Gawˇlawˇsehˇ 1:4 - Akha

⁴ Aˬ jeˬ miˇ neh ehˇ naˇ, naw maꞈ Yeˬsuˇ Ka li-ahˇ jah luꞈ-eu gaˇ kawˆ hawˇ-eu, Miˬyehˇ-euˬ tsawˇ haˬ dawˬ tawˆ luꞈ-ahˇ naw maꞈ gʼoeˇ luꞈ gaˬ luꞈ-eu gaˇ kawˆ nga maꞈ ya gaˬ-euˬ ma.

Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

⁴ Aqjeq mirnae aernar-aq, nawmaf, Yeqsur Kali-anr janluf-awr, tsawrshawr dawqtawv luf-anr gaqluf-eu garkawv nga’maf yagaq-euq ma.

Gawˇlawˇsehˇ 1:4 ပူးပေါင်းရင်းမြစ်များ

2 Gawˇliˬtu 7:7

Aˬ yawꞈ laˇ-euˬ baˬ da neh tehꞈ-ehˇ nga maꞈ gʼaˬ ahˇ laˇ-euˬ maˬ ngeuˇ. Naw maꞈ aˬ yawꞈ-ahˇ aˬ joˆ-ehˇ gʼaˬ biꞈ-euˬ gaˇ kawˆ aˬ yawꞈ ja mehˬ nehˬ laꞈ-euˬ miˇ neh, nga maꞈ gʼaˬ ahˇ laˇ-euˬ ma. Naw maꞈ ngaˬ-ahˇ aˇ naˆ ni mawˇ mawꞈ-eu gaˇ kawˆ maˬ ehˇ, pyeuꞈ dzeuˇ yaꞈ-euˬ gaˇ kawˆ-ahˇ naw maꞈ aˇ naˆ ni noeˬ shaˬ luꞈ-eu gaˇ kawˆ maˬ ehˇ, naw maꞈ ngaˇ jawˇ paw aˇ naˆ ni pyawˬ mawꞈ-eu gaˇ kawˆ maˬ ehˇ, nga maꞈ-ahˇ aˬ yawꞈ dzawˇ mehˬ laꞈ-euˬ meh. Kʼoeˇ miˇ neh, ngaˇ laˬ kʼaˬ cehˇ-eu maˬ ehˇ jiˇ coeˇ nya.

Gaˬlaˬtiˆ 3:26

Jah-eu jeˬ baˬ da neh, naw maꞈ dawˬ tawˆ luꞈ Yeˬsuˇ Ka li laꞈ kʼoeˇ Miˬyehˇ-euˬ zaˬ pyeuꞈ-eu meh.

Gaˬlaˬtiˆ 3:28

Kʼoeˇ miˇ neh, Yuˇdaˆ tsawˇ haˬ hawˇ-eu Yuˇdaˆ tsawˇ haˬ maˬ ngeuˇ-eu deuˬ maˬ ehˇ, zaˬ kʼaˆ hawˇ-eu buˬ-iˇ-euˬ tsawˇ haˬ maˬ ehˇ, kʼaˬ dzeˇ zaˬ hawˇ-eu zaˬ miˬ zaˬ maˬ ehˇ, tiˬ pawꞈ-iˬ maˬ paˇ beu meh. Aˬ jeˬ miˇ neh ehˇ naˇ, Yeˬsuˇ Ka li laꞈ kʼoeˇ, naw maꞈ dawˬ tawˆ luꞈ tiˬ kawˆ meh.

Gaˬlaˬtiˆ 5:6

Aˬ jeˬ miˇ neh ehˇ naˇ, Yeˬsuˇ Ka li laꞈ kʼoeˇ jawˇ-eu tsawˇ haˬ deuˬ gʼaˇ duˬ, baˆ kʼoˆ mehˬ dzaˬ yehˬ-euˬ hawˇ-eu maˬ yehˬ-euˬ tiˬ pawꞈ-iˬ beu gaˇ duˬ maˬ jaˆ-a. Gʼoeˇ-eu gaˬ-eu jeˬ mˇ doˆ shaˇ doˆ laꞈ nya-eu jah-eu kʼoeˇ tiˬ jeˬ tehꞈ-ehˇ gaˇ dahˇ tsoeˬ-eu jeˬ pyeuꞈ-eu meh.

