Lormav 12:8 - Akha

⁸ Aˬ cawˬ-ahˇ gʼaˬ biꞈ-eu gʼaˇ duˬ laꞈ sawˬ za-euˬ ngeuˇ naˇ, gʼaˬ biꞈ-eu tsaˬ meh. Aˬ cawˬ-ahˇ biꞈ nehˬ damˬ nehˬ-eu laꞈ sawˬ za-euˬ ngeuˇ naˇ, nui ma keuˆ-eu laꞈ kʼoeˇ biꞈ nehˬ-eu tsaˬ meh. Aˬ cawˬ kʼoeˇ taˆ aˬ yuiꞈ aˬ tsu geuꞈ-awˇ uˆ lahˇ-eu laꞈ sawˬ za-euˬ ngeuˇ naˇ, leh jeh dui dui-awˇ mˇ-eu tsaˬ meh. Aˬ cawˬ-ahˇ gʼawˬ shaˬ gaˬ nehˬ-eu laꞈ sawˬ za-euˬ ngeuˇ naˇ, laˬ kʼaˬ tiˬ cehˇ gaˬ nehˬ-eu tsaˬ meh.

Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

⁸ Ghaq bif-eu lafsawq za-euq ngeur nar-aq, ghaq bif-awq. Bif-awr damq-eu lafsawq za-euq ngeur nar-aq, nuima jerloni bif-awr damq-awq. Sheuqghae-eu lafsawq za-euq ngeur nar-aq, laejae-awr sheuqghae-awq. Ghawqshaq gaq-eu lafsawq za-euq ngeur nar-aq, laqkhaq tiqcaer ghawqshaq gaqnaeq-awq.

Lormav 12:8 ပူးပေါင်းရင်းမြစ်များ

Aˇ dahˬ 18:19

Aˬ yawꞈ-euˬ aˬ li deuˬ-ahˇ maˬ ehˇ, aˬ yawꞈ-euˬ zaˬ deuˬ uˆ deuˬ-ahˇ maˬ ehˇ, yaw tsaˬ yaw dawˇ jeˬ mˇ ni bi mehˬ nehˬ-eu gʼaˇ duˬ, ngaˇ aˬ yawꞈ-ahˇ tseˇ doˆ-eu ma. Aˬ yawꞈ maꞈ kʼoeˇ loꞈ-ehˇ mˇ naˇ, aˬ yawꞈ nehˬ-ehˇ ngaˇ saˇ jaˇ kʼaˇ dzaˬ taˬ-euˬ jeˬ dawˬ tawˆ luꞈ mˇ byah nehˬ ma.”

Jaceuq 112:9

Shaˬ-eu tsawˇ haˬ-ahˇ aˬ yawꞈ yaw muiˬ-ehˇ gamꞈ nehˬ-awˇ, gʼawˬ shaˬ gaˬ-eu nui ma maˬ byoˆ-iˇ-a. Aˬ yawꞈ baoˬ jaˆ-awˇ, aˬ cawˬ yaw zeu baw tehꞈ-a.

Jaceuq 37:21

Haiˬ-eu deuˬshaˇngaˬshaˇpaˇngeh, biꞈkʼoꞈtsoeˬkʼoꞈ-eu maˬbaw-a. Ehˇkʼawꞈmuiˬ-eu tsawˇhaˬdeuˬ-aˬ, nui ma keuˆ-awˇ biꞈnehˬ-eu meh.

Dawqdaq 22:9

Tsawˇ tsiˇ maˬ tsiˇ ni shaˬ zaˬ zahˬ zaˬ-ahˇ bi dzaˬ bi dawˇ-awˬ. Nawˇ guiˬ lahˬ za tehꞈ-a.

Dawˬ tsoˆ 11:6

Siˬ yoeˬ kʼaˇ sehˬ-euˬ dehꞈ laˇ meh lehˇ maˬ ehˇ tsehˆ nya-ehˇ, aˬ geu ngeh yamˬ-ahˇ sehˬ-euˬ muiˬ dzehˬ-eu gaˇ kawˆ maˬ siˬ duˬ nya-eu miˇ neh, uˬ shawˬ paw tehꞈ-ehˇ maˬ sehˬ ni, uˬ ciꞈ paw kʼawꞈ sehˬ-awˬ.

