Hawˇseˬ 2:20 - Akha

²⁰ Ngaˬ-euˬ saˇ jaˇ-ahˇ ngaˇ ziꞈ-awˇ, nawˬ-ahˇ ngaˬ-euˬ bi pyeuꞈ tsehˆ ma. Ngaˇ Sahˬpaˬ Miˬyehˇ ngeuˇ meh lehˇ, nawˇ yaw muiˬ-ehˇ siˬ duˬ tehꞈ-a.

Hawˇseˬ 2:20 ပူးပေါင်းရင်းမြစ်များ

Aˇ dahˬ 9:10

Kʼaˇ dehꞈ kʼaˇ jawˇ-eu jeˬ zaˬ deuˬ hawˇ-eu ho zaˬ nga jiˇ deuˬ nehˬ-ehˇ maˬ ehˇ, saˇ baoˬ laꞈ kʼoeˇ neh kʼaˇ doˆ le-euˬ jeˬ dawˬ tawˆ luꞈ nehˬ-ehˇ maˬ ehˇ, ngaˇ heu loꞈ-ehˇ dawˬ ma saˇ jaˇ dzaˬ-eu ma.

Iˇsaˬyaˇ 2:4

Miˇ kʼahˬ tsawˇ jeuˬ yaw kaˬ-ahˇ aˬ yawꞈ yaˇ kʼaˬ daˇ-awˇ, miˇ tsaˬ zaˬ-ahˇ aˬ yawꞈ laˆ tsaˬ laˆ tsahˇ nehˬ tehꞈ-a. Guiˇ deuˆ-eu mi cehˇ-ahˇ aˬ yawꞈ maꞈ nyoˬ tsehˬ tehˆ pyeuꞈ-awˇ, guiˇ deuˆ-eu gahˬ-ahˇ yehˬ kʼoꞈ tehˆ pyeuꞈ tehꞈ-a. Tsawˇ jeuˬ tiˬ jeuˬ tiˇ jeuˬ guiˇ maˬ paˇ deuˆ-ehˇ, guiˇ deuˆ-eu gaˇ kawˆ maˬ mehˬ maˬ sawˇ ni byehˇ tehꞈ-a.

Iˇsaˬyaˇ 62:4

Paˬ tseuˆ bi tseuˆ dzeh-euˬ zaˬ lehˇ nawˬ-ahˇ maˬ paˇ kuˇ meh. Nawˬ-euˬ miˇ kʼahˬ-ahˇ kʼawꞈ, “meuˬ meuˬ tsoeˬ” lehˇ maˬ paˇ kuˇ meh. “Miˬyehˇ nui kʼahˇ shiˇ-eu gʼaˬ” lehˇ nawˬ-ahˇ ya kuˇ paˇ-awˇ, nawˬ-euˬ miˇ kʼahˬ-euˬ tsawˇ myahˇ yaw shuiꞈ-aˬ, “Laˬ kʼaˬ tiˬ cehˇ sheuˬ dahˬ dzaˬ-euˬ” lehˇ meh. Aˬ jeˬ miˇ neh ehˇ naˇ, Sahˬpaˬ Miˬyehˇ nawˬ-ahˇ nui kʼahˇ shiˇ-awˇ, nawˬ-euˬ miˇ kʼahˬ hawˇ-eu aˬ yawꞈ, miˬ zaˬ yo zaˬ-ahˇ duˇ-eu meh.

Yeˬlaˬmiˇ 24:7

Ngaˇ Sahˬpaˬ Miˬyehˇ pyeuꞈ-eu gaˇ kawˆ siˬ mawꞈ-eu nui ma aˬ yawꞈ maꞈ-ahˇ ngaˇ biꞈ nehˬ ma. Aˬ yawꞈ maꞈ-ahˇ ngaˬ-euˬ tsawˇ haˬ bi pyeuꞈ laˇ-awˇ, ngaˇ aˬ yawꞈ maꞈ-euˬ Miˬyehˇ pyeuꞈ ma. Aˬ jeˬ miˇ neh ehˇ naˇ, aˬ yawꞈ maꞈ-euˬ nui ma gʼawˇ mawˇ dawˬ tawˆ luꞈ, ngaˇ jawˇ gaˇ gʼoꞈ kʼoꞈ laˇ tehꞈ-a.

