheu dzawˇmehˬ-eu laꞈkʼoeˇ, nawˬ-ahˇbi ja ceuˬnehˬlaꞈ-awˬ. Nawˇka kʼoꞈnehˬlaꞈ-euˬ miˇ neh, ngaˇlaˬkʼaˬcehˇ nui kʼahˇshiˇma.

Dawqdaq 29:2

Yaw tsaˬ yaw dawˇ tsawˇ haˬ dzoeˬ dzaˬ ngeh, miˇ kʼahˬ zaˬ nui saˇ oꞈ-awˇ, maˬ tsaˬ maˬ dawˇ-eu tsawˇ haˬ dzoeˬ dzaˬ ngeh, miˇ kʼahˬ zaˬ ya noeˬ shaˬ tehꞈ-a.

Dawˬ caˇ 3:11

Ziˇoˬ meuˬ-ahˇ jawˇ-eu zaˬ miˬ zaˬ deuˬ-oˇ, sahˬ paˬ Sawˇlaˬmoˬ-ahˇ haw laˇ sheˇ. Aˬ yawꞈ gʼaˇ duˬ byawˬ dui dui-eu aˇ nah pyeuꞈ-eu, oeˇ mˇ baˇ ngeh nah-ahˇ, aˬ yawꞈ aˬ ma neh nyehꞈ kʼoˆ nehˬ-eu shuiˇ uˬ kʼoˆ kʼoeˇ siˬ aˬ yawꞈ kʼoˆ luꞈ-eu meh.

Iˇsaˬyaˇ 52:1

Yeˬluˇsaˬlehˬ meuˬ-oˇ, noeˬ laˇ-awˬ. Beuˇ laˇ-awˬ. Gʼaˬ ziꞈ dah ni paˇ ahˇ laˇ-awˬ. Miˬyehˇ-euˬ muiˬ-eu shawˇ-eu meuˬ-oˇ, yaw shehꞈ kʼahˬ sehˇ dm-awˬ. Lawˇ ciꞈ zaˬ deuˬ meuˬ lahˇ laꞈ kʼoeˇ maˬ paˇ ya uˇ laˇ meh.

Iˇsaˬyaˇ 62:5

Miˬ daꞈ zaˬ daꞈ sheuˬ dahˬ dzaˬ-eu loꞈ-ehˇ, nawˬ-ahˇ beh-euˬ gʼaˬ nawˬ-ahˇ sheuˬ dahˬ dzaˬ tehꞈ-a. Miˬ zaˬ yo zaˬ tiˬ gʼaˬ tiˇ gʼaˬ nui kʼahˇ jaˆ-eu loꞈ-ehˇ, nawˬ-euˬ Miˬyehˇ kʼawꞈ nawˬ-ahˇ nui kʼahˇ jaˆ tehꞈ-a.

Iˇsaˬyaˇ 66:10

Yeˬluˇsaˬlehˬ meuˬ-ahˇ kʼaˇ gaˬ-eu tsawˇ haˬ deuˬ, Yeˬluˇsaˬlehˬ meuˬ nehˬ-ehˇ laˬ kʼaˬ caw cehˇ-awˇ, aˬ yawꞈ gʼaˇ duˬ nui kʼahˇ shiˇ-awˬ. Yeˬluˇsaˬlehˬ gʼaˇ duˬ tsawˇ ngoeˇ ngoeˇ-euˬ deuˬ, nymˬ-mˇ aˬ yawꞈ nehˬ-ehˇ laˬ kʼaˬ cehˇ-awˬ.

