Maꞈtehˬ 19:28 - Akha

²⁸ Aˬ yawꞈ maꞈ-ahˇ Yeˬsuˇ ehˇ nehˬ-eu, “Miˇ tsaˬ tahˬ kʼawˇ yaw shuiꞈ paˇ laˇ-awˇ, yaw shehꞈ kʼahˬ sehˇ huiˬ-eu dzoeˬ dzaˬ nuiˇ mahˬ kʼoeˇ taˆ Tsawˇhaˬ-euˬ Zaˬmaˇ nuiˇ le ngeh, ngaˬ-euˬ mehˬ nah caw teh-eu naw maꞈ tseˇ nyiꞈ gʼaˬ kʼawꞈ, dzoeˬ dzaˬ nuiˇ mahˬ kʼoeˇ taˆ nuiˇ-awˇ, Iˇsaˬleˬlaˆ tsawˇ jeuˬ tseˇ nyiꞈ jeuˬ kʼoeˇ taˆ ya uˆ lahˇ tehꞈ-a.

Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

²⁸ Khoerngae, Yeqsur, aqyawf maf-anr heulof-aer aernaeq-euq mae, “Ngar, nawmaf-anr aqdirma-aer aernaeq nyar, yawqjeq navluf yawshuif parlar-awr, Tsawrhaq-euq Zaqyo, aqyawf-euq yawshaef khanqsaer huiq-eu nuirmanq-anr nuir ngae, ngaq-euq maeqnan cantae-eu nawmaf khawf, nuirmanq 12 manq-anr nuir-awr, Irsaqleqlav tsawrjeuq 12 jeuq-anr yarkhaq yadar taef-a.

Maꞈtehˬ 19:28 ပူးပေါင်းရင်းမြစ်များ

1 Sahˬpaˬ 18:31

Sahˬpaˬ Miˬyehˇ neh Iˇsaˬleˬlaˆ lehˇ myahˇ nehˬ-euˬ Yaˬkoˆ-euˬ aˬ li tseˇ nyiꞈ li-euˬ tsawˇ myahˇ pi luꞈ-eu tsawˇ jeuˬ tseˇ nyiꞈ jeuˬ gʼaˇ duˬ, kʼaˬ lo tseˇ nyiˬ siˬ aˬ yawꞈ yuˇ-euˬ meh.

2 Laˬsaˬbaˬ 9:19

Dawˬ dzm dawˬ tehꞈ aˬ yawꞈ tehꞈ yawꞈ-euˬ kʼoeˇ paˆ ma paˆ-ehˇ aˇ laˬ jaˬ shiˇ mawˇ kawˇ tiˬ paw tiˬ kawˇ yawꞈ luꞈ-awˇ, aˇ laˬ jaˬ shiˇ mawˇ kawˇ kʼoeˇ dawˬ tawˆ luꞈ tseˇ nyiꞈ kawˇ byah-eu meh. Nuiˇ mahˬ kʼoeˇ mahˬ-ahˇ duˇ-eu nuiˇ mahˬ miˇ kʼahˬ tiˬ kʼahˬ-ahˇ-iˬ maˬ jaˆ haw-aˬ.

Eˇzaˬlaˬ 6:17

Uˬ duˬ tahˬ nymˇ nymˇ ma a nehˬ-eu gʼaˇ duˬ, mawˇ neˇ tiˬ yaˇ mawˇ, yawˇ nyiˬ yaˇ mawˇ hawˇ-eu, yawˇ zaˬ oeˬ yaˇ mawˇ aˬ yawꞈ maꞈ lawˇ nehˬ-euˬ meh. Iˬ baˇ shawˇ-eu lawˇ-eu jeˬ gʼaˇ duˬ kʼawꞈ, Iˇsaˬleˬlaˆ tsawˇ jeuˬ tiˬ jeuˬ-euˬ ciꞈ myehꞈ tiˬ mawˇ doˇ leˇ-ehˇ, ciꞈ myehꞈ tseˇ nyiꞈ mawˇ aˬ yawꞈ maꞈ lawˇ-euˬ meh.

