Hawˇseˬ 9:8 - Akha

⁸ Iˇsaˬleˬlaˆ-ahˇ mehˬ nehˬ-eu, Bawˇlawˇpeh bi geuꞈ-eu gʼaˇ duˬ, Miˬyehˇ ngaˬ-ahˇ pyehˬ leꞈ-euˬ meh. Ehˇ kʼawꞈ, ngaˇ kʼaˇ iˇ kʼaˇ laˇ gaˇ, aˇ jiˇ lahˇ ju kʼmˇ-eu loꞈ-ehˇ, naw maꞈ ngaˬ-ahˇ kʼmˇ luꞈ-eu meh. Miˬyehˇ-euˬ miˇ kʼahˬ-ahˇ jawˇ-eu. Miˬyehˇ-euˬ tsawˇ haˬ heu deuˬ-aˬ, Bawˇlawˇpeh-ahˇ muiˇ-eu deuˬ meh.

Hawˇseˬ 9:8 ပူးပေါင်းရင်းမြစ်များ

1 Sahˬpaˬ 17:1

Giˇlaˆ miˇ kʼahˬ Tiˇshaˬbeˬ meuˬ-ahˇ jawˇ-eu Eˇliˇyaˆ lehˇ myahˇ-euˬ Miˬyehˇ gʼaˇ duˬ ngehˬ dah-eu gʼaˬ neh, sahˬ paˬ Aˬhaˆ-ahˇ heu loꞈ-ehˇ ehˇ nehˬ-euˬ meh. “Ngaˇ dawˬ maˬ ngehˬ maˬ tmˇ kʼoeˇ keuˆ ni, smˇ kʼoꞈ byah ni ceuˬ maˬ ga le, uˬ yehˇ maˬ yehˇ le ni jaˆ tehꞈ-a lehˇ, ngaˇ uˬ duˬ tahˬ luꞈ-eu Iˇsaˬleˬlaˆ-euˬ Dehꞈ luꞈ-eu Miˬyehˇ pyeuꞈ-eu Sahˬpaˬ Miˬyehˇ-euˬ tsawˇ myahˇ uˬ moˆ, nawˬ-ahˇ ngaˇ ehˇ-eu ma.”

1 Sahˬpaˬ 18:1

Aˇ kʼoꞈ aˇ la ui cuiˆ myahˇ laˇ-awˇ, uˬ yehˇ maˬ yehˇ le-eu aˇ kʼoꞈ smˇ kʼoꞈ tiˬ kʼoꞈ-ahˇ, “Sahˬ paˬ Aˬhaˆ jawˇ gaˇ nawˇ iˇ-awˇ, nawˬ-euˬ gʼawˇ mawˇ aˬ yawꞈ-ahˇ bi mawˇ-awˬ. Ngaˇ uˬ yehˇ bi yehˇ le ma” lehˇ, Eˇliˇyaˆ-ahˇ Sahˬpaˬ Miˬyehˇ ehˇ nehˬ-euˬ meh.

1 Sahˬpaˬ 18:19

Iˇsaˬleˬlaˆ tsawˇ haˬ dawˬ tawˆ luꞈ-ahˇ, Gaˬlaˬmeˬlaˇ gawˬ jawˬ-ahˇ ngaˇ jawˇ gaˇ laˇ-awˬ lehˇ, nymˬ-mˇ dawˬ biꞈ nehˬ-awˬ. Baˬlaˇ miˬ yehˇ gʼaˇ duˬ ngehˬ dah-eu tsawˇ haˬ oeˬ yaˇ ngaˬ tseˇ gʼaˬ hawˇ-eu, Yeˬsaˬbeˬlaˇ neh bi dzaˬ bi dawˇ-euˬ Aˬsheˇlaˬ miˬ yehˇ ma gʼaˇ duˬ ngehˬ dah-eu tsawˇ haˬ oeˬ yaˇ gʼaˬ kʼawꞈ sheuˬ-awˇ laˇ-awˬ.”

