Gaˬlaˬtiˆ 5:1 - Akha

¹ Aˬ dui buˬ-iˇ-euˬ tsawˇ haˬ pyeuꞈ laˇ ni, Ka li neh aˬ dui-ahˇ bi buˬ-iˇ laꞈ-euˬ meh. Kʼoeˇ miˇ neh, buˬ-iˇ-euˬ tsawˇ haˬ loꞈ-ehˇ ziꞈ dah ni jawˇ-awˬ. Zaˬ kʼaˆ taˬ paˇ geuꞈ.

Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

¹ Aqdui buq-ir-euq tsawrhaq pyeufni, Kali, aqdui-anr bibuq-ir naeqlaf-euq mae. Khoermirnae, zifdanni jawr-awr zaqkhav-euq khavbaf taqpar baf.

Gaˬlaˬtiˆ 5:1 ပူးပေါင်းရင်းမြစ်များ

Jaceuq 51:12

Nawˬ-euˬ ka kʼoꞈ-eu guiˬ lahˬ yaw dzahˇ laꞈ kʼoeˇ doˆ le-euˬ laˬ kʼaˬ cehˇ-eu jeˬ ngaˬ-ahˇ biꞈ nehˬ laꞈ-awˇ, nawˬ-euˬ ehˇ dawˬ naˇ haˬ nya ni ngaˬ-ahˇ caw ba nehˬ laꞈ.

Dawqdaq 23:23

Yaw tsaˬ yaw dawˇ jeˬ zaˬ siˬ nui gahˇ, tsawˇ gahˇ dzaw geuꞈ-eu jeˬ hawˇ-eu nui ma-ahˇ noeˬ-eu heu deuˬ-aˬ, aˇ poeˬ aˇ naˆ ni kʼaˆ kʼawꞈ poˆ geuꞈ-eu tsaˬ meh. Ehˇ kʼawꞈ, aˇ poeˬ kʼaˆ dui dui-eu miˇ neh ahˬ dzeh-eu maˬ tsaˬ-a.

Iˇsaˬyaˇ 61:1

Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ-euˬ yaw sahˇ, ngaˬ-euˬ kʼoeˇ taˆ keuˆ le-euˬ meh. Yaw shaˬ zaˬ-ahˇ laˬ kʼaˬ cehˇ-eu guiˬ lahˬ dawˬ tsaꞈ gaˬ-eu gʼaˇ duˬ, nui ma tsawˬ paˆ-euˬ deuˬ-ahˇ laˆ saˆ-eu gʼaˇ duˬ, aˬ cawˬ miˇ kʼahˬ-ahˇ bi nyehꞈ gʼeh-euˬ deuˬ hawˇ-eu, paꞈ kuˆ laꞈ kʼoeˇ ka lahˇ taˬ-euˬ tsawˇ haˬ deuˬ-ahˇ, ya buˬ ya law-iˇ meh lehˇ tsaꞈ gaˬ-eu gʼaˇ duˬ, aˬ yawꞈ ngaˬ-ahˇ tseˇ doˆ-awˇ pyehˬ gʼeh leꞈ-euˬ meh.

Maꞈtehˬ 23:4

Maˬ pi coeˇ-eu kʼaˆ behˆ, aˬ cawˬ-ahˇ aˬ yawꞈ maꞈ ciˬ pi-awˇ, aˬ yawꞈ maꞈ-aˬ, laꞈ noeˇ tiˬ noeˇ neh tehꞈ-ehˇ kʼawꞈ, caw dehˬ caw toˆ nehˬ mawꞈ-eu nui ma maˬ ahˇ-a.

Luˇkaꞈ 5:38

Ehˇ kʼawꞈ, aˬ gaꞈ dzaˇ uiˇ yaw shuiꞈ-ahˇ, shaˬ koˆ iˇ puˬ yaw shuiꞈ laꞈ kʼoeˇ ya shehˆ ahˇ-eu meh.

