Hawˇseˬ 10:8 - Akha

⁸ Iˇsaˬleˬlaˆ uˬ duˬ tahˬ-euˬ, tahˬ pahˬ aˬ ma kʼoeˇ deuˬ jaˆ-eu, Aˬbehˇ meuˬ-euˬ gawˬ duˇ uˬ du, jaˆ-eu uˬ duˬ tahˬ nymˇ kʼoeˇ deuˬ, ya luˬ ya seˇ-iˇ jiˇ tehꞈ-a. Lawˇ duˬ kʼoeˇ deuˬ jaˆ-eu kʼoeˇ taˆ, aˬ gah baw duˆ uˆ byoˆ tehꞈ-a. “Nga maꞈ-ahˇ byaˆ tehˬ le-awˬ” lehˇ, gawˬ jawˬ-ahˇ aˬ yawꞈ maꞈ guˇ-awˇ, “Nga maꞈ-ahˇ pymˬ tehˬ le-awˬ” lehˇ, gawˬ duˇ-ahˇ yawꞈ maꞈ guˇ tehꞈ-a.

Hawˇseˬ 10:8 ပူးပေါင်းရင်းမြစ်များ

Aˇ dahˬ 3:8

Kʼoeˇ ngeh nah uˬ ciꞈ uˬ taw paw, Miˬyehˇ pyeuꞈ-eu Sahˬpaˬ Miˬyehˇ yaˇ kmˇ laꞈ kʼoeˇ gaˇ ma cah haw le-eu teˇ saˇ-ahˇ aˬ yawꞈ nyaꞈ ya gaˬ ngeh, aˇ bawˇ uˬ moˆ cehˆ zaꞈ-euˬ meh.

1 Sahˬpaˬ 13:2

Miˬyehˇ gʼaˇ duˬ ngehˬ dah-eu kʼoeˇ gʼaˬ, Sahˬpaˬ Miˬyehˇ neh kʼaˇ kʼehˇ-euˬ loꞈ-ehˇ lawˇ duˬ-ahˇ yaˬ kʼehˇ yaˬ-awˇ ehˇ-eu, “Lawˇ duˬ-oˇ, Lawˇ duˬ-oˇ, Sahˬpaˬ Miˬyehˇ heu loꞈ-ehˇ ehˇ-eu meh. Yawˇshiˆ lehˇ myahˇ-euˬ aˬ li tiˬ li Daˬbiˇ-euˬ nymˇ jiˇ laꞈ kʼoeˇ dehꞈ le tehꞈ-a. Aˬ cawˬ tsawˇ jeuˬ-euˬ lawˇ duˬ-ahˇ gaˇ mˇ-eu piˇ ma geuꞈ-awˇ nawˬ-euˬ kʼoeˇ taˆ lawˇ-eu shehˇ-eu jeˬ mˇ luꞈ-eu tsawˇ haˬ kʼoeˇ deuˬ-ahˇ, nawˬ-euˬ kʼoeˇ taˆ aˬ yawꞈ sehꞈ daˆ-awˇ, tsawˇ haˬ-euˬ shaˬ yoeˬ kʼawꞈ nawˬ-euˬ kʼoeˇ taˆ aˬ yawꞈ dzah puiˆ tehꞈ-a.”

1 Sahˬpaˬ 13:34

Aˬ yawꞈ neh mˇ-euˬ iˬ baˇ kʼoeˇ-aˬ, aˬ yawꞈ-euˬ nymˇ jiˇ tsuiꞈ dahˬ ya dahˬ-iˇ-eu gaˇ kawˆ pyeuꞈ-awˇ, miˇ tsaˬ kʼoeˇ taˆ aˬ yawꞈ-euˬ aˇ jeuˬ tiˬ gʼaˬ-iˬ maˬ jawˇ-ehˇ ya shiˇ cuˆ jiˇ gaˇ keuˆ ni bi guˬ dzaˬ leˇ-euˬ iˬ baˇ meh.

1 Sahˬpaˬ 14:16

Yeˬyawˇbamˬ mehˬ huˬ huˬ-eu mehˬ nah caw teh-awˇ, Iˇsaˬleˬlaˆ tsawˇ haˬ deuˬ iˬ baˇ mˇ-euˬ miˇ neh, Iˇsaˬleˬlaˆ tsawˇ jeuˬ-ahˇ Sahˬpaˬ Miˬyehˇ byehˇ dzeh tehꞈ-a.”