Iˇsaˬyaˇ 66:14

Kʼoeˇ loꞈ-ehˇ pyeuꞈ laˇ gaˇ mawˇ ngeh, naw maꞈ laˬ kʼaˬ ya cehˇ tehꞈ-a. Kʼoeˇ loꞈ-ehˇ pyeuꞈ laˇ ngeh, naw maꞈ jawˇ saˇ doˆ-awˇ gʼaˬ ahˇ tehꞈ-a. Kʼoeˇ loꞈ-ehˇ pyeuꞈ laˇ ngeh, Sahˬpaˬ Miˬyehˇ pyeuꞈ-eu ngaˇ-aˬ, ngaˬ-euˬ ehˇ dawˬ naˇ haˬ-eu deuˬ-ahˇ ngehˬ gʼeh-awˇ, ngaˬ-ahˇ muiˇ-eu deuˬ-ahˇ nui ma bi mawˇ gaˇ, naw maꞈ ya siˬ ya mawˇ tehꞈ-a.”

Zaˬkaˬliˇ 9:9

Ziˇoˬ tsawˇ haˬ laˬ kʼaˬ cehˇ-awˬ. Yeˬluˇsaˬlehˬ meuˬ-euˬ tsawˇ haˬ, laˬ kʼaˬ cehˇ-awˇ guˇ dui dui-awˬ. Naw maꞈ-euˬ sahˬpaˬ oe luꞈ meh. Aˬ yawꞈ baoˬ kʼahˬ sehˇ huiˬ-eu kʼawꞈ, nui nahˬ nui yu ahˇ-eu laꞈ kʼoeˇ, mahˬ tahˬ laˆ zaˬ-ahˇ dziˬ-eu meh.

Maꞈtehˬ 1:20

Kʼoeˇ loꞈ-ehˇ shaˇ noeˬ luꞈ-eu aˇ yamˬ-ahˇ, aˬ yawꞈ yuꞈ maˆ maˆ-eu laꞈ kʼoeˇ, Sahˬpaˬ Miˬyehˇ-euˬ mˬ taˆ gʼaˬ kʼehˇ tiˬ gʼaˬ aˬ yawꞈ jawˇ gaˇ doˆ le-awˇ, heu loꞈ-ehˇ ehˇ-eu meh. “Daˬbiˇ-euˬ aˬ li Yoˇsehˆ-oˇ, Maˬliˇ-ahˇ sheuˬ-eu gaˇ kawˆ taˬ noeˬ shaˬ. Aˬ yawꞈ zaˬ tsehˆ leˇ-euˬ-aˬ, Muiˬ-eu shawˇ-eu Yaw sahˇ Miˬyehˇ baˬ da neh meh.

Maꞈtehˬ 22:2

“Mˬtaˆ Miˇkʼahˬ-aˬ, heu loꞈ-ehˇ duˇ-eu meh. Sahˬ paˬ tiˬ gʼaˬ aˬ yawꞈ-euˬ aˬ li oeˇ mˇ baˇ-eu bawˬ-iˬ gʼeh-eu gʼaˇ duˬ, lehˬ hmˬ-euˬ meh.

Luˇkaꞈ 12:36

Yawˬ ha-euˬ baw leˬ oeˇ mˇ baˇ-eu bawˬ-iˬ gʼeh gaˇ iˇ-euˬ gʼoꞈ laˇ-awˇ, laˇ gʼoˆ-ahˇ kʼoˆ laˇ ngeh, laˇ gʼoˆ ja tawˆ ni pah nehˬ-eu lehˇ loꞈ luꞈ-eu tsawˇ haˬ deuˬ loꞈ-ehˇ, lehˬ hmˬ deuˇ taˬ-awˬ.

Yoˇhaˬ 3:29

Smˇ miˇ iˇ-eu zaˬ miˬ-aˬ, miˬ zaˬ laˬ-eu zaˬ yo-ahˇ oꞈ-eu meh. Miˬ zaˬ sheuˬ-eu gʼaˬ-euˬ dawˬ peh yawꞈ caw nehˬ-awˇ naˇ haˬ luꞈ-eu aˬ yawꞈ-euˬ cawˬ kʼoeˇ gʼaˬ-aˬ, miˬ zaˬ sheuˬ-eu gʼaˬ-euˬ dawˬ-ahˇ ya gaˬ ngeh, laˬ kʼaˬ cehˇ-eu meh. Kʼoeˇ gaˇ duˇ ni, nymˬ-mˇ ngaˇ laˬ kʼaˬ cehˇ-eu jeˬ byah miˇ-a.