Doˆ-iˇ 15:27

Yawˬ nah yawˬ keuˆ le ngeh, iˇ cuꞈ iˇ beuˆ tseˇ nyiꞈ beuˆ doˆ-awˇ, daoˇ aˇ bawˬ shiꞈ tseˇ bawˬ dehꞈ-eu Eˇleˬ lehˇ kuˇ-eu jawˇ duˬ-ahˇ aˬ yawꞈ maꞈ le keuˆ-euˬ meh. Kʼoeˇ gaˇ, lawˇ baˬ dawˬ peh aˬ yawꞈ maꞈ sehˬ gʼawˆ gʼawˆ-awˇ naˬ-euˬ meh.

Doˆ-iˇ 24:4

Kʼoeˇ naˇ, Sahˬpaˬ Miˬyehˇ neh kʼaˇ ngehˬ kʼaˇ tmˇ-euˬ zahˇ sahˇ kʼoꞈ dawˬ tawˆ luꞈ, Moˇseˬ boꞈ-euˬ meh. Yawˬ nah yawˬ uˬ shawˬ yaw naꞈ-ehˇ, gawˬ jawˬ dawˬ dahˬ-ahˇ lawˇ duˬ tiˬ tsahˇ aˬ yawꞈ tsoˆ-awˇ, Iˇsaˬleˬlaˆ tsawˇ jeuˬ tseˇ nyiꞈ jeuˬ-euˬ dah zaˇ, kʼaˬ lo tseˇ nyiꞈ siˬ kʼahˬ tuˇ-euˬ meh.

Doˆ-iˇ 28:21

Kʼaˬ lo sehˇ heu tseˇ nyiꞈ siˬ-aˬ, Iˇsaˬleˬlaˆ tsawˇ jeuˬ tseˇ nyiꞈ jeuˬ-euˬ dah zaˇ pyeuꞈ-eu gʼaˇ duˬ, aˬ yawꞈ siˬ yawꞈ kʼoeˇ taˆ, Yaˬkoˆ-euˬ aˬ li tiˬ li-euˬ tsawˇ myahˇ ya toeˬ boꞈ taˬ meh.

Iˇsaˬyaˇ 65:17

Sahˬpaˬ Miˬyehˇ heu loꞈ-ehˇ ehˇ-eu meh. “Mˬ yaw shuiꞈ miˇ yaw shuiꞈ ngaˇ beh luꞈ ma. Kʼaˇ pyeuꞈ dzeuˇ-euˬ jeˬ dawˬ tawˆ luꞈ ya ngehˇ byoˆ jiˇ tehꞈ-a.

Iˇsaˬyaˇ 66:22

“Ngaˬ-euˬ baoˬ baˬ da neh, mˬ yaw shuiꞈ hawˇ-eu miˇ kʼahˬ yaw shuiꞈ maˬ cawˆ-iˇ ni ziꞈ-eu loꞈ-ehˇ, naw maꞈ-euˬ zaˬ deuˬ uˆ deuˬ hawˇ-eu naw maꞈ-eu tsawˇ myahˇ, maˬ cawˆ-iˇ ni ziꞈ tehꞈ-a.

Uˬ duˬ 24:5

Cehˇ meu tseˇ nyiꞈ pehˬ yuˇ-awˇ, kaˬ muˇ tseˇ nyiꞈ siˬ jahˇ-awˬ.

Maꞈtehˬ 16:27

Tsawˇhaˬ-euˬ Zaˬmaˇ-aˬ, aˬ yawꞈ Aˬda-euˬ yaw shehꞈ kʼahˬ sehˇ dm-awˇ, aˬ yawꞈ-euˬ mˬ taˆ gʼaˬ kʼehˇ deuˬ nehˬ-ehˇ zaꞈ le-awˇ, tsawˇ haˬ yawˬ gʼaˬ yawˬ na luꞈ-ahˇ, yawˬ ha neh kʼaˇ mˇ taˬ-euˬ loꞈ-ehˇ tsoeˬ kʼoꞈ nehˬ le tehꞈ-a.