Yeˬlaˬmiˇ 30:10

“Ngaˬ-euˬ tsawˇ haˬ deuˬ-oˇ, taˬ guˆ. Iˇsaˬleˬlaˆ tsawˇ haˬ deuˬ-oˇ, nui ma taˬ baˬ. Naw maꞈ-ahˇ nyehꞈ daˆ gʼeh-awˇ bi jawˇ-euˬ, gaˇ mahˇ kaˬ gaˇ jaˆ-eu miˇ kʼahˬ kʼoeˇ kʼahˬ laꞈ kʼoeˇ, naw maꞈ-ahˇ ngaˇ ka kʼoꞈ doˆ ma. Naw maꞈ iˇ kahˇ gʼoꞈ keuˆ laˇ-awˇ, nui saˇ oꞈ-eu laꞈ kʼoeˇ ya dehꞈ tehꞈ-a. naw maꞈ kʼahˬ lahˇ kʼaˇ maˬ za-ehˇ, noeˬ guˆ kʼaˇ maˬ za ni ya dehꞈ tehꞈ-a.

Yeˬlaˬmiˇ 32:41

Aˬ yawꞈ maꞈ-ahˇ yaw muiˬ jeˬ mˇ nehˬ-eu gʼaˇ duˬ ngaˇ laˬ kʼaˬ cehˇ-awˇ, miˇ kʼahˬ heu kʼahˬ laꞈ kʼoeˇ ziꞈ dah ni bi dehꞈ ma.

Yeˬlaˬmiˇ 9:24

Ngaˬ-euˬ gʼoeˇ-eu gaˬ-eu jeˬ aˬ myah luꞈ ziꞈ-awˇ, ngaˇ yaw tsaˬ yaw dawˇ jeˬ mˇ-eu miˇ neh, kʼahˬ sehˇ kʼaˇ jehˆ mawꞈ-eu tsawˇ haˬ, ngaˬ-ahˇ siˬ nya-eu jeˬ gaˇ kawˆ kʼahˬ sehˇ jehˆ-awˬ. Kʼoeˇ loꞈ-ehˇ mˇ gaˇ ngaˇ nui kʼahˇ shiˇ-eu ma lehˇ, Sahˬpaˬ Miˬyehˇ pyeuꞈ-eu ngaˇ ehˇ-eu ma.”

Yeˬsaˬgeˬlaˇ 16:62

Nawˬ nehˬ-ehˇ ngaˇ dawˬ ma saˇ jaˇ paˇ dzaˬ ziꞈ-awˇ, ngaˇ Sahˬpaˬ Miˬyehˇ pyeuꞈ-eu nawˇ ya siˬ duˬ tehꞈ-a.

Yeˬsaˬgeˬlaˇ 16:8

“Ngaˇ yawˬ poˆ yawˬ paˇ oe tsehˆ ngeh, nawˇ cawˬ shaˇ baw yamˬ tsaˬ laˇ taˬ-euˬ meh. Neˇ myawˆ ni gʼeh-eu nawˬ-euˬ gʼawˇ mawˇ-ahˇ, ngaˬ-euˬ pehˇ kʼahˬ neh tsahˇ lahˇ nehˬ-awˇ, nawˬ-ahˇ sheuˬ ma lehˇ saˇ jaˇ biꞈ yaꞈ-euˬ ma. Ngeuˇ ma. Nawˬ-ahˇ sheuˬ-eu gʼaˇ duˬ ngaˇ saˇ jaˇ dzaˬ gʼaˬ-awˇ, nawˇ ngaˬ-euˬ zaˬ kʼaˬ pyeuꞈ laˇ gʼaˬ-euˬ ma” lehˇ Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ ehˇ-eu meh.

Yeˬsaˬgeˬlaˇ 34:25

Aˬ yawꞈ maꞈ guˆ kʼaˇ maˬ za-ehˇ ya dehꞈ ni, aˬ yawꞈ maꞈ nehˬ-ehˇ ngaˇ dawˬ ma saˇ jaˇ dzaˬ ma. Ngaˬ-euˬ yawˇ deuˬ deh ga-ahˇ nui ma saˇ lehˆ ni ya gaˆ-awˇ, sahˬ kʼaˆ uˬ moˆ ciˬ cuˇ ni ya yuꞈ-eu gʼaˇ duˬ, bawˇ tsahˬ jeˬ zaˬ yaw haiˬ dawˬ tawˆ luꞈ ngaˇ laˆ byoˆ ma.