Dawˬ tsoˆ 9:10

Nawˇ kʼaˇ mˇ kʼaˇ shaˇ-eu jeˬ laꞈ kʼoeˇ, leh jeh dui dui-awˬ. Aˬ jeˬ miˇ neh ehˇ naˇ, nawˇ le luꞈ-eu shiˇ-eu miˇ kʼahˬ-ahˇ, mˇ myawˬ mˇ-eu, nui noeˬ noeˬ-eu hawˇ-eu, zaˬ siˬ tsawˇ gahˇ heu deuˬ maˬ jaˆ-a.

Iˇsaˬyaˇ 32:5

Aˬ dzawˬ-ahˇ taˬ huiˬ taˬ mahˇ-eu jeˬ byoˆ-iˇ-awˇ, biˇ siˇ deuˬ-ahˇ tsawˇ muiˬ no-eu aˇ yamˬ dzeuˇ-iˇ tehꞈ-a.

Iˇsaˬyaˇ 32:8

Ehˇ kʼawꞈ, nui nahˬ nui yu ahˇ-eu tsawˇ haˬ, yaw sui yaw dawˇ jeˬ mˇ doˆ shaˇ doˆ-awˇ, yaw tsaˬ yaw dawˇ gaˇ ma kʼoeˇ taˆ, ziꞈ dah ni yawꞈ-eu meh.

Iˇsaˬyaˇ 64:5

Yaw tsaˬ yaw dawˇ jeˬ mˇ gaˇ laˬ kʼaˬ cehˇ-eu deuˬ hawˇ-eu, nawˬ-euˬ nui kʼahˇ poˆ-eu deuˬ-ahˇ nawˇ maˬ ngehˇ-a. Nawˇ nga maꞈ-ahˇ nui ma pehˇ kʼawꞈ, nga maꞈ iˬ baˇ mˇ-eu maˬ byehˇ dzeh-aˬ. Nawˇ nui ma pehˇ dui dui-euˬ kʼawꞈ, aˇ hu ba neh yaw lehˬ jeˬ nga maꞈ mˇ ka leꞈ-euˬ ma.

Maꞈtehˬ 25:40

Kʼoeˇ ngeh, aˬ yawꞈ maꞈ-ahˇ Sahˬ paˬ heu loꞈ-ehˇ ehˇ nehˬ tehꞈ-a. ‘Ngaˬ-euˬ aˬ yuiꞈ aˬ nyiˇ heu deuˬ laꞈ kʼoeˇ, aˬ cawˬ naˆ maˬ tseˇ nyiˇ teˬ-eu gʼaˬ-ahˇ naw maꞈ neh ngehˬ gʼeh nehˬ-euˬ jeˬ-aˬ, ngaˬ-ahˇ ngehˬ gʼeh nehˬ laꞈ gaˇ duˇ-eu meh lehˇ, ngaˇ naw maꞈ-ahˇ maˇ jawˆ ni ehˇ-eu ma.’

Gʼaˬkʼehˇ 11:23

Aˬ yawꞈ kʼoeˇ gaˇ le keuˆ-awˇ, Miˬyehˇ neh tsawˇ haˬ kʼoeˇ deuˬ-ahˇ guiˬ lahˬ biꞈ-euˬ gaˇ ya mawˇ ngeh, laˬ kʼaˬ cehˇ dui dui-eu laꞈ kʼoeˇ, Sahˬ paˬ Yeˬsuˇ-ahˇ nui ma laꞈ kʼoeˇ keuˆ ni saˇ jaˇ ziꞈ-eu gʼaˇ duˬ aˬ yawꞈ maꞈ dawˬ tawˆ luꞈ-ahˇ gʼaˬ biꞈ nehˬ-euˬ meh.

Gʼaˬkʼehˇ 13:12

Kʼoeˇ loꞈ-ehˇ pyeuꞈ laˇ-euˬ gaˇ sahˬ paˬ kʼoeˇ gʼaˬ ya mawˇ ngeh, Miˬyehˇ-ahˇ jah laˇ-euˬ meh. Aˬ jeˬ miˇ neh ehˇ naˇ, Sahˬpaˬ Miˬyehˇ-euˬ gaˇ kawˆ mehˬ nehˬ tsoˆ nehˬ gaˇ aˬ yawꞈ zahˬ dui dui leˇ-euˬ meh.

