Iˇsaˬyaˇ 14:2 - Akha

² Iˇsaˬleˬlaˆ tsawˇ haˬ deuˬ aˬ yawꞈ maꞈ-euˬ miˇ kʼahˬ laꞈ kʼoeˇ gʼoꞈ jawˇ leˇ nya ni, tsawˇ jeuˬ gʼawˬ mya jeuˬ aˬ yawꞈ maꞈ-ahˇ caw ba nehˬ-awˇ, tsawˇ jeuˬ kʼoeˇ deuˬ Iˇsaˬleˬlaˆ miˇ kʼahˬ laꞈ kʼoeˇ aˬ yawꞈ maꞈ-euˬ zaˬ kʼaˆ geuꞈ laˇ tehꞈ-a. Yaw beh aˬ yawꞈ maꞈ-ahˇ deuˆ gʼaˬ-euˬ tsawˇ haˬ deuˬ-ahˇ aˬ yawꞈ maꞈ paˇ deuˆ gʼaˬ-awˇ, aˬ yawꞈ maꞈ-ahˇ kʼehˬ-euˬ tsawˇ haˬ deuˬ kʼoeˇ taˆ, aˬ yawꞈ maꞈ paˇ uˆ lahˇ tehꞈ-a.

Iˇsaˬyaˇ 14:2 ပူးပေါင်းရင်းမြစ်များ

Eˇzaˬlaˬ 2:65

Kʼaˬ dzeˇ zaˬ hawˇ-eu zaˬ miˬ zaˬ zaˬ kʼaˆ deuˬ, shiꞈ heˇ smˬ yaˇ smˬ tseˇ shiꞈ gʼaˬ, Caˇ dawˬ caˇ-eu kʼaˬ dzeˇ zaˬ hawˇ-eu zaˬ miˬ zaˬ deuˬ, nyiˬ yaˇ gʼaˬ,

Jaceuq 68:18

Tsawˇ haˬ gʼawˬ mya ni aˬ yawꞈ nyehꞈ gʼeh-awˇ, gawˬ jawˬ yaw goˇ-ahˇ daˆ leˇ tehꞈ-a. Aˬ yawꞈ-ahˇ puiˬ-eu tsawˇ haˬ deuˬ-ahˇ keuˆ ni, aˬ yawꞈ-ahˇ laꞈ sawˬ biꞈ laˇ-awˇ, mˬ maˬ maˬ byaˆ zaˇ ziˇ Sahˬpaˬ Miˬyehˇ kʼoeˇ gaˇ jawˇ tehꞈ-a.

Iˇsaˬyaˇ 18:7

Baoˬ huiˬ-awˇ aˬ cawˬ tsawˇ jeuˬ-ahˇ gʼaˬ leˇ-eu miˇ neh, dawˬ peh gaˇ mahˇ jawˇ-eu tsawˇ jeuˬ deuˬ ya guˆ-eu, lawˇ baˬ gʼawˬ mya gawˆ yoeˇ paˆ-eu miˇ kʼahˬ-ahˇ jawˇ-eu, shaˬ jiˇ muiˬ-awˇ caˇ gawˬ goˇ-eu tsawˇ haˬ deuˬ neh, damˬ nehˬ lawˇ nehˬ laˇ-euˬ jeˬ-ahˇ, Baoˬ huiˬ-eu Sahˬpaˬ Miˬyehˇ ha geuꞈ nehˬ-eu aˇ nah keuˆ tehꞈ-a. Baoˬ huiˬ-eu Sahˬpaˬ Miˬyehˇ-ahˇ uˬ duˬ tahˬ-eu jawˇ duˬ, Ziˇoˬ gawˬ jawˬ-ahˇ aˬ yawꞈ maꞈ laˇ-awˇ, damˬ laˇ lawˇ laˇ tehꞈ-a.

