Maˬkuˆ 6:11 - Akha

¹¹ Naw maꞈ-ahˇ maˬ ha geuꞈ-ehˇ, naw maꞈ mehˬ gaˇ maˬ naˇ haˬ mawꞈ-eu jawˇ duˬ-ahˇ naw maꞈ iˇ zaˬ naˇ, naw maꞈ doˆ-iˇ ngeh, aˬ kuiˇ pehˬ zaˬ-ahˇ lehꞈ-eu kʼaˬ lehˇ sawˆ kʼaˇ nehˬ yaꞈ-awˬ. Kʼoeˇ-aˬ, aˬ yawꞈ maꞈ-euˬ yaw lehˬ siˬ leˇ ni mˇ-eu saˇ kiˇ meh.”

Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

¹¹ Aqgeugar jawr-eu tsawrhaq maqaer, nawmaf-anr maqha-aer, nawmaf-euq dawq maq narhaq nar-aq, nawmaf khoergar nae dov-ir ngae, aqyawf maf-euq yawlaeq bi dovlar-eu sarkir pyeufni, nawmaf-euq aqkuir paeqzaq-euq uqmov-euq khaqlaer byuqkhar yaf-awq. Ngar, nawmaf-anr aqdirma-aer aernaeq nyar, yarkhaqdar ngae nan, meuq khoermeuq-aq, Sordoq hawr-eu Gormorlav navmaqtser yadaq taef-a.”

Maˬkuˆ 6:11 ပူးပေါင်းရင်းမြစ်များ

Neˬhaˬmiˇ 5:13

Kʼoeˇ naˇ, ngaˬ-euˬ joꞈ-ahˇ paꞈ luꞈ-eu pawˬ behˆ ngaˇ lehˆ doˆ-awˇ, aˬ yawꞈ maꞈ mehˬ shi byuˬ kʼaˇ mehˬ nehˬ-awˇ heu loꞈ-ehˇ ehˇ nehˬ-euˬ ma. “Yawˬ ha neh saˇ jaˇ dzaˬ taˬ-euˬ loꞈ-ehˇ maˬ mˇ-eu tsawˇ haˬ-ahˇ Miˬyehˇ heu loꞈ-ehˇ byuˬ kʼaˇ nehˬ tehꞈ-a. Naw maꞈ-euˬ nymˇ deuˬ hawˇ-eu naw maꞈ kʼaˇ jaˆ-eu yawˬ jeˬ na luꞈ-ahˇ Miˬyehˇ yuˇ kʼoꞈ jiˇ-awˇ, tiˬ jeˬ-iˬ maˬ jaˆ ni bi jawˇ nehˬ laꞈ tehꞈ-a.” Kʼoeˇ ngeh, kʼoeˇ gaˇ kʼaˇ uiˬ laˇ-euˬ yawˬ gʼaˬ na luꞈ, “Aˬmiˬ” lehˇ ehˇ-awˇ, Sahˬpaˬ miˬyehˇ-euˬ guiˬ lahˬ-ahˇ ja ceuˬ-euˬ meh. Aˬ yuiꞈ aˬ tsu deuˬ kʼawꞈ yawˬ ha neh saˇ jaˇ kʼaˇ dzaˬ taˬ-euˬ loꞈ-ehˇ mˇ-euˬ meh.

Maꞈtehˬ 12:36

“Ngaˇ naw maꞈ-ahˇ ehˇ nehˬ nyaˇ. Yaˇ kʼaˬ daˇ-eu Aˇ nah keuˆ le ngeh, tsawˇ haˬ yawˬ gʼaˬ na luꞈ, yawˬ ha neh kʼaˇ ngehˬ dzeuˇ-euˬ gaˇ dahˇ maˬ tsoeˬ-eu dawˬ yawˬ dawˬ na luꞈ paˇ ya dzawˇ poˆ tehꞈ-a.