Gʼaˬkʼehˇ 15:10

Toˆ-ehˇ ngeuˇ naˇ, aˬ dui-euˬ aˬ poeˬ aˬ bawˇ deuˬ maˬ ehˇ, aˬ dui maˬ ehˇ, maˬ daˬ coeˇ-eu kʼaˆ behˆ kʼoeˇ-ahˇ jah-eu tsawˇ haˬ deuˬ-euˬ naˇ kʼah ciˬ pi nehˬ-eu laꞈ kʼoeˇ, aˬ jeˬ miˇ neh naw maꞈ Miˬyehˇ-ahˇ lawˬ haw-eu gʼeh te.

Lormav 6:14

Iˬ baˇ neh naw maꞈ-ahˇ taˬ paˇ bi uˆ lahˇ. Aˬ jeˬ miˇ neh ehˇ naˇ, zahˇ dawˬ kʼoꞈ dawˬ uˬ moˆ naw maꞈ maˬ paˇ jawˇ-ehˇ, Miˬyehˇ-euˬ guiˬ lahˬ yaw dzahˇ uˬ moˆ jawˇ luꞈ-eu meh.

Lormav 6:18

Naw maꞈ-ahˇ iˬ baˇ laꞈ kʼoeˇ bi buˬ bi law-iˇ-awˇ, yaw tsaˬ yaw dawˇ jeˬ-euˬ zaˬ kʼaˆ bi pyeuꞈ laˇ-euˬ meh.

Lormav 7:3

Kʼoeˇ miˇ neh, yawˬ ha-euˬ kʼaˬ dzeˇ zaˬ maˬ shiˇ mi naˆ-ehˇ aˬ cawˬ nehˬ-ehˇ jawˇ naˇ, aˬ cawˬ-euˬ miˬ sawˇ yo zaˬ-ahˇ bahˬ-euˬ tsawˇ haˬ lehˇ bi myahˇ tehꞈ-a. Ehˇ kʼawꞈ, yawˬ ha-euˬ kʼaˬ dzeˇ zaˬ shiˇ dzeuˇ ngeh jawˇ, kʼaˬ dzeˇ zaˬ maˬ paˇ baw-euˬ miˇ neh, yawˬ gʼaˬ yawˬ-ahˇ dahˬ dzaˬ paˇ-iˇ kʼawꞈ, bahˬ-eu muˆ-eu lehˇ maˬ paˇ sawˇ nya meh.

Lormav 7:6

Ehˇ kʼawꞈ, nymˬ-mˇ poˆ jawˇ-aˬ, Zahˇ dawˬ kʼoꞈ dawˬ uˬ moˆ aˬ dui buˬ-iˇ law-iˇ gʼaˬ-euˬ ma. Aˬ jeˬ miˇ neh ehˇ naˇ, dzeuˇ laˇ ngeh aˬ dui-ahˇ paꞈ tawꞈ taˬ-euˬ jeˬ-ahˇ aˬ dui shiˇ dzeuˇ-euˬ ma. Boꞈ doˆ taˬ-euˬ zahˇ dawˬ kʼoꞈ dawˬ-ahˇ taꞈ-eu gaˇ ma yaw oeˇ-ahˇ gʼoe-awˇ Miˬyehˇ-euˬ gaˇ-ahˇ aˬ dui mˇ luꞈ-eu maˬ ngeuˇ. Yaw sahˇ Miˬyehˇ-ahˇ taꞈ-eu gaˇ ma yaw shuiꞈ-ahˇ gʼoe-awˇ mˇ luꞈ-eu ma.

Lormav 8:15

Aˬ jeˬ miˇ neh ehˇ naˇ, Miˬyehˇ neh naw maꞈ-ahˇ biꞈ-euˬ Yaw sahˇ Miˬyehˇ-aˬ, naw maꞈ-ahˇ zaˬ kʼaˆ maˬ bi geuꞈ-eu uˬ taꞈ, naw maꞈ guˆ-iˇ ni maˬ jahˇ-a. Naw maꞈ Miˬyehˇ-euˬ zaˬ pyeuꞈ laˇ ni jahˇ-eu meh. Yaw sahˇ Miˬyehˇ-euˬ baoˬ-ahˇ gʼoe-eu laꞈ kʼoeˇ Miˬyehˇ-ahˇ “Aˬda-oˇ, ngaˬ Da-oˇ” lehˇ aˬ dui kuˇ-eu ma.

