Lormav 14:22 - Akha

²² Gaˇ kawˆ heu-ahˇ taꞈ leˇ-awˇ, yawˬ ha neh kʼaˇ jah duˬ taˬ-euˬ jeˬ yawˬ ha hawˇ-eu Miˬyehˇ yaw kaˬ-ahˇ jaˆ-eu meh. Yawˬ ha neh tsaˬ ma lehˇ noeˬ-euˬ jeˬ kʼaˬ duˬ ni mˇ-eu tsawˇ haˬ-aˬ, laˬ kʼaˬ cehˇ-eu jeˬ oꞈ-eu meh.

Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

²² Nawr nuijan anr-eu le laq? Nuijan khoer Miqyaer hawr-eu yawqha-euq yawkaq bijav-awq. Yawqha nae tsaq nga laer noeq-awr mr-awr shar-euq jeq-euq baqda’nae, yawqhar yawqha iqbax taq-eu jeq maqjav nar-aq, guiqlanqhuiq taef-a.

Lormav 14:22 ပူးပေါင်းရင်းမြစ်များ

Gʼaˬkʼehˇ 24:16

Miˬyehˇ mehˬ shi maˬ ehˇ, tsawˇ haˬ zaˬ mehˬ shi maˬ ehˇ, ngaˬ-euˬ nui ma aˬ myah luꞈ shawˇ jehˆ ni jaˆ ni leh jeh luꞈ-eu ma.

Lormav 14:14

Ngaˇ Sahˬpaˬ Yeˬsuˇ nehˬ-ehˇ taꞈ-eu laꞈ kʼoeˇ dzaˬ-eu dawˇ-eu jeˬ-aˬ, maˬ muiˬ maˬ shawˇ-eu tiˬ jeˬ-iˬ maˬ jaˆ-aˇ lehˇ jah duˬ taˬ-euˬ ma. Ehˇ kʼawꞈ, tsawˇ haˬ tiˬ gʼaˬ na, dzaˬ dzaˬ dawˇ dawˇ tiˬ jeˬ na maˬ shawˇ-a lehˇ jah-eu ngeuˇ naˇ, dzaˬ dzaˬ dawˇ dawˇ kʼoeˇ aˬ yawꞈ gʼaˇ duˬ maˬ shawˇ-eu jeˬ pyeuꞈ laˇ-euˬ meh.

Lormav 14:2

Jah-eu tsawˇ haˬ tiˬ gʼaˬ na yawˬ jeˬ na luꞈ dzaˬ nya ma lehˇ noeˬ-eu meh. Ehˇ kʼawꞈ, jah-eu gʼaˬ baˬ-eu tsawˇ haˬ-aˬ, shaˬ jiˇ maˬ dzaˬ ni gʼawˬ paꞈ gʼawˬ nyoeˇ tehꞈ-ehˇ dzaˬ-eu meh.

Lormav 14:23

Ehˇ kʼawꞈ, yawˬ ha dzaˬ-eu jeˬ-ahˇ yawˬ ha-euˬ nui ma laꞈ kʼoeˇ maˬ shaw naˇ, jah-eu laꞈ kʼoeˇ mˇ-eu maˬ ngeuˇ-eu miˇ neh Miˬyehˇ yaˇ kʼaˬ daˇ gaˇ ya daˬ tehꞈ-a. Maˬ jah-eu laꞈ kʼoeˇ kʼaˇ mˇ-euˬ yawˬ jeˬ na luꞈ iˬ baˇ meh.

Lormav 14:5

Tsawˇ haˬ tiˬ gʼaˬ na, aˇ nah nui deuˬ naˆ maˬ tseˇ huiˬ-eu aˇ nah jaˆ meh lehˇ noeˬ-awˇ, tiˬ gʼaˬ na, aˇ nah dawˬ tawˆ luꞈ tiˬ kawˆ meh lehˇ noeˬ-eu meh. Aˬ geu gʼaˬ maˬ kaˬ, yawˬ ha neh tsaˬ ma lehˇ noeˬ-euˬ jeˬ-ahˇ ziꞈ dah ni tuˆ tehˬ-eu tsaˬ meh.

Lormav 2:1

Cawˬ deuˬ-oˇ, naw maꞈ aˬ cawˬ-ahˇ yaw lehˬ poˆ te loˇ. Nawˇ aˬ joˆ-ehˇ gʼeh-eu tsawˇ haˬ ma lehˇ yawˬ haˇ yawˬ ha noeˬ kʼawꞈ, yaw lehˬ maˬ ahˇ-eu tsawˇ haˬ maˬ ngeuˇ-a. Yawˬ ha aˬ cawˬ kʼaˇ dehꞈ-eu loꞈ-ehˇ dehꞈ-awˇ, aˬ cawˬ-ahˇ yaw lehˬ poˆ te lehˇ ngeuˇ naˇ, yawˬ haˇ yawˬ ha yaw lehˬ poˆ gaˇ duˇ-eu tehꞈ meh.

