Iˇsaˬyaˇ 11:9 - Akha

⁹ Iˬ ma laˆ shaˆ iˇ cuꞈ byah-eu loꞈ-ehˇ, Sahˬpaˬ Miˬyehˇ-ahˇ siˬ nya-eu jeˬ, miˇ tsaˬ kʼoeˇ taˆ byah-eu miˇ neh, Miˬyehˇ-euˬ muiˬ-eu shawˇ-eu Ziˇoˬ gawˬ jawˬ-ahˇ, lehˬ laˇ ca laˇ duˬ maˬ jaˆ-a.

Iˇsaˬyaˇ 11:9 ပူးပေါင်းရင်းမြစ်များ

Yawˇbaˆ 5:23

Kʼaˬ lo maˬ ahˇ-eu deh yaˇ-ahˇ nawˇ ya tsehˬ-awˇ, haiˬ-eu bawˇ tsahˬ jeˬ zaˬ deuˬ nawˬ-ahˇ tiˬ jawˇ-iˬ maˬ muiˇ-aˇ.

Jaceuq 72:19

Yaw shehꞈ kʼahˬ sehˇ huiˬ-eu aˬ yawꞈ-euˬ tsawˇ myahˇ-ahˇ, mˬ maˬ maˬ byaˆ zaˇ ziˇ ja ceuˬ-awˬ. Aˬ yawꞈ-euˬ yaw shehꞈ kʼahˬ sehˇ miˇ tsaˬ kʼoeˇ taˆ byah luꞈ-uˇ. Aˬmiˬ. Aˬmiˬ.

Jaceuq 78:54

Aˬ yawꞈ-euˬ muiˬ-eu shawˇ-eu miˇ kʼahˬ-ahˇ aˬ yawꞈ maꞈ-ahˇ sheuˬ gʼeh nehˬ-awˇ, aˬ yawꞈ neh deuˆ gʼaˬ-euˬ gawˬ jawˬ deuˬ-ahˇ sheuˬ gʼeh-euˬ meh.

Iˇsaˬyaˇ 11:13

Iˇsaˬleˬlaˆ miˇ kʼahˬ Yuˇdaˆ miˇ kʼahˬ-ahˇ myaˆ maˬ paˇ naˆ-ehˇ, Yuˇdaˆ miˇ kʼahˬ Iˇsaˬleˬlaˆ miˇ kʼahˬ-ahˇ muiˇ-eu nui ma byoˆ-iˇ tehꞈ-a.

Iˇsaˬyaˇ 11:8

Zaˬ nahˬ aˇ lawˇ byoe dawˬ peh aˬ mui mui nya-awˇ, doꞈ kʼaˆ-eu aˇ lawˇ uˇ-eu byoe-ahˇ, zaˬ yaw nyiˇ deuˬ beuˬ niˇ gʼa nya tehꞈ-a.

Iˇsaˬyaˇ 2:4

Miˇ kʼahˬ tsawˇ jeuˬ yaw kaˬ-ahˇ aˬ yawꞈ yaˇ kʼaˬ daˇ-awˇ, miˇ tsaˬ zaˬ-ahˇ aˬ yawꞈ laˆ tsaˬ laˆ tsahˇ nehˬ tehꞈ-a. Guiˇ deuˆ-eu mi cehˇ-ahˇ aˬ yawꞈ maꞈ nyoˬ tsehˬ tehˆ pyeuꞈ-awˇ, guiˇ deuˆ-eu gahˬ-ahˇ yehˬ kʼoꞈ tehˆ pyeuꞈ tehꞈ-a. Tsawˇ jeuˬ tiˬ jeuˬ tiˇ jeuˬ guiˇ maˬ paˇ deuˆ-ehˇ, guiˇ deuˆ-eu gaˇ kawˆ maˬ mehˬ maˬ sawˇ ni byehˇ tehꞈ-a.