1 Sahˬpaˬ 22:11

Aˬ yawꞈ maꞈ laꞈ kʼoeˇ, Sheˬnaˬnahˬ-euˬ aˬ li Zeˬdaˬkiˇ gʼaˬ shmˇ uˬ coeˇ tehˆ-awˇ, “Heu loꞈ-ehˇ gʼeh-eu uˬ coeˇ neh Suˇliˆ tsawˇ haˬ deuˬ-ahˇ naw maꞈ guiˇ deuˆ-awˇ, naw maꞈ deuˆ gʼaˬ tehꞈ-a lehˇ Sahˬpaˬ Miˬyehˇ ehˇ-eu meh” lehˇ ngehˬ dah-euˬ meh.

1 Sahˬpaˬ 22:22

Nawˇ aˬ joˆ-ehˇ mehˇ shuiˇ shuiˇ-eu gʼeh te lehˇ Sahˬpaˬ Miˬyehˇ naˇ haˬ ngeh, ‘Ngaˇ iˇ-awˇ, Aˬhaˆ-ahˇ Miˬyehˇ gʼaˇ duˬ kʼaˇ ngehˬ dah nehˬ-eu deuˬ jaˬ myawꞈ myawꞈ ni jahˇ-iˇ ma’ lehˇ, yaw sahˇ kʼoeˇ sahˇ ehˇ kʼoꞈ nehˬ-euˬ meh. Sahˬpaˬ Miˬyehˇ gʼeh, ‘Iˇ-awˇ mehˇ shuiˇ shuiˇ haw-iˇ-awˬ. Shuiˇ tawˆ nya-eu baw le’ lehˇ ehˇ-eu meh.

1 Sahˬpaˬ 22:28

Miˇkaˬyaˇ ehˇ-eu, “Nawˇ tiˬ jeˬ-iˬ maˬ ca laˇ-ehˇ gʼoꞈ keuˆ le lawˬ naˇ, Sahˬpaˬ Miˬyehˇ ngaˬ-ahˇ gʼoe-awˇ dawˬ ngehˬ-euˬ maˬ ngeuˇ-aˇ. Ngaˬ neh ehˇ-euˬ dawˬ-ahˇ yawˬ gʼaˬ na luꞈ yaw muiˬ paˬ-ehˇ naˇ haˬ taˬ-awˬ.”

1 Sahˬpaˬ 22:6

Kʼoeˇ naˇ, Miˬyehˇ gʼaˇ duˬ ngehˬ dah-eu tsawˇ haˬ oeˬ yaˇ gʼaˬ-ahˇ Aˬhaˆ kuˇ uiˬ-awˇ ehˇ nehˬ-eu, “Giˇlaˆ miˇ kʼahˬ Laˬmoˆ meuˬ-ahˇ ngaˇ guiˇ deuˆ leˇ-eu tsaˬ nga loˇ, maˬ tsaˬ nga loˇ lehˇ ehˇ nehˬ laꞈ sheˇ.” Aˬ yawꞈ maꞈ ehˇ-eu, “Deuˆ leˇ-awˬ. Sahˬpaˬ Miˬyehˇ nawˬ-ahˇ bi gʼaˬ leˇ nehˬ laꞈ tehꞈ-a.”

2 Sahˬpaˬ 13:21

Tiˬ poˆ-aˬ, tsawˇ haˬ baꞈ pahˬ luꞈ ngeh, aˇ muˇ kʼoeˇ tiˬ muˇ laˇ luꞈ gaˇ ya mawˇ-awˇ, tsawˇ shiˇ-ahˇ Eˇliˇshehˇ-euˬ lmˬ bymˇ laꞈ kʼoeˇ baꞈ ahˇ yaꞈ-awˇ, cehˆ jiˇ-euˬ meh. Tsawˇ shiˇ kʼoeˇ Eˇliˇshehˇ-euˬ shaˬ yoeˬ-ahˇ ga tuˆ-euˬ nehˬ-ehˇ, tiˬ poˆ tehꞈ-ehˇ gʼoꞈ dehꞈ laˇ-awˇ, gawˬ yawꞈ yawꞈ laˇ-euˬ meh.