Lormav 8:2

Aˬ jeˬ miˇ neh ehˇ naˇ, aˬ dui-ahˇ Yeˬsuˇ Ka li laꞈ kʼoeˇ bi dehꞈ laꞈ-euˬ Yaw sahˇ Miˬyehˇ-euˬ baoˬ-aˬ, iˬ baˇ hawˇ-eu shiˇ-eu jeˬ-euˬ zahˇ sahˇ kʼoꞈ uˬ moˆ aˬ dui-ahˇ bi buˬ-iˇ laꞈ-euˬ meh.

1 Gawˇliˬtu 15:58

Kʼoeˇ miˇ neh aˬ yuiꞈ aˬ nyiˇ Ka li zaˬ deuˬ-oˇ, gʼaˬ byehˆ maˬ byehˆ-ehˇ ziꞈ dah ni yawꞈ tehˬ taˬ-eu laꞈ kʼoeˇ, Sahˬpaˬ Yeˬsuˇ-euˬ gaˇ mˇ-eu yawꞈ ngehꞈ maˬ ngeuˇ-a lehˇ siˬ nya-awˇ, Sahˬpaˬ Yeˬsuˇ-euˬ gaˇ mˇ-eu leh jeh dui dui-awˬ.

1 Gawˇliˬtu 16:13

Yaw beuˇ beuˇ-ehˇ jawˇ-awˬ. Jah-eu jeˬ laꞈ kʼoeˇ ziꞈ dah ni yawꞈ tehˬ taˬ-awˬ. Nui ma kʼaˬ duˬ ni taˬ-awˬ. Gʼaˬ tiˬ byah ni bi ahˇ-awˬ.

1 Gawˇliˬtu 7:22

Aˬ jeˬ miˇ neh ehˇ naˇ, Sahˬpaˬ Miˬyehˇ neh kuˇ-euˬ zaˬ kʼaˆ tiˬ gʼaˬ-aˬ, Sahˬpaˬ Miˬyehˇ-euˬ buˬ-iˇ-euˬ tsawˇ haˬ pyeuꞈ-eu meh. Kʼoeˇ loꞈ-ehˇ duˇ ni, Ka li neh bi kuˇ-euˬ buˬ-iˇ-euˬ tsawˇ haˬ tiˬ gʼaˬ-aˬ, Ka liˬ-euˬ zaˬ kʼaˆ pyeuꞈ-eu meh.

2 Gawˇliˬtu 11:20

Aˬ cawˬ naw maꞈ-ahˇ kʼehˇ dzaˬ laˇ gaˇ maˬ ehˇ, nawˬ dzaˬ kʼaˆ dzaˬ laˇ gaˇ maˬ ehˇ, zuiˆ laˇ gaˇ maˬ ehˇ, daˆ dziˬ laˇ gaˇ maˬ ehˇ, baˬ ba-ahˇ tehˆ laˇ gaˇ maˬ ehˇ, naw maꞈ daˬ coeˇ meh ehˇ lawˬ laˬ.

2 Gawˇliˬtu 3:17

Nymˬ-mˇ Sahˬpaˬ Miˬyehˇ lehˇ ehˇ-eu heu-aˬ, Yaw sahˇ Miˬyehˇ-ahˇ ehˇ-eu meh. Sahˬpaˬ Miˬyehˇ-euˬ Yaw sahˇ-aˬ, aˬ dui-ahˇ bi buˬ bi law-iˇ laꞈ-eu meh.