Iˇsaˬyaˇ 30:26

Ba la yaw shehꞈ nahˇ ma loꞈ-ehˇ bya-eu uˬ taꞈ, nahˇ ma shiꞈ bymˇ bya dzehˬ laˇ-awˇ, shiꞈ nah bya-eu yaw shehꞈ tiˬ nah laꞈ kʼoeˇ bya jiˇ gaˇ duˇ tehꞈ-a. Sahˬpaˬ Miˬyehˇ neh aˬ yawꞈ-euˬ tsawˇ haˬ deuˬ-ahˇ diˬ naˇ laˆ naˇ nehˬ-euˬ naˇ gawˇ deuˬ-ahˇ aˬ yawꞈ paˇ laˆ saˆ taˬ ngeh nah, kʼoeˇ deuˬ dawˬ tawˆ luꞈ keuˆ le tehꞈ-a.

Iˇsaˬyaˇ 32:16

Miˇ kʼahˬ heu yawˬ coeˇ yawˬ na luꞈ, yaw tsaˬ yaw dawˇ jeˬ byah tehꞈ-a.

Iˇsaˬyaˇ 33:6

Naw maꞈ-euˬ aˇ nah aˇ yamˬ gʼaˇ duˬ, ziꞈ dah ni gʼeh-eu dawˬ pehˬ aˬ yawꞈ meh. Aˬ yawꞈ-euˬ tsawˇ haˬ-ahˇ ka kʼoꞈ nehˬ-awˇ, zaˬ siˬ nui gahˇ biꞈ nehˬ tehꞈ-a. Sahˬpaˬ Miˬyehˇ-ahˇ yaw zeu baw-eu jeˬ-aˬ, huiˬ dzehˬ-eu smˇ muiˬ muiˬ-eu jeˬ meh.

Iˇsaˬyaˇ 35:9

Aˇ laˬ jaˬ shiˇ deuˬ kʼoeˇ gaˇ maˬ jawˇ-ehˇ, haiˬ-eu jeˬ zaˬ kʼoeˇ gaˇ maˬ cah tsehˆ-a. Sahˬpaˬ Miˬyehˇ neh ka kʼoꞈ nehˬ-euˬ tsawˇ haˬ deuˬ, iˇ kahˇ gʼoꞈ leˇ-eu gaˇ ma meh.

Iˇsaˬyaˇ 45:6

Ngaˇ Sahˬpaˬ Miˬyehˇ pyeuꞈ-eu gaˇ kawˆ heu hawˇ-eu, miˬ yehˇ nui gʼaˬ maˬ jawˇ-eu gaˇ kawˆ-ahˇ, mˬ dzeˇ miˇ dzeˇ keuˆ ni bi siˬ doe ni, ngaˇ heu loꞈ-ehˇ jahˇ-eu ma.

Iˇsaˬyaˇ 49:6

Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh. “Ngaˬ-euˬ zaˬ kʼaˆ-oˇ, ngaˇ nawˬ-ahˇ, huiˬ dzehˬ-eu gaˇ paˇ bi mˇ ma. Dzeuˇ-iˇ-euˬ Iˇsaˬleˬlaˆ tsawˇ haˬ-ahˇ sheuˬ kʼoꞈ doˆ-awˇ, aˬ yawꞈ maꞈ dehꞈ doˆ dzaˬ laˇ ni ya mˇ-eu gaˇ tehꞈ-ehˇ maˬ ngeuˇ, mˬ dzeˇ miˇ dzeˇ keuˆ ni ka kʼoꞈ-eu jeˬ za ni, nawˬ-ahˇ miˇ tsaˬ-euˬ yaw shehꞈ paˇ bi geuꞈ-eu ma.”

Iˇsaˬyaˇ 52:10

Sahˬpaˬ Miˬyehˇ muiˬ-eu shawˇ-eu baoˬ-ahˇ gʼoe-awˇ, aˬ yawꞈ-euˬ tsawˇ haˬ-ahˇ ka kʼoꞈ nehˬ gaˇ, miˇ tsaˬ dawˬ tawˆ ya mawˇ tehꞈ-a.