Yeˬsaˬgeˬlaˇ 34:27

Aˇ bawˇ deuˬ aˇ siˬ siˬ le-awˇ, deh yaˇ-ahˇ dzaˬ la gʼo cehˇ loˆ le-eu uˬ taꞈ, yawˬ gʼaˬ na luꞈ yawˬ ha-euˬ miˇ tsaˬ-ahˇ guˆ kʼaˇ maˬ za ni ya jawˇ tehꞈ-a. Ngaˬ-euˬ tsawˇ haˬ deuˬ daˬ luꞈ-eu shmˇ caˆ ngaˇ gʼeu tsehˆ-awˇ, aˬ yawꞈ maꞈ-ahˇ zaˬ kʼaˆ bi geuꞈ-euˬ deuˬ-euˬ laꞈ-ahˇ bi buˬ-iˇ ngeh, ngaˇ Sahˬpaˬ Miˬyehˇ pyeuꞈ-eu gaˇ kawˆ aˬ yawꞈ maꞈ siˬ duˬ tehꞈ-a.

Yeˬsaˬgeˬlaˇ 38:23

Ngaˇ huiˬ dui mahˇ dui dui-awˇ muiˬ-eu shawˇ-eu gʼaˬ pyeuꞈ-eu gaˇ kawˆ, tsawˇ jeuˬ dawˬ tawˆ luꞈ-ahˇ kʼoeˇ ngeh nah bi siˬ duˬ ma. Ngaˇ Sahˬpaˬ Miˬyehˇ pyeuꞈ-eu aˬ yawꞈ maꞈ-ahˇ siˬ duˬ leˇ tehꞈ-a.”

Hawˇseˬ 13:4

Sahˬpaˬ Miˬyehˇ ehˇ-eu dawˬ-aˬ, “Sahˬpaˬ Miˬyehˇ pyeuꞈ-eu ngaˇ-aˬ, Iˇjiˇtuˆ miˇ kʼahˬ laꞈ kʼoeˇ neh, naw maꞈ-ahˇ sheuˬ doˆ nehˬ laꞈ-euˬ, naw maꞈ-euˬ Miˬyehˇ pyeuꞈ-eu ma. Naw maꞈ-euˬ Miˬyehˇ ngaˇ tehꞈ ma. Ka kʼoꞈ nehˬ-euˬ gʼaˬ ngaˇ tehꞈ ma.

Hawˇseˬ 2:19

Iˇsaˬleˬlaˆ-oˇ, nawˬ-ahˇ ngaˇ, ngaˬ-euˬ miˬ zaˬ bi geuꞈ-eu ma. Nawˬ-euˬ kʼoeˇ taˆ saˇ jaˇ ziꞈ-awˇ, nawˬ-ahˇ gaˬ-eu ngaˬ-euˬ nui gaˬ, nawˬ-ahˇ ngaˇ gʼawˬ shaˬ gaˬ-eu jeˬ, tiˬ jawˇ-iˬ maˬ bi tsehˆ leˇ-ehˇ, tiˬ jawˇ-iˬ maˬ paˇ dehꞈ gʼawˬ ma.

Hawˇseˬ 6:6

Lawˇ-eu shehˇ-eu jeˬ ngaˇ maˬ mawꞈ. Ngaˬ-ahˇ aˬ myah luꞈ gaˬ-eu jeˬ, ngaˇ mawꞈ dui dui-eu tiˬ jeˬ ma. Miˬ dzaˬ dzah-awˇ lawˇ gaˇ maˬ mawꞈ. naw maꞈ ngaˬ-ahˇ siˬ nya-eu jeˬ, ngaˇ mawꞈ dui dui-eu tiˬ jeˬ ma.