2 Sahˬpaˬ 23:15

Iˇsaˬleˬlaˆ tsawˇ haˬ deuˬ iˬ baˇ mˇ ni sheuˬ gʼeh-euˬ gʼaˬ pyeuꞈ-eu, Neˬbaˇ-euˬ aˬ li sahˬ paˬ Yeˬyawˇbamˬ neh tsoˆ-euˬ, Beˬdeˬlaˇ meuˬ-ahˇ jaˆ-eu uˬ duˬ tahˬ-eu jawˇ duˬ kʼawꞈ, Yawˇshiˆ laˆ cawˆ-euˬ meh. Lawˇ duˬ-ahˇ aˬ yawꞈ ngawˬ coˬ-awˇ, kʼaˬ lo deuˬ deh paˆ-awˇ, tahˬ meuˇ tahˬ loeˇ-euˬ meh. Aˬsheˇlaˬ miˬyehˇ ma-euˬ tahˬ pahˬ aˬ ma mawˇ kawˇ-ahˇ aˬ yawꞈ miˬ dzaˬ keuˬ dzeh-euˬ meh.

2 Laˬsaˬbaˬ 31:1

Bawˬ-iˬ gʼeh gʼaˬ ngeh, Iˇsaˬleˬlaˆ tsawˇ haˬ dawˬ tawˆ luꞈ Yuˇdaˆ miˇ kʼahˬ laꞈ kʼoeˇ jaˆ-eu meuˬ yawˬ meuˬ na luꞈ-ahˇ iˇ doe-awˇ, kʼaˬ lo kʼawˇ zeuˇ tahˬ pahˬ aˬ ma mawˇ kawˇ deuˬ deh paˆ dzeh-awˇ, Aˬsheˇlaˬ miˬyehˇ ma-euˬ tahˬ pahˬ aˬ ma mawˇ kawˇ deuˬ tuˇ coˬ-awˇ, lawˇ duˬ deuˬ hawˇ-eu lawˇ ciꞈ zaˬ deuˬ uˬ duˬ tahˬ-eu jawˇ duˬ deuˬ-ahˇ laˆ cawˆ jiˇ-euˬ meh. Yuˇdaˆ miˇ kʼahˬ doe ni kʼoeˇ loꞈ-ehˇ jahˇ gʼaˬ ngeh, Beˬyaˬmiˬ miˇ kʼahˬ, Eˇpaˬleˬ miˇ kʼahˬ hawˇ-eu, Maˬnaˇseˬ miˇ kʼahˬ doe ni aˬ yawꞈ maꞈ kʼoeˇ loꞈ-ehˇ jahˇ-iˇ-awˇ, yawˬ ha-euˬ meuˬ-ahˇ gʼoꞈ-iˇ jiˇ-euˬ meh.

Iˇsaˬyaˇ 2:19

Sahˬpaˬ Miˬyehˇ miˇ tsaˬ tahˬ kʼawˇ-ahˇ ngawˬ nyeh le ngeh, aˬ yawꞈ-euˬ nui ma pehˇ-eu jeˬ hawˇ-eu, aˬ yawꞈ-euˬ yaw shehꞈ kʼahˬ sehˇ-ahˇ cehˆ dzeuˇ-eu lehˇ, tsawˇ haˬ zaˬ deuˬ lo byoe doe ni cehˆ uˇ-awˇ, duˬ kʼahˬ doe ni cehˆ zaꞈ tehꞈ-a.

Iˇsaˬyaˇ 2:21

Sahˬpaˬ Miˬyehˇ miˇ tsaˬ tahˬ kʼawˇ-ahˇ ngawˬ nyeh le ngeh, aˬ yawꞈ nui ma pehˇ-eu jeˬ hawˇ-eu, aˬ yawꞈ-euˬ yaw shehꞈ kʼahˬ sehˇ-ahˇ cehˆ dzeuˇ nya ni, lo kʼahˬ lo guˇ zaꞈ gʼaˇ doe ni, tsawˇ haˬ zaˬ deuˬ cehˆ zaꞈ tehꞈ-a.

Iˇsaˬyaˇ 32:13

Ngaˬ-euˬ tsawˇ haˬ deuˬ-euˬ yaˇ kʼahˬ yaˇ lahˬ aˬ gah baw duˆ hawˇ-eu yaˇ moꞈ dehꞈ byah-euˬ meh. Laˬ kʼaˬ cehˇ-eu jeˬ byah-eu nymˇ kʼoeˇ deuˬ hawˇ-eu, dehꞈ bym dui dui-eu meuˬ gʼaˇ duˬ, noeˬ shaˬ-awˇ tsawˇ ngoeˇ ngoeˇ nehˬ-awˬ.

