Iˇsaˬyaˇ 5:20 - Akha

²⁰ Yaw doeˇ-ahˇ yaw muiˬ no-awˇ, yaw muiˬ-ahˇ yaw doeˇ no-eu deuˬ, yaw zahˇ-ahˇ yaw shehꞈ ciˬ paˇ-awˇ, yaw shehꞈ-ahˇ yaw zahˇ ciˬ paˇ-eu deuˬ, yaw kʼaˬ-ahˇ laˆ coeˇ-awˇ, yaw coeˇ-ahˇ laˆ kʼaˬ-eu deuˬ, ya noeˬ shaˬ dui dui tehꞈ-a.

Iˇsaˬyaˇ 5:20 ပူးပေါင်းရင်းမြစ်များ

Yawˇbaˆ 17:12

Ehˇ kʼawꞈ, ngaˬ-euˬ cawˬ deuˬ uˬ ciꞈ-ahˇ nah gʼahˇ lehˇ ehˇ luꞈ meh. yaw shehꞈ keuˆ le-eu peh laˇ luꞈ meh lehˇ aˬ yawꞈ maꞈ ehˇ luꞈ meh. Ehˇ kʼawꞈ, ngaˇ yaw zahˇ laꞈ kʼoeˇ jawˇ luꞈ-eu ngaˇ siˬ nya ma.

Doˆ-iˇ 23:7

Maˬ tsaˬ maˬ dawˇ-eu laꞈ kʼoeˇ, aˬ cawˬ-ahˇ iˬ baˇ taˬ-awˇ, yaˇ kʼaˬ maˬ ya ja-a. Maˬ lehˬ maˬ ca-eu tsawˇ haˬ-ahˇ maˬ ya sehꞈ-a. Aˬ jeˬ miˇ neh ehˇ naˇ, kʼoeˇ loꞈ-ehˇ maˬ tsaˬ maˬ dawˇ-eu jeˬ mˇ-eu tsawˇ haˬ-ahˇ, ngaˇ iˬ baˇ maˬ pyehˬ nya-a.

Dawqdaq 17:15

Yaw lehˬ deuˬ-ahˇ laˆ law nehˬ-eu jeˬ hawˇ-eu, yaw tsaˬ yaw dawˇ deuˬ-ahˇ yaw lehˬ no-eu jeˬ, nyiˬ jeˬ luꞈ-ahˇ Sahˬpaˬ Miˬyehˇ maˬ haw nahˇ-a.

Dawqdaq 4:17

Haiˬ-eu jeˬ mˇ-awˇ tsawˇ haˬ-ahˇ sehꞈ-eu-aˬ, aˬ yawꞈ maꞈ gʼaˇ duˬ hawˬ dzaˬ-awˇ iˇ cuꞈ dawˇ-eu naˆ ni tehꞈ meh.

Iˇsaˬyaˇ 24:9

Aˬ gaꞈ dzaˇ uiˇ dawˇ-awˇ caˇ dawˬ caˇ-eu maˬ paˇ baw-ehˇ, aˬ gaꞈ dzaˇ uiˇ maˬ paˇ dawˇ kuiˇ nya meh.

Iˇsaˬyaˇ 29:21

Yaw haiˬ deuˬ buˬ-iˇ ni ja piˇ-awˇ, tsawˇ muiˬ yaw doeˇ oꞈ ni ngehˬ-eu tsawˇ haˬ, Miˬyehˇ laˆ cawˆ nehˬ gaˇ ya daˬ tehꞈ-a.

Iˇsaˬyaˇ 30:10

Miˬyehˇ gʼaˇ duˬ ngehˬ dah luꞈ-eu deuˬ-ahˇ, aˬ yawꞈ maꞈ kʼaˬ meh paꞈ tsoeˬ tsoeˬ nehˬ-awˇ, “Yaw tsaˬ yaw dawˇ jeˬ gaˇ kawˆ maˬ mehˬ ni, nga maꞈ naˇ haˬ mawꞈ-eu dawˬ deuˬ hawˇ-eu, gaˇ jaw jaw-eu dawˬ mehˬ le-awˬ” lehˇ ehˇ-eu meh.

Iˇsaˬyaˇ 32:5

Aˬ dzawˬ-ahˇ taˬ huiˬ taˬ mahˇ-eu jeˬ byoˆ-iˇ-awˇ, biˇ siˇ deuˬ-ahˇ tsawˇ muiˬ no-eu aˇ yamˬ dzeuˇ-iˇ tehꞈ-a.

Yeˬsaˬgeˬlaˇ 13:19

Lawˬ loeˇ hawˇ-eu kaˬ muˇ ui cuiˆ za laˇ gaˇ haw-awˇ, ngaˬ-euˬ tsawˇ haˬ deuˬ-euˬ mehˬ shi, naw maꞈ ngaˬ-ahˇ yehˬ bawˬ sehˇ lu-ehˇ gʼeh-eu meh. Maˬ bi shiˇ paˬ-ehˇ gʼeh-eu tsawˇ haˬ deuˬ-ahˇ naw maꞈ laˆ sehꞈ-awˇ, bi shiˇ paˬ-ehˇ gʼeh-eu tsawˇ haˬ deuˬ-ahˇ naw maꞈ bi dehꞈ-euˬ meh. Ngaˬ-euˬ tsawˇ haˬ deuˬ naw maꞈ-ahˇ jah laˇ ni, naw maꞈ mehˇ shuiˇ shuiˇ-euˬ meh.”

Aˬmoˆ 5:7

Yaw tsaˬ yaw dawˇ jeˬ-ahˇ sheu pyawˆ-awˇ, aˬ cawˬ kʼoeˇ taˆ myawꞈ dzaˬ shuiˇ dzaˬ-eu naw maꞈ deuˬ kʼoeˇ taˆ, dawˇ keuˆ le tehꞈ-a.