Lormav 7:15

Ngaˇ mˇ luꞈ-eu jeˬ-ahˇ ngaˇ maˬ siˬ nya nya. Aˬ jeˬ miˇ neh ehˇ naˇ, yawˬ ha mˇ mawꞈ-eu jeˬ-ahˇ maˬ mˇ ni, yawˬ ha maˬ mˇ nahˇ-eu jeˬ-ahˇ mˇ-eu nya.

Lormav 7:24

Ngaˬ-ahˇ shaˬ zahˬ naꞈ dui dui nya. Ngaˬ-ahˇ shiˇ gaˇ sheuˬ gʼeh luꞈ-eu ngaˬ-euˬ gʼawˇ mawˇ heu mawˇ laꞈ kʼoeˇ ngaˬ-ahˇ ka kʼoꞈ nehˬ laꞈ-eu aˬ suˇ gʼaˬ jawˇ ta. Miˬyehˇ jawˇ meh.

1 Gawˇliˬtu 8:7

Ehˇ kʼawꞈ, yawˬ gʼaˬ na luꞈ kʼoeˇ loꞈ-ehˇ siˬ nya-eu zaˬ siˬ tsawˇ gahˇ ahˇ-eu maˬ ngeuˇ-a. Tsawˇ haˬ tiˬ paˆ na deuˬ-aˬ, tahˬ pahˬ aˬ ma mawˇ kawˇ-ahˇ jah sheuˆ taˬ-euˬ miˇ neh, kʼoeˇ loꞈ-ehˇ gʼeh-eu lawˇ dzaˇ-ahˇ dzaˬ ngeh, tahˬ pahˬ aˬ ma mawˇ kawˇ-euˬ dzaˇ meh lehˇ noeˬ luꞈ-eu meh. Aˬ yawꞈ maꞈ-euˬ siˬ nya-eu nui ma gʼaˬ baˬ-eu miˇ neh, dzaˇ kʼoeˇ tsawˇ haˬ-ahˇ laˆ jawꞈ-eu meh lehˇ noeˬ-eu meh.

2 Gawˇliˬtu 1:12

Miˇ tsaˬ heu kʼoeˇ taˆ nga maꞈ yaw dehꞈ dehꞈ luꞈ-eu heu hawˇ-eu, kʼaˆ kʼaˆ ni naw maꞈ nehˬ-ehˇ cawˬ ya cawˬ taꞈ luꞈ-eu heu-aˬ, Miˬyehˇ neh biꞈ leꞈ-euˬ myaˆ pyawˬ bya cehˆ ni taˬ nya-eu jeˬ hawˇ-eu, nui ma dawˇ coe ni gʼeh-eu jeˬ laꞈ kʼoeˇ ya dehꞈ luꞈ-eu baˬ da neh maˬ ehˇ, tsawˇ haˬ zaˬ-euˬ zaˬ siˬ tsawˇ gahˇ-ahˇ maˬ gʼoe-ehˇ Miˬyehˇ-euˬ guiˬ lahˬ yaw dzahˇ-euˬ baoˬ-ahˇ gʼoe-awˇ ya dehꞈ luꞈ-eu baˬ da neh maˬ ehˇ, nga maꞈ kʼahˬ sehˇ jehˆ kʼaˇ za-eu ma.

Gaˬlaˬtiˆ 6:1

Aˬ yuiꞈ aˬ nyiˇ Ka li zaˬ deuˬ-oˇ, tsawˇ haˬ tiˬ gʼaˬ na mˇ lehˬ naˇ, naw maꞈ laꞈ kʼoeˇ guiˬ lahˬ saꞈ laˇ paw gʼaˬ kʼaˆ-eu deuˬ aˬ yawꞈ-ahˇ ciˬ tuˇ nehˬ-eu tsaˬ meh. Ehˇ kʼawꞈ, nui nahˬ nui yu ahˇ-eu laꞈ kʼoeˇ ciˬ tuˇ nehˬ-awˬ. Yawˬ ha kʼawꞈ, muˇ juˇ juˇ-eu mehˬ nah maˬ ya caw teh gʼeh ni yahˇ-awˬ.

Yaˬkoˆ 3:13

Naw maꞈ laꞈ kʼoeˇ, tsawˇ gahˇ ahˇ-awˇ siˬ-eu nya-eu tsawˇ haˬ jawˇ te loˇ. Muiˬ-eu dehꞈ-eu jawˇ-eu jeˬ laꞈ kʼoeˇ maˬ ehˇ, nui nahˬ nui yu hawˇ-eu nui gahˇ neh mˇ doˆ shaˇ doˆ laꞈ-eu muiˬ-eu gaˇ deuˬ laꞈ kʼoeˇ maˬ ehˇ, zaˬ siˬ tsawˇ gahˇ kʼoeˇ bi doˆ laˇ-awˬ.

1 Yoˇhaˬ 3:21

Kʼoeˇ miˇ neh ngaˇ gaˬ dui dui-eu cawˬ deuˬ-oˇ, aˬ dui-euˬ nui ma aˬ dui-ahˇ iˬ baˇ taˬ kʼaˇ maˬ za naˇ, Miˬyehˇ mehˬ shi aˬ dui nui ma ziꞈ dah ni jaˆ-eu ma.