Maꞈtehˬ 19:27

Kʼoeˇ ngeh, Beˬtuˆluˆ ehˇ-eu, “Haw sheˇ. Nga maꞈ kʼaˇ jaˆ-eu yawˬ jeˬ na luꞈ byehˇ dzeh yaꞈ jiˇ-awˇ, nawˬ-euˬ mehˬ nah caw teh laˇ-euˬ maˬ ngeuˇ nga loˇ. Nga maꞈ aˬ jeˬ za nmˇ.”

Maꞈtehˬ 20:21

Yeˬsuˇ aˬ yawꞈ-ahˇ ehˇ nehˬ-eu, “Nawˇ aˬ jeˬ shaˇ mawꞈ te.” Aˬ yawꞈ ehˇ-eu, “Nawˇ sahˬ paˬ keuˆ leˇ ngeh, ngaˬ li heu nyiˬ li-ahˇ, nawˬ-euˬ aˇ maˇ paw tiˬ gʼaˬ bi nuiˇ-awˇ, aˇ caˇ paw tiˬ gʼaˬ bi nuiˇ ma lehˇ, ngaˬ-ahˇ tiˬ poˆ ehˇ tsehˆ nehˬ laꞈ-awˬ.”

Maꞈtehˬ 25:31

“Tsawˇhaˬ-euˬ Zaˬmaˇ mˬ taˆ gʼaˬ kʼehˇ deuˬ sheuˬ-awˇ, Sahˬ paˬ loꞈ-ehˇ zaꞈ le ngeh, aˬ yawꞈ-euˬ dzoeˬ dzaˬ nuiˇ mahˬ kʼoeˇ taˆ nuiˇ le tehꞈ-a.

Maꞈtehˬ 6:33

Miˬyehˇ-euˬ Miˇ kʼahˬ hawˇ-eu aˬ yawꞈ-euˬ yaw tsaˬ yaw dawˇ jeˬ-ahˇ jeˬ huˬ poˆ-awˬ. Nui jeˬ dawˬ tawˆ luꞈ, aˬ yawꞈ naw maꞈ-ahˇ biꞈ lahˬ laꞈ tehꞈ-a.

Maꞈtehˬ 8:20

Tsawˇ haˬ kʼoeˇ gʼaˬ-ahˇ Yeˬsuˇ ehˇ nehˬ-eu, “Byaˬ hiˇ-aˬ bahˬ baw meh. Aˇ jiˇ kʼawꞈ bahˬ baw meh. Ehˇ kʼawꞈ, Tsawˇ haˬ-euˬ Zaˬmaˇ -aˬ, uˬ duˬ baꞈ daˇ-awˇ naˬ kʼaˇ tiˬ gaˇ-iˬ maˬ za-a.”

Maˬkuˆ 10:37

Aˬ nyaꞈ nmˇ ehˇ-eu, “Yaw shehꞈ kʼahˬ sehˇ huiˬ-eu Miˇ kʼahˬ laꞈ kʼoeˇ, nawˬ-euˬ dzoeˬ dzaˬ nuiˇ mahˬ kʼoeˇ taˆ nawˇ nuiˇ ngeh, nga nyaꞈ nmˇ-ahˇ nawˬ-euˬ aˇ maˇ paw tiˬ gʼaˬ hawˇ-eu, aˇ caˇ paw tiˬ gʼaˬ bi nuiˇ laꞈ.”

Gʼaˬkʼehˇ 3:21

Muiˬ-eu shawˇ-eu Yaw sahˇ Miˬyehˇ gʼaˇ duˬ ngehˬ dah-eu deuˬ-ahˇ gʼoe-awˇ yawˬ jeˬ na luꞈ yaw shuiꞈ beˬ paˇ jiˇ-eu aˇ yamˬ maˬ keuˆ laˇ kʼoeˇ keuˆ ni, mˬ kʼoeˇ taˆ aˬ yawꞈ ya jawˇ tawˬ meh.

2 Tiˆmoˇseˬ 2:12

Aˬ dui daˬ dzeuˇ oˇ dzeuˇ coeˇ naˇ, aˬ yawꞈ nehˬ-ehˇ ya dzoeˬ tehꞈ-a. Aˬ dui aˬ yawꞈ-ahˇ byehˇ dzeh naˇ, aˬ yawꞈ aˬ dui-ahˇ byehˇ tehꞈ-a.