Iˇsaˬyaˇ 31:8

“Tsawˇ haˬ zaˬ neh maˬ tehˆ-euˬ mi cehˇ kʼehˬ-ahˇ, tsawˇ haˬ zaˬ neh maˬ deuˆ-euˬ mi cehˇ kʼehˬ-ahˇ, Aˬshuˇliˆ tsawˇ haˬ deuˬ ya shiˇ tehꞈ-a. Mi cehˇ kʼehˬ-ahˇ ya cehˆ byaˆ-awˇ, aˬ yawꞈ maꞈ-euˬ zaˬ yo aˬ cawˬ zaˬ kʼaˆ ya geuꞈ tehꞈ-a.

Iˇsaˬyaˇ 45:14

Iˇsaˬleˬlaˆ-ahˇ Sahˬpaˬ Miˬyehˇ ehˇ nehˬ-eu, “Iˇjiˇtuˆ hawˇ-eu Suˬdaˬ miˇ kʼahˬ laꞈ kʼoeˇ jaˆ-eu pyuˇ shuiˇ myawˬ gahˬ, dawˬ tawˆ luꞈ nawˬ-euˬ meh. Caˇ gawˬ goˇ-eu Seˬbaˇ tsawˇ haˬ kʼoeˇ deuˬ nawˬ-euˬ zaˬ kʼaˆ geuꞈ-awˇ, shmˇ caˆ daˬ-awˇ nawˬ-euˬ mehˬ nah caw teh tehꞈ-a. Naw maꞈ mehˬ shi aˬ yawꞈ maꞈ awˆ byaˆ-awˇ, heu loꞈ-ehˇ ehˇ tehꞈ-a. ‘Naw maꞈ nehˬ-ehˇ Miˬyehˇ jawˇ meh. Aˬ yawꞈ tehꞈ-ehˇ maˇ maˇ ni Miˬyehˇ meh.

Iˇsaˬyaˇ 49:22

Dawˬ tawˆ kʼoeˇ taˆ uˆ lahˇ luꞈ-eu Sahˬpaˬ Miˬyehˇ , aˬ yawꞈ-euˬ tsawˇ haˬ-ahˇ heu loꞈ-ehˇ ehˇ-eu meh. “Miˇ kʼahˬ tsawˇ jeuˬ deuˬ-ahˇ ngaˇ laꞈ liˆ liˆ nehˬ ngeh, nawˬ-euˬ zaˬ deuˬ aˬ yawꞈ maꞈ sheuˬ kʼoꞈ laꞈ tehꞈ-a.

Iˇsaˬyaˇ 49:23

Sahˬ paˬ deuˬ nawˬ-euˬ gʼaˇ duˬ aˬ da-ahˇ duˇ-awˇ, sahˬ paˬ ma deuˬ aˬ ma-ahˇ duˇ tehꞈ-a. Aˬ yawꞈ maꞈ nawˬ-euˬ mehˬ shi awˆ byaˆ-awˇ, nawˬ-ahˇ taˬ huiˬ taˬ mahˇ tehꞈ-a. Aˬ yawꞈ maꞈ nui ma nahˬ yu ni taˬ-eu laꞈ kʼoeˇ, nawˬ-ahˇ yaw zeu baw nehˬ tehꞈ-a. Kʼoeˇ naˇ, ngaˇ Sahˬpaˬ Miˬyehˇ pyeuꞈ-eu nawˇ ya siˬ tehꞈ-a. Ngaˇ caw ba nehˬ laꞈ gaˇ dawˬ-eu tsawˇ haˬ, daˬ maˬ ya ga-eu nawˇ siˬ duˬ tehꞈ-a.”

Iˇsaˬyaˇ 49:25

Sahˬpaˬ Miˬyehˇ ehˇ kʼoꞈ nehˬ-eu, “Kʼoeˇ loꞈ-ehˇ gʼeh-eu jeˬ maˇ maˇ ni pyeuꞈ doˆ laˇ tehꞈ-a. Yehˇ neh paꞈ taˬ-euˬ tsawˇ haˬ bi sheuˬ kʼoꞈ geuꞈ-awˇ, guˆ laˇ paˬ-ehˇ gʼeh-eu gʼaˬ neh deuˆ za-euˬ myawˬ gahˬ deuˬ bi ceh geuꞈ jiˇ tehꞈ-a. Nawˬ-ahˇ guiˇ kʼaˇ deuˆ-eu deuˬ-ahˇ ngaˇ guiˇ deuˆ-awˇ, nawˬ-euˬ zaˬ deuˬ-ahˇ ngaˇ ka kʼoꞈ nehˬ ma.