Gaˬlaˬtiˆ 2:4

Tiˬ paˆ na deuˬ-aˬ, aˬ yawꞈ-ahˇ baˆ kʼoˆ mehˬ dzaˬ bi yehˬ mawꞈ-eu meh. Tsawˇ haˬ kʼoeˇ deuˬ Ka li-ahˇ jah-eu tsawˇ haˬ jahˇ geuꞈ-awˇ, nga maꞈ-euˬ aˇ muˇ laꞈ kʼoeˇ uˇ kʼoeˬ laˇ-awˇ, Yeˬsuˇ Ka li laꞈ kʼoeˇ nga maꞈ Zahˇ dawˬ kʼoꞈ dawˬ dawˬ tawˆ luꞈ-ahˇ maˬ caw teh ni mˇ nya shaˇ nya-eu a kawˬ-aˬ za taˬ-euˬ gaˇ kawˆ-ahˇ kʼoeˬ sho haw laˇ-euˬ meh. Aˬ yawꞈ maꞈ-aˬ, nga maꞈ-ahˇ Zahˇ dawˬ kʼoꞈ dawˬ-euˬ zaˬ kʼaˆ bi geuꞈ mawꞈ-eu meh.

Gaˬlaˬtiˆ 3:25

Nymˬ-mˇ-aˬ, jah-eu jeˬ-euˬ aˇ yamˬ keuˆ le-euˬ miˇ neh, Zahˇ dawˬ kʼoꞈ dawˬ koeˇ aˬ dui-ahˇ maˬ paˇ haw piˇ meh.

Gaˬlaˬtiˆ 4:26

Ehˇ kʼawꞈ, mˬ taˆ-euˬ Yeˬluˇsaˬlehˬ meuˬ-aˬ, buˬ-iˇ-euˬ meuˬ pyeuꞈ-eu meh. Meuˬ kʼoeˇ meuˬ-aˬ, aˬ dui-euˬ aˬ ma pyeuꞈ-eu meh.

Gaˬlaˬtiˆ 4:31

Aˬ yuiꞈ aˬ nyiˇ Ka li zaˬ deuˬ-oˇ, aˬ dui-aˬ, zaˬ miˬ zaˬ zaˬ kʼaˆ o neh dehꞈ le-euˬ zaˬ deuˬ maˬ ngeuˇ. Zaˬ kʼaˆ maˬ ngeuˇ-eu zaˬ miˬ zaˬ gʼaˬ o neh dehꞈ le-euˬ zaˬ deuˬ ma.

Gaˬlaˬtiˆ 4:9

Nymˬ-mˇ poˆ jawˇ-aˬ, naw maꞈ Miˬyehˇ-ahˇ siˬ nya laˇ-euˬ meh. Maˬ ngeuˇ naˇ, Miˬyehˇ naw maꞈ-ahˇ siˬ nya-euˬ meh lehˇ kʼawꞈ ehˇ-awˬ. Gʼaˬ baˬ dui dui-awˇ tiˬ jeˬ-iˬ maˬ jahˇ nya-eu yaw sahˇ kʼoeˇ deuˬ jawˇ paw naw maꞈ aˬ joˆ-ehˇ paˇ gʼoꞈ pyawˇ-iˇ mawꞈ-eu nya. Aˬ jeˬ miˇ neh aˬ yawꞈ maꞈ-euˬ zaˬ kʼaˆ paˇ geuꞈ poˆ mawꞈ-eu nya.

Gaˬlaˬtiˆ 5:13

Aˬ yuiꞈ aˬ nyiˇ Ka li zaˬ deuˬ-oˇ, naw maꞈ-aˬ, bi buˬ-iˇ-eu gʼaˇ duˬ kuˇ doˆ gʼaˬ-euˬ tsawˇ haˬ meh. Ehˇ kʼawꞈ, buˬ-iˇ-euˬ kʼoeˇ-aˬ, naw maꞈ-euˬ shiˬ shaˬ jiˇ nui loˆ mˇ-eu gʼaˇ duˬ taˬ bi pyeuꞈ. Gʼoeˇ-eu gaˬ-eu laꞈ kʼoeˇ tiˬ gʼaˬ tiˇ gʼaˬ ngehˬ gʼeh-awˬ.

Eˇpeˇsu 6:14

Kʼoeˇ miˇ neh, yaw sui yaw dawˇ jeˬ joꞈ paꞈ paꞈ-awˇ, yaw tsaˬ yaw dawˇ jeˬ kʼahˬ-ahˇ dehˬ kaˬ-awˇ yawꞈ-awˬ.