Yawˇshuˆ 3:12

Tsawˇ haˬ tseˇ nyiꞈ gʼaˬ byah ni, Iˇsaˬleˬlaˆ tsawˇ jeuˬ tiˬ jeuˬ-euˬ tsawˇ haˬ tiˬ gʼaˬ nymˬ-mˇ tseˇ doˆ-awˬ.

2 Beˬtuˆluˆ 3:13

Ehˇ kʼawꞈ, aˬ dui-aˬ, Miˬyehˇ neh saˇ jaˇ dzaˬ taˬ-euˬ jeˬ-ahˇ dawˬ luꞈ-eu ma. Iˇ kahˇ laꞈ kʼoeˇ yaw tsaˬ yaw dawˇ jeˬ jaˆ-eu mˬ yaw shuiꞈ miˇ yaw shuiꞈ-ahˇ dawˬ luꞈ-eu ma.

Panmaeq 11:16

Kʼoeˇ ngeh, Miˬyehˇ mehˬ shi yawˬ ha-euˬ dzoeˬ dzaˬ nuiˇ mahˬ kʼoeˇ taˆ yawˬ ha nuiˇ luꞈ-eu aˬ yuiꞈ aˬ tsu kʼoeˇ nyiˬ tseˇ oeˬ gʼaˬ awˆ byaˆ-awˇ, Miˬyehˇ-ahˇ uˬ duˬ tahˬ-eu meh.

Panmaeq 12:1

Kʼoeˇ naˇ, huiˬ dui dui-eu zahˬ leˇ paˬ-ehˇ gʼeh-eu jeˬ mˬ kʼoeˇ taˆ ya mawˇ-euˬ ma. Zaˬ miˬ zaˬ tiˬ gʼaˬ nahˇ ma-ahˇ dm-awˇ, ba la-ahˇ nawˬ tehˬ taˬ-awˇ, aˬ guiˇ tseˇ nyiꞈ siˬ tsoꞈ-eu shuiˇ uˬ kʼoˆ kʼoˆ luꞈ-eu meh.

Panmaeq 20:4

Kʼoeˇ naˇ, dzoeˬ dzaˬ nuiˇ mahˬ tiˬ deuˬ-ahˇ ngaˇ ya mawˇ-euˬ ma. Kʼoeˇ gaˇ nuiˇ luꞈ-eu tsawˇ haˬ deuˬ-ahˇ yaˇ kʼaˬ daˇ-eu baoˬ biꞈ taˬ-euˬ meh. Yeˬsuˇ neh pah mehˬ-euˬ yaw tsaˬ yaw dawˇ gaˇ kawˆ hawˇ-eu Miˬyehˇ dawˬ kawˬ gaˇ kawˆ mehˬ-euˬ baˬ da neh bi sehꞈ-euˬ tsawˇ haˬ deuˬ-euˬ saꞈ laˇ deuˬ-ahˇ kʼawꞈ ya mawˇ-euˬ ma. Aˬ yawꞈ maꞈ-aˬ, jeˬ zaˬ yaw haiˬ kʼoeˇ mawˇ hawˇ-eu aˬ yawꞈ-euˬ tahˬ pahˬ aˬ ma mawˇ kawˇ-ahˇ uˬ duˬ maˬ tahˬ-ehˇ, aˬ yawꞈ maꞈ-euˬ naˇ kʼawˇ hawˇ-eu aˬ laꞈ-ahˇ aˬ yawꞈ-euˬ jmˬ maˬ diˬ taˬ-aˬ. Aˬ yawꞈ maꞈ gʼoꞈ dehꞈ laˇ-awˇ, Ka li nehˬ-ehˇ sahˬ paˬ geuꞈ-awˇ tiˬ heˇ kʼoꞈ uˆ lahˇ-euˬ meh.

