Panmaeq 11:13 - Akha

¹³ Kʼoeˇ ngeh kʼaˆ tseuˆ ni, miˇ luˆ yaw kʼaˆ-ehˇ luˆ laˇ-euˬ baˬ da neh, meuˬ kʼoeˇ meuˬ-euˬ tseˇ bymˇ tiˬ bymˇ cawˆ-iˇ-awˇ, tsawˇ haˬ shiꞈ heˇ gʼaˬ shiˇ-euˬ meh. Dzeˇ-eu tsawˇ haˬ deuˬ guˆ dui dui-iˇ-awˇ, mˬ taˆ Miˬyehˇ huiˬ dui mahˇ dui dui gaˇ ja ceuˬ tehꞈ-a.

Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

¹³ Khoerngae yamq-anr, mirluvluv duidui lar-awr, meuq heumeuq tser bymr-anr nae tiq bymr gabyav-euq mae. Mirluv luv-euq baqda’nae, tsawrhaq 7,000 ghaq shir-euq mae. Nuideuq-aq, guv duidui-ir-awr, mq-euq khoertav jawr-eu Miqyaer-anr ciqhuiq ciqmanr-eu mae.

Panmaeq 11:13 ပူးပေါင်းရင်းမြစ်များ

Aˇ dahˬ 6:4

Aˇ nah aˇ yamˬ kʼoeˇ yamˬ laꞈ kʼoeˇ maˬ ehˇ, kʼoeˇ sawˇ miˇ tsa dehꞈ ka leꞈ-euˬ aˇ nah aˇ yamˬ deuˬ laꞈ kʼoeˇ maˬ ehˇ, mˬ taˆ zaˬ yo deuˬ hawˇ-eu miˇ tsa zaˬ miˬ deuˬ sheuˬ dahˬ dzaˬ taꞈ-awˇ dehꞈ le-euˬ, aˇ gahˬ aˇ goˇ muiˬ dui dui-eu tsawˇ haˬ zaˬ deuˬ jawˇ-euˬ meh. Tsawˇ haˬ kʼoeˇ deuˬ-aˬ, huiˬ-eu gaˇ deuˬ mˇ-awˇ tsawˇ myahˇ doˆ dui dui-euˬ, aˇ hu ba-euˬ tsawˇ haˬ deuˬ pyeuꞈ-eu meh.

Iˇsaˬyaˇ 29:6

mˬ jeˬ jaˬ lehˇ hawˇ-eu miˇ luˆ luˆ-eu laꞈ kʼoeˇ, Baoˬ huiˬ-eu Sahˬpaˬ Miˬyehˇ nawˬ-ahˇ ka kʼoꞈ tehꞈ-a. Jaˬ lehˇ lehˇ ma hawˇ-eu miˬ dzaˬ miˬ lmˇ, aˬ yawꞈ pyehˬ leꞈ tehꞈ-a.

Yeˬlaˬmiˇ 13:16

Yaw zahˇ jeˬ maˬ bi keuˆ le mi naˆ-ehˇ, gawˬ jawˬ kʼoeˇ taˆ naw maꞈ sahˬ tiꞈ maˬ ya tiꞈ mi naˆ-ehˇ, naw maꞈ noeˬ tmˬ-euˬ yaw shehꞈ-ahˇ, aˬ yawꞈ zahˇ tsui ni maˬ bi pyeuꞈ-iˇ mi naˆ-ehˇ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ, naw maꞈ yaw zeu baw-awˬ.

Maˬlaˬkiˇ 2:2

Naw maꞈ kʼaˇ mˇ kʼaˇ shaˇ-eu jeˬ laꞈ kʼoeˇ, ngaˬ-ahˇ yaw zeu ya baw meh. Naw maꞈ ngaˬ-euˬ ehˇ dawˬ maˬ naˇ haˬ naˇ, yaˬ kʼehˇ yaˬ gaˇ ya daˬ tehꞈ-a. Naw maꞈ neh gaˇ mˇ-euˬ aˇ poeˬ naw maꞈ-ahˇ biꞈ taˬ-euˬ jeˬ kʼoeˇ taˆ, ngaˇ yaˬ kʼehˇ yaˬ ma. Aˬ diˇ aˬ maˇ ehˇ naˇ, naw maꞈ ngaˬ-euˬ dawˬ-ahˇ yaw muiˬ paˬ-ehˇ maˬ naˇ haˬ geuꞈ-eu miˇ neh, kʼoeˇ deuˬ kʼoeˇ taˆ ngaˇ yaˬ kʼehˇ yaˬ dzeuˇ gʼaˬ-euˬ ma.

