Hawˇseˬ 5:1 - Akha

¹ Piˇ ma deuˬ-oˇ, naˬ bawˇ gaˬ-awˬ. Iˇsaˬleˬlaˆ tsawˇ haˬ deuˬ-oˇ, naˬ bawˇ ciˬ kʼmˇ-awˇ naˇ haˬ-awˬ. Sahˬpaˬ-euˬ nymˇ kʼahˬ zaˬ deuˬ-oˇ, yaw muiˬ paˬ-ehˇ naˇ haˬ taˬ-awˬ. Naw maꞈ-ahˇ yaˇ kʼaˬ daˇ-eu dawˬ, keuˆ le luꞈ gaˇ naˇ haˬ taˬ-awˬ. Naw maꞈ dehꞈ leꞈ jawˇ leꞈ-euˬ-aˬ, Miˇ zaˬ paˬ-ahˇ jeˬ beuˆ tahˇ-awˇ, Taˬbawˬ meuˬ-ahˇ baw gʼaꞈ kʼmˇ-awˇ,

Hawˇseˬ 5:1 ပူးပေါင်းရင်းမြစ်များ

Yeˬlaˬmiˇ 11:7

Aˬ yawꞈ maꞈ-euˬ aˬ poeˬ aˬ bawˇ deuˬ-ahˇ Iˇjiˇtuˆ miˇ kʼahˬ laꞈ kʼoeˇ ngaˇ sheuˬ doˆ nehˬ ngeh, ngaˬ-euˬ ehˇ dawˬ-ahˇ ya naˇ haˬ meh lehˇ ngaˇ ehˇ duˬ nehˬ-awˇ, iˬ nah keuˆ ni ngaˇ kʼoeˇ loꞈ-ehˇ ehˇ luꞈ-eu ma.

Yeˬlaˬmiˇ 13:18

Sahˬpaˬ Miˬyehˇ ngaˬ-ahˇ ehˇ-eu, “Sahˬ paˬ hawˇ-eu aˬ yawꞈ-euˬ aˬ ma-ahˇ, heu loꞈ-ehˇ ehˇ nehˬ-awˬ. Naw maꞈ-euˬ nuiˇ mahˬ-ahˇ byehˇ-awˇ zaꞈ ka le-awˬ. Aˬ jeˬ miˇ neh ehˇ naˇ naw maꞈ uˬ duˬ-ahˇ kʼoˆ luꞈ-eu, kʼahˬ sehˇ huiˬ-eu shuiˇ uˬ kʼoˆ ga lehˆ le tehꞈ-a.

Yeˬlaˬmiˇ 46:18

Ngaˇ, Baoˬ huiˬ-eu Sahˬpaˬ Miˬyehˇ-aˬ, dzoeˬ dzaˬ sahˬ paˬ pyeuꞈ-awˇ, dehꞈ luꞈ-eu Miˬyehˇ ma. Gawˬ jawˬ dawˬ tawˆ kʼoeˇ taˆ Taˬbawˬ gawˬ jawˬ goˇ-eu loꞈ-ehˇ, laˆ shaˆ kʼoeˇ taˆ Kaˬlaˬmeˬlaˇ gawˬ jawˬ uˆ-eu loꞈ-ehˇ, naw maꞈ-ahˇ guiˇ deuˆ le-eu gʼaˬ, gʼaˬ kʼaˆ aˬ cawˬ taꞈ-ehˇ dzehˬ ma.

Hawˇseˬ 10:15

Beˬdeˬlaˇ-ahˇ jawˇ-eu deuˬ-oˇ, naw maꞈ haiˬ dui dui-euˬ miˇ neh, kʼoeˇ naˆ ni gʼeh-eu kʼehˬ-eu jeˬ, naw maꞈ kʼoeˇ taˆ keuˆ le tehꞈ-a. Guiˇ deuˆ dahˬ beh doˆ laˇ ngeh neh, Iˇsaˬleˬlaˆ-euˬ sahˬ paˬ-aˬ, ya shiˇ tsehˆ-eu yaw duˬ baw meh.”