Panmaeq 21:5

Kʼoeˇ naˇ, dzoeˬ dzaˬ nuiˇ mahˬ kʼoeˇ taˆ nuiˇ luꞈ-eu kʼoeˇ gʼaˬ ehˇ-eu, “Nymˬ-mˇ poˆ jawˇ-aˬ, yawˬ jeˬ na luꞈ ngaˬ neh yaw shuiꞈ jahˇ paˇ jiˇ-euˬ ma.” Aˬ yawꞈ ngaˬ-ahˇ paˇ ehˇ-eu, “Heu loꞈ-ehˇ boꞈ ahˇ taˬ-awˬ. Aˬ jeˬ miˇ neh ehˇ naˇ, dawˬ heu deuˬ tsaˬ dui dui-awˇ jah paˬ-ehˇ gʼeh dui dui-eu meh.”

Panmaeq 22:2

Lawˇ baˬ kʼoeˇ gawˆ-aˬ, meuˬ-euˬ laꞈ kʼoeˇ dahˇ-eu gaˇ jawˬ gʼahˇ ceh nyiˬ paˆ-ehˇ yoeˇ ka leꞈ-eu meh. Lawˇ baˬ-euˬ kʼoeˇ dzeˇ heu dzeˇ dehꞈ-eu saꞈ laˇ aˇ bawˇ bawˇ-awˇ, ba la tiˬ siˬ tiˬ poˆ aˇ siˬ siˬ-awˇ, tiˬ kʼoꞈ tseˇ nyiꞈ lehˆ siˬ-eu meh. Aˇ bawˇ kʼoeˇ bawˇ-euˬ aˇ paꞈ-aˬ, miˇ kʼahˬ tsawˇ jeuˬ deuˬ-ahˇ naˇ gawˇ bi taˬ leˇ-eu jaˆ gʼaˬ pyeuꞈ-eu meh.

Panmaeq 22:5

Kʼoeˇ gaˇ uˬ ciꞈ ciꞈ le-eu maˬ paˇ baw-ehˇ, tsiˇ kʼmˬ hawˇ-eu nahˇ ma yaw shehꞈ maˬ paˇ loˬ meh. Aˬ jeˬ miˇ neh ehˇ naˇ, Sahˬpaˬ Miˬyehˇ-aˬ, aˬ yawꞈ maꞈ-euˬ yaw shehꞈ pyeuꞈ-awˇ, aˬ yawꞈ maꞈ sahˬ paˬ geuꞈ-awˇ mˬ maˬ maˬ byaˆ zaˇ ziˇ ya uˆ lahˇ tehꞈ-a.

Panmaeq 3:21

Ngaˇ gʼaˬ leˇ-euˬ miˇ neh, ngaˬ Da-euˬ dzoeˬ dzaˬ nuiˇ mahˬ kʼoeˇ taˆ ngaˬ Da-euˬ gaˇ dzeˇ nuiˇ luꞈ-eu loꞈ-ehˇ, gʼaˬ leˇ-euˬ tsawˇ haˬ deuˬ-ahˇ, ngaˬ-euˬ dzoeˬ dzaˬ nuiˇ mahˬ kʼoeˇ taˆ ngaˬ-euˬ gaˇ dzeˇ bi nuiˇ ma.

Panmaeq 4:4

Dzoeˬ dzaˬ nuiˇ mahˬ kʼoeˇ-euˬ tiˬ jawˬ, dzoeˬ dzaˬ nuiˇ mahˬ nyiˬ tseˇ oeˬ mahˬ jaˆ-awˇ, mehˬ tsoeˬ yaw pyuˇ dm-awˇ shuiˇ uˬ kʼoˆ kʼoˆ luꞈ-eu aˬ yuiꞈ aˬ tsu nyiˬ tseˇ oeˬ gʼaˬ nuiˇ luꞈ-eu meh.

Panmaeq 7:4

Kʼoeˇ naˇ, naˇ kʼawˇ-ahˇ Miˬyehˇ-euˬ jmˬ diˬ taˬ-euˬ tsawˇ haˬ tiˬ seh oeˬ muiˇ oeˬ heˇ gʼaˬ byah-eu meh lehˇ ngaˬ-ahˇ ehˇ nehˬ laꞈ-euˬ meh. Aˬ yawꞈ maꞈ-aˬ, Iˇsaˬleˬlaˬ tsawˇ jeuˬ tseˇ nyiꞈ jeuˬ laꞈ kʼoeˇ ahˇ-eu tsawˇ haˬ deuˬ meh.