Maꞈtehˬ 5:9 - Akha

⁹ “Tsaˬ leˇ dzoeˇ leˇ ni mˇ-eu tsawˇ haˬ deuˬ guiˬ lahˬ huiˬ-eu meh. Aˬ jeˬ miˇ neh ehˇ naˇ, aˬ yawꞈ maꞈ-ahˇ Miˬyehˇ-euˬ zaˬ lehˇ kuˇ tehꞈ-a.

Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

⁹ “Tsaqler dzoerlerni mr-eu tsawrhaq deuq-aq, guiqlanq huiq-eu mae. Aqjeq mirnae aernar-aq, aqyawf maf-anr Miqyaer-euq zaq laer kur taef-a.

Maꞈtehˬ 5:9 ပူးပေါင်းရင်းမြစ်များ

1 Laˬsaˬbaˬ 12:17

Daˬbiˇ aˬ yawꞈ maꞈ-ahˇ tahˬ puˬ-iˇ-awˇ ehˇ-eu, “Naw maꞈ cawˬ cawˬ mawꞈ-euˬ nui ma ahˇ-awˇ, ngaˬ-ahˇ caw ba le-eu lehˇ laˇ-euˬ ngeuˇ naˇ, naw maꞈ-ahˇ ngaˇ ha geuꞈ ma. Ehˇ kʼawꞈ, muiˇ-eu deuˬ-euˬ aˬ laꞈ laꞈ kʼoeˇ, naw maꞈ ngaˬ-ahˇ a ahˇ nehˬ-eu lehˇ noeˬ taˬ-euˬ jaˆ naˇ, ngaˇ naw maꞈ-ahˇ tiˬ jeˬ-iˬ maˬ jahˇ kʼawꞈ, aˬ dui-euˬ aˬ poeˬ aˬ bawˇ deuˬ-euˬ Miˬyehˇ siˬ nya-awˇ, naw maꞈ-ahˇ kʼehˬ nehˬ kʼaˆ nehˬ laꞈ tehꞈ-a.”

Jaceuq 120:6

Yaw muiˬ yaw saˇ saˇ-ehˇ maˬ dehꞈ-eu deuˬ nehˬ-ehˇ, ngaˇ maˬ jawˇ coeˇ-ehˇ pyeuꞈ laˇ-euˬ miˇ-a.

Jaceuq 34:12

Yaw dehꞈdehꞈ-eu nui kʼahˇshiˇ-awˇ, ziˇbaw ziˇza dehꞈziˇshehˇ-awˇ, laˬkʼaˬcehˇ-eu jeˬmawꞈte loˇ.

Maꞈtehˬ 5:45

Kʼoeˇ loꞈ-ehˇ jahˇ naˇ, naw maꞈ-aˬ, mˬ kʼoeˇ taˆ jawˇ-eu naw maꞈ-euˬ Aˬ da-euˬ zaˬ pyeuꞈ laˇ tehꞈ-a. Aˬ jeˬ miˇ neh ehˇ naˇ, aˬ yawꞈ-aˬ, tsawˇ muiˬ tsawˇ doeˇ maˬ tseˇ ni, dawˬ tawˆ luꞈ kʼoeˇ taˆ aˬ yawꞈ-euˬ nahˇ ma bi doˆ laˇ-awˇ, yaw tsaˬ yaw dawˇ tsawˇ haˬ hawˇ-eu maˬ tsaˬ maˬ dawˇ-eu tsawˇ haˬ maˬ tseˇ paˆ ni, dawˬ tawˆ luꞈ kʼoeˇ taˆ uˬ yehˇ bi yehˇ le-eu meh.

Maꞈtehˬ 5:48

Kʼoeˇ miˇ neh, mˬ kʼoeˇ taˆ jawˇ-eu naw maꞈ-euˬ Aˬ da byah-eu loꞈ-ehˇ, naw maꞈ kʼawꞈ bi byah laˇ-awˬ.