Eˇpeˇsu 1:15

Heu baˬ da neh, sahˬ paˬ Yeˬsuˇ-ahˇ naw maꞈ jah-eu gaˇ kawˆ hawˇ-eu Miˬyehˇ-euˬ tsawˇ haˬ dawˬ tawˆ luꞈ-ahˇ naw maꞈ gaˬ-eu gaˇ kawˆ ngaˇ ya gaˬ ngeh,

Eˇpeˇsu 6:18

Miˬyehˇ caw ba laꞈ ni guiˬ lahˬ shaˇ-awˇ, kʼoeˇ deuˬ dawˬ tawˆ luꞈ-ahˇ mˇ gʼeh-awˬ. Yaw sahˇ Miˬyehˇ sheuˬ gʼeh-eu laꞈ kʼoeˇ aˬ myah luꞈ guiˬ lahˬ shaˇ-awˬ. Maˬ ya smˬ-iˇ ni aˬ myah luꞈ yaw beuˇ beuˇ-ehˇ jawˇ-awˬ. Miˬyehˇ-euˬ tsawˇ haˬ dawˬ tawˆ luꞈ gʼaˇ duˬ aˬ myah luꞈ guiˬ lahˬ shaˇ-awˬ.

Gawˇlawˇsehˇ 1:9

Kʼoeˇ miˇ neh, naw maꞈ-euˬ gaˇ kawˆ ya gaˬ-euˬ tiˬ nah neh, naw maꞈ gʼaˇ duˬ nga maꞈ guiˬ lahˬ maˬ tsehˆ leˇ ni shaˇ luꞈ-eu ma. Yaw sahˇ Miˬyehˇ neh biꞈ-euˬ zaˬ siˬ tsawˇ gahˇ hawˇ-eu noeˬ siˬ noeˬ mawˇ nya-eu jeˬ laꞈ kʼoeˇ, Miˬyehˇ-euˬ nui kʼahˇ-ahˇ siˬ nya-eu jeˬ naw maꞈ laꞈ kʼoeˇ byah laˇ ni shaˇ luꞈ-eu ma.

1 Teˇsaˬloˇni 1:3

Aˬ jeˬ miˇ neh ehˇ naˇ, jah-eu baˬ da neh naw maꞈ aˬ joˆ-ehˇ mˇ doˆ shaˇ doˆ laꞈ luꞈ-eu gaˇ kawˆ maˬ ehˇ, gʼoeˇ-eu gaˬ-eu jeˬ baˬ da neh naw maꞈ aˇ naˆ ni leh jeh-awˇ mˇ luꞈ-eu gaˇ kawˆ maˬ ehˇ, aˬ dui-euˬ Sahˬpaˬ Yeˬsuˇ Ka li-ahˇ naw maꞈ noeˬ tmˬ taˬ-euˬ jeˬ aˇ naˆ ni ziꞈ luꞈ-eu gaˇ kawˆ maˬ ehˇ, aˬ dui-euˬ Aˬda pyeuꞈ-eu Miˬyehˇ mehˬ shi nga maꞈ noeˬ keuˆ luꞈ-eu ma.

1 Teˇsaˬloˇni 3:6

Nymˬ-mˇ Tiˆmoˇseˬ gʼoꞈ keuˆ le-awˇ, naw maꞈ-euˬ jah-eu jeˬ hawˇ-eu gʼoeˇ-eu gaˬ-eu jeˬ gaˇ kawˆ, laˬ kʼaˬ cehˇ laˇ paˬ-ehˇ dzawˇ gaˬ le-euˬ meh. Naw maꞈ nga maꞈ-ahˇ aˬ myah luꞈ noeˬ keuˆ luꞈ-awˇ, nga maꞈ naw maꞈ-ahˇ mawˇ mawꞈ dui dui-eu loꞈ-ehˇ, naw maꞈ kʼawꞈ nga maꞈ-ahˇ mawˇ mawꞈ dui dui luꞈ-eu gaˇ kawˆ dzawˇ nehˬ laꞈ-euˬ meh.

