Jaceuq 105:9 - Akha

⁹ Aˬbyaˬhaˬ nehˬ-ehˇ dzaˬ-euˬ dawˬ ma saˇ jaˇ-ahˇ aˬ yawꞈ ziꞈ-awˇ, Iˇtsaˆ nehˬ-ehˇ dzaˬ-euˬ saˇ jaˇ-ahˇ ziꞈ tehꞈ-a.

Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

⁹ Aqyawf, Aqbyaqhaq naeq-aer dawqma sarjax dzaq-awr, Aqyawf, Irtsav-anr kamqtaq-euq mae.

Jaceuq 105:9 ပူးပေါင်းရင်းမြစ်များ

Aˇ dahˬ 12:7

Kʼoeˇ ngeh, Aˬbyaˬ-euˬ mehˬ shi Sahˬpaˬ Miˬyehˇ doˆ le-awˇ, “Miˇ kʼahˬ heu kʼahˬ-aˬ, nawˬ-euˬ zaˬ nawˬ-euˬ uˆ deuˬ-ahˇ biꞈ-eu gʼaˇ duˬ, ngaˬ neh lehˬ hmˬ taˬ-euˬ miˇ kʼahˬ pyeuꞈ-eu ma” lehˇ ehˇ nehˬ-euˬ meh. Aˬbyaˬ-aˬ, aˬ yawꞈ-euˬ mehˬ shi doˆ le-euˬ Sahˬpaˬ Miˬyehˇ-ahˇ lawˇ nehˬ shehˇ nehˬ-eu gʼaˇ duˬ, kʼoeˇ gaˇ lawˇ duˬ tiˬ tsahˇ tsoˆ-euˬ meh.

Aˇ dahˬ 17:2

Ngaˇ nawˬ nehˬ-ehˇ dawˬ ma saˇ jaˇ dzaˬ taꞈ-awˇ, nawˬ-euˬ zaˬ nawˬ-euˬ uˆ deuˬ bi jeuˬ bi o le ma.”

Aˇ dahˬ 26:3

Nawˇ heu gaˇ jawˇ naˇ, nawˬ nehˬ-ehˇ ngaˇ jawˇ-awˇ nawˬ-ahˇ ngaˇ guiˬ lahˬ biꞈ nehˬ ma. Miˇ kʼahˬ heu kʼahˬ kʼahˬ lah ni nawˇ hawˇ-eu nawˬ-euˬ zaˬ nawˬ-euˬ uˆ deuˬ-ahˇ ngaˇ biꞈ ma. Nawˬ da Aˬbyaˬhaˬ nehˬ-ehˇ ngaˬ neh dzaˬ taˬ-euˬ saˇ jaˇ-ahˇ ngaˇ mˇ byah ma.

Aˇ dahˬ 28:13

Sahˬpaˬ Miˬyehˇ aˬ yawꞈ dawˬ peh yawꞈ-awˇ ehˇ-eu, “Ngaˇ-aˬ, Aˬbyaˬhaˬ hawˇ-eu Iˇtsaˆ-euˬ Miˬyehˇ pyeuꞈ-eu Sahˬpaˬ Miˬyehˇ ma. Nawˇ yuꞈ luꞈ-eu miˇ tsaˬ heu tsahˇ, nawˇ hawˇ-eu nawˬ-euˬ zaˬ deuˬ-ahˇ ngaˇ biꞈ ma.

Aˇ dahˬ 35:11

Kʼoeˇ naˇ, Yaˬkoˆ-ahˇ Miˬyehˇ ehˇ nehˬ-eu, “Ngaˇ-aˬ, Baoˬ huiˬ-eu Miˬyehˇ pyeuꞈ-eu ma. Nawˬ-euˬ zaˬ deuˬ jeuˬ le o le luꞈ-uˇ. Nawˬ-euˬ o neh tsawˇ jeuˬ gʼawˬ mya jeuˬ doˆ laˇ-awˇ, nawˇ-aˬ, miˇ kʼahˬ-ahˇ uˆ lahˇ-eu sahˬ paˬ deuˬ-euˬ aˬ da yaw dzahˇ ya pyeuꞈ laˇ tehꞈ-a.

2 Sahˬpaˬ 13:23

Ehˇ kʼawꞈ, Iˇsaˬleˬlaˆ tsawˇ haˬ deuˬ-ahˇ Sahˬpaˬ Miˬyehˇ gʼawˬ shaˬ gaˬ-eu laꞈ kʼoeˇ, Aˬbyaˬhaˬ, Iˇtsaˆ, Yaˬkoˆ aˬ ha maꞈ-ahˇ aˬ yawꞈ neh dzaˬ taˬ-euˬ dawˬ ma saˇ jaˇ baˬ da neh, aˬ yawꞈ-euˬ tsawˇ jeuˬ-ahˇ aˬ yawꞈ maˬ ngehˇ leˇ coeˇ-ehˇ, cawˆ-iˇ jiˇ gaˇ maˬ bi keuˆ ni caw ba nehˬ-euˬ meh.