2 Sahˬpaˬ 2:14

Eˇliˇyaˆ-euˬ pehˇ kʼahˬ pehˇ mahˇ kʼoeˇ neh iˇ cuꞈ-ahˇ aˬ yawꞈ sheu juiꞈ-awˇ, “Eˇliˇyaˆ-euˬ Miˬyehˇ pyeuꞈ-eu Sahˬpaˬ Miˬyehˇ aˬ gaˇ jawˇ ta” lehˇ ehˇ-eu meh. Kʼoeˇ naˇ, iˇ cuꞈ-ahˇ aˬ yawꞈ tiˬ poˆ paˇ sheu juiꞈ ngeh, iˇ cuꞈ nyiˬ paˆ paˆ-iˇ-awˇ, lawˇ baˬ tsehˆ doˆ-euˬ meh.

2 Sahˬpaˬ 2:21

Iˇ cuꞈ lawˇ kʼawꞈ-ahˇ Eˇliˇshehˇ iˇ-awˇ, iˇ cuꞈ-ahˇ saˬ deuꞈ byaˆ-awˇ, “Shiˇ-eu jeˬ hawˇ-eu zaˬ yoeˇ dzeh-eu jeˬ maˬ paˇ bi keuˆ le ni, iˇ cuꞈ heu-ahˇ ngaˇ bi shawˇ laˇ ma lehˇ Sahˬpaˬ Miˬyehˇ ehˇ-eu meh” lehˇ ehˇ-eu meh.

2 Sahˬpaˬ 4:41

Kʼoeˇ ngeh, “Cehˇ meu ui cuiˆ yuˇ laꞈ-awˬ” lehˇ Eˇliˇshehˇ ehˇ-awˇ, cehˇ meu dawˆ-euˬ meh. Kʼoeˇ naˇ, “Dzaˇ kuˬ doˆ lahˬ-awˇ aˬ yawꞈ maꞈ-ahˇ bi dzaˬ-awˬ” lehˇ Eˇliˇshehˇ ehˇ-eu meh. Dzaˇ kʼoeˇ doꞈ maˬ ahˇ-ehˇ pyeuꞈ-iˇ-euˬ meh.

2 Sahˬpaˬ 4:43

Ehˇ kʼawꞈ, “Dzaˇ heu tsawˇ haˬ tiˬ yaˇ gʼaˬ dzaˬ loꞈ tehꞈ-a lehˇ nawˇ noeˬ te loˇ” lehˇ, zaˬ kʼaˆ kʼoeˇ gʼaˬ ehˇ-eu meh. Eˇliˇshehˇ ehˇ-eu, “Aˬ yawꞈ maꞈ-ahˇ dzaˇ kʼoeˇ bi dzaˬ-awˬ. Aˬ jeˬ miˇ neh ehˇ naˇ, aˬ yawꞈ maꞈ dzaˬ dehˆ-eu uˬ taꞈ, dzehˬ laˇ tehꞈ-a lehˇ Sahˬpaˬ Miˬyehˇ ehˇ-eu meh.”

2 Sahˬpaˬ 5:14

Kʼoeˇ ngeh, Yawˇdaˬ lawˇ baˬ-ahˇ Neˬmaˬ iˇ-awˇ, Eˇliˇshehˇ neh kʼaˇ ehˇ nehˬ-euˬ loꞈ-ehˇ shiꞈ poˆ keuˆ ni iˇ byoˆ byoˆ ngeh, aˬ yawꞈ-euˬ naˇ gawˇ taˬ tsehˆ leˇ-awˇ, aˬ yawꞈ-euˬ shaˬ jiˇ kʼawꞈ, zaˬ yaw nyiˇ-euˬ shaˬ jiˇ loꞈ-ehˇ muiˬ laˇ shawˇ laˇ-euˬ meh.

2 Sahˬpaˬ 5:27

Nymˬ-mˇ poˆ jawˇ, Neˬmaˬ-euˬ naˇ gawˇ kʼoeˇ nawˬ-ahˇ nyawˬ laˇ-awˇ, nawˇ hawˇ-eu nawˬ-eu zaˬ nawˬ-euˬ uˆ deuˬ dawˬ tawˆ luꞈ, mˬ maˬ maˬ byaˆ zaˇ ziˇ naˇ gawˇ kʼoeˇ ya daˬ tehꞈ-a.” Geˬhaˬziˇ doˆ-iˇ ngeh, nyawˬ naˇ laˇ-awˇ, aˬ yawꞈ-euˬ shaˬ jiˇ ngehˇ loꞈ-ehˇ pyuˇ deuˬ ni pyeuꞈ-iˇ-euˬ meh.

