HeˬByehˇ 6:11 - Akha

¹¹ Naw maꞈ neh noeˬ tmˬ taˬ-euˬ jeˬ keuˆ le ni, naw maꞈ yawˬ gʼaˬ na luꞈ aˇ saˬ saˬ ngeh keuˆ ni nui ma keuˆ gaˇ nga maꞈ geuꞈ mawꞈ dui dui-eu ma.

Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

¹¹ Nawmaf nae noeqtmqduq taq-euq lof-aer aqdir byanlarni, nawmaf yawqghaq navluf arsaqsaq ngae keuvni yawmuiq-aer laejae-awr mrghae-eu gar nga’maf geufmawf mir-a.

HeˬByehˇ 6:11 ပူးပေါင်းရင်းမြစ်များ

Iˇsaˬyaˇ 32:17

Tsawˇ haˬ yawˬ gʼaˬ na luꞈ yaw tsaˬ yaw dawˇ jeˬ-ahˇ poˆ-eu miˇ neh, nui saˇ oꞈ-awˇ coꞈ ngehˇ ni gʼeh-eu jeˬ, mˬ maˬ maˬ byaˆ zaˇ ziˇ keuˆ le tehꞈ-a.

Maꞈtehˬ 24:13

Ehˇ kʼawꞈ, aˇ saˬ saˬ ngeh keuˆ ni kamˬ coeˇ-eu tsawˇ haˬ deuˬ ka kʼoꞈ-eu jeˬ za tehꞈ-a.

Luˇkaꞈ 1:1

Nga maꞈ jawˇ gaˇ pyeuꞈ dzeuˇ yaꞈ-euˬ gaˇ kawˆ deuˬ-ahˇ, tsawˇ haˬ gʼawˬ mya gʼaˬ kʼaˇ gʼeh nya-eu loꞈ-ehˇ sahˬ boꞈ boꞈ doˆ taˬ gʼaˬ-euˬ meh.

Lormav 12:8

Aˬ cawˬ-ahˇ gʼaˬ biꞈ-eu gʼaˇ duˬ laꞈ sawˬ za-euˬ ngeuˇ naˇ, gʼaˬ biꞈ-eu tsaˬ meh. Aˬ cawˬ-ahˇ biꞈ nehˬ damˬ nehˬ-eu laꞈ sawˬ za-euˬ ngeuˇ naˇ, nui ma keuˆ-eu laꞈ kʼoeˇ biꞈ nehˬ-eu tsaˬ meh. Aˬ cawˬ kʼoeˇ taˆ aˬ yuiꞈ aˬ tsu geuꞈ-awˇ uˆ lahˇ-eu laꞈ sawˬ za-euˬ ngeuˇ naˇ, leh jeh dui dui-awˇ mˇ-eu tsaˬ meh. Aˬ cawˬ-ahˇ gʼawˬ shaˬ gaˬ nehˬ-eu laꞈ sawˬ za-euˬ ngeuˇ naˇ, laˬ kʼaˬ tiˬ cehˇ gaˬ nehˬ-eu tsaˬ meh.

Lormav 15:13

Muiˬ-eu Shawˇ-eu Yaw sahˇ Miˬyehˇ-euˬ baoˬ baˬ da neh naw maꞈ-euˬ noeˬ tmˬ-eu jeˬ huiˬ laˇ mahˇ laˇ nya ni, naw maꞈ Miˬyehˇ-ahˇ jah-eu jeˬ-ahˇ gʼoe-awˇ, noeˬ tmˬ-eu jeˬ-euˬ dawˬ pehˬ duˬ puˇ pyeuꞈ-eu Miˬyehˇ naw maꞈ-ahˇ laˬ kʼaˬ cehˇ nui saˇ za-eu jeˬ bi byah laˇ luꞈ-uˇ.

1 Gawˇliˬtu 13:13

Nymˬ-mˇ-aˬ, jah-eu jeˬ, noeˬ tmˬ-eu jeˬ, gʼoeˇ-eu gaˬ-eu jeˬ, heu smˇ jeˬ jaˆ-eu meh. Heu smˇ jeˬ laꞈ kʼoeˇ aˬ cawˬ naˆ maˬ tseˇ huiˬ dzehˬ-eu jeˬ-aˬ, gʼoeˇ-eu gaˬ-eu jeˬ meh.

1 Gawˇliˬtu 15:58

Kʼoeˇ miˇ neh aˬ yuiꞈ aˬ nyiˇ Ka li zaˬ deuˬ-oˇ, gʼaˬ byehˆ maˬ byehˆ-ehˇ ziꞈ dah ni yawꞈ tehˬ taˬ-eu laꞈ kʼoeˇ, Sahˬpaˬ Yeˬsuˇ-euˬ gaˇ mˇ-eu yawꞈ ngehꞈ maˬ ngeuˇ-a lehˇ siˬ nya-awˇ, Sahˬpaˬ Yeˬsuˇ-euˬ gaˇ mˇ-eu leh jeh dui dui-awˬ.