Maˬkuˆ 6:10

Aˬ yawꞈ maꞈ-ahˇ aˬ yawꞈ ehˇ nehˬ-eu, “Naw maꞈ nymˇ tiˬ nymˇ-ahˇ nymˇ daˆ daˆ leˇ shaw naˇ, jawˇ duˬ kʼoeˇ tsahˇ-ahˇ kʼaˇ jawˇ kʼoeˇ keuˆ ni, nymˇ daˆ taˬ daˆ paˇ.

Luˇkaꞈ 9:5

Naw maꞈ-ahˇ maˬ kʼaˇ ha geuꞈ nehˬ laꞈ-eu meuˬ deuˬ-ahˇ neh naw maꞈ doˆ-iˇ ngeh, aˬ kuiˇ pehˬ zaˬ-ahˇ lehꞈ-eu kʼaˬ lehˇ sawˆ kʼaˇ nehˬ yaꞈ-awˬ. Kʼoeˇ-aˬ, aˬ yawꞈ maꞈ-euˬ yaw lehˬ siˬ leˇ ni mˇ-eu saˇ kiˇ meh.”

Gʼaˬkʼehˇ 18:6

Aˬ yawꞈ maꞈ aˬ yawꞈ mehˬ gaˇ maˬ naˇ haˬ ni aˬ yawꞈ-ahˇ yaw doeˇ ehˇ ngeh, aˬ yawꞈ pehˇ kʼahˬ byuˬ kʼaˇ-awˇ ehˇ nehˬ-eu, “Naw maꞈ dehꞈ-eu jeˬ-ahˇ smˬ naˇ, naw maꞈ-euˬ iˬ baˇ meh. Ngaˬ-ahˇ tiˬ jeˬ-iˬ maˬ taꞈ. Iˬ nah taꞈ naˇ, aˬ cawˬ tsawˇ jeuˬ-ahˇ ngaˇ mehˬ-iˇ ma.”

Lormav 2:16

Kʼoeˇ miˇ neh, ngaˇ mehˬ luꞈ-eu Laˬ kʼaˬ cehˇ-eu Guiˬ lahˬ dawˬ heu ehˇ mawꞈ-eu-aˬ, tsawˇ haˬ zaˬ-euˬ nui ma laꞈ kʼoeˇ zaꞈ taˬ-euˬ nui noeˬ kʼoeˇ-ahˇ, Yeˬsuˇ Ka li-ahˇ gʼoe-awˇ Miˬyehˇ yaˇ kʼaˬ daˇ ngeh Nah, kʼoeˇ loꞈ-ehˇ daˇ tehꞈ-a.

Lormav 2:5

Ehˇ kʼawꞈ, nawˇ nui ma gʼahˇ dui dui-awˇ, naˬ bawˇ tuˇ-eu miˇ neh, Miˬyehˇ nui ma pehˇ-eu jeˬ hawˇ-eu dawˇ coe ni yaˇ kʼaˬ daˇ-eu jeˬ pah mehˬ le ngeh Nah, kʼoeˇ naˆ maˬ tseˇ gʼeh-eu kʼehˬ-eu kʼaˆ-eu jeˬ nawˬ-euˬ kʼoeˇ taˆ keuˆ le ni yawˬ haˇ yawˬ ha mˇ luꞈ gaˇ duˇ-eu meh.

2 Beˬtuˆluˆ 2:6

Sawˇdoˬ meuˬ hawˇ-eu Gawˇmawˇlaˆ meuˬ-ahˇ kʼawꞈ, miˬ dzaˬ bi puiˆ byoˆ-euˬ meh. Kʼoeˇ-aˬ, Miˬyehˇ-ahˇ yaw zeu maˬ baw-eu tsawˇ haˬ deuˬ kʼoeˇ taˆ aˬ joˆ-ehˇ keuˆ le-eu gaˇ kʼawˆ, aˬ yawꞈ maꞈ bi dzaw geuꞈ-eu gʼaˇ duˬ mˇ mehˬ-euˬ jeˬ pyeuꞈ-eu meh.