Piˇliˇpiˆ 1:27

Huiˬ-eu tiˬ jeˬ-aˬ, ngaˇ naw maꞈ-ahˇ haw keuˆ laˇ-eu maˬ kaˬ, maˬ haw keuˆ laˇ-eu maˬ kaˬ, naw maꞈ nui ma tiˬ siˬ tehꞈ-ehˇ taˬ-awˇ ziꞈ dah ni jawˇ luꞈ-eu gaˇ kawˆ hawˇ-eu, La kʼaˬ cehˇ-eu Guiˬ lahˬ dawˬ-ahˇ taꞈ-eu jah-eu jeˬ gʼaˇ duˬ naw maꞈ nui ma gm-awˇ deuˆ ceh ceh luꞈ-eu gaˇ kawˆ-ahˇ ngaˇ ya gaˬ ni, Ka li-euˬ Laˬ kʼaˬ cehˇ-eu Guiˬ lahˬ dawˬ-ahˇ tsaˬ ni dehꞈ gʼeh jawˇ gʼeh-awˬ.

1 Teˇsaˬloˇni 3:8

Naw maꞈ Sahˬpaˬ Yeˬsuˇ laꞈ kʼoeˇ ziꞈ dah ni jawˇ luꞈ naˇ, nga maꞈ yaw dehꞈ dehꞈ mahˇ tsahˇ ma.

2 Teˇsaˬloˇni 2:15

Kʼoeˇ miˇ neh aˬ yuiꞈ aˬ nyiˇ Ka li zaˬ deuˬ-oˇ, jah-eu laꞈ kʼoeˇ ziꞈ dah ni dehꞈ-awˇ, nga maꞈ dawˬ mehˬ mehˬ-awˇ maˬ ehˇ, sahˬ boꞈ boꞈ-awˇ maˬ ehˇ, naw maꞈ-ahˇ mehˬ nehˬ tsoˆ nehˬ-euˬ yaw tsaˬ yaw dawˇ dawˬ-ahˇ ziꞈ dah ni tuˆ tehˬ taˬ-awˬ.

HeˬByehˇ 10:23

Aˬ dui neh jah duˬ taˬ-euˬ noeˬ tmˬ-eu jeˬ-ahˇ ziꞈ dah ni tuˆ tehˬ taˬ kaˇ-euˇ. Aˬ jeˬ miˇ neh ehˇ naˇ, Miˬyehˇ-aˬ, aˬ yawꞈ neh saˇ jaˇ dzaˬ taˬ-euˬ loꞈ-ehˇ mˇ byah nehˬ laꞈ tehꞈ-a lehˇ aˬ dui jah-eu ma.

HeˬByehˇ 3:14

Aˬ jeˬ miˇ neh ehˇ naˇ, aˇ dahˬ beh ngeh neh aˬ dui ziꞈ dah ni jah-euˬ loꞈ-ehˇ, aˇ saˬ saˬ ngeh keuˆ ni ziꞈ naˇ, aˬ dui dawˬ tawˆ luꞈ Ka li-euˬ mˇ cawˬ shaˇ cawˬ deuˬ pyeuꞈ-eu ma.

HeˬByehˇ 3:6

Ehˇ kʼawꞈ, Ka li-aˬ, Miˬyehˇ-euˬ nymˇ jiˇ-ahˇ haw-eu pyaˆ-eu gʼaˬ pyeuꞈ-eu saˇ jaˇ ziꞈ-eu Zaˬmaˇ meh. Aˬ dui kʼawꞈ, aˬ dui neh noeˬ tmˬ taˬ-euˬ jeˬ-ahˇ nui ma kʼaˬ duˬ ni taˬ-awˇ, ziꞈ dah ni tuˆ tehˬ taˬ naˇ, Miˬyehˇ-euˬ nymˇ jiˇ laꞈ kʼoeˇ jawˇ-eu aˬ yawꞈ-euˬ zaˬ deuˬ lehˇ ehˇ nya ma.