2 Sahˬpaˬ 7:19

Eˇliˇshehˇ kʼoeˇ loꞈ-ehˇ ehˇ ngeh, “Kʼoeˇ loꞈ-ehˇ maˬ pyeuꞈ laˇ nya-aˇ, Sahˬpaˬ Miˬyehˇ neh cehˇ pyuˇ bi sha ha le law hawˇ kʼawꞈ, cehˇ pyuˇ aˇ poeˬ kʼoeˇ naˆ naˆ-ehˇ maˬ ga yaˇ le nya-aˇ” lehˇ, yaw huiˬ yaw mahˇ kʼoeˇ gʼaˬ ehˇ-euˬ meh. Kʼoeˇ ngeh, “Kʼoeˇ loꞈ-ehˇ ga yaˇ le-euˬ gaˇ nawˇ ya mawˇ tehꞈ-a. Ehˇ kʼawꞈ, nawˇ maˬ ya dzaˬ-aˇ” lehˇ, Aˬ yawꞈ-ahˇ Eˇliˇshehˇ ehˇ kʼoꞈ nehˬ-euˬ meh.

2 Sahˬpaˬ 7:2

Sahˬ paˬ-ahˇ loꞈ piˇ-eu gʼaˬ ehˇ-eu, “Kʼoeˇ loꞈ-ehˇ maˬ pyeuꞈ laˇ nya-aˇ. Sahˬpaˬ Miˬyehˇ neh cehˇ pyuˇ bi sha ha le law hawˇ kʼawꞈ, cehˇ pyuˇ aˇ poeˬ kʼoeˇ naˆ naˆ-ehˇ maˬ ga yaˇ le nya-aˇ.” Eˇliˇshehˇ ehˇ-eu, “Kʼoeˇ loꞈ-ehˇ ga yaˇ le-euˬ gaˇ nawˇ ya mawˇ tehꞈ-a. Ehˇ kʼawꞈ, nawˇ maˬ ya dzaˬ-aˇ.”

Jaceuq 124:7

Aˇ jiˇ tahˇ-eu sehˬ toˆ-ahˇ dzeuˇ-iˇ-euˬ, aˇ jiˇ tiˬ mawˇ-ahˇ aˬ dui duˇ-eu ma. Sehˬ toˆ kʼehꞈ-iˇ-awˇ aˬ dui dzeuˇ-iˇ-euˬ ma.

Dawˬ tsoˆ 9:12

Tsawˇ haˬ tiˬ gʼaˬ-iˬ yawˬ ha-euˬ aˇ yamˬ aˇ law maˬ siˬ nya-a. Lahˇ ju-ahˇ paꞈ leˇ-euˬ aˇ jiˇ hawˇ-eu ngaˬ myahˬ-ahˇ paꞈ leˇ-euˬ ngaˬ shaˬ loꞈ-ehˇ, maˬ noeˬ miˇ-ahˇ aˬ dui kʼoeˇ taˆ yaw doeˇ jeˬ keuˆ le nya-eu meh.

Dawˬ caˇ 3:3

Meuˬ-ahˇ loꞈ piˇ-eu deuˬ cah doˆ leꞈ gaˇ ngaˇ tahˬ puˬ-awˇ, “Ngaˬ-euˬ zaˬ kʼaˬ maˬ mawˇ-aˬ loˇ” lehˇ naˇ haˬ-euˬ ma.

Iˇsaˬyaˇ 62:6

Yeˬluˇsaˬlehˬ meuˬ-oˇ, nawˬ-euˬ meuˬ lahˇ kʼoeˇ taˆ, meuˬ-ahˇ loꞈ piˇ-eu tsawˇ haˬ ngaˇ pyehˬ taˬ-eu ma. Uˬ ciꞈ nah gʼahˇ maˬ ehˇ aˬ yawꞈ maꞈ ciˬ cuˇ ni maˬ ya jawˇ-ehˇ, Sahˬpaˬ Miˬyehˇ aˬ yawꞈ-euˬ saˇ jaˇ-ahˇ maˬ ya ngehˇ ni, maˬ naˬ leˇ ni ya ehˇ noeˬ nehˬ-eu meh.

