Lormav 14:18 - Akha

¹⁸ Ka li gʼaˇ duˬ kʼoeˇ loꞈ-ehˇ mˇ-eu tsawˇ haˬ-ahˇ Miˬyehˇ nui ma tsaˬ-awˇ, tsawˇ haˬ zaˬ kʼawꞈ nui kʼahˇ shiˇ-eu meh.

Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

¹⁸ Kali-euq gharduq mr-eu tsawrhaq-anr Miqyaer nuikhanr shir-awr, tsawrhaqzaq khawf nuima tsaq taef-a.

Lormav 14:18 ပူးပေါင်းရင်းမြစ်များ

Aˇ dahˬ 4:7

Nawˇ dawˇ coe ni mˇ law nmˇ-aˬ, laˬ kʼaˬ ya cehˇ tehꞈ-a. Ehˇ kʼawꞈ, nawˇ yaw tsaˬ yaw dawˇ dawˇ-ehˇ maˬ mˇ-euˬ miˇ neh, nawˬ-euˬ nymˇ gʼoˆ kʼehˬ-ahˇ iˬ baˇ keuˆ le luꞈ meh. Iˬ baˇ kʼoeˇ nawˬ-ahˇ uˆ lahˇ mawꞈ-eu meh. Iˬ baˇ-ahˇ gʼaˬ leˇ ni nawˇ leh jeh-awˬ.”

Dawˬ tsoˆ 9:7

Tsawˬ tuˇ-awˇ, nawˬ-euˬ dzaˇ nui kʼahˇ tiˬ shiˇ dzaˬ-awˇ, nawˬ-euˬ aˬ gaꞈ dzaˇ uiˇ tiˬ dehˆ dawˇ-eu laꞈ kʼoeˇ, laˬ kʼaˬ cehˇ taˆ ni dehꞈ-awˬ. Miˬyehˇ-ahˇ tiˬ jeˬ-iˬ maˬ bahˬ-aˇ.

Maˬkuˆ 13:34

Gaˇ kawˆ kʼoeˇ-aˬ, tsawˇ haˬ tiˬ gʼaˬ aˬ yawꞈ-euˬ zaˬ kʼaˆ deuˬ-ahˇ gaˇ biˇ nehˬ yaꞈ-awˇ gaˇ ma doˆ-iˇ gaˇ duˇ tehꞈ-a. Zaˬ kʼaˆ aˬ yawꞈ gʼaˬ yawꞈ-ahˇ gaˇ biꞈ yaꞈ-awˇ, laˇ gʼoˆ-ahˇ loꞈ-eu gʼaˬ-ahˇ yaw beuˇ beuˇ-ehˇ loꞈ-eu gʼaˇ duˬ mehˬ nehˬ yaꞈ-awˇ doˆ-iˇ-euˬ meh.

Yoˇhaˬ 12:26

Ngaˬ-euˬ gaˇ mˇ mawꞈ-eu tsawˇ haˬ aˬ geuˬ gʼaˬ maˬ kaˬ, ngaˬ-euˬ mehˬ nah ya caw teh laˇ meh. Aˬ jeˬ miˇ neh ehˇ naˇ, ngaˬ-euˬ zaˬ kʼaˆ-aˬ, ngaˇ kʼaˇ jawˇ gaˇ ya jawˇ tehꞈ-a. Ngaˬ-euˬ gaˇ kʼaˇ mˇ-eu tsawˇ haˬ-ahˇ ngaˬ Da taˬ huiˬ taˬ mahˇ nehˬ tehꞈ-a.”

Gʼaˬkʼehˇ 10:35

Aˬ geu jeˬ tsawˇ jeuˬ pyeuꞈ-eu maˬ kaˬ, aˬ yawꞈ-ahˇ guˆ-awˇ yaw tsaˬ yaw dawˇ jeˬ mˇ-eu tsawˇ haˬ-ahˇ aˬ yawꞈ nui ma tsaˬ-eu meh.

Lormav 12:11

Yaw doeˇ maˬ doeˇ ni mˇ dui dui-awˬ. Nui ma keuˆ dui dui-eu laꞈ kʼoeˇ Miˬyehˇ gaˇ mˇ-awˬ.

Lormav 14:4

Aˬ cawˬ-euˬ zaˬ kʼaˆ-ahˇ yaw lehˬ poˆ paˬ-ehˇ nawˇ aˬ suˇ gʼaˬ te. Aˬ yawꞈ tsaˬ-eu lehˬ-eu gaˇ kawˆ, aˬ yawꞈ-euˬ baw leˬ gʼaˬ ngehˬ tehꞈ-a. Aˬ yawꞈ-aˬ tsaˬ-eu tsawˇ haˬ pyeuꞈ tehꞈ-a. Aˬ jeˬ miˇ neh ehˇ naˇ, aˬ yawꞈ tsaˬ ni Sahˬpaˬ Miˬyehˇ jahˇ nya-eu meh.

