Iˇsaˬyaˇ 42:6 - Akha

⁶ “Sahˬpaˬ Miˬyehˇ pyeuꞈ-eu ngaˇ nawˬ-ahˇ kuˇ-awˇ, miˇ tsaˬ kʼoeˇ taˆ yaw tsaˬ yaw dawˇ jeˬ jaˆ laˇ ni, nawˬ-ahˇ baoˬ biꞈ taˬ gʼaˬ-euˬ ma. Nawˬ-ahˇ gʼoe-eu laꞈ kʼoeˇ tsawˇ jeuˬ dawˬ tawˆ luꞈ-ahˇ, ngaˇ saˇ jaˇ dzaˬ taꞈ ma. Nawˬ-ahˇ gʼoe-awˇ tsawˇ jeuˬ dawˬ tawˆ luꞈ-euˬ kʼoeˇ taˆ, ngaˇ yaw shehꞈ bi bya ma.

Iˇsaˬyaˇ 42:6 ပူးပေါင်းရင်းမြစ်များ

Iˇsaˬyaˇ 26:3

Nui ma ziꞈ dah ni gʼeh-awˇ, nawˬ-ahˇ jah-eu tsawˇ haˬ deuˬ-ahˇ, byah dui dui-eu nui saˇ oꞈ-eu jeˬ, Sahˬpaˬ Miˬyehˇ nawˇ biꞈ nehˬ-awˬ.

Iˇsaˬyaˇ 27:3

“Sahˬpaˬ Miˬyehˇ pyeuꞈ-eu ngaˇ, yaˇ kmˇ kʼoeˇ kmˇ-ahˇ bo saˆ-eu ma. Maˬ tsehˆ leˇ ni iˇ cuꞈ shehˬ-awˇ, aˬ cawˬ maˬ bi laˆ cawˆ laˇ-eu gʼaˇ duˬ, uˬ ciꞈ nah gʼahˇ maˬ ehˇ haw piˇ-eu ma.

Iˇsaˬyaˇ 32:1

Haw yawˬ. Yaw tsaˬ yaw dawˇ laꞈ kʼoeˇ uˆ lahˇ-eu sahˬ paˬ tiˬ gʼaˬ doˆ le tehꞈ-a. miˇ kʼahˬ-ahˇ haw-eu pyaˆ-eu aˬ yuiꞈ aˬ tsu deuˬ kʼawꞈ, yaw sui yaw dawˇ laꞈ kʼoeˇ haw pyaˆ tehꞈ-a.

Iˇsaˬyaˇ 41:13

Ngaˇ-aˬ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ ma. Naw maꞈ-ahˇ ngaˇ gʼaˬ biꞈ-eu laꞈ kʼoeˇ, ‘Taˬ guˆ. Ngaˇ caw ba ma’ lehˇ ehˇ-eu ma.”

Iˇsaˬyaˇ 41:2

“Guiˇ deuˆ gʼaˬ nya-eu gʼaˬ-ahˇ nahˇ ma doˆ kʼehˬ paw neh aˬ suˇ gʼaˬ neh sheuˬ ahˇ leꞈ-awˇ, guiˇ kʼaˇ deuˆ gaˇ gʼaˬ leˇ ni, aˬ suˇ gʼaˬ jahˇ nehˬ ta. Sahˬ paˬ hawˇ-eu miˇ kʼahˬ deuˬ-ahˇ aˬ yawꞈ gʼaˬ leˇ ni, aˬ suˇ gʼaˬ caw ba ta. Aˬ yawꞈ-euˬ mi cehˇ neh aˬ yawꞈ maꞈ-ahˇ, kʼaˬ lehˇ loꞈ-ehˇ byehˆ nmˆ nehˬ-awˇ, aˬ yawꞈ-euˬ kaˆ aˬ yawꞈ maꞈ-ahˇ, gʼoˆ yoeˬ jaˬ lehˇ baw byaˆ-eu loꞈ-ehˇ jahˇ nehˬ-euˬ meh.