Yeˬlaˬmiˇ 11:19

Ngaˇ-aˬ aˬ cawˬ neh bi sehꞈ dzaˬ-eu lehˇ gʼeh-eu nahˬ jawˆ ni gʼeh-eu yawˇ zaˬ-ahˇ duˇ-eu ma. Aˬ yawꞈ maꞈ ngaˬ-ahˇ yaw doeˇ jahˇ mawꞈ law hawˇ ngaˬ lehˇ ngaˇ maˬ siˬ-aˬ. Aˬ yawꞈ maꞈ heu loꞈ-ehˇ ehˇ-eu meh. “Aˇ siˬ siˬ-eu aˇ bawˇ heu bawˇ tuˇ dzeh kaˇ-euˇ. Tsawˇ haˬ tiˬ gʼaˬ-iˬ maˬ noeˬ mawˇ coeˇ ni, bi ngehˇ jiˇ-eu gʼaˇ duˬ sehꞈ byoˆ kaˇ-euˇ.”

Yeˬlaˬmiˇ 14:13

Kʼoeˇ naˇ, ngaˇ heu loꞈ-ehˇ ehˇ-euˬ ma. “Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ-oˇ, nawˬ neh saˇ jaˇ dzaˬ taˬ-euˬ jaˆ-eu miˇ neh, miˇ kʼahˬ heu kʼahˬ laꞈ kʼoeˇ guiˇ deuˆ-eu jeˬ hawˇ-eu mehꞈ-eu shuꞈ-eu jeˬ maˬ keuˆ le-ehˇ, nui saˇ oꞈ-eu jeˬ tehꞈ-ehˇ keuˆ le tehꞈ-a lehˇ, Miˬyehˇ gʼaˇ duˬ ngehˬ dah-eu deuˬ ehˇ luꞈ-eu nawˇ siˬ nya meh.”

Yeˬlaˬmiˇ 23:13

Saˬmaˬliˆ miˇ kʼahˬ-ahˇ Miˬyehˇ gʼaˇ duˬ ngehˬ dah-eu deuˬ, iˬ baˇ ahˇ-eu ngaˇ mawˇ duˬ taˬ-euˬ ma. Baˬlaˇ miˬ yehˇ tsawˇ myahˇ uˬ moˆ aˬ yawꞈ maꞈ dawˬ ngehˬ-awˇ, ngaˬ-euˬ tsawˇ haˬ deuˬ-ahˇ gaˇ ma sheuˬ bahˬ-euˬ meh.

Yeˬlaˬmiˇ 31:6

Meuˬ-ahˇ loꞈ piˇ-eu tsawˇ haˬ deuˬ, aˬ dui maꞈ-euˬ Miˬyehˇ pyeuꞈ-eu Sahˬpaˬ Miˬyehˇ jawˇ gaˇ, Ziˇoˬ gawˬ jawˬ-ahˇ le beuˇ lehˇ, Eˇpaˬleˬ miˇ kʼahˬ gawˬ jawˬ gawˬ duˇ kʼoeˇ taˆ guˇ tehꞈ-a.”

Yeˬlaˬmiˇ 6:14

Ngaˬ-euˬ tsawˇ haˬ deuˬ-euˬ maˇ kʼehˬ maˇ naˇ deuˬ-ahˇ, aˬ gah pyaˆ-eu naˆ ni tehꞈ-ehˇ aˬ yawꞈ maꞈ sawˇ nehˬ-awˇ, maˬ taˬ leˇ gaˇ keuˆ ni taˬ leˇ gʼaˬ mehˬ lehˇ myawꞈ-eu meh.

Yeˬlaˬmiˇ 6:17

Kʼoeˇ naˇ, daˇ heh teˇ saˇ bi naˇ haˬ-eu gʼaˇ duˬ, meuˬ-ahˇ loꞈ-eu tsawˇ haˬ Sahˬpaˬ Miˬyehˇ tseˇ doˆ nehˬ kʼawꞈ, “Maˬ naˇ haˬ” lehˇ aˬ yawꞈ maꞈ ehˇ-eu meh.