2 Gawˇliˬtu 11:2

Miˬyehˇ naw maꞈ-ahˇ nui ma maˬ shiˇ-eu loꞈ-ehˇ, ngaˇ kʼawꞈ naw maꞈ-ahˇ nui ma maˬ shiˇ nya. Naw maꞈ miˬ shuiꞈ tiˬ gʼaˬ loꞈ-ehˇ Ka li tiˬ gʼaˬ-ahˇ tehꞈ-ehˇ bi dahˬ dzaˬ-iˇ-eu gʼaˇ duˬ saˇ jaˇ dzaˬ nehˬ-euˬ gʼaˬ ngaˇ ma.

Eˇpeˇsu 5:23

Aˬ jeˬ miˇ neh ehˇ naˇ, Ka li zaˬ aˇ muˇ kʼoeˇ taˆ Ka li uˆ lahˇ-eu baoˬ jaˆ-eu loꞈ-ehˇ, miˬ zaˬ kʼoeˇ taˆ kʼaˬ dzeˇ zaˬ uˆ lahˇ-eu baoˬ jaˆ meh. Ka li-aˬ, Ka li zaˬ aˇ muˇ pyeuꞈ-eu aˬ yawꞈ-euˬ gʼawˇ mawˇ-ahˇ Ka kʼoꞈ-eu yaw sahˇ pyeuꞈ-eu meh.

Eˇpeˇsu 5:32

Jaˇliꞈ aˇ deuˆ heu deuˆ laꞈ kʼoeˇ, naꞈ dui dui-eu zaꞈ taˬ-euˬ jeˬ pah mehˬ luꞈ-eu meh. Kʼoeˇ-aˬ, Ka li hawˇ-eu Ka li zaˬ aˇ muˇ-ahˇ ehˇ mawꞈ-eu meh lehˇ ngaˇ gʼoˆ shaw-eu ma.

Dawˬmehˬ 32:43

“Miˇ kʼahˬ tsawˇ jeuˬ dawˬ tawˆ luꞈ-oˇ, Sahˬpaˬ Miˬyehˇ-euˬ tsawˇ haˬ-ahˇ, naw maꞈ ya ja ceuˬ gaˇ keuˆ meh. Aˬ yawꞈ maꞈ-ahˇ sehꞈ-eu deuˬ-ahˇ, aˬ yawꞈ kʼehˬ nehˬ kʼaˆ nehˬ tehꞈ-a. Muiˇ-eu deuˬ-ahˇ laꞈ poˆ poˆ-awˇ, aˬ yawꞈ-euˬ tsawˇ haˬ deuˬ-ahˇ-aˬ, aˬ yawꞈ iˬ baˇ pyehˬ nehˬ tehꞈ-a.”

Piˇliˇpiˆ 3:3

Dawˇ coe ni ya ehˇ naˇ, maˇ maˇ ni baˆ kʼoˆ mehˬ dzaˬ yehˬ-euˬ tsawˇ haˬ deuˬ-aˬ, aˬ yawꞈ maꞈ maˬ ngeuˇ-a. Aˬ dui maꞈ ma. Aˬ jeˬ miˇ neh ehˇ naˇ, Yaw sahˇ Miˬyehˇ-ahˇ gʼoe-eu laꞈ kʼoeˇ Miˬyehˇ-ahˇ aˬ dui u duˬ tahˬ-awˇ, Yeˬsuˇ Ka li laꞈ kʼoeˇ yaw dehꞈ dehꞈ-eu jeˬ-ahˇ aˬ dui laˬ kʼaˬ cehˇ-eu ma. Laꞈ nyiˇ paw mˇ mawˇ nya-eu zahˇ sahˇ kʼoꞈ deuˬ-ahˇ aˬ dui gʼoe-eu maˬ ngeuˇ.