Iˇsaˬyaˇ 42:1

Sahˬpaˬ Miˬyehˇ ehˇ-eu, “Heu-aˬ, ngaˬ-euˬ zaˬ kʼaˆ ma. Ngaˇ hehˇ tehˇ nehˬ luꞈ-eu gʼaˬ ma. Aˬ yawꞈ-ahˇ ngaˇ tseˇ doˆ-awˇ, nui kʼahˇ shiˇ luꞈ-eu gʼaˬ ma. Aˬ yawꞈ kʼoeˇ taˆ ngaˬ-euˬ Yaw sahˇ jawˇ-awˇ, tsawˇ jeuˬ yawˬ jeuˬ na luꞈ kʼoeˇ taˆ, yaw tsaˬ yaw dawˇ jeˬ aˬ yawꞈ bi keuˆ le tehꞈ-a.

Iˇsaˬyaˇ 43:1

Iˇsaˬleˬlaˆ-oˇ, nawˬ-ahˇ beh-euˬ Miˬyehˇ heu loꞈ-ehˇ ehˇ-eu meh. “Taˬ guˆ. Nawˬ-ahˇ ngaˇ ka kʼoꞈ ma. Nawˬ-ahˇ ngaˇ tsawˇ myahˇ kuˇ-awˇ tseˇ-euˬ ma. Nawˇ ngaˬ-euˬ tsawˇ haˬ ma.

Iˇsaˬyaˇ 45:1

Guˇluˆ-ahˇ sahˬ paˬ bi geuꞈ-eu gʼaˇ duˬ, Sahˬpaˬ Miˬyehˇ tseˇ doˆ-euˬ meh. Aˬ cawˬ miˇ kʼahˬ-ahˇ guiˇ bi deuˆ gʼaˬ-eu gʼaˇ duˬ, Guˇluˆ-ahˇ tseˇ doˆ taˬ-euˬ meh. Miˇ kʼahˬ sahˬ paˬ deuˬ-euˬ baoˬ lehˆ dzeh-eu gʼaˇ duˬ, aˬ yawꞈ-ahˇ pyehˬ gʼeh leꞈ-euˬ meh. Aˬ yawꞈ gʼaˇ duˬ Sahˬpaˬ Miˬyehˇ, meuˬ lahˇ kʼehˬ laˇ gʼoˆ deuˬ pah dzeh tehꞈ-a.

Iˇsaˬyaˇ 45:13

Yaw tsaˬ yaw dawˇ jeˬ bi mˇ-eu gʼaˇ duˬ, Guˇluˆ-ahˇ ngaˇ gʼeu tuˇ-euˬ ma. Aˬ yawꞈ iˇ-eu gaˇ ma ngaˇ shaˇ dawˇ ma. Ngaˬ-euˬ Yeˬluˇsaˬlehˬ meuˬ aˬ yawˬ gawˬ muiˬ-awˇ, aˬ cawˬ miˇ kʼahˬ-ahˇ nyehꞈ gʼeh-euˬ ngaˬ-euˬ tsawˇ haˬ deuˬ-ahˇ, aˬ yawꞈ pyehˬ kʼoꞈ doˆ laꞈ tehꞈ-a. Ehˇ kʼawꞈ, laꞈ nmꞈ nmꞈ-awˇ aˇ poeˬ biꞈ-euˬ miˇ neh, aˬ yawꞈ kʼoeˇ loꞈ-ehˇ mˇ-eu maˬ ngeuˇ-a” lehˇ, Baoˬ huiˬ-eu Miˬyehˇ pyeuꞈ-eu Sahˬpaˬ Miˬyehˇ ehˇ-eu meh.

Iˇsaˬyaˇ 49:6

Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh. “Ngaˬ-euˬ zaˬ kʼaˆ-oˇ, ngaˇ nawˬ-ahˇ, huiˬ dzehˬ-eu gaˇ paˇ bi mˇ ma. Dzeuˇ-iˇ-euˬ Iˇsaˬleˬlaˆ tsawˇ haˬ-ahˇ sheuˬ kʼoꞈ doˆ-awˇ, aˬ yawꞈ maꞈ dehꞈ doˆ dzaˬ laˇ ni ya mˇ-eu gaˇ tehꞈ-ehˇ maˬ ngeuˇ, mˬ dzeˇ miˇ dzeˇ keuˆ ni ka kʼoꞈ-eu jeˬ za ni, nawˬ-ahˇ miˇ tsaˬ-euˬ yaw shehꞈ paˇ bi geuꞈ-eu ma.”