Ngoeˇ dawˬ 2:14

Miˬyehˇ gʼaˇ duˬ ngehˬ dah-eu deuˬ, nawˬ-ahˇ jaˬ myawꞈ myawꞈ nehˬ-euˬ meh. Nawˬ-ahˇ aˬ cawˬ maˬ bi nyehꞈ ni, nawˬ-euˬ yaw lehˬ iˬ baˇ deuˬ-ahˇ, aˬ yawꞈ maꞈ maˬ pah doˆ nehˬ-a. Aˬ yawꞈ maꞈ ngehˬ-euˬ tmˇ-euˬ jeˬ, nawˬ-ahˇ gaˇ ma sheuˬ bahˬ-euˬ meh.

Ngoeˇ dawˬ 4:13

Kʼoeˇ gaˇ uˇ keuˆ leˇ nya-euˬ-aˬ, bawˇ lawˇ peh hawˇ-eu piˇ ma deuˬ, tsawˇ muiˬ deuˬ-ahˇ sehꞈ-eu laꞈ kʼoeˇ, iˬ baˇ mˇ-euˬ baˬ da neh meh.

Yeˬsaˬgeˬlaˇ 3:17

“Tsawˇ haˬ zaˬ-oˇ, ngaˇ nawˬ-ahˇ Iˇsaˬleˬlaˆ tsawˇ jeuˬ-ahˇ haw-eu gʼaˬ bi geuꞈ ma. Aˬ yawꞈ maꞈ nui ma paˇ laˇ ni ngaˬ neh mehˬ-euˬ dawˬ deuˬ aˬ yawꞈ maꞈ-ahˇ nawˇ ya biꞈ meh.

Yeˬsaˬgeˬlaˇ 33:7

“Tsawˇ haˬ zaˬ-oˇ, nymˬ-mˇ ngaˇ nawˬ-ahˇ Iˇsaˬleˬlaˆ miˇ kʼahˬ-ahˇ loꞈ piˇ-eu gʼaˬ bi geuꞈ-eu ma. Ngaˬ-euˬ kʼaˬ meh-ahˇ kʼaˇ doˆ le-euˬ dawˬ deuˬ, aˬ yawꞈ maꞈ-ahˇ nawˇ ya dzawˇ gaˬ nehˬ meh.

Hawˇseˬ 5:1

Piˇ ma deuˬ-oˇ, naˬ bawˇ gaˬ-awˬ. Iˇsaˬleˬlaˆ tsawˇ haˬ deuˬ-oˇ, naˬ bawˇ ciˬ kʼmˇ-awˇ naˇ haˬ-awˬ. Sahˬpaˬ-euˬ nymˇ kʼahˬ zaˬ deuˬ-oˇ, yaw muiˬ paˬ-ehˇ naˇ haˬ taˬ-awˬ. Naw maꞈ-ahˇ yaˇ kʼaˬ daˇ-eu dawˬ, keuˆ le luꞈ gaˇ naˇ haˬ taˬ-awˬ. Naw maꞈ dehꞈ leꞈ jawˇ leꞈ-euˬ-aˬ, Miˇ zaˬ paˬ-ahˇ jeˬ beuˆ tahˇ-awˇ, Taˬbawˬ meuˬ-ahˇ baw gʼaꞈ kʼmˇ-awˇ,

Hawˇseˬ 9:7

Oꞈ-eu geuˇ-eu loꞈ-ehˇ kʼehˬ-eu, kʼehˬ nah kʼaˆ nah keuˆ le luꞈ meh. Aˇ nah aˇ yamˬ kʼoeˇ keuˆ le ngeh, Iˇsaˬleˬlaˆ siˬ le tehꞈ-a. “Bawˇlawˇpeh heu gʼaˬ tsawˇ uˬ nga.” “Shaˆ ma heu gʼaˬ aˬ dzawˬ nga” lehˇ, naw maꞈ dawˬ doeˇ ngehˬ daˆ-euˬ meh. Naw maꞈ iˬ baˇ myaˬ-eu miˇ neh, naw maꞈ ngaˬ-ahˇ bye dui dui meh.

Hawˇseˬ 9:9

Giˇbyaˬ meuˬ-ahˇ dehꞈ ngeh loꞈ-ehˇ aˬ yawꞈ maꞈ kʼaˇ mˇ kʼaˇ shaˇ-eu, ehˇ kʼaˇ maˬ za ni haiˬ-eu meh. Iˬ baˇ kʼoeˇ deuˬ-ahˇ maˬ ngehˇ ni, Miˬyehˇ kʼehˬ nehˬ kʼaˆ nehˬ tehꞈ-a.