Iˇsaˬyaˇ 54:5

Nawˬ-ahˇ beh-euˬ gʼaˬ nawˬ-euˬ kʼaˬ dzeˇ zaˬ-ahˇ duˇ tehꞈ-a. Aˬ yawꞈ tsawˇ myahˇ Baoˬ huiˬ-eu Sahˬpaˬ Miˬyehˇ meh. Iˇsaˬleˬlaˆ-euˬ muiˬ-eu shawˇ-eu Miˬyehˇ nawˬ-ahˇ ka kʼoꞈ nehˬ laꞈ tehꞈ-a. Miˇ tsaˬ dawˬ tawˆ luꞈ-ahˇ aˬ yawꞈ uˆ lahˇ-eu meh.

Iˇsaˬyaˇ 56:7

ngaˬ-euˬ muiˬ-eu shawˇ-eu gawˬ jawˬ-ahˇ sheuˬ daˆ-awˇ, ngaˬ-euˬ guiˬ lahˬ shaˇ nymˇ laꞈ kʼoeˇ, aˬ yawꞈ maꞈ-ahˇ ngaˇ laˬ kʼaˬ bi cehˇ ma. Aˬ yawꞈ maꞈ neh lawˇ-euˬ shehˇ-euˬ jeˬ-ahˇ, ngaˬ-euˬ lawˇ duˬ kʼoeˇ taˆ ngaˇ ha geuꞈ ma. Ngaˬ-euˬ Uˬ duˬ tahˬ nymˇ nymˇ ma heu-ahˇ, tsawˇ jeuˬ dawˬ tawˆ luꞈ-euˬ uˬ duˬ tahˬ nymˇ lehˇ myahˇ tehꞈ-a.”

Iˇsaˬyaˇ 59:19

Aˬ yawꞈ-euˬ baoˬ hawˇ-eu aˬ yawꞈ-euˬ tsawˇ myahˇ-ahˇ, nahˇ ma doˆ kʼehˬ ga kʼehˬ doˆ ni yawˬ gʼaˬ na luꞈ ya guˆ tehꞈ-a. Iˇ jeuˬ jeuˬ-awˇ jaˬ lehˇ lehˇ ma baw-eu loꞈ-ehˇ, aˬ yawꞈ oe gaˇ ya mawˇ tehꞈ-a.

Iˇsaˬyaˇ 65:25

Kʼaˬ yehˇ hawˇ-eu yawˇ zaˬ tiˬ gaˇ gaˆ-awˇ, aˇ laˬ jaˬ shiˇ mawˇ neˇ nehˬ-ehˇ gʼo yoeˬ dzaˬ-awˇ, aˇ lawˇ maˬ toˆ laˇ-ehˇ pyeuꞈ-iˇ tehꞈ-a. Ngaˬ-euˬ muiˬ-eu shawˇ-eu Ziˇoˬ gawˬ jawˬ kʼoeˇ taˆ, yaw haiˬ jeˬ hawˇ-eu guˆ-eu gaˆ-eu jeˬ, dawˬ tawˆ luꞈ byoˆ-iˇ jiˇ tehꞈ-a.”

Iˇsaˬyaˇ 66:18

Aˬ yawꞈ maꞈ-euˬ nui noeˬ hawˇ-eu aˬ yawꞈ maꞈ neh mˇ-euˬ gaˇ deuˬ ngaˇ siˬ luꞈ mawˇ luꞈ ma. Miˇ kʼahˬ tsawˇ jeuˬ dawˬ tawˆ luꞈ kuˇ uiˬ-eu gʼaˇ duˬ ngaˇ oe-eu ma. Aˬ yawꞈ maꞈ tiˬ gaˇ uiˬ laˇ jiˇ ngeh, ngaˬ-euˬ baoˬ-ahˇ gʼoe-awˇ mˇ nya-eu gaˇ deuˬ-ahˇ aˬ yawꞈ maꞈ ya mawˇ tehꞈ-a.