Iˇsaˬyaˇ 49:8

Aˬ yawꞈ-euˬ tsawˇ jeuˬ-ahˇ Sahˬpaˬ Miˬyehˇ ehˇ-eu, “Nawˬ-ahˇ ka kʼoꞈ-eu aˇ yamˬ tsaˬ laˇ ngeh, nawˬ-euˬ myaˆ pyawˬ naˇ mehˇ-ahˇ ngaˇ haw-awˇ, nawˬ-euˬ shaˇ dawˬ ngaˇ naˇ haˬ ma. Nawˬ-ahˇ ngaˇ bo saˆ haw piˇ-awˇ, nawˬ-ahˇ gʼoe-eu laꞈ kʼoeˇ tsawˇ jeuˬ dawˬ tawˆ luꞈ-ahˇ, ngaˇ dawˬ ma saˇ jaˇ dzaˬ taꞈ ma. Nymˬ-mˇ yaw cawˆ-ehˇ jaˆ-eu nawˬ-euˬ miˇ kʼahˬ-ahˇ, nawˬ-ahˇ paˇ bi jawˇ kʼoꞈ laˇ ma.

Yeˬlaˬmiˇ 12:16

Aˬ yawꞈ maꞈ-euˬ nui ma gʼawˇ mawˇ dawˬ tawˆ luꞈ, ngaˬ-euˬ tsawˇ jeuˬ-euˬ uˬ duˬ tahˬ-eu zahˇ sahˇ kʼoꞈ-ahˇ ha geuꞈ-awˇ, aˇ hu Baˬlaˇ miˬ yehˇ-euˬ tsawˇ myahˇ-ahˇ gʼoe-awˇ saˇ jaˇ dzaˬ ni ngaˬ-euˬ tsawˇ haˬ deuˬ-ahˇ aˬ yawꞈ maꞈ neh mehˬ nehˬ taˬ-euˬ jaˆ-eu loꞈ-ehˇ, nymˬ-mˇ aˬ yawꞈ maꞈ, “Sahˬpaˬ Miˬyehˇ kʼaˇ dehꞈ kʼoeˇ keuˆ ni” lehˇ ehˇ-awˇ saˇ jaˇ dzaˬ naˇ, aˬ yawꞈ maꞈ kʼawꞈ ngaˬ-euˬ tsawˇ jeuˬ ya pyeuꞈ-awˇ, baw le za le tehꞈ-a.

Maꞈtehˬ 26:28

Heu-aˬ, tsawˇ haˬ gʼawˬ mya ni-euˬ iˬ baˇ bi buˬ bi law-iˇ-eu gʼaˇ duˬ yoeˇ le-euˬ, Miˬyehˇ-euˬ dawˬ ma saˇ jaˇ-ahˇ taꞈ-eu ngaˬ-euˬ shiˬ ma.

Luˇkaꞈ 2:32

Lawˇ ciꞈ zaˬ deuˬ mawˇ nya laˇ ni, yaw shehꞈ bya nehˬ-eu jeˬ pyeuꞈ-awˇ, nawˬ neh kuˇ-euˬ tsawˇ jeuˬ pyeuꞈ-eu, Iˇsaˬleˬlaˆ tsawˇ haˬ deuˬ-ahˇ, Yaw shehꞈ kʼahˬ sehˇ bi huiˬ-euˬ meh.”

Yoˇhaˬ 8:12

Kʼoeˇ naˇ, Paˬliˬsehˇ deuˬ-ahˇ Yeˬsuˇ heu loꞈ-ehˇ ehˇ nehˬ-euˬ meh. “Ngaˇ-aˬ, miˇ tsaˬ-euˬ yaw shehꞈ ma. Ngaˬ-euˬ mehˬ nah kʼaˇ caw teh-eu tsawˇ haˬ-aˬ, dehꞈ-eu saꞈ laˇ yaw shehꞈ za-awˇ, yaw zahˇ laꞈ kʼoeˇ maˬ paˇ cah-aˇ.”