Yoˇhaˬ 9:24

Dehꞈ le ngeh neh myaˆ behꞈ behꞈ-euˬ tsawˇ haˬ kʼoeˇ gʼaˬ-ahˇ aˬ yawꞈ maꞈ tiˬ poˆ paˇ kuˇ-awˇ ehˇ nehˬ-eu, “Nawˇ dawˇ coe ni ehˇ ma lehˇ Miˬyehˇ mehˬ shi kamˬ-awˬ. Nawˬ-ahˇ myaˆ nuiˆ mawˇ laˇ ni jahˇ nehˬ-euˬ kʼoeˇ gʼaˬ iˬ baˇ zaˬ meh lehˇ nga maꞈ siˬ nya ma.”

Gʼaˬkʼehˇ 1:15

Gʼawˬ myahˇ maˬ gʼeh-ehˇ, jah-eu tsawˇ haˬ deuˬ tiˬ yaˇ nyiˬ tseˇ gʼaˬ uiˬ leˇ-awˇ jawˇ gaˇ, Beˬtuˆluˆ tuˇ laˇ-awˇ, heu loꞈ-ehˇ ehˇ-eu meh.

Yawˇshuˆ 7:19

Aˬkaˬ-ahˇ Yawˇshuˆ ehˇ nehˬ-eu, “Ngaˬ li-oˇ, Iˇsaˬleˬlaˆ tsawˇ jeuˬ-euˬ Miˬyehˇ pyeuꞈ-eu Sahˬpaˬ Miˬyehˇ-euˬ mehˬ shi nawˬ-euˬ iˬ baˇ-ahˇ dawˇ coe ni ehˇ doˆ-awˬ. Nawˇ aˬ joˆ-ehˇ jahˇ-euˬ gaˇ kawˆ nymˬ-mˇ ngaˬ-ahˇ ehˇ nehˬ laꞈ-awˬ. Ngaˬ-euˬ mehˬ shi tiˬ jeˬ-iˬ taˬ zaꞈ taˬ.”

Panmaeq 11:11

Smˬ nah uˬ taꞈ nah kʼoeˆ tiˬ kʼoeˆ dzeuˇ-iˇ ngeh, Miˬyehˇ jawˇ gaˇ neh doˆ le-euˬ tsawˇ haˬ zaˬ-ahˇ bi dehꞈ laˇ-eu saꞈ, aˬ yawꞈ nyaꞈ-euˬ laꞈ kʼoeˇ uˇ le-awˇ, aˬ yawꞈ nyaꞈ tuˇ laˇ-euˬ meh. Kʼoeˇ ngeh, aˬ yawꞈ nyaꞈ-ahˇ kʼaˇ ya mawˇ-eu tsawˇ haˬ deuˬ tsawˬ guˆ-iˇ-euˬ meh.

Panmaeq 11:19

Mˬ taˆ jaˆ-eu Miˬyehˇ-euˬ uˬ duˬ tahˬ nymˇ nymˇ ma pah taˬ-awˇ, Dawˬ ma saˇ jaˇ Bahˬ keuˆ mawˇ laˇ-eu meh. Kʼoeˇ ngeh, mˬ myawꞈ myawꞈ-awˇ, teˇ saˇ gʼawˬ mya jeˬ hawˇ-eu mˬ jeˬ jeˬ-eu teˇ saˇ gaˬ le-eu uˬ taꞈ, miˇ luˆ yaw kʼaˆ-ehˇ luˆ-awˇ, uˬ yehˇ aˇ siˬ ga dui dui-eu meh.

Panmaeq 14:7

Aˬ yawꞈ teˇ saˇ yaw kʼaˆ-ehˇ guˇ-awˇ ehˇ-eu, “Miˬyehˇ-ahˇ taˬ huiˬ taˬ mahˇ-awˇ, aˬ yawꞈ huiˬ dui mahˇ dui dui gaˇ ja ceuˬ-awˬ. Aˬ jeˬ miˇ neh ehˇ naˇ, tsawˇ haˬ zaˬ-ahˇ aˬ yawꞈ yaˇ kʼaˬ daˇ-eu aˇ yamˬ keuˆ le-euˬ meh. Mˬ, miˇ, iˬ ma laˆ shaˆ hawˇ-eu, iˇ cuꞈ lawˇ gawˆ deuˬ-ahˇ beh-euˬ gʼaˬ-ahˇ uˬ duˬ tahˬ-awˬ.”