Neˬhaˬmiˇ 9:8

Aˬ yawꞈ nawˬ-ahˇ saˇ jaˇ ziꞈ gaˇ nawˇ ya mawˇ-awˇ, aˬ yawꞈ nehˬ-ehˇ dawˬ ma saˇ jaˇ nawˇ dzaˬ-euˬ meh. Kaˬnaˬ tsawˇ jeuˬ-euˬ miˇ kʼahˬ, Heˬtaˆ tsawˇ jeuˬ hawˇ-eu Aˬmawˇliˆ tsawˇ jeuˬ-euˬ miˇ kʼahˬ, Paˬyehˆ tsawˇ jeuˬ, Yeˬbuˇ tsawˇ jeuˬ hawˇ-eu, Geuˬgaˬshaˆ tsawˇ jeuˬ heu deuˬ-euˬ miˇ kʼahˬ, aˬ yawꞈ-euˬ zaˬ deuˬ-ahˇ biꞈ ma lehˇ, aˬ yawꞈ-ahˇ nawˇ saˇ jaˇ dzaˬ-euˬ meh. Nawˇ saˇ jaˇ ziꞈ dui dui-eu gʼaˬ pyeuꞈ-awˇ, nawˬ-euˬ saˇ jaˇ dawˬ kawˬ byah laˇ-euˬ meh.

Doˆ-iˇ 2:24

Aˬ yawꞈ maꞈ shaˬ zahˬ naꞈ-eu laꞈ kʼoeˇ ngoeˇ luꞈ-eu teˇ saˇ-ahˇ Miˬyehˇ ya gaˬ ngeh, Aˬbyaˬhaˬ, Iˇtsaˆ hawˇ-eu Yaˬkoˆ-ahˇ aˬ yawꞈ neh dawˬ ma saˇ jaˇ dzaˬ taˬ-euˬ gaˇ noeˬ keuˆ-euˬ meh.

Yeˬlaˬmiˇ 11:5

Kʼoeˇ naˇ, aˬ yawꞈ maꞈ-euˬ aˬ poeˬ aˬ bawˇ deuˬ nehˬ-ehˇ, ngaˬ neh dzaˬ taˬ-euˬ saˇ jaˇ-ahˇ ngaˇ ziꞈ-awˇ, nymˬ-mˇ aˬ yawꞈ maꞈ jawˇ luꞈ-eu miˇ tsaˬ miˇ muiˬ muiˬ dui dui-awˇ baw le za le-eu miˇ kʼahˬ heu kʼahˬ, aˬ yawꞈ maꞈ-ahˇ ngaˇ biꞈ ma lehˇ ehˇ nehˬ-euˬ ma.” Kʼoeˇ ngeh, “Sahˬpaˬ Miˬyehˇ nawˇ kʼaˇ ehˇ-eu loꞈ-ehˇ ngaˇ mˇ ma” lehˇ, ngaˇ ehˇ kʼoꞈ nehˬ-euˬ ma.

Gʼaˬkʼehˇ 7:8

Kʼoeˇ naˇ, Miˬyehˇ neh Aˬbyaˬhaˬ-ahˇ baˆ kʼoˆ mehˬ dzaˬ yehˬ-eu zahˇ bi jahˇ-eu laꞈ kʼoeˇ, dawˬ ma saˇ jaˇ dzaˬ-euˬ meh. Kʼoeˇ miˇ neh, Iˇtsaˆ dehꞈ le-awˇ tiˬ jaw byah laˇ ngeh, Aˬbyaˬhaˬ neh aˬ yawꞈ-euˬ aˬ li Iˇtsaˆ-ahˇ baˆ kʼoˆ mehˬ dzaˬ yehˬ nehˬ-euˬ meh. Kʼoeˇ loꞈ-ehˇ duˇ ni, Iˇtsaˆ gʼeh, aˬ yawꞈ-euˬ aˬ li Yaˬkoˆ-ahˇ baˆ kʼoˆ mehˬ dzaˬ yehˬ nehˬ-euˬ meh. Yaˬkoˆ gʼeh, aˬ yawꞈ-euˬ aˬ li tseˇ nyiꞈ li-ahˇ baˆ kʼoˆ mehˬ dzaˬ yehˬ nehˬ-euˬ meh. Aˬ li kʼoeˇ tseˇ nyiꞈ liˬ-aˬ, aˬ dui tsawˇ jeuˬ-euˬ tsawˇ myahˇ doˆ-eu aˬ poeˬ deuˬ pyeuꞈ-eu meh.

Gaˬlaˬtiˆ 3:17

Ngaˇ ehˇ mawꞈ-eu-aˬ, heu loꞈ-ehˇ ma. Aˬbyaˬhaˬ nehˬ-ehˇ Miˬyehˇ dawˬ ma saˇ jaˇ dzaˬ-euˬ meh. Kʼoeˇ sawˇ miˇ tsa oeˬ yaˇ smˬ tseˇ kʼoꞈ gʼeh-awˇ neh hawˇ-eu biꞈ leꞈ-euˬ Zahˇ dawˬ kʼoꞈ dawˬ kʼoeˇ-aˬ, Miˬyehˇ neh dzaˬ taˬ-euˬ saˇ jaˇ kʼoeˇ-ahˇ maˬ laˆ pyaˆ nya-a.

HeˬByehˇ 6:17

Miˬyehˇ neh saˇ jaˇ dzaˬ taˬ-euˬ tsawˇ haˬ deuˬ-ahˇ Miˬyehˇ aˬ yawꞈ neh noeˬ taˬ-euˬ jeˬ tiˬ jawˇ-iˬ maˬ poˆ maˬ paˇ-eu gaˇ kawˆ bi siˬ duˬ mawꞈ-eu meh. Kʼoeˇ miˇ neh, aˬ yawꞈ saˇ jaˇ dzaˬ ngeh, dzaˬ-euˬ loꞈ-ehˇ maˇ maˇ ni bi pyeuꞈ laˇ-eu gʼaˇ duˬ kamˬ tsehˆ-eu meh.