Gʼaˬkʼehˇ 13:15

Moˇseˬ-euˬ Zahˇ dawˬ kʼoꞈ dawˬ sahˬ boꞈ hawˇ-eu Miˬyehˇ gʼaˇ duˬ ngehˬ dah-eu deuˬ neh boꞈ-euˬ sahˬ boꞈ deuˬ-ahˇ gui gʼaˬ ngeh, uˬ duˬ tahˬ nymˇ-ahˇ aˬ yuiꞈ geuꞈ-eu deuˬ aˬ yawꞈ nyaꞈ-ahˇ heu loꞈ-ehˇ bi tsaꞈ gaˬ-iˇ-euˬ meh. “Tsawˇ haˬ heu deuˬ-ahˇ gʼaˬ biꞈ mawꞈ-eu jeˬ jaˆ naˇ, naw nyaꞈ-ahˇ dawˬ ngehˬ-eu aˇ yamˬ biꞈ mawꞈ miˇ-a.”

Gʼaˬkʼehˇ 15:32

Yuˇdaˆ hawˇ-eu Siˬlaˆ aˬ nyaꞈ kʼawꞈ, Miˬyehˇ gʼaˇ duˬ ngehˬ dah-eu tsawˇ haˬ pyeuꞈ-eu loꞈ-ehˇ, aˬ yawꞈ maꞈ-ahˇ dawˬ gʼawˬ myahˇ ni ngehˬ-awˇ gʼaˬ biꞈ lahˬ nehˬ-euˬ meh.

Gʼaˬkʼehˇ 20:2

Miˇ kʼahˬ kʼoeˇ kʼahˬ doe ni aˬ yawꞈ iˇ gʼeh ngeh, dawˬ mehˬ mehˬ mehˬ-ehˇ gʼaˬ biꞈ yaꞈ-awˇ, Aˬgaˬyaˇ miˇ kʼahˬ-ahˇ iˇ keuˆ-euˬ meh.

Gʼaˬkʼehˇ 20:28

Kʼoeˇ miˇ neh, naw maꞈ-euˬ gʼawˇ mawˇ yaw muiˬ paˬ-ehˇ yahˇ-awˇ dehꞈ-eu uˬ taꞈ, Muiˬ-eu shawˇ-eu Yaw sahˇ Miˬyehˇ neh naw maꞈ-ahˇ a nehˬ-awˇ bi haw bi pyaˆ-euˬ yawˇ yawˇ maꞈ-ahˇ yaw muiˬ paˬ-ehˇ bo saˆ haw piˇ-awˬ. Miˬyehˇ neh aˬ yawꞈ-euˬ Zaˬmaˇ bi shiˇ dah-awˇ zeuˇ tsehˆ taˬ-euˬ aˬ yawꞈ-euˬ Ka li zaˬ aˇ muˇ-ahˇ yawˇ bo-eu loꞈ-ehˇ bo-awˬ.

Gʼaˬkʼehˇ 4:36

Guˇbaˬluˇ iˇ jaw lahˇ miˇ kʼahˬ-ahˇ dehꞈ le-euˬ Leˬbiˇ tsawˇ jeuˬ Yoˇsehˆ lehˇ myahˇ-euˬ tiˬ gʼaˬ jawˇ-eu meh. Gʼaˬ kʼehˇ deuˬ neh aˬ yawꞈ-ahˇ Baˬnaˬbaˇ lehˇ myahˇ paˇ nehˬ-euˬ meh. Baˬnaˬbaˇ lehˇ ehˇ-eu dawˬ tsuiꞈ-aˬ, “Gʼaˬ biꞈ-eu gʼaˬ” lehˇ ehˇ mawꞈ-eu meh.

Lormav 12:13

Nawˇ kʼaˇ jaˆ-eu jeˬ nawˬ-euˬ cawˬ Ka li zaˬ deuˬ-ahˇ caw ba nehˬ-awˇ, daˬ yah-ahˇ yaw muiˬ-ehˇ ha-awˬ.