Lormav 16:18

Aˬ jeˬ miˇ neh ehˇ naˇ, kʼoeˇ loꞈ-ehˇ mˇ-eu tsawˇ haˬ deuˬ-aˬ, aˬ dui-euˬ Sahˬpaˬ Yeˬsuˇ Ka li-euˬ gaˇ mˇ-eu maˬ ngeuˇ-a. Yawˬ ha-euˬ uˬ maˆ gʼaˇ duˬ shaˇ noeˬ-awˇ mehˇ shuiˇ shuiˇ-eu laꞈ kʼoeˇ iˬ baˇ maˬ ahˇ-eu tsawˇ haˬ deuˬ-ahˇ sheuˬ bahˬ-eu meh.

Lormav 6:22

Ehˇ kʼawꞈ, nymˬ-mˇ naw maꞈ-ahˇ iˬ baˇ laꞈ kʼoeˇ bi buˬ-iˇ-awˇ, Miˬyehˇ-euˬ zaˬ kʼaˆ bi pyeuꞈ laˇ-euˬ meh. Heu poˆ jawˇ naw maꞈ aˬ jeˬ za ta. Naw maꞈ-euˬ nui ma gʼawˇ mawˇ dawˬ tawˆ luꞈ aˬ yawꞈ-ahˇ a nehˬ gʼaˬ-euˬ miˇ neh mˬ maˬ maˬ byaˆ zaˇ ziˇ dehꞈ-eu jeˬ-ahˇ za-eu meh.

1 Gawˇliˬtu 7:22

Aˬ jeˬ miˇ neh ehˇ naˇ, Sahˬpaˬ Miˬyehˇ neh kuˇ-euˬ zaˬ kʼaˆ tiˬ gʼaˬ-aˬ, Sahˬpaˬ Miˬyehˇ-euˬ buˬ-iˇ-euˬ tsawˇ haˬ pyeuꞈ-eu meh. Kʼoeˇ loꞈ-ehˇ duˇ ni, Ka li neh bi kuˇ-euˬ buˬ-iˇ-euˬ tsawˇ haˬ tiˬ gʼaˬ-aˬ, Ka liˬ-euˬ zaˬ kʼaˆ pyeuꞈ-eu meh.

2 Gawˇliˬtu 4:2

Shaꞈ dawˇ paˬ-ehˇ gʼeh-eu zaꞈ taˬ-euˬ jeˬ-ahˇ nga maꞈ tiˬ jawˇ-iˬ maˬ mˇ. Mehˇ shuiˇ shuiˇ-eu jeˬ hawˇ-eu Miˬyehˇ dawˬ kawˬ-ahˇ yuˇ pyawˆ-eu jeˬ nga maꞈ maˬ jahˇ. Yaw tsaˬ yaw dawˇ jeˬ-ahˇ bya cehˆ ni mehˬ-awˇ , nga maꞈ-ahˇ aˬ cawˬ jah coeˇ ni Miˬyehˇ-euˬ mehˬ shi dehꞈ luꞈ-eu ma.

2 Gawˇliˬtu 5:11

Nga maꞈ Sahˬpaˬ Miˬyehˇ-ahˇ yaw zeu baw-awˇ guˆ-eu siˬ nya-eu miˇ neh, tsawˇ haˬ yawˬ gʼaˬ na luꞈ aˬ yawꞈ jawˇ paw pyawˇ laˇ ni gʼaˬ biꞈ luꞈ-eu ma. Nga maꞈ aˬ joˆ-ehˇ gʼeh-eu tsawˇ haˬ pyeuꞈ-eu gaˇ kawˆ Miˬyehˇ siˬ duˬ meh. Naw maꞈ-euˬ nui ma laꞈ kʼoeˇ kʼawꞈ, ngaˬ-ahˇ siˬ nya luꞈ meh lehˇ ngaˇ noeˬ tmˬ-eu ma.

2 Gawˇliˬtu 5:9

Ehˇ kʼawꞈ, nymˇ heu nymˇ-ahˇ ya jawˇ-eu maˬ kaˬ, kʼoeˇ nymˇ-ahˇ ya jawˇ leˇ-eu maˬ kaˬ, nui jeˬ-ahˇ naˆ maˬ tseˇ Sahˬpaˬ Yeˬsuˇ nui kʼahˇ shiˇ-eu jeˬ-ahˇ dawˬ pehˬ taˬ-eu ma.