Uˬ duˬ 26:5

Naw maꞈ dzaˬ la gʼo cehˇ za dui dui le-eu miˇ neh, aˬ gaꞈ aˇ siˬ pyaˆ yamˬ-ahˇ keuˆ ni, cehˇ ya laˆ luiˆ luꞈ gaˇ keuˆ-awˇ, siˬ yoeˬ sehˬ-eu yamˬ-ahˇ keuˆ ni, aˬ gaꞈ aˇ siˬ pyaˆ pyaˆ-ehˇ ya jawˇ gaˇ keuˆ tehꞈ-a. Yawˬ ha kʼaˇ dzaˬ mawꞈ-eu jeˬ tiˬ byah tiˬ loꞈ jaˆ-awˇ, guˆ-eu gaˆ-eu jeˬ-ahˇ kʼahˬ lahˇ kʼaˇ maˬ za ni, naw maꞈ-euˬ miˇ kʼahˬ laꞈ kʼoeˇ, saˇ lehˆ ni naw maꞈ ya jawˇ tehꞈ-a.

Uˬ duˬ 26:6

“Miˇ kʼahˬ saˇ-eu jeˬ, naw maꞈ-euˬ miˇ kʼahˬ kʼoeˇ taˆ ngaˇ bi keuˆ le-awˇ, tsawˇ haˬ tiˬ gʼaˬ-ahˇ-iˬ guˆ kʼaˇ maˬ za ni, naw maꞈ ya yuꞈ ya jawˇ tehꞈ-a. Miˇ kʼahˬ kʼoeˇ kʼahˬ laꞈ kʼoeˇ, haiˬ-eu jeˬ zaˬ deuˬ ngaˇ laˆ byoˆ-awˇ, guiˇ deuˆ-eu jeˬ kʼawꞈ maˬ jaˆ ni pyeuꞈ-iˇ tehꞈ-a.

Miˇkaˬ 4:3

Miˇ kʼahˬ tsawˇ jeuˬ dawˬ ja doˆ gaˇ, aˬ yawꞈ laˆ tsaˬ laˆ tsahˇ tehꞈ-a. Dawˬ peh gaˇ mahˇ gʼaˬ kʼaˆ luꞈ-eu, baoˬ huiˬ-eu miˇ kʼahˬ deuˬ-ahˇ kʼawꞈ, aˬ yawꞈ ngehˬ tsehˆ daˇ tsehˆ tehꞈ-a. Miˇ kʼahˬ tsawˇ jeuˬ guiˇ maˬ deuˆ-ehˇ, guiˇ mˇ-eu jeˬ maˬ paˇ baw-aˇ.

Zaˬkaˬliˇ 9:10

Sahˬpaˬ Miˬyehˇ ehˇ-eu, “Iˇsaˬleˬlaˆ-euˬ guiˇ laˆ lawˬ, Yeˬluˇsaˬlehˬ-euˬ guiˇ dziˬ mahˬ, dawˬ tawˆ luꞈ ngaˇ yuˇ byoˆ jiˇ-awˇ, Guiˇ deuˆ gaˇ geuꞈ-eu kaˆ myaˬ deuˬ, dawˬ tawˆ luꞈ ngaˇ laˆ cawˆ jiˇ ma. Naw maꞈ-ahˇ uˆ lahˇ-eu sahˬ paˬ, miˇ kʼahˬ tsawˇ jeuˬ-ahˇ tsaˬ leˇ-awˇ, laˆ shaˆ nyiˬ dzeˇ uˆ lahˇ gʼmˇ-awˇ, Uˇpaˬlaˇ lawˇ baˬ-ahˇ neh naˇ, mˬ dzeˇ miˇ dzeˇ dzoeˬ keuˆ tehꞈ-a.”

Maꞈtehˬ 11:27

“Yawˬ jeˬ na luꞈ, ngaˬ Da neh ngaˬ-ahˇ a nehˬ jiˇ laꞈ-euˬ meh. Aˬda maˬ ngeuˇ naˇ, Zaˬmaˇ-ahˇ siˬ nya-eu tiˬ gʼaˬ-iˬ maˬ jawˇ-a. Zaˬmaˇ hawˇ-eu Zaˬmaˇ neh tseˇ doˆ-awˇ pah mehˬ nehˬ-euˬ tsawˇ haˬ deuˬ maˬ ngeuˇ naˇ, Aˬda-ahˇ siˬ nya-eu tiˬ gʼaˬ-iˬ maˬ jawˇ-a.