Lormav 13:6

Kʼoeˇ baˬ da neh, naw maꞈ kawˬ ya doˆ nehˬ-eu meh. Aˬ jeˬ miˇ neh ehˇ naˇ, aˬ yawꞈ maꞈ yawˬ ha-euˬ gaˇ mˇ-eu kʼoeˇ-aˬ, Miˬyehˇ-euˬ gʼaˇ duˬ mˇ luꞈ-eu jeˬ pyeuꞈ-eu meh.

1 Gawˇliˬtu 12:28

Ka li zaˬ aˇ muˇ laꞈ kʼoeˇ, Miˬyehˇ neh jawˇ duˬ biˇ tsaˬ taˬ-euˬ meh. Gʼaˬ kʼehˇ deuˬ-ahˇ jeˬ hu hu saˬ bi jawˇ-awˇ, kʼoeˇ-euˬ jeˬ nah Miˬyehˇ gʼaˇ duˬ ngeh dah-eu deuˬ-ahˇ bi jawˇ-euˬ meh. Kʼoeˇ-euˬ jeˬ nah mehˬ-eu tsoˆ-eu saˬ laˬ deuˬ-ahˇ bi jawˇ-euˬ meh. Kʼoeˇ naˇ, zahˬ leˇ paˬ-ehˇ gʼeh-eu jeˬ mˇ nya-eu baoˬ biꞈ taˬ-euˬ deuˬ, naˇ gawˇ laˆ taˬ nya-eu baoˬ biꞈ taˬ-euˬ deuˬ, aˬ cawˬ-ahˇ caw ba nehˬ nya-eu deuˬ, Ka li zaˬ aˇ muˇ-euˬ gaˇ-ahˇ haw-eu pyaˆ-eu deuˬ hawˇ-eu, dawˬ gʼawˬ mya jeˬ ngehˬ nya-eu deuˬ-ahˇ tiˬ tiˆ saˇ-iˬ tiˬ tiˆ bi jawˇ ka leꞈ-euˬ meh.

1 Gawˇliˬtu 14:3

Ehˇ kʼawꞈ, Miˬyehˇ dawˬ kawˬ mehˬ-eu tsawˇ haˬ-aˬ, tsawˇ haˬ zaˬ-ahˇ ngehˬ cawˬ-eu jeˬ pyeuꞈ-eu miˇ neh, aˬ cawˬ-ahˇ caw ba-eu, gʼaˬ biꞈ-eu, nui ma saˇ laˇ ni gʼaˬ biꞈ-eu dawˬ ngehˬ-eu tmˇ-eu, heu deuˬ mˇ nehˬ nya-eu meh.

2 Gawˇliˬtu 1:12

Miˇ tsaˬ heu kʼoeˇ taˆ nga maꞈ yaw dehꞈ dehꞈ luꞈ-eu heu hawˇ-eu, kʼaˆ kʼaˆ ni naw maꞈ nehˬ-ehˇ cawˬ ya cawˬ taꞈ luꞈ-eu heu-aˬ, Miˬyehˇ neh biꞈ leꞈ-euˬ myaˆ pyawˬ bya cehˆ ni taˬ nya-eu jeˬ hawˇ-eu, nui ma dawˇ coe ni gʼeh-eu jeˬ laꞈ kʼoeˇ ya dehꞈ luꞈ-eu baˬ da neh maˬ ehˇ, tsawˇ haˬ zaˬ-euˬ zaˬ siˬ tsawˇ gahˇ-ahˇ maˬ gʼoe-ehˇ Miˬyehˇ-euˬ guiˬ lahˬ yaw dzahˇ-euˬ baoˬ-ahˇ gʼoe-awˇ ya dehꞈ luꞈ-eu baˬ da neh maˬ ehˇ, nga maꞈ kʼahˬ sehˇ jehˆ kʼaˇ za-eu ma.

2 Gawˇliˬtu 11:3

Eˇbaˆ-ahˇ aˇ lawˇ neh mehˇ shuiˇ bi shuiˇ tawˆ-euˬ loꞈ-ehˇ, Ka li-ahˇ maˇ maˇ ni shawˇ jehˆ ni gaˬ-eu naw maꞈ-euˬ nui ma bi tsahˇ pyawˇ gaˇ ngaˇ kʼahˬ lahˇ dui dui nya.