Luˇkaꞈ 20:36

Aˬ yawꞈ maꞈ-aˬ, mˬ taˆ gʼaˬ kʼehˇ loꞈ-ehˇ pyeuꞈ laˇ-awˇ, tiˬ jawˇ-iˬ maˬ shiˇ-a. Aˬ yawꞈ maꞈ shiˇ gʼaˬ-awˇ paˇ gʼoꞈ dehꞈ laˇ-euˬ miˇ neh, Miˬyehˇ-euˬ zaˬ deuˬ pyeuꞈ laˇ-euˬ meh.

Luˇkaꞈ 6:35

Ehˇ kʼawꞈ, naw maꞈ-ahˇ muiˇ-eu deuˬ-ahˇ gaˬ-awˬ. Yaw muiˬ jeˬ mˇ-awˬ. Biꞈ kʼoꞈ nehˬ laꞈ gaˇ maˬ noeˬ tmˬ ni ngaˬ nehˬ paˇ nehˬ-awˬ. Kʼoeˇ loꞈ-ehˇ jahˇ naˇ, naw maꞈ gʼaˇ duˬ laꞈ sawˬ huiˬ dui dui-awˇ, Huiˬ dui Mahˇ dui dui-eu Gʼaˬ-euˬ zaˬ naw maꞈ pyeuꞈ laˇ tehꞈ-a. Aˬ jeˬ miˇ neh ehˇ naˇ, guiˬ lahˬ-ahˇ maˬ noeˬ mawˇ nya-eu tsawˇ haˬ hawˇ-eu haiˬ-eu tsawˇ haˬ deuˬ-ahˇ, aˬ yawꞈ gʼawˬ shaˬ gaˬ-eu meh.

Gʼaˬkʼehˇ 7:26

Yawˬ nah yawˬ Iˇsaˬleˬlaˆ tsawˇ haˬ nyiˬ gʼaˬ yaw kaˬ ceh luꞈ gaˇ aˬ yawꞈ mawˇ-awˇ, aˇ kaˬ piˇ nehˬ-eu laꞈ kʼoeˇ, ‘Naˇ haˬ sheˇ. Iˇsaˬleˬlaˆ tsawˇ haˬ cawˬ cawˬ aˬ jeˬ miˇ neh teu loꞈ-ehˇ ceh dzaˬ te’ lehˇ ehˇ nehˬ-euˬ meh.

Lormav 12:18

Tsawˇ haˬ yawˬ gʼaˬ na luꞈ nehˬ-ehˇ tsaˬ leˇ ni, yawˬ ha kʼaˇ gʼeh nya-eu loꞈ-ehˇ leh jeh-awˇ dehꞈ-awˬ.

Lormav 8:14

Miˬyehˇ-euˬ Yaw sahˇ sheuˬ gʼeh-eu mehˬ nah dehꞈ gʼeh-eu tsawˇ haˬ deuˬ-aˬ, Miˬyehˇ-euˬ zaˬ meh.

Lormav 8:16

Aˬ dui Miˬyehˇ-euˬ zaˬ pyeuꞈ-eu gaˇ kawˆ, Yaw sahˇ Miˬyehˇ hawˇ-eu aˬ dui-euˬ saꞈ laˇ tiˬ kawˆ loꞈ-ehˇ saˇ kiˇ kamˬ-eu meh.

Lormav 8:19

Miˬyehˇ neh aˬ yawꞈ-euˬ zaˬ deuˬ pah mehˬ nehˬ laꞈ gaˇ, kʼaˇ beh taˬ-euˬ jeˬ dawˬ tawˆ luꞈ noeˬ tmˬ dui dui-eu laꞈ kʼoeˇ loꞈ luꞈ-eu meh.

1 Gawˇliˬtu 6:6

Ehˇ kʼawꞈ, naw maꞈ Ka li zaˬ yaw kaˬ tiˬ gʼaˬ tiˇ gʼaˬ yaˇ kʼaˬ daˇ-eu nymˇ-ahˇ daˬ keuˆ leˇ-awˇ, Ka li-ahˇ maˬ jah-eu tsawˇ haˬ deuˬ neh yaˇ kʼaˬ bi daˇ-eu la.