2 Teˇsaˬloˇni 1:3

Aˬ yuiꞈ aˬ nyiˇ Ka li zaˬ deuˬ-oˇ, naw maꞈ gʼaˇ duˬ nga maꞈ Miˬyehˇ guiˬ lahˬ-ahˇ maˬ ja ceuˬ-ehˇ tiˬ kʼehˬ-iˬ maˬ jawˇ coeˇ nya. Naw maꞈ-euˬ jah-eu jeˬ huiˬ laˇ tehˇ tehˬ-awˇ, naw maꞈ yaw kaˬ tiˬ gʼaˬ tiˇ gʼaˬ gʼoeˇ-eu gaˬ-eu jeˬ myaˬ laˇ luꞈ-eu miˇ neh, nga maꞈ Miˬyehˇ-euˬ guiˬ lahˬ-ahˇ ja ceuˬ paˬ-ehˇ gʼeh-eu meh.

Piˇleˇmoˬ 1:5

Aˬ jeˬ miˇ neh ehˇ naˇ, Miˬyehˇ-euˬ tsawˇ haˬ dawˬ tawˆ luꞈ-ahˇ nawˇ gaˬ-eu gaˇ kawˆ hawˇ-eu, Sahˬpaˬ Yeˬsuˇ-ahˇ nawˇ jah-eu jeˬ-euˬ gaˇ kawˆ ngaˇ ya gaˬ-euˬ ma.

HeˬByehˇ 6:10

Miˬyehˇ-aˬ, dawˇ coe ni yaˇ kʼaˬ daˇ-eu gʼaˬ meh. Naw maꞈ neh mˇ-euˬ gaˇ deuˬ-ahˇ aˬ yawꞈ maˬ ngehˇ-a. Naw maꞈ neh Ka li zaˬ cawˬ cawˬ caw ba dzeuˇ-euˬ laꞈ kʼoeˇ maˬ ehˇ, nymˬ-mˇ caw ba luꞈ-eu laꞈ kʼoeˇ maˬ ehˇ, aˬ yawꞈ-euˬ gʼoeˇ-eu gaˬ-eu jeˬ aˬ cawˬ mawˇ nya ni naw maꞈ neh mˇ-euˬ jeˬ-ahˇ maˬ ngehˇ-a.

1 Yoˇhaˬ 3:14

Aˬ dui-aˬ, shiˇ-eu jeˬ laꞈ kʼoeˇ neh doˆ dzeuˇ laˇ-awˇ, dehꞈ-eu jeˬ laꞈ kʼoeˇ uˇ keuˆ laˇ taˬ-euˬ ma lehˇ siˬ nya-eu ma. Aˬ dui Ka li zaˬ cawˬ cawˬ gaˬ luꞈ-eu miˇ neh, kʼoeˇ loꞈ-ehˇ ehˇ tsehˆ nya-eu ma. Gʼoeˇ-eu gaˬ-eu jeˬ maˬ ahˇ-eu tsawˇ haˬ-aˬ, shiˇ-eu jeˬ-euˬ baoˬ uˬ moˆ jawˇ luꞈ-a siˬ.

1 Yoˇhaˬ 3:23

Aˬ yawꞈ neh aˬ dui-ahˇ biꞈ-euˬ dawˬ-aˬ, aˬ yawꞈ-euˬ Zaˬmaˇ Yeˬsuˇ Ka li-ahˇ jah-awˇ, Ka li neh dawˬ biꞈ taˬ-euˬ loꞈ-ehˇ tiˬ gʼaˬ tiˇ gʼaˬ gaˬ-awˬ lehˇ ehˇ-eu kʼoeˇ dawˬ meh.

1 Yoˇhaˬ 4:16

Kʼoeˇ miˇ neh, Miˬyehˇ neh aˬ dui-ahˇ gaˬ-euˬ gʼoeˇ-eu gaˬ-eu jeˬ kʼoeˇ-ahˇ aˬ dui siˬ nya-awˇ jah-eu ma. Miˬyehˇ-aˬ, gʼoeˇ-eu gaˬ-eu jeˬ pyeuꞈ-eu meh. Gʼoeˇ-eu gaˬ-eu jeˬ laꞈ kʼoeˇ kʼaˇ jawˇ-eu tsawˇ haˬ-aˬ, Miˬyehˇ-euˬ laꞈ kʼoeˇ jawˇ-awˇ, Miˬyehˇ kʼawꞈ, aˬ yawꞈ-euˬ laꞈ kʼoeˇ jawˇ-eu meh.