Gaˬlaˬtiˆ 5:5

Nga maꞈ law nmˇ-aˬ, nga maꞈ-euˬ jah-eu jeˬ laꞈ kʼoeˇ Yaw sahˇ Miˬyehˇ-euˬ baoˬ gaˇ mˇ-eu baˬ da neh Miˬyehˇ-ahˇ tsaˬ leˇ tsahˇ leˇ nya gaˇ noeˬ tmˬ kʼaˇ za ma.

Gaˬlaˬtiˆ 6:9

Kʼoeˇ miˇ neh, gʼaˬ byehˆ maˬ byehˆ ni yaw muiˬ jeˬ mˇ kaˇ-euˇ. Aˬ dui nui ma maˬ cawˆ naˇ, aˇ yamˬ keuˆ laˇ ngeh ya yehˬ tehꞈ-a.

Piˇliˇpiˆ 3:15

Guiˬ lahˬ saꞈ laˇ paw tsawˇ kʼaˆ kʼaˆ laˇ-euˬ aˬ dui dawˬ tawˆ luꞈ, kʼoeˇ loꞈ-ehˇ nui ma taˬ-eu tsaˬ meh. Ehˇ kʼawꞈ, naw maꞈ tiˬ paˆ na deuˬ nui ma taˬ-eu yawˬ jeˬ yawˬ jaˆ naˇ, naw maꞈ-ahˇ geuˇ-eu loꞈ-ehˇ gʼoˆ shaw nya ni Miˬyehˇ caw ba nehˬ laꞈ tehꞈ-a.

Gawˇlawˇsehˇ 1:23

Naw maꞈ jah-eu jeˬ laꞈ kʼoeˇ ziꞈ dah ni ya dehꞈ daˆ gʼeh-awˇ, Laˬ kʼaˬ cehˇ-eu Guiˬ lahˬ dawˬ ya gaˬ ngeh za taˬ-euˬ noeˬ tmˬ-eu jeˬ poˆ poˆ laˆ laˆ-ehˇ maˬ ya bi gʼeh-a. Ngaˇ Pawˇluˆ zaˬ kʼaˆ geuꞈ luꞈ-eu heu-aˬ, miˇ tsaˬ kʼoeˇ taˆ kʼaˇ jawˇ-eu tsawˇ haˬ yawˬ gʼaˬ na luꞈ-ahˇ mehˬ nehˬ-euˬ Laˬ kʼaˬ cehˇ-eu Guiˬ lahˬ dawˬ heu-euˬ gʼaˇ duˬ ma.

Gawˇlawˇsehˇ 1:5

Maˇ jawˆ ni gʼeh-eu Miˬyehˇ-euˬ dawˬ kawˬ pyeuꞈ-eu Laˬ kʼaˬ cehˇ-eu Guiˬ lahˬ dawˬ naw maꞈ-ahˇ mehˬ beh beh laˇ ngeh, kʼoeˇ gaˇ taꞈ leˇ-eu noeˬ tmˬ-eu jeˬ gaˇ kawˆ naw maꞈ ya gaˬ-euˬ meh. Naw maꞈ jah-eu kʼoeˇ hawˇ-eu gʼoeˇ-eu gaˬ-eu kʼoeˇ-aˬ, naw maꞈ noeˬ tmˬ-eu kʼoeˇ-euˬ laꞈ kʼoeˇ neh doˆ laˇ-euˬ meh. Naw maꞈ noeˬ tmˬ-eu kʼoeˇ-ahˇ, naw maꞈ gʼaˇ duˬ Miˬyehˇ neh mˬ kʼoeˇ taˆ jeˬ hmˬ taˬ-euˬ meh.

Gawˇlawˇsehˇ 2:2

Aˬ yawꞈ maꞈ-euˬ nui ma kʼaˬ duˬ ni pyeuꞈ laˇ-awˇ, gʼoeˇ-eu gaˬ-eu jeˬ laꞈ kʼoeˇ nui ma tiˬ siˬ tehꞈ-ehˇ taˬ nya laˇ-awˇ, yaw muiˬ paˬ-ehˇ gʼoˆ siˬ gʼoˆ shaw nya-eu baˬ da neh yaw duˬ yaw ciˇ baw laˇ ni, ngaˇ kʼoeˇ loꞈ-ehˇ mˇ luꞈ-eu ma. Kʼoeˇ loꞈ-ehˇ mˇ-eu baˬ da neh, Miˬyehˇ neh zaꞈ taˬ-eu jeˬ pyeuꞈ-eu Ka li-ahˇ aˬ yawꞈ maꞈ siˬ nya laˇ tehꞈ-a.