Panmaeq 15:4

Sahˬpaˬ Miˬyehˇ-oˇ, nawˬ-euˬ mehˬ shi yawꞈ-awˇ, maˬ zahˬ leˇ-eu aˬ suˇ jawˇ ta. Nawˇ huiˬdui mahˇdui dui meh lehˇ, maˬ ja ceuˬ-eu aˬ suˇ jawˇ ta. Nawˇ tehꞈ-ehˇ muiˬ-eu shawˇ-eu meh. Nawˬ neh mˇ-euˬ yaw tsaˬ yaw dawˇ, tsawˇ haˬ zaˬ mawˇ jiˇ-euˬ miˇ neh, Miˇ kʼahˬ tsawˇ jeuˬ dawˬ tawˆ laˇ-awˇ, nawˬ-ahˇ uˬ duˬ tahˬ laˇ tehꞈ-a.”

Panmaeq 19:7

Aˬyawꞈ huiˬ dui mahˇ dui dui gaˇ, laˬ kʼaˬ cehˇ-awˇ ja ceuˬ kaˇ-euˇ. Aˬ jeˬ miˇ neh ehˇ naˇ, Yawˇ zaˬ oeˇ mˇ baˇ-eu gʼeh-awˇ, zaˬ miˬ lehˬ hmˬ dah taˬ-euˬ meh.

Panmaeq 3:4

Ehˇ kʼawꞈ, Saˬdiˇ meuˬ-ahˇ jawˇ-eu naw maꞈ heu myaˆ gʼaˬ-aˬ, mehˬ tsoeˬ maˬ jawꞈ-iˇ-aˬ siˬ. Naw maꞈ ngaˬ nehˬ-ehˇ cah-awˇ, mehˬ tsoeˬ yaw pyuˇ ya dm tehꞈ-a. Aˬ jeˬ miˇ neh ehˇ naˇ, naw maꞈ kʼoeˇ loꞈ-ehˇ mˇ geuˇ-eu tsawˇ haˬ pyeuꞈ-eu meh.

Panmaeq 6:12

Kʼoeˇ naˇ, Yawˇzaˬ kʼoeˇ mawˇ jmˬ diˬ taˬ-euˬ shiꞈ hmˬ tiˬ hmˬ-ahˇ ngawˬ paˆ gaˇ ngaˇ mawˇ-euˬ ma. Kʼoeˇ ngeh, miˇ luˆ luˆ dui dui laˇ-awˇ ‘nahˇ ma myahˬ naˆ-euˬ saˬ paˇ loꞈ-ehˇ zahˇ-iˇ-awˇ, ba la shiˬ loꞈ-ehˇ neˇ laˇ-euˬ meh.

Panmaeq 8:5

Kʼoeˇ naˇ, tsiˇ yaw saw jeˬ doꞈ duˬ kʼoeˇ-ahˇ mˬ taˆ gʼaˬ kʼehˇ kʼoeˇ gʼaˬ yuˇ-awˇ, lawˇ duˬ kʼoeˇ taˆ doꞈ luꞈ-eu miˬ dzaˬ pehˆ ahˇ-awˇ, miˇ tsaˬ kʼoeˇ taˆ biˬ ka gʼeh-euˬ meh. Kʼoeˇ ngeh, teˇ saˇ gʼawˬ mya jeˬ hawˇ-eu mˬ jeˬ jeˬ-eu teˇ saˇ gaˬ le-awˇ, mˬ myawꞈ myawꞈ-awˇ miˇ luˆ luˆ-euˬ meh.

1 Saˬmeuˬlaˆ 6:5

Kʼoeˇ loꞈ-ehˇ jahˇ naˇ, naw maꞈ-ahˇ maˬ ehˇ, naw maꞈ-euˬ miˬ yehˇ deuˬ-ahˇ maˬ ehˇ, naw maꞈ-euˬ miˇ kʼahˬ-ahˇ maˬ ehˇ, aˬ yawꞈ maˬ paˇ kʼehˬ nehˬ laꞈ ni byehˇ-eu duˇ.