Iˇsaˬyaˇ 66:20

Ngaˬ-ahˇ laꞈ sawˬ biꞈ laˇ-eu loꞈ-ehˇ, aˬ cawˬ miˇ kʼahˬ laꞈ kʼoeˇ kʼaˇ jawˇ-eu naw maꞈ-euˬ tsawˇ haˬ dawˬ tawˆ luꞈ-ahˇ, aˬ yawꞈ maꞈ sheuˬ kʼoꞈ laꞈ tehꞈ-a. Zahˇ jahˇ gaˇ geuꞈ nya ni shawˇ-eu kʼa puˬ kʼa lu laꞈ kʼoeˇ, Iˇsaˬleˬlaˆ tsawˇ haˬ deuˬ dzaˬ la gʼo cehˇ lawˇ-eu jeˬ dawˆ ahˇ-awˇ, Uˬ duˬ tahˬ nymˇ nymˇ ma-ahˇ hehˇ laꞈ-eu loꞈ-ehˇ, naw maꞈ-euˬ tsawˇ haˬ kʼoeˇ deuˬ-ahˇ, mahˬ deuˬ, mahˬ tahˬ laˆ deuˬ, law taw deuˬ hawˇ-eu, mahˬ laˆ lawˬ deuˬ kʼoeˇ taˆ bi dziˬ-awˇ, Yeˬluˇsaˬlehˬ meuˬ laꞈ kʼoeˇ jaˆ-eu ngaˬ-eu muiˬ-eu shawˇ-eu gawˬ duˇ jaˆ gaˇ sheuˬ kʼoꞈ ha laˇ tehꞈ-a.

Yeˬlaˬmiˇ 31:23

Iˇsaˬleˬlaˆ tsawˇ jeuˬ-euˬ Miˬyehˇ pyeuꞈ-eu Baoˬ huiˬ-eu Sahˬpaˬ Miˬyehˇ heu loꞈ-ehˇ ehˇ-eu meh. “Tsawˇ jeuˬ heu jeuˬ-ahˇ aˬ yawꞈ maꞈ-euˬ miˇ kʼahˬ laꞈ kʼoeˇ ngaˇ sheuˬ kʼoꞈ gʼeh nehˬ-awˇ paˇ bi jawˇ ngeh, Yuˇdaˆ miˇ kʼahˬ hawˇ-eu kʼoeˇ gaˇ jaˆ-eu meuˬ deuˬ laꞈ kʼoeˇ, aˬ yawꞈ maꞈ heu loꞈ-ehˇ paˇ ya ehˇ tehꞈ-a. ‘Yaw tsaˬ yaw dawˇ jeˬ jawˇ-eu jawˇ duˬ-oˇ, muiˬ-eu shawˇ-eu gawˬ jawˬ-oˇ Sahˬpaˬ Miˬyehˇ nawˬ-ahˇ guiˬ lahˬ biꞈ luꞈ-uˇ’ lehˇ ya ehˇ tehꞈ-a.

Yeˬlaˬmiˇ 31:34

Ngaˬ-ahˇ siˬ nya laˇ ni, aˬ yawꞈ maꞈ tiˬ gʼaˬ tiˇ gʼaˬ mehˬ-eu tsoˆ-eu maˬ paˇ loˬ-aˇ. Aˬ jeˬ miˇ neh ehˇ naˇ, huiˬ zaˬ nyiˇ zaˬ dawˬ tawˆ luꞈ ngaˬ-ahˇ siˬ nya jiˇ tehꞈ-a. Aˬ yawꞈ maꞈ-ahˇ ngaˇ iˬ baˇ pyehˬ nehˬ-awˇ, aˬ yawꞈ maꞈ-euˬ yaw lehˬ ngaˇ maˬ paˇ noeˬ taˬ ma lehˇ, Sahˬpaˬ Miˬyehˇ pyeuꞈ-eu ngaˇ ehˇ-eu ma.”

