Maˬlaˬkiˇ 1:7 - Akha

⁷ Lawˇ duˬ kʼoeˇ taˆ maˬ muiˬ maˬ shawˇ-eu jeˬ lawˇ-eu laꞈ kʼoeˇ, naw maꞈ ngaˬ-ahˇ yehˬ bawˬ sehˇ lu-ehˇ gʼeh-euˬ meh. ‘Nga maꞈ maˬ muiˬ maˬ shawˇ-eu aˬ geu jeˬ lawˇ taˬ’ lehˇ naw maꞈ paˇ ehˇ nga siˬ. Naw maꞈ ngaˬ-euˬ lawˇ duˬ-ahˇ aˬ joˆ-ehˇ jahˇ-awˇ yehˬ bawˬ-ehˇ gʼeh-euˬ gaˇ kawˆ, naw maꞈ-ahˇ ngaˇ ehˇ nehˬ nyaˇ.

Maˬlaˬkiˇ 1:7 ပူးပေါင်းရင်းမြစ်များ

Yeˬsaˬgeˬlaˇ 41:22

daˇ kawˬ neh jahˇ taˬ-euˬ lawˇ duˬ-ahˇ duˇ leˇ-eu tiˬ hmˬ jaˆ-eu meh. Yaw goˇ paw smˬ caˆ byah-awˇ, yaw jeˇ paw nyiˬ caˆ byah-eu meh. Laꞈ coeˇ-ahˇ jahˇ tsoꞈ taˬ-euˬ aˬ kuiˇ hawˇ-eu dawˬ dah nuiˇ daˬ-aˬ, daˇ kawˬ pyeuꞈ-awˇ, byaˇ gʼaˇ yawˬ pyawˬ na luꞈ daˇ kawˬ neh jahˇ taˬ-euˬ meh. “Heu-aˬ, Sahˬpaˬ Miˬyehˇ-euˬ mehˬ shi jaˆ-eu hawˬ jeh meh” lehˇ, tsawˇ haˬ kʼoeˇ gʼaˬ ngaˬ-ahˇ ehˇ-eu meh.

Yeˬsaˬgeˬlaˇ 44:16

Aˬ yawꞈ maꞈ-ahˇ tehꞈ-ehˇ ngaˬ-euˬ Uˬ duˬ tahˬ nymˇ nymˇ ma laꞈ kʼoeˇ bi uˇ laˇ-awˇ, lawˇ duˬ-ahˇ lawˇ-eu shehˇ-eu gaˇ hawˇ-eu, uˬ duˬ tahˬ gaˇ sheuˬ gʼeh-eu gaˇ bi mˇ ma.

Uˬ duˬ 2:11

Dzaˬ la gʼo cehˇ lawˇ gaˇ taꞈ leˇ-eu lawˇ-eu jeˬ Sahˬpaˬ Miˬyehˇ-ahˇ naw maꞈ aˬ geu jeˬ lawˇ nehˬ-eu maˬ kaˬ, dehˬ tseˬ maˬ ya bi keuˬ-a. Aˬ jeˬ miˇ neh ehˇ naˇ, dehˬ tseˬ maˬ ehˇ, byaˬ byaˬ uiˇ maˬ ehˇ, miˬ dzaˬ-ahˇ puiˆ-awˇ Sahˬpaˬ Miˬyehˇ-ahˇ maˬ lawˇ nehˬ kʼmˬ-a.

Uˬ duˬ 21:6

Aˬ yawꞈ-aˬ, yaw muiˬ yaw shawˇ shawˇ-ehˇ ya dehꞈ-awˇ, ngaˬ-euˬ tsawˇ myahˇ-ahˇ yehˬ bawˬ sehˇ lu-ehˇ maˬ ya gʼeh-a. Aˬ yawꞈ-aˬ, ngaˬ-ahˇ dzaˬ dzaˬ dawˇ dawˇ lawˇ nehˬ-eu tsawˇ haˬ pyeuꞈ-eu baˬ da neh, ya bi muiˬ ya bi shawˇ meh.

Uˬ duˬ 21:8

Piˇ ma-aˬ, yaw muiˬ yaw shawˇ meh lehˇ tsawˇ haˬ dawˬ tawˆ luꞈ ya siˬ nya meh. Aˬ jeˬ miˇ neh ehˇ naˇ, aˬ yawꞈ-aˬ, ngaˬ-ahˇ dzaˬ dzaˬ dawˇ dawˇ lawˇ-eu tsawˇ haˬ pyeuꞈ-eu meh. Ngaˇ-aˬ, Sahˬpaˬ Miˬyehˇ ma. Ngaˇ-aˬ, muiˬ-eu shawˇ-eu gʼaˬ pyeuꞈ-awˇ, ngaˬ-euˬ tsawˇ haˬ deuˬ-ahˇ bi muiˬ bi shawˇ-eu ma.

