Hawˇseˬ 14:6 - Akha

⁶ Aˬ yawꞈ maꞈ baw nmˬ nmˬ laˇ-awˇ, saˬ loˬ aˇ bawˇ loꞈ-ehˇ muiˬ-awˇ, Leˬbaˬnoˬ gawˬ jawˬ-ahˇ dehꞈ-eu, shuˬ liˇ aˇ bawˇ kʼoeˇ deuˬ loꞈ-ehˇ, yaw saꞈ saw dui dui laˇ tehꞈ-a.

Hawˇseˬ 14:6 ပူးပေါင်းရင်းမြစ်များ

Aˇ dahˬ 27:27

Yaˬkoˆ dawˬ peh jiˆ tuˆ leˇ-awˇ, Iˇtsaˆ-ahˇ mehˬ cuˇ cuˇ nehˬ-eu lehˇ mˇ jeh ngeh, aˬ yawꞈ dm luꞈ-eu mehˬ tsoeˬ-ahˇ Iˇtsaˆ laˆ haw-euˬ meh. Kʼoeˇ naˇ, Yaˬkoˆ-ahˇ Iˇtsaˆ heu loꞈ-ehˇ dawˬ ngehˬ gʼeh nehˬ-euˬ meh. “Yaw zawˇ-ehˇ saw-eu ngaˬ li-euˬ yaw saꞈ-aˬ, Sahˬpaˬ Miˬyehˇ neh guiˬ lahˬ biꞈ nehˬ-euˬ deh yaˇ tiˬ kawˬ-euˬ yaw saꞈ-ahˇ duˇ miˇ-a.

Jaceuq 128:3

Nawˬ-euˬ miˬ zaˬ-aˬ, nawˬ-euˬ nymˇ-ahˇ dehꞈ-eu aˇ siˬ sahˇ-eu aˬ gaꞈ baw duˆ-ahˇ duˇ-awˇ, Nawˬ-euˬ aˬ li deuˬ-aˬ, nawˬ-euˬ hawˬ jeh tiˬ jawˬ dehꞈ-eu saˬ loˬ kahˬ zaˬ-ahˇ duˇ tehꞈ-a.

Jaceuq 52:8

Ehˇ kʼawꞈ ngaˇ-aˬ, Miˬyehˇ-euˬ nymˇ-ahˇ dehꞈ-eu saˬ loˬ aˇ bawˇ-ahˇ duˇ-eu meh. Maˬ tsehˆ leˇ nya-eu aˬ yawꞈ-euˬ gʼoeˇ-eu gaˬ-eu jeˬ-ahˇ, mˬ maˬ maˬ byaˆ zaˇ ziˇ gʼoe-eu ma.

Jaceuq 92:12

Yaw tsaˬ yaw dawˇ tsawˇ haˬ deuˬ daoˇ aˇ bawˇ loꞈ-ehˇ mehˇ laˇ-awˇ, Leˬbaˬnoˬ gawˬ jawˬ-ahˇ dehꞈ-eu siˬ daˬ miˬ shuˬ aˇ bawˇ loꞈ-ehˇ goˇ leˇ tehꞈ-a. Yaw tsaˬ yaw dawˇ tsawˇ haˬ deuˬ-aˬ,

Iˇsaˬyaˇ 27:6

Mehˬ hu paw le-eu aˇ yamˬ-ahˇ, Yaˬkoˆ-euˬ zaˬ Iˇsaˬleˬlaˆ tsawˇ haˬ deuˬ, duˬ ciˇ toeˬ ziꞈ leˇ-awˇ, aˇ cuˬ aˇ yehˆ yehˆ-eu laꞈ kʼoeˇ, miˇ tsaˬ kʼoeˇ taˆ aˇ siˬ siˬ byah tehꞈ-a.

Iˇsaˬyaˇ 35:2

Kʼaˇ shuiꞈ deh yaˇ caˇ dawˬ caˇ-awˇ, laˬ kʼaˬ cehˇ-awˇ guˇ tehꞈ-a. Kʼaˇ shuiꞈ deh yaˇ kʼoeˇ Leˬbaˬnoˬ gawˬ jawˬ loꞈ-ehˇ, haw muiˬ dui dui laˇ-awˇ, Gaˬlaˬmeˬlaˇ gawˬ jawˬ hawˇ-eu Shaˬloˬ deh kʼawꞈ loꞈ-ehˇ, miˇ tsaˬ miˇ muiˬ muiˬ laˇ tehꞈ-a. Sahˬpaˬ Miˬyehˇ-euˬ yaw shehꞈ kʼahˬ sehˇ, huiˬ-eu mahˇ-eu jeˬ hawˇ-eu baoˬ-ahˇ, yawˬ gʼaˬ na luꞈ ya mawˇ tehꞈ-a.