Hawˇseˬ 13:8

Zaˬ bi nyehꞈ-euˬ kʼaˬ hmˇ loꞈ-ehˇ, naw maꞈ-euˬ kʼahˬ ngawˬ paˆ dzeh ma. Haiˬ-eu aˇ laˬ jaˬ shiˇ loꞈ-ehˇ, naw maꞈ-ahˇ ngaˇ kawꞈ sehꞈ dzaˬ ma. Bawˇ tsahˬ jeˬ zaˬ yaw haiˬ loꞈ-ehˇ, naw maꞈ-ahˇ ngaˇ cehˬ paˆ dzeh ma.

Hawˇseˬ 4:1

Sahˬpaˬ Miˬyehˇ ngehˬ-eu dawˬ-ahˇ, Iˇsaˬleˬlaˆ naˬ bawˇ gaˬ-awˬ. “Miˇ kʼahˬ heu-euˬ tsawˇ haˬ deuˬ-ahˇ, aˬ yawꞈ ja-eu gaˇ kawˆ jaˆ meh. Saˇ jaˇ ziꞈ-eu gaˇ kawˆ maˬ ehˇ, gʼawˬ shaˬ gaˬ-eu gaˇ kawˆ maˬ ehˇ, Miˬyehˇ-ahˇ siˬ nya-eu maˬ ehˇ, miˇ kʼahˬ heu kʼahˬ laꞈ kʼoeˇ maˬ jaˆ.

Hawˇseˬ 6:9

Tahˇ joe baˬ maꞈ loꞈ-eu loꞈ-ehˇ, piˇ ma baˬ maꞈ gm-awˇ loꞈ meh. Muiˬ-eu shawˇ-eu Sheˬkmˬ meuˬ-ahˇ, le-eu gaˇ pehˇ tsawˇ haˬ sehꞈ-awˇ, maˇ maˇ ni yaw haiˬ mˇ-eu meh.

Hawˇseˬ 9:8

Iˇsaˬleˬlaˆ-ahˇ mehˬ nehˬ-eu, Bawˇlawˇpeh bi geuꞈ-eu gʼaˇ duˬ, Miˬyehˇ ngaˬ-ahˇ pyehˬ leꞈ-euˬ meh. Ehˇ kʼawꞈ, ngaˇ kʼaˇ iˇ kʼaˇ laˇ gaˇ, aˇ jiˇ lahˇ ju kʼmˇ-eu loꞈ-ehˇ, naw maꞈ ngaˬ-ahˇ kʼmˇ luꞈ-eu meh. Miˬyehˇ-euˬ miˇ kʼahˬ-ahˇ jawˇ-eu. Miˬyehˇ-euˬ tsawˇ haˬ heu deuˬ-aˬ, Bawˇlawˇpeh-ahˇ muiˇ-eu deuˬ meh.

Yawˇlaˆ 1:2

Tsawˇ mawˬ tsawˇ kʼaˆ deuˬ naˇ haˬ-awˬ. Yuˇdaˆ miˇ kʼahˬ laꞈ kʼoeˇ jawˇ-eu, yawˬ gʼaˬ yawˬ na luꞈ naˇ haˬ-awˬ. Naw maꞈ-euˬ ziˇ laꞈ kʼoeˇ maˬ ehˇ, aˬ poeˬ aˬ bawˇ-euˬ ziˇ maˬ ehˇ, heu loꞈ-ehˇ gʼeh-eu gaˇ kawˆ heu, puˬ haw mawˇ haw-euˬ jaˆ meh loˇ.