Luˇkaꞈ 10:22

“Yawˬ jeˬ naˬ luꞈ ngaˬ Da neh ngaˬ-ahˇ a nehˬ jiˇ laꞈ-euˬ meh. Zaˬmaˇ-aˬ, aˬ suˇ gʼaˬ-a lehˇ, Aˬda maˬ ngeuˇ naˇ tiˬ gʼaˬ-iˬ maˬ siˬ nya-a. Kʼoeˇ loꞈ-ehˇ duˇ ni, Aˬda-aˬ, aˬ suˇ gʼaˬ-a lehˇ, Zaˬmaˇ hawˇ-eu Zaˬmaˇ neh tseˇ doˆ-awˇ pah mehˬ nehˬ-euˬ deuˬ maˬ ngeuˇ naˇ, tiˬ gʼaˬ-iˬ maˬ siˬ nya-a.”

Yoˇhaˬ 17:3

Nawˇ tiˬ gʼaˬ tehꞈ-ehˇ maˇ maˇ ni Miˬyehˇ meh lehˇ siˬ nya-awˇ, nawˬ neh kʼehˇ gʼeh leꞈ-euˬ Yeˬsuˇ Ka li-ahˇ siˬ nya-eu kʼoeˇ-aˬ, mˬ maˬ maˬ byaˆ zaˇ ziˇ dehꞈ-eu jeˬ pyeuꞈ-eu meh.

Yoˇhaˬ 8:55

Naw maꞈ aˬ yawꞈ-ahˇ maˬ siˬ nya-a. Ehˇ kʼawꞈ, ngaˇ aˬ yawꞈ-ahˇ siˬ nya ma. Aˬ yawꞈ-ahˇ maˬ siˬ nya nya lehˇ ngaˇ ehˇ naˇ, ngaˇ kʼawꞈ naw maꞈ loꞈ-ehˇ jaˬ myawꞈ myawꞈ-eu tsawˇ haˬ-ahˇ duˇ tehꞈ-a. Ngaˇ aˬ yawꞈ-ahˇ a diˇ siˬ nya-awˇ, aˬ yawꞈ-euˬ dawˬ-ahˇ naˇ haˬ geuꞈ luꞈ-eu ma.

2 Gawˇliˬtu 4:6

“Yaw zahˇ laꞈ kʼoeˇ yaw shehꞈ bya tehꞈ-a” lehˇ ehˇ-eu Miˬyehˇ hawˇ-eu Ka li-euˬ myaˆ pyawˬ kʼoeˇ taˆ bya doˆ le-euˬ Miˬyehˇ-euˬ yaw shehꞈ kʼahˬ sehˇ-ahˇ nga maꞈ siˬ nya laˇ ni nga maꞈ-euˬ nui ma laꞈ kʼoeˇ yaw shehꞈ bi bya laꞈ-euˬ Miˬyehˇ-aˬ, aˬ yawꞈ tiˬ gʼaˬ tehꞈ meh.

Piˇliˇpiˆ 3:8

Kʼoeˇ naˆ ni tehꞈ-ehˇ maˬ ngeuˇ-a siˬ. Gaˇ dahˇ tsoeˬ dzehˬ-eu jeˬ pyeuꞈ-eu ngaˬ-euˬ Sahˬpaˬ Yeˬsuˇ Ka li-ahˇ siˬ nya-eu jeˬ-ahˇ shaˇ cehˆ haw ngeh, ngaˬ neh kʼaˇ mˇ dzeuˇ-euˬ yawˬ jeˬ na luꞈ maˇ maˇ ni smˬ dui dui-eu jeˬ tehꞈ law hawˇ ngaˬ lehˇ sawˇ duˬ gʼaˬ-euˬ ma. Ka li-ahˇ ngaˇ geuꞈ mawꞈ dzehˬ-eu miˇ neh, ngaˬ neh kʼaˇ mˇ kʼaˇ shaˇ dzeuˇ yaꞈ-euˬ jeˬ dawˬ tawˆ luꞈ bi smˬ-iˇ jiˇ-euˬ ma. Ka li-ahˇ ngaˇ za nya ni, kʼoeˇ deuˬ dawˬ tawˆ luꞈ-ahˇ yaˆ dzeh-euˬ jaˆ guˬ jaˆ meuˬ loꞈ-ehˇ tehꞈ-ehˇ sawˇ-euˬ ma.