Iˇsaˬyaˇ 66:14

Kʼoeˇ loꞈ-ehˇ pyeuꞈ laˇ gaˇ mawˇ ngeh, naw maꞈ laˬ kʼaˬ ya cehˇ tehꞈ-a. Kʼoeˇ loꞈ-ehˇ pyeuꞈ laˇ ngeh, naw maꞈ jawˇ saˇ doˆ-awˇ gʼaˬ ahˇ tehꞈ-a. Kʼoeˇ loꞈ-ehˇ pyeuꞈ laˇ ngeh, Sahˬpaˬ Miˬyehˇ pyeuꞈ-eu ngaˇ-aˬ, ngaˬ-euˬ ehˇ dawˬ naˇ haˬ-eu deuˬ-ahˇ ngehˬ gʼeh-awˇ, ngaˬ-ahˇ muiˇ-eu deuˬ-ahˇ nui ma bi mawˇ gaˇ, naw maꞈ ya siˬ ya mawˇ tehꞈ-a.”

Yeˬlaˬmiˇ 11:16

Aˇ hu aˬ yawꞈ maꞈ-ahˇ ngaˇ, aˇ paꞈ sahˇ-awˇ aˇ siˬ muiˬ dui dui-eu saˬ loˬ aˇ bawˇ lehˇ myahˇ-euˬ ma. Ehˇ kʼawꞈ, nymˬ-mˇ poˆ jawˇ-aˬ, mˬ jeˬ jeˬ-eu loꞈ-ehˇ mahˇ laˇ gaˇ keuˆ ni aˇ paꞈ deuˬ-ahˇ ngaˇ dzah puiˆ-awˇ, uˬ laꞈ deuˬ-ahˇ ngawˬ kʼehꞈ nehˬ ma.

Hawˇseˬ 6:3

Sahˬpaˬ Miˬyehˇ-ahˇ siˬ nya ni, aˬ dui leh jeh dui dui kaˇ-euˇ, Uˬ bya bya shawˇ laˇ-eu loꞈ-ehˇ, yehˇ gʼahˇ ahˇ dahˬ beh le luꞈ ngeh, miˇ tsaˬ tahˬ kʼawˇ-ahˇ yehˇ shehˬ-eu, uˬ yehˇ yaw duˬ baw-eu loꞈ-ehˇ, aˬ yawꞈ aˬ dui jawˇ gaˇ oe-eu, yaw duˬ baw meh” lehˇ ehˇ-eu meh.

Maꞈtehˬ 13:31

Aˬ yawꞈ maꞈ-ahˇ Yeˬsuˇ yaw jeˬ ma jeˬ tiˬ hmˬ heu loꞈ-ehˇ paˇ ja mehˬ nehˬ-euˬ meh. “Mˬtaˆ Miˇkʼahˬ-aˬ, heu loꞈ-ehˇ duˇ-eu meh. Tsawˇ haˬ tiˬ gʼaˬ gʼawˬ paˆ aˇ nuiˆ tiˬ nuiˆ yuˇ-awˇ, aˬ yawꞈ-euˬ yaˇ-ahˇ sehˬ taˬ-euˬ meh.

Yoˇhaˬ 15:1

Ngaˇ-aˬ, maˇ maˇ ni gʼeh-eu aˬ gaꞈ baw duˆ ma. Ngaˬ Da-aˬ, aˬ gaꞈ yaˇ kmˇ-ahˇ bo saˆ-eu gʼaˬ meh.

Piˇliˇpiˆ 4:18

Naw maꞈ neh kʼaˇ biꞈ laꞈ-euˬ yawˬ jeˬ na luꞈ gʼaˇ duˬ, guiˬ lahˬ huiˬ-eu dawˬ tsaꞈ ahˇ laꞈ-eu ma. Ngaˇ loˬ-eu myaˆ maˬ tseˇ naw maꞈ ngaˬ-ahˇ biꞈ laˬ-euˬ meh. Naw maꞈ neh biꞈ laꞈ-euˬ laꞈ sawˬ deuˬ-ahˇ Iˇbaˬpawˬdiˇ neh hehˇ keuˆ nehˬ leꞈ-euˬ miˇ neh, ngaˇ kʼaˇ loˬ-eu jeˬ nymˬ-mˇ byah miˇ-a. Laꞈ sawˬ heu deuˬ-aˬ, Miˬyehˇ nui kʼahˇ shiˇ-awˇ ha geuꞈ-euˬ saw dui dui-eu lawˇ-eu jeˬ pyeuꞈ-eu meh.