2 Gawˇliˬtu 8:12

Damˬ mawꞈ-eu nui ma ahˇ naˇ, naw maꞈ kʼaˇ gʼeh nya-eu loꞈ-ehˇ damˬ-euˬ gaˇ Miˬyehˇ ha geuꞈ nehˬ laꞈ tehꞈ-a. Maˬ gʼeh nya gaˇ keuˆ ni damˬ-awˬ lehˇ maˬ ehˇ-a.

2 Gawˇliˬtu 9:11

Naw maꞈ neh damˬ-euˬ jeˬ-ahˇ nga maꞈ sha miˇ nehˬ-eu baˬ da neh, aˬ cawˬ gʼawˬ mya ni Miˬyehˇ-ahˇ ja ceuˬ ni naw maꞈ aˬ myah luꞈ damˬ nya-eu gʼaˇ duˬ, Miˬyehˇ naw maꞈ-ahˇ smˇ muiˬ bi muiˬ laˇ tehꞈ-a.

2 Gawˇliˬtu 9:13

Naw maꞈ Ka li-euˬ Laˬ kʼaˬ cehˇ-eu Guiˬ lahˬ dawˬ-ahˇ saˇ jaˇ ziꞈ gaˇ maˬ ehˇ, Miˬyehˇ-euˬ tsawˇ haˬ kʼoeˇ deuˬ hawˇ-eu aˬ yawꞈ-ahˇ nui ma keuˆ-eu laꞈ kʼoeˇ damˬ nehˬ gaˇ maˬ ehˇ, aˬ cawˬ ya mawˇ ngeh, naw maꞈ neh mˇ-euˬ gaˇ heu-ahˇ haw-awˇ tsawˇ haˬ gʼawˬ mya ni Miˬyehˇ-euˬ yaw shehꞈ kʼahˬ sehˇ-ahˇ ja ceuˬ tehꞈ-a.

2 Gawˇliˬtu 9:7

Kʼoeˇ miˇ neh, aˬ yawꞈ gʼaˬ yawꞈ yawˬ ha neh kʼaˇ noeˬ tsehˆ taˬ-euˬ loꞈ-ehˇ damˬ-awˬ. Nui ma maˬ keuˆ ni damˬ-eu maˬ ehˇ, aˬ cawˬ ehˇ-eu miˇ neh damˬ-eu maˬ ehˇ, taˬ bi pyeuꞈ. Aˬ jeˬ miˇ neh ehˇ naˇ, laˬ kʼaˬ tiˬ cehˇ damˬ-eu tsawˇ haˬ-ahˇ Miˬyehˇ gaˬ-eu meh.

Eˇpeˇsu 6:5

Zaˬ kʼaˆ deuˬ-oˇ, miˇ tsaˬ zaˬ pyeuꞈ-eu naw maꞈ-euˬ baw leˬ deuˬ-ahˇ guˆ-awˇ yaw dzuˬ dzuˬ-eu laꞈ koeˇ, ehˇ dawˬ naˇ haˬ geuꞈ-awˬ. Ka li-euˬ gaˇ mˇ gaˇ duˇ ni, aˬ yawꞈ maꞈ kʼaˇ kʼehˇ-eu jeˬ-ahˇ mˇ-awˬ.

Dawˬmehˬ 15:14

Sahˬpaˬ Miˬyehˇ neh nawˬ-ahˇ guiˬ lahˬ biꞈ laꞈ-euˬ deuˬ pyeuꞈ-eu yawˇ, dzaˬ la gʼo cehˇ hawˇ-eu, aˬ gaꞈ dzaˇ uiˇ deuˬ, tsawˇ tsiˇ maˬ tsiˇ ni aˬ yawꞈ-ahˇ ya biꞈ meh.

Dawˬmehˬ 16:11

Nawˬ-euˬ zaˬ deuˬ, nawˬ-euˬ zaˬ kʼaˆ deuˬ, naw maꞈ-euˬ meuˬ deuˬ-ahˇ jawˇ luꞈ-eu Leˬbiˇ tsawˇ haˬ deuˬ, boeˇ miˬ siˬ kʼaˬ deuˬ, muˇ coe aˬ nmˇ deuˬ hawˇ-eu miˬ coeˬ miˬ ma deuˬ nehˬ-ehˇ, uˬ duˬ tahˬ-eu jawˇ duˬ-ahˇ Sahˬpaˬ Miˬyehˇ-euˬ mehˬ shi laˬ kʼaˬ cehˇ-awˬ.