2 Beˬtuˆluˆ 2:9

Kʼoeˇ miˇ neh, Yaˇ kʼaˬ daˇ-eu Aˇ nah gʼaˇ duˬ, Miˬyehˇ-ahˇ yaw zeu baw-eu tsawˇ haˬ deuˬ-ahˇ aˬ joˆ-ehˇ bi buˬ-iˇ-eu gaˇ kawˆ hawˇ-eu, haiˬ-eu tsawˇ haˬ deuˬ-ahˇ aˬ joˆ-ehˇ ya kʼehˬ ya kʼaˆ nehˬ-eu gaˇ kawˆ, Miˬyehˇ siˬ nya meh.

2 Beˬtuˆluˆ 3:7

Ehˇ kʼawꞈ, nymˬ-mˇ jaˆ luꞈ-eu mˬ hawˇ-eu miˇ heu deuˬ kʼawꞈ, Miˬyehˇ-euˬ dawˬ aˬ yawꞈ tiˬ dawˬ neh maˬ bi cawˆ-iˇ ni jeˬ hmˬ daˆ laꞈ-euˬ jeˬ pyeuꞈ-eu meh. Kʼoeˇ-aˬ, miˬ dzaˬ neh paˇ bi laˆ cawˆ-eu gʼaˇ duˬ jeˬ hmˬ daˆ laꞈ-euˬ jeˬ pyeuꞈ-eu meh. Miˬyehˇ-ahˇ yaw zeu maˬ baw-eu tsawˇ haˬ deuˬ-ahˇ yaˇ kʼaˬ daˇ nehˬ-awˇ laˆ luˬ laˆ seˇ nehˬ-eu aˇ nah kʼoeˇ nah gʼaˇ duˬ jeˬ hmˬ daˆ laꞈ-euˬ jeˬ pyeuꞈ-eu meh.

1 Yoˇhaˬ 4:17

Yaˇ kʼaˬ daˇ-eu aˇ nah-ahˇ aˬ dui nui ma ziꞈ dah ni jaˆ ni, aˬ dui laꞈ kʼoeˇ gʼoeˇ-eu gaˬ-eu jeˬ bi byah laˇ-euˬ meh. Aˬ dui nui ma ziꞈ dah ni jaˆ ma. Aˬ jeˬ miˇ neh ehˇ naˇ, aˬ dui miˇ tsaˬ kʼoeˇ taˆ dehꞈ-eu heu-aˬ, Ka li aˬ yawꞈ miˇ tsaˬ kʼoeˇ taˆ dehꞈ yaꞈ-euˬ loꞈ-ehˇ tiˬ kawˆ ma.

Yuˇdaˆ 1:7

Sawˇdoˬ meuˬ, Gawˇmawˇlaˆ meuˬ hawˇ-eu dawˬ peh jaˆ-eu meuˬ kʼoeˇ deuˬ-euˬ gaˇ kawˆ shaˇ noeˬ haw sheˇ. Kʼoeˇ gaˇ jawˇ-euˬ tsawˇ haˬ kʼoeˇ deuˬ mˬ taˆ gʼaˬ kʼehˇ kʼoeˇ deuˬ loꞈ-ehˇ dehꞈ-awˇ, maˬ tsaˬ maˬ dawˇ-eu laꞈ kʼoeˇ kʼaˬ miˬ sheu-eu jeˬ hawˇ-eu bahˬ dui jawꞈ dui dui-eu jeˬ mˇ-euˬ meh. Tsawˇ haˬ zaˬ dawˬ tawˆ luꞈ-ahˇ bi siˬ leˇ-eu gʼaˇ duˬ, mˬ maˬ maˬ byaˆ zaˇ ziˇ miˬ dzaˬ neh aˬ yawꞈ maꞈ-ahˇ kʼehˬ nehˬ kʼaˆ nehˬ-euˬ meh.