2 Gawˇliˬtu 13:11

Aˬ yuiꞈ aˬ nyiˇ Ka li zaˬ deuˬ-oˇ, aˇ saˬ saˬ-eu dawˬ heu loꞈ-ehˇ ehˇ ma. Laˬ kʼaˬ cehˇ-eu jeˬ oꞈ luꞈ-uˇ. Naw maꞈ dehꞈ paˇ-awˬ. Ngaˬ-euˬ shaˇ dawˬ naˇ haˬ nehˬ laꞈ-awˬ. Tiˬ gʼaˬ tiˇ gʼaˬ tsaˬ leˇ dzoeˇ leˇ-awˬ. Gʼoeˇ-eu gaˬ-eu jeˬ hawˇ-eu nui saˇ oꞈ-eu jeˬ biꞈ-eu Miˬyehˇ naw maꞈ nehˬ-ehˇ jawˇ tehꞈ-a.

2 Gawˇliˬtu 5:20

Kʼoeˇ miˇ neh, nga maꞈ-aˬ, Ka li-euˬ dah zaˇ ngehˬ zaˬ tmˇ zaˬ geuꞈ luꞈ-eu ma. Nga maꞈ-ahˇ gʼoe-eu laꞈ kʼoeˇ naw maꞈ-ahˇ Miˬyehˇ shaˇ ju luꞈ gaˇ duˇ meh. Miˬyehˇ-ahˇ tsaˬ leˇ tsahˇ leˇ-awˬ lehˇ, Ka li-euˬ dah zaˇ naw maꞈ-ahˇ shaˇ-eu ma.

Gaˬlaˬtiˆ 5:22

Ehˇ kʼawꞈ, Yaw sahˇ Miˬyehˇ laꞈ kʼoeˇ siˬ le-eu aˇ siˬ deuˬ-aˬ, gʼoeˇ-eu gaˬ-eu, laˬ kʼaˬ cehˇ-eu, nui saˇ oꞈ-eu, nui ma gʼawˬ mahˇ ni taˬ-eu, gʼawˬ shaˬ gaˬ-eu nui ma ahˇ-eu, yaw muiˬ jeˬ mˇ-eu, saˇ jaˇ ziꞈ-eu,

Eˇpeˇsu 4:1

Sahˬpaˬ Yeˬsuˇ-euˬ gaˇ mˇ-eu miˇ neh tawˬ-ahˇ ya uˇ-euˬ tsawˇ haˬ pyeuꞈ-eu ngaˇ, naw maꞈ-ahˇ heu loꞈ-ehˇ shaˇ-eu ma. Miˬyehˇ naw maꞈ-ahˇ kuˇ ngeh aˬ yawꞈ neh noeˬ taˬ-euˬ aˇ tiˆ kʼoeˇ tiˆ-ahˇ dehꞈ keuˆ-awˬ.

Piˇliˇpiˆ 4:2

Iˇbawˇdiˇ hawˇ-eu Suˇtuˆ-oˇ, Sahˬpaˬ Yeˬsuˇ laꞈ kʼoeˇ nui ma tiˬ gaˇ taꞈ-awˬ lehˇ naw nyaꞈ-ahˇ ngaˇ shaˇ-eu ma.

Gawˇlawˇsehˇ 3:13

Tiˬ gʼaˬ tiˇ gʼaˬ oˇ-awˬ. Iˬ baˇ taˬ kʼaˇ za laˇ ngeh, tiˬ gʼaˬ tiˇ gʼaˬ iˬ baˇ pyehˬ-awˬ. Sahˬpaˬ Yeˬsuˇ naw maꞈ-ahˇ iˬ baˇ pyehˬ nehˬ laꞈ-euˬ loꞈ-ehˇ, tiˬ gʼaˬ tiˇ gʼaˬ iˬ baˇ pyehˬ-awˬ.

HeˬByehˇ 12:14

Tsawˇ haˬ yawˬ gʼaˬ na luꞈ nehˬ-ehˇ tsaˬ leˇ tsahˇ leˇ-eu laꞈ kʼoeˇ yaw muiˬ yaw shawˇ shawˇ-ehˇ dehꞈ-awˬ. Kʼoeˇ loꞈ-ehˇ maˬ dehꞈ naˇ, tsawˇ haˬ tiˬ gʼaˬ-iˬ Sahˬpaˬ Miˬyehˇ-ahˇ maˬ mawˇ nya-a.