Miˇkaˬ 3:2

Ehˇ kʼawꞈ, yaw muiˬ yaw jaˬ jeˬ-ahˇ naw maꞈ bye-awˇ, maˬ muiˬ maˬ jaˬ-eu jeˬ-ahˇ naw maꞈ gaˬ-eu meh. Ngaˬ-euˬ tsawˇ haˬ deuˬ-ahˇ naw maꞈ yaw dehꞈ-ehˇ baˆ kʼoˆ gʼeu yawˆ nehˬ-awˇ, aˬ yawꞈ maꞈ-euˬ shaˬ yoeˬ-ahˇ shaˬ jiˇ kaˇ doˆ-euˬ meh.

Haˬbaˬkuˆ 1:4

Zahˇ sahˇ kʼoꞈ deuˬ peuˬ-iˇ jiˇ-awˇ, yaw tsaˬ yaw dawˇ maˬ paˇ ziꞈ meh. Yaw muiˬ-ahˇ yaw haiˬ jawˬ lahˇ-awˇ, yaw tsaˬ yaw dawˇ buꞈ-iˇ-euˬ meh.

Maˬlaˬkiˇ 2:17

Naw maꞈ-euˬ dawˬ baˬ da neh, Sahˬpaˬ Miˬyehˇ nui ma maˬ saˇ-a. Ehˇ kʼawꞈ, “Sahˬpaˬ Miˬyehˇ nui ma maˬ saˇ paˬ-ehˇ nga maꞈ aˬ jeˬ ehˇ taˬ-eu jaˆ ta” lehˇ naw maꞈ ehˇ meh. “Baoˬ huiˬ-eu Sahˬpaˬ Miˬyehˇ-aˬ, yaw haiˬ jeˬ kʼaˇ mˇ-eu tsawˇ haˬ-ahˇ yaw muiˬ noeˬ-awˇ, aˬ diˇ aˬ maˇ nui ma tsaˬ-eu nga” lehˇ naw maꞈ ehˇ-awˇ, “Yaw tsaˬ yaw dawˇ Miˬyehˇ aˬ gaˇ jawˇ ta” lehˇ ehˇ-eu laꞈ kʼoeˇ, aˬ yawꞈ nui ma maˬ saˇ ni naw maꞈ jahˇ-euˬ meh.

Maˬlaˬkiˇ 3:15

Aˬ dui neh ya mawˇ-euˬ loꞈ-ehˇ ngeuˇ naˇ, nui ma huiˬ-eu mahˇ-eu tsawˇ haˬ deuˬ guiˬ lahˬ za gahˬ ngaˇ. Haiˬ-eu tsawˇ haˬ deuˬ dehꞈ dzaˬ dui dui-eu uˬ taꞈ, Miˬyehˇ-ahˇ yaw haiˬ jeˬ mˇ haw mˇ haw-ehˇ dehꞈ kʼawꞈ, tiˬ jeˬ-iˬ maˬ guˬ leˇ nga’ lehˇ ehˇ-eu meh.”

Luˇkaꞈ 16:15

Yeˬsuˇ aˬ yawꞈ maꞈ-ahˇ ehˇ nehˬ-eu, “Naw maꞈ-aˬ, tsawˇ haˬ zaˬ-euˬ mehˬ shi yaw tsaˬ yaw dawˇ jahˇ geuꞈ-eu meh. Ehˇ kʼawꞈ, naw maꞈ-euˬ nui ma-ahˇ Miˬyehˇ siˬ nya meh. Aˬ jeˬ miˇ neh ehˇ naˇ, tsawˇ haˬ zaˬ neh ciˬ poeˬ-euˬ jeˬ-ahˇ Miˬyehˇ nui daˆ daˆ-eu meh.

Dawˬmehˬ 25:1

“Iˇsaˬleˬlaˆ tsawˇ haˬ nyiˬ gʼaˬ yaw kaˬ dawˬ ja doˆ laˇ-euˬ miˇ neh, yaˇ kʼaˬ daˇ duˬ-ahˇ le-awˇ bi laˆ tsaˬ leˇ ngeh, tiˬ gʼaˬ-aˬ iˬ baˇ ahˇ-awˇ, yawˬ gʼaˬ yawˬ iˬ baˇ maˬ ahˇ-a lehˇ bi daˇ tsehˆ-euˬ ehˇ-awˬ.

2 Beˬtuˆluˆ 2:1

Aˇ hu ba-euˬ tsawˇ haˬ deuˬ jawˇ gaˇ maˬ ngeuˇ-eu Miˬyehˇ gʼaˇ duˬ ngehˬ dah-eu deuˬ doˆ le haw-euˬ loꞈ-ehˇ, naw maꞈ jawˇ gaˇ maˬ ngeuˇ-eu mehˬ-eu tsoˆ-eu saˬ laˬ deuˬ doˆ le tehꞈ-a. Yaw cawˆ jeˬ hawˇ-eu maˬ tsaˬ-eu jah-eu jeˬ aˬ yawꞈ maꞈ hehˇ ahˇ laꞈ-awˇ, aˬ yawꞈ maꞈ-ahˇ ka kʼoꞈ nehˬ-euˬ Sahˬpaˬ-ahˇ maˬ siˬ lehˇ ehˇ tehꞈ-a. Kʼoeˇ miˇ neh, aˬ yawꞈ maꞈ kʼoeˇ taˆ luˬ-iˇ seˇ-iˇ-eu jeˬ yaw kawˇ-ehˇ keuˆ le ni yawˬ haˇ ha mˇ gaˇ duˇ-eu meh.