Iˇsaˬyaˇ 34:13

Sahˬ paˬ-euˬ nymˇ aˬ gah baw duˆ dehꞈ byah jiˇ-awˇ, meuˬ lahˇ baw-eu meuˬ deuˬ yaˇ moꞈ uˆ tehˬ jiˇ-awˇ, bawˇ tsahˬ aˬ kuiˬ hawˇ-eu dzeˇ ngawˇ deuˬ jawˇ byah jiˇ tehꞈ-a.

Hawˇseˬ 10:2

Nui ma yaw gʼoꞈ ahˇ-eu aˇ poeˬ, nymˬ-mˇ paˇ ya daˬ poˆ tehꞈ-a. Aˬ yawꞈ maꞈ-euˬ lawˇ duˬ kʼoeˇ deuˬ, Miˬyehˇ laˆ kʼehˬ laˆ kʼoeˆ nehˬ-awˇ, muiˬ-eu shawˇ-eu kʼawˇ zeuˇ kʼoeˇ deuˬ, laˆ piˬ laˆ byoˆ jiˇ nehˬ tehꞈ-a.

Hawˇseˬ 10:5

Saˬmaˬliˆ meuˬ-ahˇ jawˇ-eu deuˬ, Beˬdeˬlaˇ meuˬ-ahˇ jaˆ luꞈ-eu, shuiˇ mawˇ neˇ mawˇ kawˇ byoˆ-euˬ gaˇ, guˆ dui dui-eu yaw dzuˬ dzuˬ meh. Mawˇ kawˇ kʼoeˇ-euˬ yaw shehꞈ kʼahˬ sehˇ, maˬ paˇ jaˆ-ehˇ pyeuꞈ-iˇ-euˬ gaˇ, kʼoeˇ gaˇ piˇ ma geuꞈ-eu deuˬ kʼawꞈ, miˇ kʼahˬ zaˬ nehˬ-ehˇ ngoeˇ tehꞈ-a.

Hawˇseˬ 10:9

Sahˬpaˬ Miˬyehˇ ehˇ-eu dawˬ-aˬ, “Iˇsaˬleˬlaˆ tsawˇ haˬ deuˬ-aˬ, Giˇbyaˬ meuˬ-ahˇ aˇ dahˬ beh-euˬ, iˬ baˇ mˇ-eu maˬ naˬ-aˬ siˬ. Kʼoeˇ baˬ da neh Giˇbyaˬ meuˬ-ahˇ, guiˇ deuˆ-eu jeˬ keuˆ le tehꞈ-a.

Hawˇseˬ 2:6

Kʼoeˇ baˬ da neh, yawꞈ-euˬ gaˇ ma. Aˬ gah duˬ gahˬ ngaˇ sheu uiˬ-awˇ, yawꞈ iˇ gaˇ ma maˬ bi mawˇ ni, lahˇ goˇ gawˬ -awˇ ciˬ tsoeˬ nehˬ ma.

Hawˇseˬ 4:13

Gawˬ jawˬ uˬ du doe ni lawˇ-awˇ, gawˬ duˇ uˬ du doe bi damˬ-awˇ, naˇ shmˇ muiˬ-eu aˇ bawˇ pyeuꞈ-eu, tsuiꞈ kaˆ, pawˇpaˬlaˬ, teˬleˬbiˇ, heu deuˬ dawˬ pehˬ-ahˇ lawˇ-euˬ meh. “Kʼoeˇ loꞈ-ehˇ dehꞈ-euˬ baˬ da neh, zaˬ miˬ meh maˬ laˇ pyeuꞈ-iˇ-awˇ, kuiˬ ma aˬ cawˬ-ahˇ bahˬ-euˬ meh.

Hawˇseˬ 4:15

“Naw maꞈ Iˇsaˬleˬlaˆ miˇ kʼahˬ, ngaˬ-ahˇ saˇ jaˇ puiˬ-awˇ dehꞈ kʼawꞈ, Yuˇdaˆ miˇ kʼahˬ kʼoeˇ loˇ maˬ ngeuˇ. Giˇlaˇgaˬlaˇ meuˬ-ahˇ taˬ le. Behˬdaˬbeˬ meuˬ-ahˇ jiˇ taˬ le. Sahˬpaˬ Miˬyehˇ tsawˇ myahˇ gʼoe-awˇ, kamˬ tsehˆ ehˇ tsehˆ-eu dawˬ taˬ ngehˬ.