Gawˇlawˇsehˇ 3:22

Zaˬ kʼaˆ deuˬ-oˇ, yawˬ jeˬ na luꞈ laꞈ kʼoeˇ yawˬ ha-euˬ baw leˬ ehˇ dawˬ naˇ haˬ-awˬ. Baw leˬ deuˬ neh bi ja ceuˬ-eu lehˇ baw leˬ mawˇ gaˇ tehꞈ-ehˇ dawˬ gʼoˆ gʼoˆ-eu jeˬ maˬ bi pyeuꞈ ni, Sahˬpaˬ Yeˬsuˇ-ahˇ yaw zeu baw-eu miˇ neh nui ma laꞈ kʼoeˇ keuˆ ni dawˬ gʼoˆ gʼoˆ-eu jeˬ bi pyeuꞈ-awˬ.

1 Teˇsaˬloˇni 2:3

Naw maꞈ Laˬ kʼaˬ cehˇ-eu Guiˬ lahˬ dawˬ-ahˇ jah laˇ ni nga maꞈ mehˬ-eu heu-aˬ, jaˬ myawꞈ myawꞈ-eu laꞈ kʼoeˇ mehˬ-eu maˬ ngeuˇ. Nui ma maˬ shawˇ-eu laꞈ kʼoeˇ mehˬ-eu maˬ ngeuˇ. Mehˇ shuiˇ shuiˇ-eu laꞈ kʼoeˇ mehˬ-eu maˬ ngeuˇ.

1 Teˇsaˬloˇni 2:8

Naw maꞈ-ahˇ nga maꞈ gʼoeˇ dui gaˬ dui dui-eu miˇ neh, Miˬyehˇ-euˬ Laˬ kʼaˬ cehˇ-eu Guiˬ lahˬ dawˬ tehꞈ-ehˇ maˬ ngeuˇ ni, nga maꞈ-euˬ gʼawˇ mawˇ kʼawꞈ naw maꞈ gʼaˇ duˬ shiˇ dah nehˬ coeˇ ma. Naw maꞈ-ahˇ nga maꞈ gaˬ dui dui-eu ma.

1 Tiˆmoˇseˬ 4:13

Ngaˇ laˇ keuˆ ngeh keuˆ ni, nawˬ-euˬ aˇ yamˬ hawˇ-eu gʼaˬ dawˬ tawˆ luꞈ, tsawˇ haˬ aˇ maꞈ-ahˇ Jaˇliꞈ gui mehˬ-eu, dawˬ mehˬ mehˬ-eu, mehˬ nehˬ tsoˆ nehˬ-eu, heu deuˬ-euˬ gʼaˇ duˬ zmˬ-awˬ.

1 Tiˆmoˇseˬ 5:17

Ka li zaˬ aˇ muˇ-ahˇ sheuˬ gʼeh-eu gaˇ yaw muiˬ paˬ-ehˇ mˇ luꞈ-eu tsawˇ mawˬ tsawˇ kʼaˆ deuˬ-ahˇ nyiˬ bymˇ taˬ huiˬ nehˬ paˬ-ehˇ gʼeh tehꞈ-a. Aꞈ yawꞈ maꞈ laꞈ kʼoeˇ, dawˬ mehˬ mehˬ-eu hawˇ-eu mehˬ-eu tsoˆ-eu jeˬ-ahˇ yaw kʼaˆ-ehˇ leh jeh-awˇ mˇ-eu deuˬ-ahˇ, kʼoeˇ naˆ maˬ tseˇ taˬ huiˬ nehˬ paˬ-ehˇ gʼeh tehꞈ-a.

1 Tiˆmoˇseˬ 6:18

Aˬ cawˬ gʼaˇ duˬ yaw muiˬ jeˬ mˇ-eu, muiˬ-eu gaˇ gʼawˬ mya jeˬ mˇ-eu, tsawˇ tsiˇ maˬ tsiˇ ni damˬ nehˬ-eu, aˬ cawˬ-ahˇ caw ba nehˬ-eu, heu loꞈ-ehˇ gʼeh-eu deuˬ-ahˇ mˇ-awˬ lehˇ aˬ yawꞈ maꞈ-ahˇ mehˬ nehˬ-awˬ.