Iˇsaˬyaˇ 54:3

Nawˬ-euˬ miˇ kaˬ yawˬ pyawˬ na luꞈ teh jiˆ taˬ-awˬ. Aˬ cawˬ tsawˇ jeuˬ neh ceh geuꞈ taˬ-euˬ miˇ tsaˬ deuˬ, nawˬ-euˬ tsawˇ haˬ deuˬ paˇ za kʼoꞈ tehꞈ-a. Meuˬ tsoeˬ tsoeˬ-iˇ-euˬ meuˬ kʼoeˇ deuˬ, tsawˇ haˬ paˇ jawˇ byah jiˇ tehꞈ-a.

Iˇsaˬyaˇ 60:14

Nawˬ-ahˇ kʼehˬ-euˬ tsawˇ haˬ deuˬ-euˬ aˬ li deuˬ laˇ keuˆ-awˇ, awˆ byaˆ-awˇ nawˬ-ahˇ yaw zeu baw tehꞈ-a. Yaw beh nawˬ-ahˇ yehˬ bawˬ-ehˇ gʼeh-euˬ deuˬ, nawˬ-euˬ aˬ kuiˇ dawˬ peh uˬ duˬ tahˬ laˇ tehꞈ-a. Aˬ yawꞈ maꞈ nawˬ-ahˇ Sahˬpaˬ Miˬyehˇ-euˬ meuˬ lehˇ kuˇ-awˇ, Iˇsaˬleˬlaˆ-euˬ muiˬ-eu shawˇ-eu Miˬyehˇ-euˬ meuˬ lehˇ kuˇ tehꞈ-a.

Iˇsaˬyaˇ 60:4

Nawˬ-euˬ tiˬ jawˬ myaˆ nuiˆ byeh-awˇ haw-awˬ. Nawˬ-euˬ tsawˇ haˬ gʼoꞈ laˇ-eu lehˇ uiˬ leˇ luꞈ meh. Gaˇ mahˇ jawˇ-eu nawˬ li deuˬ gʼoꞈ doˆ laˇ-awˇ, nawˬ buˇ deuˬ-ahˇ aˬ cawˬ ciˬ kʼoꞈ ha laˇ tehꞈ-a.

Iˇsaˬyaˇ 61:5

Ngaˬ-euˬ tsawˇ haˬ deuˬ-oˇ, boeˇ miˬ siˬ kʼaˬ deuˬ naw maꞈ-ahˇ mˇ cu tehꞈ-a. Naw maꞈ-euˬ yawˇ aˬ yawꞈ maꞈ bo nehˬ-awˇ, naw maꞈ-euˬ yaˇ aˬ yawꞈ maꞈ mˇ nehˬ-awˇ, naw maꞈ-euˬ aˬ gaꞈ yaˇ kmˇ aˬ yawꞈ maꞈ bo saˆ tehꞈ-a.

Iˇsaˬyaˇ 66:12

Sahˬpaˬ Miˬyehˇ heu loꞈ-ehˇ ehˇ-eu meh. “Maˬ cawˆ-iˇ nya-eu baw le za le-eu guiˬ lahˬ, naw maꞈ-ahˇ ngaˇ biꞈ ma. Maˬ gui iˇ-eu iˇ cuꞈ lawˇ baˬ loꞈ-ehˇ, miˇ kʼahˬ tsawˇ jeuˬ-euˬ pyuˇ shuiˇ myawˬ gahˬ deuˬ, naw maꞈ jawˇ gaˇ yoeˇ le tehꞈ-a. Aˬ ma-euˬ bawˇ kʼahˇ laꞈ kʼoeˇ ciˬ ahˇ-awˇ, gaˬ huiˬ haw huiˬ-euˬ zaˬ-ahˇ naw maꞈ duˇ tehꞈ-a.