Uˬ duˬ 3:11

Aˬ yuiꞈ geuꞈ-awˇ gaˇ mˇ luꞈ-eu piˇ ma gʼaˬ, heu deuˬ dawˬ tawˆ luꞈ-ahˇ lawˇ duˬ kʼoeˇ taˆ dzah puiˆ-awˇ, dzaˬ dzaˬ dawˇ dawˇ lawˇ-eu jeˬ Sahˬpaˬ Miˬyehˇ-ahˇ ya lawˇ meh.

Maˬlaˬkiˇ 1:12

Ehˇ kʼawꞈ, naw maꞈ ngaˬ-ahˇ yaw zeu maˬ baw-a. Ngaˬ-euˬ lawˇ duˬ gaˇ dahˇ maˬ tsoeˬ-a lehˇ naw maꞈ ehˇ-awˇ, naw maꞈ maˬ haw nahˇ-eu dzaˇ deuˬ lawˇ luꞈ-eu meh.

Maˬlaˬkiˇ 1:13

‘Gaˇ heu maˬ mˇ nahˇ-ehˇ pyeuꞈ laˇ taˬ nyaˬ’ lehˇ naw maꞈ ehˇ-awˇ, ngaˬ-ahˇ naˇ mehˇ mˇ juꞈ haw-eu meh. Kʼoeˬ-euˬ jeˬ zaˬ, kuiˇ kuˆ laꞈ kuˆ kuˆ-eu jeˬ zaˬ hawˇ-eu, naˇ gawˇ ahˇ-eu jeˬ zaˬ deuˬ tsahˇ-awˇ, naw maꞈ ngaˬ-ahˇ lawˇ nehˬ laˇ-euˬ meh. Kʼoeˇ loꞈ-ehˇ gʼeh-eu lawˇ-eu shehˇ-eu jeˬ-ahˇ ngaˇ ha geuꞈ tehꞈ-a lehˇ naw maꞈ noeˬ te loˇ.

Maˬlaˬkiˇ 1:8

Myaˆ behꞈ behꞈ-eu jeˬ zaˬ, naˇ gawˇ ahˇ-eu jeˬ zaˬ, kuiˇ kuˆ laꞈ kuˆ kuˆ-eu jeˬ zaˬ heu deuˬ naw maꞈ ngaˬ-ahˇ lawˇ nehˬ laˇ ngeh, tiˬ jeˬ-iˬ maˬ bahˬ-aˇ lehˇ noeˬ te loˇ. Miˇ kʼahˬ-ahˇ uˆ lahˇ-eu sahˬ paˬ sahˬ ma deuˬ-ahˇ kʼoeˇ loꞈ-ehˇ gʼeh-eu jeˬ zaˬ biꞈ leˇ haw sheˇ. Aˬ yawꞈ maꞈ nui kʼahˇ shiˇ-awˇ laˬ kʼaˬ tiˬ cehˇ ha geuꞈ nehˬ laꞈ tehꞈ-a loˇ.”

1 Gawˇliˬtu 10:21

Sahˬpaˬ Yeˬsuˇ-euˬ kʼmˬ maˬ hawˇ-eu nehꞈ-euˬ kʼmˬ maˬ heu nyiˬ jeˬ luꞈ-ahˇ naw maꞈ maˬ dawˇ nya-a. Sahˬpaˬ Yeˬsuˇ-euˬ hawˬ jeh hawˇ-eu nehꞈ-euˬ hawˬ jeh heu nyiˬ jeˬ luꞈ-ahˇ naw maꞈ maˬ dzaˬ nya-a.

Dawˬmehˬ 15:21

Ehˇ kʼawꞈ, kuiˇ kuˆ laꞈ kuˆ kuˆ-eu maˬ ehˇ, myaˆ behꞈ behꞈ-euˬ maˬ ehˇ, maˇ byawꞈ maˇ naˇ baw-eu maˬ ehˇ, jeˬ zaˬ kʼoeˇ deuˬ laꞈ kʼoeˇ pyeuꞈ doˆ laˇ naˇ, nawˬ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ, jeˬ zaˬ kʼoeˇ deuˬ nawˇ maˬ lawˇ nehˬ kʼmˬ-a.