Gawˇlawˇsehˇ 1:10

Kʼoeˇ miˇ neh, Sahˬpaˬ Yeˬsuˇ bi dehꞈ mawꞈ-eu loꞈ-ehˇ naw maꞈ dehꞈ nya laˇ-awˇ, aˬ yawꞈ nui kʼahˇ shiˇ-eu jeˬ-ahˇ naw maꞈ aˬ myah luꞈ mˇ nya laˇ tehꞈ-a. Naw maꞈ yaw dehꞈ dehꞈ-eu laꞈ kʼoeˇ yaw muiˬ jeˬ gʼawˬ mya ni doˆ laˇ-awˇ, Miˬyehˇ-ahˇ siˬ nya dzehˬ laˇ tehꞈ-a.

2 Tiˆmoˇseˬ 1:12

Kʼoeˇ-euˬ gʼaˇ duˬ, kʼehˬ-eu kʼaˆ-eu heu deuˬ-ahˇ ngaˇ daˬ luꞈ-eu ma. Ehˇ kʼawꞈ, ngaˇ tiˬ pawꞈ-iˬ maˬ shaꞈ dawˇ. A jeˬ miˇ neh ehˇ naˇ, ngaˇ gʼoe luꞈ-eu gʼaˬ aˬ suˇ gʼaˬ-a lehˇ ngaˇ siˬ nya-awˇ, aˬ yawꞈ neh ngaˬ-ahˇ a nehˬ taˬ-euˬ jeˬ-ahˇ, Aˇ nah kʼoeˇ nah keuˆ laˇ ngeh keuˆ ni aˬ yawꞈ jeˬ hmˬ bo saˆ tehꞈ-a lehˇ ngaˇ siˬ nya ma.

HeˬByehˇ 8:11

Yawˬ ha tsawˇ jeuˬ yaw kaˬ hawˇ-eu, yawˬ ha miˇ kʼahˬ zaˬ deuˬ yaw kaˬ, ‘Sahˬpaˬ Miˬyehˇ-ahˇ siˬ-awˬ’lehˇ, mehˬ nehˬ tsoˆ nehˬ-eu maˬ loˬ-aˇ. Huiˬ zaˬ nyiˇ zaˬ yawˬ gʼaˬ na luꞈ, ngaˬ-ahˇ siˬ nya jiˇ laˇ tehꞈ-a.

1 Yoˇhaˬ 4:6

Ehˇ kʼawꞈ, aˬ dui-aˬ, Miˬyehˇ-ahˇ taꞈ-eu ma. Miˬyehˇ-ahˇ kʼaˇ siˬ nya-eu tsawˇ haˬ-aˬ, nga maꞈ-euˬ ehˇ dawˬ naˇ haˬ geuꞈ-eu meh. Miˬyehˇ-ahˇ maˬ kʼaˇ taꞈ-eu tsawˇ haˬ-aˬ, nga maꞈ-euˬ ehˇ dawˬ maˬ naˇ haˬ geuꞈ-a. Kʼoeˇ gaˇ haw-awˇ, ngeuˇ-eu Yaw sahˇ hawˇ-eu maˬ ngeuˇ-eu yaw sahˇ-ahˇ aˬ dui tseˇ paˆ geuꞈ nya tehꞈ-a.

1 Yoˇhaˬ 5:20

Maˇ maˇ ni gʼeh-eu Miˬyehˇ-ahˇ aˬ dui siˬ nya laˇ ni, Miˬyehˇ-euˬ Zaˬmaˇ oe-awˇ noeˬ siˬ noeˬ mawˇ nya-eu tsawˇ gahˇ biꞈ laꞈ-euˬ meh lehˇ aˬ dui siˬ nya ma. Aˬ yawꞈ-euˬ Zaˬmaˇ Yeˬsuˇ Ka li laꞈ kʼoeˇ aˬ dui jawˇ luꞈ-eu miˇ neh, maˇ maˇ ni gʼeh-eu Miˬyehˇ laꞈ kʼoeˇ aˬ dui jawˇ luꞈ-eu ma. Heu-aˬ, maˇ maˇ ni gʼeh-eu Miˬyehˇ hawˇ-eu mˬ maˬ maˬ byaꞈ zaˇ ziˇ dehꞈ-eu jeˬ pyeuꞈ-eu meh.