Yeˬlaˬmiˇ 30:16

Ehˇ kʼawꞈ, naw maꞈ-ahˇ kawꞈ dzaˬ-euˬ tsawˇ haˬ kʼoeˇ deuˬ, aˬ cawˬ neh kawꞈ dzaˬ gaˇ paˇ ya daˬ-awˇ, naw maꞈ-ahˇ muiˇ-eu tsawˇ haˬ dawˬ tawˆ luꞈ, aˬ cawˬ miˇ kʼahˬ-ahˇ bi nyehꞈ gʼeh tehꞈ-a. Naw maꞈ-ahˇ kʼaˇ kʼaˆ dzaˬ-euˬ tsawˇ haˬ, aˬ cawˬ neh kʼaˆ dzaˬ gaˇ ya daˬ-awˇ, naw maꞈ-euˬ mˇ myawˬ-ahˇ ceh geuꞈ-euˬ deuˬ, aˬ cawˬ neh mˇ myawˬ bi ceh geuꞈ tehꞈ-a.

Yeˬlaˬmiˇ 49:2

Ehˇ kʼawꞈ, Aˬmoˬ tsawˇ jeuˬ-euˬ meuˬ meuˬ ma pyeuꞈ-eu Laˬbah meuˬ-ahˇ jawˇ-eu tsawˇ haˬ deuˬ guiˇ deuˆ le-eu teˇ saˇ ya gaˬ-awˇ, meuˬ cawˆ-iˇ-awˇ pu deuˬ miˬ dzaˬ bi keuˬ dzeh jiˇ ngeh keuˆ ni, aˬ yawꞈ maꞈ kʼoeˇ taˆ bi keuˆ le-eu lehˇ ngaˬ neh lehˬ hmˬ taˬ-euˬ aˇ yamˬ keuˆ le-eu dawˬ peh peh laˇ-euˬ meh. Kʼoeˇ ngeh jawˇ, Iˇsaˬleˬlaˆ tsawˇ haˬ deuˬ aˬ cawˬ-euˬ laꞈ-ahˇ ahˇ leˇ-euˬ yawˬ ha-euˬ miˇ kʼahˬ paˇ za kʼoꞈ tehꞈ-a.

Yeˬsaˬgeˬlaˇ 39:10

Aˬ yawꞈ maꞈ deh ga-ahˇ miˬ dzaˬ gʼoˆ-eu maˬ loˬ-ehˇ, sahˬ kʼaˆ-ahˇ aˇ bawˇ tuˇ-awˇ miˬ dzaˬ kʼehꞈ-eu maˬ loˬ-a. Aˬ jeˬ miˇ neh ehˇ naˇ, miˬ dzaˬ doꞈ-eu gʼaˇ duˬ byehˇ dzeh taˬ-euˬ guiˇ deuˆ-eu keu ka deuˬ ga-eu meh. Aˬ yawꞈ maꞈ-ahˇ pyuˇ shuiˇ myawˬ gahˬ ceh geuꞈ laˇ-euˬ tsawˇ haˬ deuˬ-euˬ pyuˇ shuiˇ myawˬ gahˬ deuˬ, aˬ yawꞈ maꞈ paˇ ya ceh geuꞈ tehꞈ-a” lehˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ ehˇ-eu meh.

Daˬyeˬlaˇ 7:18

Ehˇ kʼawꞈ, Dawˬ tawˆ kʼoeˇ taˆ huiˬ-eu Miˬyehˇ-euˬ tsawˇ haˬ deuˬ dzoeˬ dzaˬ-eu baoˬ za-awˇ, aˬ yawꞈ maꞈ-euˬ miˇ kʼahˬ mˬ maˬ maˬ byaˆ zaˇ ziˇ ziꞈ tehꞈ-a’ lehˇ ehˇ-eu meh.