1 Teˇsaˬloˇni 1:5

Aˬ jeˬ miˇ neh ehˇ naˇ, naw maꞈ jawˇ gaˇ nga maꞈ Laˬ kʼaˬ cehˇ-eu Guiˬ lahˬ dawˬ hehˇ leꞈ ngeh, kʼaˬ meh mehˬ boeˬ neh tehꞈ-ehˇ hehˇ leꞈ-euˬ maˬ ngeuˇ. Baoˬ hawˇ-eu Muiˬ-eu shawˇ-eu Yaw sahˇ Miˬyehˇ laꞈ kʼoeˇ maˬ ehˇ, maˇ maˇ ni ngeuˇ meh lehˇ siˬ duˬ jah duˬ-eu laꞈ kʼoeˇ maˬ ehˇ, hehˇ leꞈ-euˬ jeˬ pyeuꞈ-eu ma. Naw maꞈ nehˬ-ehˇ jawˇ-euˬ aˇ yamˬ laꞈ kʼoeˇ nga maꞈ aˬ joˆ-ehˇ dehꞈ yaꞈ jawˇ yaꞈ-euˬ gaˇ kawˆ naw maꞈ siˬ nya meh. Kʼoeˇ-aˬ, naw maꞈ-euˬ gʼaˇ duˬ pyeuꞈ-eu ma.

1 Teˇsaˬloˇni 4:10

Maˇ maˇ ni ehˇ naˇ, Maˬgeˬdawˇniˆ miˇ kʼahˬ laꞈ kʼoeˇ kʼaˇ jawˇ-eu aˬ yuiꞈ aˬ nyiˇ Ka li zaˬ dawˬ tawˆ luꞈ-ahˇ, naw maꞈ kʼoeˇ loꞈ-ehˇ gʼoeˇ-euˬ gaˬ-euˬ meh. Kʼoeˇ miˇ neh aˬ yuiꞈ aˬ nyiˇ Ka li zaˬ deuˬ-oˇ, naw maꞈ-euˬ gʼoeˇ-eu gaˬ-eu jeˬ kʼoeˇ naˆ maˬ tseˇ myaˬ laˇ ni leh jeh siˬ lehˇ nga maꞈ shaˇ-eu ma.

2 Teˇsaˬloˇni 3:13

Ehˇ kʼawꞈ aˬ yuiꞈ aˬ nyiˇ Ka li zaˬ deuˬ-oˇ, naw maꞈ-aˬ, yaw muiˬ jeˬ mˇ-eu gʼaˬ byehˆ maˬ ya byehˆ-a.

HeˬByehˇ 10:22

Kʼoeˇ miˇ neh, dawˇ coe ni gʼeh-eu nui ma hawˇ-eu ziꞈ dah ni gʼeh-eu jah-eu jeˬ ahˇ-eu laꞈ kʼoeˇ, Miˬyehˇ-euˬ dawˬ peh aˬ dui jiˆ uˇ leˇ kaˇ-euˇ. Iˬ baˇ-ahˇ kʼahˬ lahˇ-eu jeˬ bi tsiˬ shawˇ gʼaˬ-euˬ nui ma hawˇ-eu, shawˇ jehˆ ni gʼeh-eu iˇ cuꞈ neh bi tsiˬ shawˇ gʼaˬ-euˬ gʼawˇ mawˇ laꞈ kʼoeˇ aˬ dui jiˆ uˇ leˇ kaˇ-euˇ.

HeˬByehˇ 3:14

Aˬ jeˬ miˇ neh ehˇ naˇ, aˇ dahˬ beh ngeh neh aˬ dui ziꞈ dah ni jah-euˬ loꞈ-ehˇ, aˇ saˬ saˬ ngeh keuˆ ni ziꞈ naˇ, aˬ dui dawˬ tawˆ luꞈ Ka li-euˬ mˇ cawˬ shaˇ cawˬ deuˬ pyeuꞈ-eu ma.

HeˬByehˇ 3:6

Ehˇ kʼawꞈ, Ka li-aˬ, Miˬyehˇ-euˬ nymˇ jiˇ-ahˇ haw-eu pyaˆ-eu gʼaˬ pyeuꞈ-eu saˇ jaˇ ziꞈ-eu Zaˬmaˇ meh. Aˬ dui kʼawꞈ, aˬ dui neh noeˬ tmˬ taˬ-euˬ jeˬ-ahˇ nui ma kʼaˬ duˬ ni taˬ-awˇ, ziꞈ dah ni tuˆ tehˬ taˬ naˇ, Miˬyehˇ-euˬ nymˇ jiˇ laꞈ kʼoeˇ jawˇ-eu aˬ yawꞈ-euˬ zaˬ deuˬ lehˇ ehˇ nya ma.