Yeˬsaˬgeˬlaˇ 34:25

Aˬ yawꞈ maꞈ guˆ kʼaˇ maˬ za-ehˇ ya dehꞈ ni, aˬ yawꞈ maꞈ nehˬ-ehˇ ngaˇ dawˬ ma saˇ jaˇ dzaˬ ma. Ngaˬ-euˬ yawˇ deuˬ deh ga-ahˇ nui ma saˇ lehˆ ni ya gaˆ-awˇ, sahˬ kʼaˆ uˬ moˆ ciˬ cuˇ ni ya yuꞈ-eu gʼaˇ duˬ, bawˇ tsahˬ jeˬ zaˬ yaw haiˬ dawˬ tawˆ luꞈ ngaˇ laˆ byoˆ ma.

Yeˬsaˬgeˬlaˇ 47:5

Laꞈ oˆ paw nyiˬ yaˇ ngaˬ tseˇ lmˇ paˇ dza ka gʼeh ngeh, iˇ cuꞈ naꞈ dui dui-eu miˇ neh, iˇ diˬ maˬ diˬ naˇ maˬ tsehˆ nya ni jaˆ-eu meh.

Daˬyeˬlaˇ 11:45

Iˬ ma laˆ shaˆ hawˇ-eu Uˬ duˬ tahˬ nymˇ nymˇ ma tsoˆ taˬ-euˬ gawˬ jawˬ yaw kaˬ-ahˇ, sahˬ paˬ-euˬ sehˬ gʼawˆ gʼawˆ ma deuˬ aˬ yawꞈ gʼawˆ tehꞈ-a. Ehˇ kʼawꞈ, aˬ yawꞈ-ahˇ ngehˬ gʼeh nehˬ-eu gʼaˬ maˬ jawˇ-ehˇ pyeuꞈ-iˇ-awˇ, ya shiˇ tehꞈ-a.”

Daˬyeˬlaˇ 12:4

Aˬ yawꞈ ehˇ-eu, “Daˬyeˬlaˇ-oˇ, nymˬ-mˇ poˆ jawˇ-aˬ, sahˬ boꞈ piˬ tehˬ-awˇ, miˇ tsaˬ heu aˇ saˬ saˬ ngeh keuˆ ni jmˬ diˬ-awˇ bi jaˆ-awˬ. Aˇ yamˬ heu tiˬ kʼehˬ laꞈ kʼoeˇ, aˬ joˆ-ehˇ pyeuꞈ laˇ luꞈ-eu gaˇ kawˆ siˬ duˬ mawꞈ-eu tsawˇ haˬ deuˬ, kʼoeˇ paw heu paw coeˬ coeˬ-ehˇ shaˬ tehꞈ-a.”

Hawˇseˬ 2:18

Aˇ yamˬ kʼoeˇ yamˬ keuˆ laˇ ngeh jawˇ, ngaˬ-euˬ tsawˇ haˬ heu deuˬ kʼoeˇ taˆ, maˬ coeˬ maˬ ciˆ nehˬ-eu gʼaˇ duˬ, bawˇ tsahˬ jeˬ zaˬ dawˬ tawˆ hawˇ-eu, kʼoeˇ taˆ zaw-eu aˇ jiˇ maˬ ehˇ, miˇ tsa joe-eu deuˬ-ahˇ maˬ ehˇ, ngaˇ saˇ jaˇ dzaˬ taꞈ-eu lehˇ ma. Miˇ kʼahˬ heu kʼahˬ laꞈ kʼoeˇ jaˆ-eu, guiˇ deuˆ-eu keu ka dawˬ tawˆ luꞈ, mi cehˇ hawˇ-eu kaˆ dawˬ tawˆ luꞈ, ngaˇ laˆ piˬ laˆ byoˆ nehˬ jiˇ-awˇ, ngaˬ-euˬ tsawˇ haˬ heu deuˬ dawˬ tawˆ, nui saˇ oꞈ-awˇ ya dehꞈ tehꞈ-a.