Yawˇlaˆ 3:8

Naw maꞈ-euˬ aˬ buˇ aˬ li deuˬ Yuˇdaˆ tsawˇ haˬ deuˬ-ahˇ ya ahˬ nehˬ gaˇ keuˆ ni ngaˇ jahˇ ma. Aˬ buˇ aˬ li kʼoeˇ deuˬ-ahˇ, gaˇ mahˇ kaˬ gaˇ jawˇ-eu Saˬbyaˬ tsawˇ jeuˬ-ahˇ aˬ yawꞈ maꞈ paˇ ahˬ dzaˬ poˆ tehꞈ-a lehˇ, Sahˬpaˬ Miˬyehˇ pyeuꞈ-eu ngaˇ ehˇ-eu ma.

Uˬ duˬ 25:44

Naw maꞈ zaˬ kʼaˆ cu mawꞈ naˇ, dawˬ peh jaˆ-eu miˇ kʼahˬ deuˬ laꞈ kʼoeˇ poˆ zeuˇ-iˇ-awˬ.

Aaˇbaˬdiˇ 1:17

“Ehˇ kʼawꞈ, Ziˇoˬ gawˬ jawˬ kʼoeˇ taˆ, tiˬ paˆ na deuˬ ya cehˆ buˬ-awˇ, gawˬ jawˬ kʼoeˇ jawˬ muiˬ-eu shawˇ-eu, jawˇ duˬ tiˬ tsahˇ pyeuꞈ laˇ tehꞈ-a. Yaˬkoˆ-euˬ zaˬ deuˬ uˆ deuˬ-aˬ, aˬ yawꞈ maꞈ-ahˇ oꞈ-eu miˇ kʼahˬ, aˬ yawꞈ maꞈ paˇ za kʼoꞈ tehꞈ-a.

Zaˬkaˬliˇ 2:13

Tsawˇ haˬ yawˬ gʼaˬ na luꞈ Sahˬpaˬ Miˬyehˇ mehˬ shi ciˬ cuˇ ni jawˇ-awˬ. Aˬ jeˬ miˇ neh ehˇ naˇ, aˬ yawꞈ-euˬ muiˬ-eu shawˇ-eu jawˇ duˬ-ahˇ neh aˬ yawꞈ luˆ laˇ-awˇ oe luꞈ meh.

Zaˬkaˬliˇ 2:9

“Sahˬpaˬ Miˬyehˇ naw maꞈ-ahˇ guiˇ deuˆ-awˇ, naw maꞈ-euˬ zaˬ kʼaˆ deuˬ neh naw maꞈ-ahˇ tahˇ joe paˇ bi joe dzaˬ gaˇ keuˆ tehꞈ-a” lehˇ, Sahˬpaˬ Miˬyehˇ ehˇ-eu meh. Kʼoeˇ loꞈ-ehˇ pyeuꞈ laˇ ngeh jawˇ, Baoˬ huiˬ-eu Sahˬpaˬ Miˬyehˇ neh ngaˬ-ahˇ kʼehˇ gʼeh leꞈ-euˬ gaˇ kawˆ, tsawˇ haˬ yawˬ gʼaˬ na luꞈ ya siˬ duˬ tehꞈ-a.

Luˇkaꞈ 12:45

Ehˇ kʼawꞈ, zaˬ kaˆ kʼoeˇ gʼaˬ ‘Ngaˬ-eu baw leˬ yaw awˬ awˬ-ehˇ maˬ gʼoꞈ laˇ-aˇ’ lehˇ yawˬ haˇ yawˬ ha ehˇ-awˇ, kʼaˬ dzeˇ zaˬ zaˬ kʼaˆ deuˬ hawˇ-eu zaˬ miˬ zaˬ zaˬ kaˆ deuˬ-ahˇ diˬ diˬ-ehˇ, dzaˬ yehꞈ dawˇ yehꞈ-awˇ jawˇ naˇ,