Gʼaˬkʼehˇ 13:47

Aˬ jeˬ miˇ neh ehˇ naˇ, SahˬpaˬMiˬyehˇ neh nga maꞈ-ahˇ biꞈ taˬ-euˬ dawˬ-aˬ, heu loꞈ-ehˇ meh. ‘Mˬ dzeˇ miˇ dzeˇ tuˆ gaˇ keuˆ ni, ka kʼoꞈ-eu jeˬ za-eu gʼaˇ duˬ, aˬ cawˬ tsawˇ jeuˬ-ahˇ bya nehˬ ni, nawˬ-ahˇ yaw shehꞈ bi pyeuꞈ-eu ma”’

Gʼaˬkʼehˇ 26:23

Ka li-aˬ, shiˇ-euˬ jeˬ-ahˇ ya daˬ-awˇ, gʼoꞈ dehꞈ beh beh laˇ-euˬ gʼaˬ pyeuꞈ-awˇ Yuˇ daˆ tsawˇ haˬ-ahˇ maˬ ehˇ, aˬ cawˬ tsawˇ jeuˬ deuˬ-ahˇ maˬ ehˇ, ka kʼoꞈ-eu yaw shehꞈ gaˇ kawˆ tahˇ kʼawˬ tehꞈ-a lehˇ ehˇ-eu gaˇ kawˆ kʼoeˇ hmˬ meh.”

2 Gawˇliˬtu 1:20

Aˬ jeˬ miˇ neh ehˇ naˇ, Miˬyehˇ neh saˇ jaˇ kʼaˇ dzaˬ taˬ-euˬ jeˬ dawˬ tawˆ luꞈ, aˬ yawꞈ-euˬ laꞈ kʼoeˇ “Ngeuˇ meh” lehˇ ya mawˇ-eu meh. Kʼoeˇ miˇ neh, Miˬyehˇ-euˬ yaw shehꞈ kʼahˬ sehˇ-ahˇ taˬ huiˬ-eu laꞈ kʼoeˇ “Aˬ miˬ” lehˇ aˬ dui ehˇ ngeh, Yeˬsuˇ Ka li laꞈ kʼoeˇ aˬ dui ehˇ-eu ma.

HeˬByehˇ 12:24

Dawˬ ma saˇ jaˇ yaw shuiꞈ lehˬ hmˬ laˆ saˆ-euˬ gʼaˬ pyeuꞈ-eu Yeˬsuˇ jawˇ gaˇ maˬ ehˇ, Aˬbeˬlaˆ-euˬ shiˬ naˆ maˬ tseˇ baoˬ huiˬ dzehˬ-eu saˇ jaˇ dawˬ kawˬ pyeuꞈ-eu byaˆ shehˬ-euˬ shiˬ jaˆ gaˇ maˬ ehˇ, naw maꞈ laˇ-euˬ jeˬ pyeuꞈ-eu meh.

HeˬByehˇ 13:20

Mˬ maˬ maˬ byaˆ zaˇ ziˇ ziꞈ-eu dawˬ ma saˇ jaˇ-euˬ shiˬ baˬ da neh Huiˬ dui dui-eu Yawˇ bo-eu yaw sahˇ pyeuꞈ laˇ-euˬ aˬ dui-euˬ Sahˬpaˬ Yeˬsuˇ-ahˇ bi gʼoꞈ dehꞈ laˇ-euˬ gʼaˬ pyeuꞈ-eu nui saˇ oꞈ-eu jeˬ biꞈ-eu Miˬyehˇ-aˬ,

HeˬByehˇ 7:2

Aˬbyaˬhaˬ gʼeh, aˬ yawꞈ neh guiˇ kʼaˇ deuˆ za laꞈ-euˬ jeˬ dawˬ tawˆ luꞈ laꞈ kʼoeˇ, tseˇ bymˇ tiˬ bymˇ yuˇ doˆ-awˇ aˬ yawꞈ-ahˇ biꞈ nehˬ-euˬ meh. (Maˬlaˬkiˇsaˬdehˇ lehˇ ehˇ-eu tsawˇ myahˇ heu myahˇ-euˬ dawˬ tsuiꞈ yaw beh hmˬ-aˬ, “Yaw tsaˬ yaw dawˇ jeˬ-euˬ Sahˬpaˬ” lehˇ ehˇ mawꞈ-eu meh. Dawˬ tsuiꞈ nyiˬ hmˬ tiˬ hmˬ pyeuꞈ-eu aˬ yawꞈ-ahˇ “Saˬleˬ meuˬ-euˬ Sahˬpaˬ” lehˇ ehˇ-eu kʼoeˇ-aˬ, “Nui saˇ oꞈ-eu jeˬ-euˬ Sahˬpaˬ” lehˇ ehˇ mawꞈ-eu meh.)