Yawˇlaˆ 3:17

“Kʼoeˇ ngeh jawˇ, Iˇsaˬleˬlaˆ-oˇ, SahˬpaˬMiˬyehˇ lehˇ kuˇ-eu ngaˇ, nawˬ-euˬ Miˬyehˇ pyeuꞈ-eu ma lehˇ, nawˇ siˬ duˬ mawˇ duˬ laˇ tehꞈ-a. Muiˬ-eu shawˇ-eu ngaˬ-euˬ gawˬjawˬ, Ziˇoˬ-euˬ kʼoeˇ taˆ ngaˇ jawˇ ma. Yeˬluˇsaˬlehˬ meuˬ shawˇ laˇ-awˇ, aˬ cawˬ neh bi deuˆ gʼaˬ-eu jeˬ, tiˬ jawˇ-iˬ maˬ paˇ keuˆ le meh.

Haˬbaˬkuˆ 2:14

Sahˬpaˬ Miˬyehˇ yaw shehꞈ kʼahˬ sehˇ, huiˬ-eu meh lehˇ siˬ nya-eu jeˬ, laˆ shaˆ iˇ cuꞈ byah-eu loꞈ-ehˇ, miˇ tsaˬ kʼoeˇ taˆ byah-iˇ tehꞈ-a.

Zaˬkaˬliˇ 14:9

Kʼoeˇ naˇ, miˇ tsaˬ dawˬ tawˆ luꞈ kʼoeˇ taˆ Sahˬpaˬ Miˬyehˇ sahˬ paˬ geuꞈ-awˇ uˆ lahˇ tehꞈ-a. Kʼoeˇ ngeh jawˇ, tsawˇ haˬ yawˬ gʼaˬ na luꞈ Miˬyehˇ-ahˇ tehꞈ-ehˇ uˬ duˬ tahˬ-awˇ, Miˬyehˇ-euˬ tsawˇ myahˇ tiˬ myahˇ tehꞈ-ehˇ jaˆ tehꞈ-a.

Zaˬkaˬliˇ 8:3

Ngaˬ-euˬ muiˬ-eu shawˇ-eu meuˬ pyeuꞈ-eu Yeˬluˇsaˬlehˬ meuˬ-ahˇ ngaˇ gʼoꞈ jawˇ le ma. Meuˬ kʼoeˇ-ahˇ saˇ jaˇ ziꞈ-eu meuˬ lehˇ aˬ cawˬ kuˇ-awˇ, Baoˬ huiˬ-eu Sahˬpaˬ Miˬyehˇ-euˬ gawˬ jawˬ-ahˇ muiˬ-eu shawˇ-eu gawˬ jawˬ lehˇ kuˇ tehꞈ-a.

1 Teˇsaˬloˇni 5:15

Naw maꞈ tiˬ gʼaˬ-iˬ aˬ cawˬ yaw doeˇ jahˇ laˇ gaˇ yaw doeˇ maˬ ya jahˇ kʼoꞈ nehˬ ni yahˇ-awˬ. Ehˇ kʼawꞈ, tiˬ gʼaˬ tiˇ gʼaˬ yaw muiˬ jeˬ mˇ nehˬ-eu uˬ taꞈ, tsawˇ haˬ dawˬ tawˆ luꞈ-ahˇ yaw muiˬ jeˬ mˇ nehˬ-eu gʼaˇ duˬ, aˬ myah luꞈ noeˬ gahˇ taˬ-awˬ.

Panmaeq 21:27

Ehˇ kʼawꞈ, maˬ muiˬ maˬ shawˇ-eu jeˬ tiˬ jeˬ-iˬ meuˬ kʼoeˇ meuˬ laꞈ kʼoeˇ maˬ ya hehˇ ahˇ gʼeh-a. Shaꞈ dawˇ-eu jeˬ mˇ-eu tsawˇ haˬ hawˇ-eu jaˬ myawꞈ myawꞈ-eu tsawˇ haˬ deuˬ kʼawꞈ, maˬ ya uˇ leˇ-a. Yawˇzaˬ-euˬ dehꞈ-eu saꞈ laˇ sahˬ boꞈ laꞈ kʼoeˇ tsawˇ myahˇ ahˇ-eu tsawˇ haˬ deuˬ tehꞈ-ehˇ kʼoeˇ gaˇ ya uˇ leˇ-eu meh.