Aˬmoˆ 3:1

Iˇsaˬleˬlaˆ miˇ kʼahˬ-ahˇ jawˇ-eu tsawˇ haˬ deuˬ-oˇ, naˇ haˬ sheˇ. Naw maꞈ tsawˇ jeuˬ jeuˬ lah ni-ahˇ Iˇjiˇtuˆ miˇ kʼahˬ laꞈ kʼoeˇ neh sheuˬ doˆ nehˬ laꞈ-euˬ gʼaˬ pyeuꞈ-eu Sahˬpaˬ Miˬyehˇ neh naw maꞈ-euˬ gaˇ kawˆ heu loꞈ-ehˇ ehˇ taˬ-euˬ meh.

Aˬmoˆ 7:9

Iˇtsaˆ-euˬ zaˬ deuˬ uˆ deuˬ uˬ duˬ tahˬ-eu jawˇ duˬ ya cawˆ-iˇ tehꞈ-a. Iˇsaˬleˬlaˆ tsawˇ jeuˬ-euˬ muiˬ-eu shawˇ-eu jawˇ duˬ deuˬ ya luˬ ya seˇ-iˇ jiˇ tehꞈ-a. Sahˬpaˬ Yeˬyawˇbamˬ-euˬ nymˇ jiˇ sahˬ paˬ geuꞈ-awˇ uˆ lahˇ-eu aˇ yamˬ aˇ saˬ saˬ tehꞈ-a.”

Miˇkaˬ 3:1

Iˇsaˬleˬlaˆ tsawˇ haˬ aˬ yuiꞈ aˬ tsu deuˬ-oˇ, ngaˇ ehˇ gaˇ naˇ haˬ sheˇ. Miˇ kʼahˬ zaˬ deuˬ yaw tsaˬ yaw dawˇ dawˇ-ehˇ dehꞈ ni naw maꞈ haw-eu tsaˬ meh.

Miˇkaˬ 3:9

Yaw tsaˬ yaw dawˇ jeˬ-ahˇ bye-awˇ, yaw tsaˬ jeˬ-ahˇ yaw lehˬ jeˬ laˆ pyeuꞈ-eu Iˇsaˬleˬlaˆ tsawˇ haˬ deuˬ-oˇ, ngaˇ ehˇ gaˇ naˇ haˬ sheˇ.

Miˇkaˬ 7:2

Miˇ kʼahˬ kʼahˬ lah-ehˇ yaw sui yaw dawˇ tiˬ gʼaˬ-iˬ maˬ jawˇ-ehˇ, Miˬyehˇ -ahˇ saˇ jaˇ ziꞈ-eu tiˬ gʼaˬ-iˬ maˬ jawˇ-a. Tsawˇ haˬ yawˬ gʼaˬ na luꞈ aˬ cawˬ-ahˇ sehꞈ-eu lehˇ nawˬ jawˬ luꞈ meh. Yawˬ gʼaˬ na luꞈ yawˬ ha-euˬ miˇ kʼahˬ laꞈ kʼoeˇ tiˬ kawˆ loꞈ-ehˇ jawˇ-eu tsawˇ haˬ-ahˇ lahˇ ju kʼmˇ-eu meh.

Maˬlaˬkiˇ 1:6

Piˇ ma deuˬ-ahˇ Sahˬpaˬ Miˬyehˇ heu loꞈ-ehˇ ehˇ-eu meh. “Zaˬ deuˬ aˬ da-ahˇ yaw zeu baw-eu siˬ nya-awˇ, zaˬ kʼaˆ deuˬ baw leˬ-ahˇ yaw zeu baw-eu siˬ nya meh. Ngaˇ naw maꞈ-euˬ aˬ da ma. Aˬ jeˬ miˇ neh ngaˬ-ahˇ yaw zeu maˬ baw te. Naw maꞈ ngaˬ-ahˇ yehˬ bawˬ sehˇ lu-ehˇ gʼeh-eu uˬ taꞈ, ‘Nga maꞈ nawˬ-ahˇ aˬ joˆ-ehˇ jahˇ-awˇ yehˬ bawˬ sehˇ lu-ehˇ gʼeh taˬ-euˬ jaˆ ta’ lehˇ, naw maꞈ paˇ ehˇ-eu meh.