Lormav 15:27

Kʼoeˇ loꞈ-ehˇ noeˬ tsehˆ-euˬ kʼoeˇ-aˬ, aˬ yawꞈ maꞈ yawˬ haˇ yawˬ ha noeˬ siˬ-awˇ noeˬ tsehˆ-euˬ jeˬ pyeuꞈ-eu meh. Ehˇ kʼawꞈ, maˇ maˇ ni ehˇ leꞈ naˇ, aˬ yawꞈ maꞈ kʼoeˇ deuˬ-ahˇ ya caw ba-eu kʼaˆ behˆ jaˆ-eu meh. Aˬ jeˬ miˇ neh ehˇ naˇ, Yuˇdaˆ tsawˇ haˬ deuˬ neh Yuˇdaˆ tsawˇ haˬ maˬ ngeuˇ-eu deuˬ-ahˇ saꞈ laˇ paw-euˬ guiˬ lah caw ba nehˬ-euˬ-aˬ, Yuˇdaˆ tsawˇ haˬ maˬ ngeuˇ-eu deuˬ kʼawꞈ Yuˇdaˆ tsawˇ haˬ deuˬ-ahˇ shiˬ shaˬ jiˇ paw-euˬ guiˬ lahˬ caw ba nehˬ paˬ-ehˇ gʼeh-eu meh.

2 Gawˇliˬtu 10:5

Miˬyehˇ-ahˇ siˬ nya-eu jeˬ-ahˇ kʼaˇ laˆ tsoeˬ-eu nui ma huiˬ-eu mahˇ-eu jeˬ-ahˇ nga maꞈ gʼeu ka-eu ma. Nui noeˬ yawˬ hmˬ na luꞈ-ahˇ nga maꞈ paꞈ cuꞈ-awˇ, Ka li-euˬ ehˇ dawˬ bi naˇ haˬ-eu ma.

Gaˬlaˬtiˆ 5:13

Aˬ yuiꞈ aˬ nyiˇ Ka li zaˬ deuˬ-oˇ, naw maꞈ-aˬ, bi buˬ-iˇ-eu gʼaˇ duˬ kuˇ doˆ gʼaˬ-euˬ tsawˇ haˬ meh. Ehˇ kʼawꞈ, buˬ-iˇ-euˬ kʼoeˇ-aˬ, naw maꞈ-euˬ shiˬ shaˬ jiˇ nui loˆ mˇ-eu gʼaˇ duˬ taˬ bi pyeuꞈ. Gʼoeˇ-eu gaˬ-eu laꞈ kʼoeˇ tiˬ gʼaˬ tiˇ gʼaˬ ngehˬ gʼeh-awˬ.

Eˇpeˇsu 4:8

Jaˇliꞈ laꞈ kʼoeˇ heu loꞈ-ehˇ ehˇ taˬ-euˬ jaˆ-eu meh. “Aˬ yawꞈ yaw goˇ-ahˇ daˆ leˇ ngeh, tsawˇ haˬ gʼawˬ mya ni nyehꞈ gʼeh-awˇ, miˇ tsaˬ tsawˇ haˬ zaˬ-ahˇ, laꞈ sawˬ biꞈ nehˬ-euˬ meh.”

Panmaeq 3:9

Naˇ haˬ-awˬ. Yuˇdaˆ tsawˇ haˬ maˬ ngeuˇ gaˇ yawˬ haˇ yawˬ ha ngeuˇ ma lehˇ ehˇ-eu nehꞈ Saˬdaˬ-ahˇ taꞈ-eu aˇ muˇ kʼoeˇ muˇ-ahˇ, nawˬ-euˬ aˬ kuiˇ dawˬ peh uˬ duˬ bi shaˇ tahˬ laˇ ma. Ngaˇ nawˬ-ahˇ gaˬ-eu gaˇ kawˆ aˬ yawꞈ maꞈ dawˬ tawˆ luꞈ ya siˬ tehꞈ-a.