Hawˇseˬ 5:8

Giˇbyaˬ meuˬ-ahˇ coiˇ doi baw-awˬ. Laˬmahˇ meuˬ-ahˇ daˇ heh baw-awˬ. Behˬdaˬbeˬ meuˬ-ahˇ laˆ luiˬ-awˬ. Beˬyaˬmiˬ tsawˇ jeuˬ guiˇ deuˆ-awˬ.

Hawˇseˬ 8:5

Saˬmaˬliˆ meuˬ uˬ duˬ tahˬ-eu, shuiˇ mawˇ neˇ mawˇ kawˇ kʼoeˇ kawˇ-ahˇ, ngaˇ tiˬ pawꞈ-iˬ maˬ haw nahˇ nya. Mawˇ kawˇ kʼoeˇ-ahˇ uˬ duˬ tahˬ-eu, aˬ myah byehˇ dzeh-eu lehˇ gʼeh ta.

Hawˇseˬ 9:6

Luˬ-iˇ seˇ-iˇ-eu keuˆ le-awˇ, aˬ yawꞈ maꞈ ya cehˆ byaˆ jiˇ ngeh, Iˇjiˇtuˆ neh bi nyehꞈ uiˬ-awˇ, Mehˇpiˇ meuˬ-ahˇ baꞈ pahˬ tehꞈ-a. Aˬ yawꞈ maꞈ-euˬ pyuˇ pahˬ hawˇ-eu, aˬ yawꞈ maꞈ-euˬ nymˇ dzahˇ zaˇ-ahˇ, aˬ gah baw duˆ uˆ byoˆ tehꞈ-a.

Aˬmoˆ 1:5

Daˬmaˬsehˇ meuˬ-euˬ meuˬ lahˇ laˇ gʼoˆ deuˬ-ahˇ ngaˇ ngawˬ ceuꞈ dzeh-awˇ, Aˬbeuˬ deh kʼawꞈ-ahˇ jawˇ-eu deuˬ hawˇ-eu Behˬteˬdeˬ meuˬ-ahˇ uˆ lahˇ-eu gʼaˬ-ahˇ ngaˇ coeˇ tsehˆ ma. Suˇliˆ miˇ kʼahˬ-ahˇ jawˇ-eu tsawˇ haˬ deuˬ Kiˇlaˆ miˇ kʼahˬ-ahˇ bi nyehꞈ byoˆ gʼeh jiˇ tehꞈ-a.”

Aˬmoˆ 3:14

Iˇsaˬleˬlaˆ miˇ kʼahˬ-ahˇ jawˇ-eu tsawˇ haˬ deuˬ iˬ baˇ mˇ-euˬ miˇ neh, aˬ yawꞈ maꞈ-ahˇ ngaˇ kʼehˬ nehˬ ngeh nah, Beˬdeˬlaˇ meuˬ-ahˇ jaˆ-eu lawˇ duˬ kʼoeˇ deuˬ-ahˇ ngaˇ laˆ cawˆ ma. Lawˇ duˬ aˬ yawꞈ hmˬ yawꞈ-euˬ laꞈ coeˇ-ahˇ tsoꞈ-eu uˬ coeˇ dawˬ tawˆ luꞈ kʼehꞈ-iˇ jiˇ-awˇ, miˇ tsaˬ-ahˇ ga-iˇ tehꞈ-a.

Aˬmoˆ 7:9

Iˇtsaˆ-euˬ zaˬ deuˬ uˆ deuˬ uˬ duˬ tahˬ-eu jawˇ duˬ ya cawˆ-iˇ tehꞈ-a. Iˇsaˬleˬlaˆ tsawˇ jeuˬ-euˬ muiˬ-eu shawˇ-eu jawˇ duˬ deuˬ ya luˬ ya seˇ-iˇ jiˇ tehꞈ-a. Sahˬpaˬ Yeˬyawˇbamˬ-euˬ nymˇ jiˇ sahˬ paˬ geuꞈ-awˇ uˆ lahˇ-eu aˇ yamˬ aˇ saˬ saˬ tehꞈ-a.”

Aˬmoˆ 8:14

‘Daˬ miˬ yehˇ-euˬ tsawˇ myahˇ uˬ moˆ’ lehˇ hawˇ-eu ‘Beˬlaˇsheˬba miˬ yehˇ-euˬ tsawˇ myahˇ uˬ moˆ’ lehˇ ehˇ ehˇ-ehˇ, Saˬmaˬliˆ meuˬ-ahˇ jaˆ-eu tahˬ pahˬ aˬ ma mawˇ kawˇ deuˬ-ahˇ laꞈ jeuˬ shaˇ-awˇ toˇ-eu tsawˇ haˬ deuˬ coˬ dzeh-awˇ, tiˬ jawˇ-iˬ maˬ paˇ tuˇ laˇ nya-aˇ.”