Panmaeq 11:13

Kʼoeˇ ngeh kʼaˆ tseuˆ ni, miˇ luˆ yaw kʼaˆ-ehˇ luˆ laˇ-euˬ baˬ da neh, meuˬ kʼoeˇ meuˬ-euˬ tseˇ bymˇ tiˬ bymˇ cawˆ-iˇ-awˇ, tsawˇ haˬ shiꞈ heˇ gʼaˬ shiˇ-euˬ meh. Dzeˇ-eu tsawˇ haˬ deuˬ guˆ dui dui-iˇ-awˇ, mˬ taˆ Miˬyehˇ huiˬ dui mahˇ dui dui gaˇ ja ceuˬ tehꞈ-a.

Panmaeq 19:9

Kʼoeˇ naˇ, mˬ taˆ gʼaˬ kʼehˇ kʼoeˇ gʼaˬ ngaˬ-ahˇ ehˇ-eu, “Yawˇzaˬ oeˇ mˇ baˇ-eu bawˬ-iˬ-ahˇ laˇ-eu gʼaˇ duˬ bi kuˇ taˬ-euˬ tsawˇ haˬ deuˬ guiˬ lahˬ huiˬ-eu meh lehˇ boꞈ ahˇ taˬ-awˬ.” Aˬ yawꞈ paˇ ehˇ-eu, “Heu-aˬ, maˇ maˇ ni Miˬyehˇ neh ngehˬ-euˬ dawˬ meh.”

Panmaeq 21:2

Kʼoeˇ ngeh, Muiˬ-eu shawˇ-eu Meuˬ pyeuꞈ-eu Yeˬluˇsaˬlehˬ meuˬ-aˬ, smˇ miˇ iˇ-eu lehˇ gʼeh-eu zaˬ miˬ zaˬ tiˬ gʼaˬ yawˬ ha-euˬ kʼaˬ dzeˇ zaˬ jawˇ gaˇ iˇ-eu lehˇ dm gʼaˬ dm lmˇ tiˬ kuꞈ dm-awˇ lehˬ hmˬ taˬ-euˬ loꞈ-ehˇ, mˬ-ahˇ Miˬyehˇ jawˇ gaˇ neh zaꞈ ka le-euˬ meh.

Panmaeq 21:9

Mˬ taˆ gʼaˬ kʼehˇ kʼoeˇ shiꞈ gʼaˬ laꞈ kʼoeˇ, aˇ saˬ saˬ-eu kʼehˬ-eu kʼaˆ-eu jeˬ tiˬ byah ni ahˇ-eu naˬ bo shiꞈ bo yuˇ luꞈ-eu gʼaˬ ngaˇ jawˇ gaˇ oe-awˇ ehˇ-eu, “Laˇ-awˬ. Yawˇzaˬ-euˬ zaˬ miˬ pyeuꞈ-eu miˬ shuiꞈ kʼoeˇ gʼaˬ ngaˇ nawˬ-ahˇ mehˬ nehˬ nyaˇ.”

1 Saˬmeuˬlaˆ 2:1

Haˬnahˬ guiˬ lahˬ shaˇ-eu, “Sahˬpaˬ Miˬyehˇ, ngaˬ nui ma-ahˇ laˬ kʼaˬ cehˇ jeˬ bi byah-euˬ meh. Yawꞈ neh mˇ-euˬ gaˇ baˬ da neh, laˬ kʼaˬ cehˇ dui dui-eu laꞈ kʼoeˇ, Muiˇ-eu deuˬ-ahˇ ngaˇ uiˇ-eu ma. Miˬyehˇ caw ba laꞈ-euˬ miˇ neh, ngaˇ laˬ kʼaˬ cehˇ dui dui-eu ma.