HeˬByehˇ 10:25

Aˬ cawˬ loꞈ-ehˇ maˬ gʼeh ni, tiˬ kawˆ loꞈ-ehˇ tahˬ dzoeˇ-awˇ uˬ duˬ tahˬ-eu gaˇ heu hmˬ maˬ byehˇ ni mˇ daˆ leꞈ kaˇ-euˇ. Sahˬpaˬ Miˬyehˇ yaˇ kʼaˬ daˇ le-eu Aˇnah dawˬ peh peh le-euˬ naw maꞈ siˬ luꞈ mawˇ luꞈ-eu loꞈ-ehˇ, tiˬ gʼaˬ tiˇ gʼaˬ gʼaˬ biꞈ tehˇ tehꞈ kaˇ-euˇ.

HeˬByehˇ 13:17

Naw maꞈ kʼoeˇ taˆ aˬ yuiꞈ aˬ tsu geuꞈ-eu deuˬ-euˬ ehˇ dawˬ yaw muiˬ paˬ-ehˇ naˇ haˬ geuꞈ-awˬ. Aˬ yawꞈ maꞈ neh mˇ-euˬ gaˇ deuˬ Miˬyehˇ mehˬ shi ya dzawˇ mehˬ leˇ-eu baˬ da neh, jawˇ naˬ maˬ mˇ ni naw maꞈ-euˬ saꞈ laˇ-ahˇ haw piˇ luꞈ-eu meh. Aˬ yawꞈ maꞈ-euˬ ehˇ dawˬ-ahˇ naw maꞈ naˇ haˬ geuꞈ naˇ, aˬ yawꞈ maꞈ-euˬ gaˇ-ahˇ aˬ yawꞈ maꞈ laˬ kʼaˬ cehˇ-eu laꞈ kʼoeˇ ya mˇ tehꞈ-a. Naw maꞈ maˬ naˇ haˬ geuꞈ naˇ, aˬ yawꞈ maꞈ noeˬ shaˬ-eu laꞈ kʼoeˇ ya mˇ-awˇ, naw maꞈ gʼaˇ duˬ gaˇ dahˇ maˬ tsoeˬ-a.

HeˬByehˇ 13:22

A yuiꞈ aˬ nyiˇ Ka li zaˬ deuˬ-oˇ, naw maꞈ-ahˇ gʼaˬ biꞈ-eu dawˬ heu deuˬ-ahˇ nui ma gʼawˬ mahˇ ni taˬ-awˇ naˇ haˬ geuꞈ-awˬ lehˇ shaˇ-eu ma. Aˬ jeˬ miˇ neh ehˇ naˇ, ngaˬ neh naw maꞈ-ahˇ boꞈ nehˬ laꞈ-euˬ sahˬ boꞈ heu taꞈ-aˬ, yaw mahˇ maˬ ngeuˇ-a.

HeˬByehˇ 13:24

Naw maꞈ-euˬ aˬ yuiꞈ aˬ tsu dawˬ tawˆ luꞈ hawˇ-eu Miˬyehˇ-euˬ zaˬ dawˬ tawˆ luꞈ-ahˇ, nga maꞈ dawˬ cawˬ puˬ ahˇ leꞈ-euˬ gaˇ kawˆ tiˬ poˆ tsaꞈ nehˬ-awˬ. Iˇdaˬliˬ miˇ kʼahˬ-ahˇ jawˇ-eu aˬ yuiꞈ aˬ nyiˇ Ka li zaˬ deuˬ naw maꞈ-ahˇ dawˬ cawˬ puˬ ahˇ leꞈ-euˬ meh.

HeˬByehˇ 13:7

Naw maꞈ-ahˇ Miˬyehˇ dawˬ kawˬ mehˬ-euˬ aˬ yuiꞈ aˬ tsu deuˬ-ahˇ taˬ ngehˇ. Aˬ yawꞈ maꞈ aˬ joˆ-ehˇ dehꞈ yaꞈ jaˇ yaꞈ-awˇ shiˇ-euˬ gaˇ kawˆ-ahˇ shaˇ noeˬ-awˇ, aˬ yawꞈ maꞈ-euˬ jah-eu jeˬ-ahˇ dzaw geuꞈ-awˬ.