Maˬlaˬkiˇ 2:1

Baoˬ huiˬ-eu Sahˬpaˬ Miˬyehˇ piˇ ma deuˬ-ahˇ heu loꞈ-ehˇ ehˇ-eu meh. “Naw maꞈ-ahˇ ngaˇ heu loꞈ-ehˇ dawˬ biꞈ-eu ma.

Yaˇ kʼaˬ daˇ 4:12

Taˬbawˬ gawˬ jawˬ kʼoeˇ taˆ Baˬyehˇ daˆ leˇ-euˬ gaˇ, Siˇseˬlaˇ ya siˬ ngeh,

Yaˇ kʼaˬ daˇ 4:6

Tiˬ nah keuˆ laˇ ngeh, Naˬtaˬliˇ miˇ kʼahˬ Geˬdeˬshaˆ meuˬ-ahˇ jawˇ-eu Aˬbiˇnamˬ-euˬ aˬ li Baˬyehˇ jawˇ gaˇ aˬ yawꞈ iˇ-awˇ ehˇ-eu, “Iˇsaˬleˬlaˆ tsawˇ jeuˬ-euˬ Miˬyehˇ pyeuꞈ-eu Sahˬpaˬ Miˬyehˇ nawˬ-ahˇ heu loꞈ-ehˇ dawˬ biꞈ leꞈ-euˬ meh. ‘Naˬtaˬliˇ tsawˇ jeuˬ hawˇ-eu Zeˬbuˬluˬ tsawˇ jeuˬ laꞈ kʼoeˇ, tsawˇ haˬ tiˬ muiˇ gʼaˬ sheuˬ-awˇ, Taˬbawˬ gawˬ jawˬ-ahˇ le-awˬ.

1 Saˬmeuˬlaˆ 7:16

Beˬdeˬlaˇ meuˬ, Giˇlaˇgaˬlaˇ meuˬ, Miˇzaˬpaˬ meuˬ heu deuˬ-ahˇ, aˬ yawꞈ kʼoꞈ yawꞈ cah doe-awˇ, dawˬ ja kʼaˇ doˆ gaˇ yaˇ kʼaˬ daˇ nehˬ-euˬ meh.

1 Saˬmeuˬlaˆ 7:5

Kʼoeˇ naˇ, Saˬmeuˬlaˆ ehˇ-eu, “Iˇsaˬleˬlaˆ tsawˇ haˬ deuˬ dawˬ tawˆ luꞈ-ahˇ Miˇzaˬpaˬ meuˬ-ahˇ kuˇ uiˬ-awˬ. Naw maꞈ gʼaˇ duˬ Sahˬpaˬ Miˬyehˇ-ahˇ ngaˇ kʼoeˇ gaˇ guiˬ lahˬ shaˇ ma.”

1 Saˬmeuˬlaˆ 7:6

Kʼoeˇ ngeh, aˬ yawꞈ maꞈ dawˬ tawˆ luꞈ Miˇzaˬpaˬ meuˬ-ahˇ uiˬ laˇ jiˇ-euˬ meh. Aˬ yawꞈ maꞈ iˇ cuꞈ kʼawꞈ-awˇ shehˆ-eu laꞈ kʼoeˇ, Sahˬpaˬ Miˬyehˇ-ahˇ lawˇ nehˬ-awˇ, maˬ dzaˬ maˬ dawˇ ni nah lah lah-euˬ meh. “Nga maꞈ Sahˬpaˬ Miˬyehˇ mehˬ shi iˬ baˇ mˇ-euˬ ma” lehˇ aˬ yawꞈ maꞈ ehˇ-eu meh. Saˬmeuˬlaˆ-aˬ, Miˇzaˬpaˬ meuˬ-ahˇ jawˇ-awˇ, Iˇsaˬleˬlaˆ tsawˇ haˬ yaw kaˬ ja dzaˬ gaˇ yaˇ kʼaˬ daˇ nehˬ-euˬ meh.