Yawˇshuˆ 7:3

Yawˇshuˆ jawˇ gaˇ gʼoꞈ laˇ-awˇ, “Tsawˇ haˬ yawˬ gʼaˬ na luꞈ le-awˇ Aˬiˇ meuˬ-ahˇ guiˇ deuˆ-leˇ-eu maˬ loˬ-a. Meuˬ kʼoeˇ meuˬ-aˬ, meuˬ yaw huiˬ tiˬ meuˬ maˬ ngeuˇ-a” lehˇ dzawˇ mehˬ laˇ-euˬ meh.

1 Beˬtuˆluˆ 1:21

Aˬ yawꞈ-ahˇ shiˇ-euˬ gaˇ bi gʼoꞈ dehꞈ laˇ-awˇ yaw shehꞈ kʼahˬ sehˇ biꞈ nehˬ-euˬ gʼaˬ pyeuꞈ-eu Miˬyehˇ-ahˇ, aˬ yawꞈ baˬ da neh naw maꞈ jah laˇ-euˬ meh. Kʼoeˇ miˇ neh, naw maꞈ jah-awˇ noeˬ tmˬ-eu jeˬ-aˬ, Miˬyehˇ tiˬ gʼaˬ tehꞈ meh.

2 Beˬtuˆluˆ 1:10

Kʼoeˇ miˇ neh aˬ yuiꞈ aˬ nyiˇ Ka li zaˬ deuˬ-oˇ, Miˬyehˇ neh naw maꞈ-ahˇ kuˇ-awˇ tseˇ doˆ nehˬ laꞈ-euˬ jeˬ-ahˇ aˬ myah luꞈ ziꞈ dah ni tuˆ tehˬ taˬ nya ni, yaw kʼaˆ kʼaˆ-ehˇ leh jeh-awˬ. Kʼoeˇ loꞈ-ehˇ mˇ naˇ, jah-eu jeˬ-ahˇ naw maꞈ tiˬ jawˇ-iˬ maˬ byehˇ dzeh-aˇ.

2 Beˬtuˆluˆ 3:14

Kʼoeˇ miˇ neh cawˬ deuˬ-oˇ, Aˇnah kʼoeˇ nah-ahˇ naw maꞈ dawˬ luꞈ-eu loꞈ-ehˇ, Miˬyehˇ mehˬ shi iˬ baˇ taˬ kʼaˇ maˬ za-eu Miˬyehˇ-ahˇ tsaˬ leˇ tsahˇ leˇ gʼaˬ-euˬ muiˬ-eu shawˇ-eu tsawˇ haˬ pyeuꞈ ni leh jeh-awˬ.

1 Yoˇhaˬ 3:14

Aˬ dui-aˬ, shiˇ-eu jeˬ laꞈ kʼoeˇ neh doˆ dzeuˇ laˇ-awˇ, dehꞈ-eu jeˬ laꞈ kʼoeˇ uˇ keuˆ laˇ taˬ-euˬ ma lehˇ siˬ nya-eu ma. Aˬ dui Ka li zaˬ cawˬ cawˬ gaˬ luꞈ-eu miˇ neh, kʼoeˇ loꞈ-ehˇ ehˇ tsehˆ nya-eu ma. Gʼoeˇ-eu gaˬ-eu jeˬ maˬ ahˇ-eu tsawˇ haˬ-aˬ, shiˇ-eu jeˬ-euˬ baoˬ uˬ moˆ jawˇ luꞈ-a siˬ.

1 Yoˇhaˬ 3:19

Aˬ dui-euˬ gʼoeˇ-eu gaˬ-eu jeˬ heu maˇ jawˆ ni gʼeh-eu baˬ da neh, yawˬ ha yaw tsaˬ yaw dawˇ jeˬ-ahˇ taꞈ-eu gaˇ kawˆ yawˬ haˇ yawˬ ha siˬ laˇ tehꞈ-a. Kʼoeˇ baˬ da neh Miˬyehˇ mehˬ shi aˬ dui nui ma ziꞈ dah ni jaˆ tehꞈ-a.

Panmaeq 2:26

Aˇ saˬ saˬ ngeh keuˆ ni ngaˬ-euˬ nui kʼahˇ mˇ-eu gʼaˬ leˇ-euˬ tsawˇ haˬ-ahˇ, tsawˇ jeuˬ dawˬ tawˆ luꞈ kʼoeˇ taˆ uˆ lahˇ-eu baoˬ ngaˇ biꞈ ma.