Miˇkaˬ 7:4

Aˬ yawꞈ maꞈ laꞈ kʼoeˇ aˬ cawˬ naˆ maˬ tseˇ sui dui dawˇ dui dui-eu deuˬ kʼawꞈ, gaˇ dahˇ maˬ tsoeˬ-eu jaˆ guˬ jaˆ gaˆ loˆ ni tehꞈ meh. Miˬyehˇ gʼaˇ duˬ ngehˬ dah-eu deuˬ-ahˇ bi ehˇ taˬ-euˬ loꞈ-ehˇ, tsawˇ haˬ kʼoeˇ deuˬ-ahˇ Miˬyehˇ kʼehˬ nehˬ kʼaˆ nehˬ-eu aˇ nah keuˆ laˇ-euˬ meh. Nymˬ-mˇ poˆ jawˇ aˬ yawꞈ maꞈ tiˬ jeˬ-iˬ shaˇ noeˬ maˬ doˆ ni pyeuꞈ laˇ taˬ-euˬ meh.

Yoˇhaˬ 15:24

Tsawˇ haˬ tiˬ gʼaˬ-iˬ maˬ mˇ haw-euˬ gaˇ heu deuˬ aˬ yawꞈ maꞈ jawˇ gaˇ ngaˇ maˬ mˇ-euˬ law nmˇ-aˬ, aˬ yawꞈ maꞈ iˬ baˇ maˬ ahˇ-aˇ. Ehˇ kʼawꞈ, ngaˬ neh mˇ-euˬ gaˇ-ahˇ aˬ yawꞈ maꞈ ya mawˇ-awˇ, ngaˬ-ahˇ maˬ ehˇ, ngaˬ Da-ahˇ maˬ ehˇ, aˬ yawꞈ maꞈ muiˇ-eu meh.

Lormav 3:7

Ehˇ kʼawꞈ, ngaˬ-euˬ yaw lehˬ kʼoeˇ-aˬ, Miˬyehˇ tsaˬ-eu dawˇ-eu gaˇ kawˆ bi mawˇ shawˇ dzehˬ laˇ-eu gʼaˇ duˬ hawˇ-eu aˬ yawꞈ-euˬ yaw shehꞈ kʼahˬ sehˇ gʼaˇ duˬ pyeuꞈ-eu ngeuˇ naˇ, aˬ dui aˬ joˆ-ehˇ ehˇ nmˇ. Kʼoeˇ loꞈ-ehˇ ngeuˇ meh lehˇ ehˇ naˇ, ngaˬ-ahˇ iˬ baˇ zaˬ lehˇ aˬ joˆ-ehˇ sawˇ nya ta.

HeˬByehˇ 13:17

Naw maꞈ kʼoeˇ taˆ aˬ yuiꞈ aˬ tsu geuꞈ-eu deuˬ-euˬ ehˇ dawˬ yaw muiˬ paˬ-ehˇ naˇ haˬ geuꞈ-awˬ. Aˬ yawꞈ maꞈ neh mˇ-euˬ gaˇ deuˬ Miˬyehˇ mehˬ shi ya dzawˇ mehˬ leˇ-eu baˬ da neh, jawˇ naˬ maˬ mˇ ni naw maꞈ-euˬ saꞈ laˇ-ahˇ haw piˇ luꞈ-eu meh. Aˬ yawꞈ maꞈ-euˬ ehˇ dawˬ-ahˇ naw maꞈ naˇ haˬ geuꞈ naˇ, aˬ yawꞈ maꞈ-euˬ gaˇ-ahˇ aˬ yawꞈ maꞈ laˬ kʼaˬ cehˇ-eu laꞈ kʼoeˇ ya mˇ tehꞈ-a. Naw maꞈ maˬ naˇ haˬ geuꞈ naˇ, aˬ yawꞈ maꞈ noeˬ shaˬ-eu laꞈ kʼoeˇ ya mˇ-awˇ, naw maꞈ gʼaˇ duˬ gaˇ dahˇ maˬ tsoeˬ-a.