Miˇkaˬ 1:13

Laˬkiˇshaˆ meuˬ-ahˇ jawˇ-eu tsawˇ haˬ deuˬ-oˇ, mahˬ laˆ lawˬ lehˬ hmˬ-awˬ. Iˇsaˬleˬlaˆ miˇ kʼahˬ iˬ baˇ mˇ-euˬ gaˇ naw maꞈ dzaw geuꞈ-awˇ, Yeˬluˇsaˬlehˬ meuˬ iˬ baˇ mˇ ni naw maꞈ jahˇ-euˬ meh.

Miˇkaˬ 1:5

Iˇsaˬleˬlaˆ tsawˇ haˬ deuˬ iˬ baˇ mˇ-awˇ Miˬyehˇ-ahˇ puiˬ-euˬ miˇ neh, gaˇ kawˆ heu deuˬ dawˬ tawˆ luꞈ pyeuꞈ laˇ tehꞈ-a. Aˬ suˇ gʼaˬ baˬ da neh Iˇsaˬ leˬlaˇ miˇ kʼahˬ Miˬyehˇ-ahˇ puiˬ ta. Saˬmaˬliˆ meuˬ baˬ da neh maˬ ngeuˇ-a loˇ. Aˬ suˇ gʼaˬ baˬ da neh Yuˇdaˆ miˇ kʼahˬ tahˬ pahˬ aˬ ma mawˇ kawˇ-ahˇ uˬ duˬ tahˬ ta.

Naˬhmˬ 3:11

Niˇnaˬbeˬ nawˇ jiˇ baˬ yehꞈ-awˇ, nawˬ-ahˇ muiˇ-eu deuˬ maˬ mawˇ gaˇ, cehˆ zaꞈ-eu lehˇ leh jeh tehꞈ-a.

Luˇkaꞈ 23:30

Kʼoeˇ ngeh jawˇ, gawˬ jawˬ-ahˇ ‘Nga maꞈ kʼoeˇ taˆ byaˆ tehˬ leꞈ-awˬ’ lehˇ ya ehˇ-awˇ, gawˬ duˇ-ahˇ ‘Nga maꞈ kʼoeˇ taˆ pymˬ tehˬ leꞈ-awˬ’ lehˇ ya ehˇ gaˇ keuˆ tehꞈ-a.

Dawˬmehˬ 9:21

Naw maꞈ neh mˇ-euˬ iˬ baˇ pyeuꞈ-eu mawˇ neˇ mawˇ kawˇ kʼoeˇ ngaˇ yuˇ-awˇ, miˬ dzaˬ-ahˇ dawˆ puiˆ-euˬ ma. Kʼoeˇ naˇ, lehˬ meuˇ-awˇ gawˬ jawˬ-ahˇ neh yoeˇ ka leꞈ-euˬ lawˇ gawˆ-ahˇ dawˆ bu-euˬ ma.

Panmaeq 6:16

Gawˬ jawˬ hawˇ-eu lo guˇ deuˬ-ahˇ aˬ yawꞈ maꞈ guˇ guˇ-ehˇ ehˇ-eu, “Nga maꞈ kʼoeˇ taˆ byaˆ tehˬ le-awˇ, dzoeˬ dzaˬ nuiˇ mahˬ kʼoeˇ taˆ nuiˇ luꞈ-eu gʼaˬ-euˬ myaˆ nuiˆ hawˇ-eu, Yawˇzaˬ-euˬ nui ma pehˇ-eu jeˬ-ahˇ maˬ bi mawˇ ni dehˬ kaˬ nehˬ laꞈ-awˬ.

Panmaeq 9:6

Ba la kʼoeˇ ngaˬ siˬ laꞈ kʼoeˇ, tsawˇ haˬ kʼoeˇ deuˬ shiˇ-eu jeˬ-ahˇ poˆ tehꞈ-a. Ehˇ kʼawꞈ, maˬ poˆ mawˇ nya ni ya shaˬ tehꞈ-a. Aˬ yawꞈ maꞈ shiˇ mawꞈ dui dui tehꞈ-a. Ehˇ kʼawꞈ, shiˇ-eu jeˬ aˬ yawꞈ maꞈ-ahˇ cehˆ dzeuˇ tehꞈ-a.