2 Gawˇliˬtu 6:4

Ehˇ kʼawꞈ, kʼaˇ mˇ kʼaˇ shaˇ-eu yawˬ jeˬ na luꞈ laꞈ kʼoeˇ nga maꞈ Miˬyehˇ-euˬ zaˬ kʼaˆ pyeuꞈ-eu gaˇ kawˆ aˬ cawˬ-ahˇ mawˇ leˇ ni, shaˬ-eu zahˬ-eu jeˬ, noeˬ dui noeˬ duiˇ-eu jeˬ, nui ma shaˬ zahˬ naꞈ-eu jeˬ, heu deuˬ-ahˇ oˇ oˇ-ehˇ daˬ dui dui luꞈ ma.

2 Gawˇliˬtu 8:21

Sahˬpaˬ Miˬyehˇ mehˬ shi tehꞈ-ehˇ maˬ ngeuˇ ni, tsawˇ haˬ zaˬ-euˬ mehˬ shi kʼawꞈ dawˇ coe ni mˇ-eu gʼaˇ duˬ nga maꞈ noeˬ tsehˆ taˬ-euˬ ma.

Piˇliˇpiˆ 4:18

Naw maꞈ neh kʼaˇ biꞈ laꞈ-euˬ yawˬ jeˬ na luꞈ gʼaˇ duˬ, guiˬ lahˬ huiˬ-eu dawˬ tsaꞈ ahˇ laꞈ-eu ma. Ngaˇ loˬ-eu myaˆ maˬ tseˇ naw maꞈ ngaˬ-ahˇ biꞈ laˬ-euˬ meh. Naw maꞈ neh biꞈ laꞈ-euˬ laꞈ sawˬ deuˬ-ahˇ Iˇbaˬpawˬdiˇ neh hehˇ keuˆ nehˬ leꞈ-euˬ miˇ neh, ngaˇ kʼaˇ loˬ-eu jeˬ nymˬ-mˇ byah miˇ-a. Laꞈ sawˬ heu deuˬ-aˬ, Miˬyehˇ nui kʼahˇ shiˇ-awˇ ha geuꞈ-euˬ saw dui dui-eu lawˇ-eu jeˬ pyeuꞈ-eu meh.

Piˇliˇpiˆ 4:8

Aˬ yuiꞈ aˬ nyiˇ Ka li zaˬ deuˬ-oˇ, aˇ saˬ saˬ-eu dawˬ heu loꞈ-ehˇ ehˇ-eu ma. Yaw muiˬ jeˬ hawˇ-eu ja ceuˬ paˬ-ehˇ gʼeh-eu jeˬ pyeuꞈ-eu, tsaˬ-eu dawˇ-eu jeˬ, aˬ cawˬ yaw zeu baw paˬ-ehˇ gʼeh-eu jeˬ, aˬ cawˬ-ahˇ dehꞈ tsaˬ dehꞈ tsahˇ-eu jeˬ, muiˬ-eu shawˇ-eu jeˬ, aˬ cawˬ haw gaˬ paˬ-ehˇ gʼeh-eu jeˬ, aˬ cawˬ taˬ huiˬ taˬ mahˇ paˬ-ehˇ gʼeh-eu jeˬ, heu deuˬ naw maꞈ laꞈ kʼoeˇ bi ahˇ-awˬ.

Gawˇlawˇsehˇ 3:24

Sahˬpaˬ Yeˬsuˇ neh aˬ yawꞈ-euˬ tsawˇ haˬ deuˬ gʼaˇ duˬ lehˬ hmˬ taˬ-euˬ laꞈ sawˬ-ahˇ naw maꞈ za tehꞈ-a lehˇ nui ma laꞈ kʼoeˇ noeˬ taˬ-awˬ. Aˬ jeˬ miˇ neh ehˇ naˇ, naw maꞈ gaˇ mˇ nehˬ luꞈ-eu Baw leˬ maˇ maˇ ni gʼeh-eu gʼaˬ-aˬ, Ka li meh.

1 Tiˆmoˇseˬ 2:3

Kʼoeˇ loꞈ-ehˇ shaˇ-eu-aˬ, muiˬ-eu jeˬ pyeuꞈ-awˇ, aˬ dui-euˬ Ka kʼoꞈ-eu gʼaˬ pyeuꞈ-eu Miˬyehˇ kʼawꞈ nui kʼahˇ shiˇ-eu meh.