HeˬByehˇ 7:26

Kʼoeˇ baˬ da neh, Yeˬsuˇ-aˬ, aˬ dui kʼaˇ loˬ-eu jeˬ mˇ byah nehˬ nya-eu Piˇma Yaw huiˬ gʼaˬ pyeuꞈ-eu meh. Aˬ yawꞈ-aˬ, yaw muiˬ yaw shawˇ meh. Ehˇ kʼaˇ tiˬ pawꞈ-iˬ maˬ za-eu uˬ taꞈ, iˬ baˇ tiˬ pawꞈ-iˬ maˬ ahˇ-a. Iˬ baˇ zaˬ deuˬ nehˬ-ehˇ maˬ bi keuˬ ni aˬ yawꞈ-ahˇ Miˬyehˇ yuˇ doˆ taˬ-awˇ, mˬ naˆ maˬ tseˇ goˇ-eu tiˆ-ahˇ ciˬ huiˬ ciˬ mahˇ keuˆ nehˬ-euˬ meh.

HeˬByehˇ 8:6

Miˬyehˇ hawˇ-eu aˬ yawꞈ-euˬ tsawˇ haˬ yaw kaˬ-ahˇ Yeˬsuˇ neh lehˬ hmˬ taˬ-euˬ dawˬ ma saˇ jaˇ kʼoeˇ-aˬ, muiˬ dzehˬ byah dzehˬ-eu saˇ jaˇ dawˬ-ahˇ gʼoe-awˇ mˇ taˬ-euˬ miˇ neh, dawˬ ma saˇ jaˇ yaw oeˇ naˆ maˬ tseˇ muiˬ dzehˬ byah dzehˬ-eu dawˬ ma saˇ jaˇ pyeuꞈ-eu meh. Kʼoeˇ loꞈ-ehˇ duˇ ni, piˇ ma kʼoeˇ deuˬ mˇ luꞈ-eu gaˇ naˆ maˬ tseˇ huiˬ dzehˬ-eu gaˇ, Yeˬsuˇ-ahˇ aˬ nehˬ taˬ-euˬ meh.

HeˬByehˇ 9:15

Kʼoeˇ baˬ da neh, dawˬ ma saˇ jaˇ yaw shuiꞈ pyeuꞈ leˇ ni mˇ-eu gʼaˬ-aˬ, Ka li meh. Miˬyehˇ neh kuˇ doˆ-euˬ tsawˇ haˬ deuˬ mˬ maˬ maˬ byaˆ zaˇ ziˇ guiˬ lahˬ jeˬ biˇ za ni, aˬ yawꞈ kʼoeˇ loꞈ-ehˇ mˇ-euˬ meh. Dawˬ ma saˇ jaˇ yaw beh hmˬ-ahˇ gʼoe-awˇ dehꞈ luꞈ ngeh, Ka li shiˇ dah-awˇ tsawˇ haˬ zaˬ deuˬ-ahˇ yawˬ ha neh mˇ-euˬ iˬ baˇ-ahˇ bi buˬ-iˇ nya-euˬ miˇ neh, kʼoeˇ loꞈ-ehˇ mˇ pyeuꞈ nya-euˬ meh.

1 Beˬtuˆluˆ 2:9

Ehˇ kʼawꞈ, naw maꞈ-aˬ, tseˇ doˆ-euˬ tsawˇ haˬ pyeuꞈ-awˇ, Sahˬpaˬ-euˬ piˇ ma deuˬ pyeuꞈ-eu meh. Muiˬ-eu shawˇ-eu tsawˇ haˬ pyeuꞈ-awˇ, Miˬyehˇ-euˬ tsawˇ haˬ pyeuꞈ-eu meh. Miˬyehˇ neh mˇ-euˬ zahˬ leˇ paˬ-ehˇ gʼeh-eu gaˇ deuˬ aˬ cawˬ-ahˇ bi ja meh-eu gʼaˇ duˬ, naw maꞈ-ahˇ Miˬyehˇ tseˇ doˆ-euˬ meh. Aˬ yawꞈ-aˬ, yaw zahˇ laꞈ kʼoeˇ naw maꞈ-ahˇ kuˇ doˆ-awˇ, zahˬ leˇ paˬ-ehˇ gʼeh-eu aˬ yawꞈ-euˬ yaw shehꞈ laꞈ kʼoeˇ sheuˬ uˇ nehˬ laꞈ-euˬ meh.