1 Tiˆmoˇseˬ 5:4

Ehˇ kʼawꞈ, miˬ coeˬ miˬ ma tiˬ gʼaˬ zaˬ hawˇ-eu oeˬ paˬ oeˬ ma jawˇ naˇ, uˬ duˬ tahˬ-eu zahˇ sahˇ kʼoꞈ-ahˇ taꞈ leˇ-awˇ, aˬ yawꞈ maꞈ yawˬ ha-euˬ nymˇ jiˇ-ahˇ mˇ nehˬ paˬ-ehˇ gʼeh-eu jeˬ-ahˇ jeˬ huˬ mˇ dzaw-eu tsaˬ meh. Aˬ jeˬ miˇ neh ehˇ naˇ, kʼoeˇ-aˬ, aˬ ma aˬ da, aˬ piˬ aˬ bawˇ deuˬ-ahˇ guiˬ lahˬ jahˇ kʼoꞈ nehˬ-eu jeˬ pyeuꞈ-awˇ, Miˬyehˇ nui ma tsaˬ-eu jeˬ pyeuꞈ-eu meh.

1 Beˬtuˆluˆ 2:12

Miˬyehˇ-ahˇ maˬ jah-eu tsawˇ haˬ deuˬ-euˬ mehˬ shi naw maꞈ dehꞈ-eu jawˇ-eu gaˇ kawˆ muiˬ dui bi dui-awˬ. Kʼoeˇ loꞈ-ehˇ dehꞈ naˇ, naw maꞈ-ahˇ yaw haiˬ jeˬ mˇ-eu tsawˇ haˬ lehˇ aˬ yawꞈ maꞈ ja doeˇ kʼawꞈ, naw maꞈ yaw muiˬ jeˬ mˇ-euˬ meh lehˇ aˬ yawꞈ maꞈ ya ha geuꞈ-awˇ, Miˬyehˇ yaˇ kʼaˬ daˇ le ngeh Nah, aˬ yawꞈ maꞈ Miˬyehˇ-ahˇ ja ceuˬ tehꞈ-a.

1 Beˬtuˆluˆ 2:20

Naw maꞈ yaw lehˬ mˇ-euˬ baˬ da neh aˬ cawˬ diˬ laˇ gaˇ ya daˬ-eu kʼoeˇ-aˬ, aˬ jeˬ guiˬ lah baw nmˇ. Ehˇ kʼawꞈ, naw maꞈ tsaˬ-eu jeˬ-ahˇ mˇ-euˬ baˬ da neh aˬ cawˬ kʼehˬ laˇ kʼaˆ laˇ gaˇ daˬ dzeuˇ oˇ dzeuˇ naˇ, naw maꞈ-ahˇ Miˬyehˇ guiˬ lahˬ biꞈ laꞈ tehꞈ-a.

1 Beˬtuˆluˆ 2:5

Naw maꞈ kʼawꞈ, dehꞈ luꞈ-eu kʼaˬ lo loꞈ-ehˇ laˇ-awˇ, saꞈ laˇ uˬ duˬ tahˬ nymˇ tsoˆ gaˇ bi zmˬ-awˬ. Uˬ duˬ tahˬ nymˇ kʼoeˇ-euˬ laꞈ kʼoeˇ naw maꞈ muiˬ-eu shawˇ-eu piˇ ma ya geuꞈ-awˇ, Yeˬsuˇ ka li-ahˇ gʼoe-eu laꞈ kʼoeˇ Miˬyehˇ ha geuꞈ nehˬ laꞈ nya-eu saꞈ laˇ paw taꞈ leˇ-eu lawˇ-eu jeˬ ya lawˇ tehꞈ-a.

1 Beˬtuˆluˆ 3:16

Ehˇ kʼawꞈ, kʼoeˇ loꞈ-ehˇ ja mehˬ nehˬ ngeh, nui ma nahˬ yu ni taˬ-awˇ yaw zeu baw-eu laꞈ kʼoeˇ ja mehˬ nehˬ-awˬ. Aˬ cawˬ yehˬ bawˬ sehˇ lu-ehˇ ehˇ laˇ gaˇ naw maꞈ ya daˬ ngeh, Ka li laꞈ kʼoeˇ naw maꞈ yaw muiˬ jeˬ mˇ luꞈ gaˇ ja doeˇ-eu tsawˇ haˬ deuˬ yawˬ ha-euˬ dawˬ-ahˇ yawˬ ha ya shaꞈ dawˇ-iˇ ni, naw maꞈ-euˬ siˬ nya-eu nui ma shawˇ jehˆ ni taˬ-awˬ.