HeˬByehˇ 4:14

Aˬ dui jah ma lehˇ ehˇ taˬ-euˬ jeˬ-ahˇ ziꞈ dah ni tuˆ tehˬ taˬ kaˇ-euˇ. Aˬ jeˬ miˇ neh ehˇ naˇ, Miˬyehˇ-euˬ mehˬ shi keuˆ ni uˇ keuˆ leˇ-euˬ Piˇ ma Yaw huiˬ tiˬ gʼaˬ aˬ dui jawˇ-eu ma. Aˬ yawꞈ-aˬ, Miˬyehˇ-euˬ Zaˬmaˇ pyeuꞈ-eu Yeˬsuˇ meh.

1 Beˬtuˆluˆ 2:16

Zaˬ kʼaˆ maˬ paˇ ya geuꞈ ni buˬ-iˇ-euˬ tsawˇ haˬ loꞈ-ehˇ dehꞈ-awˬ. Ehˇ kʼawꞈ, kʼoeˇ loꞈ-ehˇ ya buˬ-iˇ-euˬ miˇ neh, yaw haiˬ jeˬ-ahˇ aˇ dzehˬ taˬ paˇ mˇ. Miˬyehˇ-euˬ zaˬ kʼaˆ loꞈ-ehˇ dehꞈ-awˬ.

2 Beˬtuˆluˆ 2:19

Yawˬ ha luˬ-iˇ seˇ-iˇ-eu jeˬ-euˬ zaˬ kʼaˆ geuꞈ geuꞈ-ehˇ shaˬ luꞈ ngeh, aˬ cawˬ-ahˇ bi buˬ-iˇ nya ma lehˇ aˬ yawꞈ maꞈ saˇ jaˇ dzaˬ-eu meh. Aˬ jeˬ miˇ neh ehˇ naˇ, tsawˇ haˬ tiˬ gʼaˬ-aˬ, yawˬ ha-ahˇ kʼaˇ uˆ gʼaˬ taˬ-euˬ jeˬ-euˬ zaˬ kʼaˆ pyeuꞈ-eu meh.

Yuˇdaˆ 1:3

Ngaˇ gaˬ dui dui-eu aˬ yuiꞈ aˬ nyiˇ Ka li zaˬ deuˬ-oˇ, aˬ dui dawˬ tawˆ luꞈ-ahˇ taꞈ-eu ka kʼoꞈ-eu jeˬ gaˇ kawˆ, ngaˇ kʼaˇ gʼeh nya-eu loꞈ-ehˇ boꞈ ahˇ laꞈ-eu ma. Miˬyehˇ neh aˬ yawꞈ-euˬ tsawˇ haˬ deuˬ-ahˇ mˬ maˬ maˬ byaˆ zaˇ ziˇ tiˬ poˆ tehꞈ-ehˇ biꞈ-euˬ jah-eu jeˬ gʼaˇ duˬ leh jeh dui dui-awˇ deuˆ ceh ceh paˬ-ehˇ gʼeh-eu gaˇ kawˆ, naw maꞈ-ahˇ gʼaˬ biꞈ-eu sahˬ boꞈ yaw kawˇ-ehˇ boꞈ paˬ-ehˇ gʼeh-eu meh lehˇ ngaˇ noeˬ-eu ma.

Panmaeq 2:25

Ehˇ kʼawꞈ, ngaˇ oe ngeh keuˆ ni naw maꞈ kʼaˇ jaˆ luꞈ-eu jeˬ-ahˇ ziꞈ dah ni tuˆ tehˬ taˬ-awˬ.

Panmaeq 3:3

Nawˬ-ahˇ mehˬ nehˬ tsoˆ nehˬ-euˬ jeˬ hawˇ-eu nawˬ neh ya gaˬ taˬ-euˬ jeˬ-ahˇ noeˬ keuˆ-awˬ. Kʼoeˇ-ahˇ naˇ haˬ geuꞈ-awˇ, iˬ baˇ-ahˇ byehˇ dzeh-awˬ. Nawˇ maˬ noeˬ laˇ naˇ, smˇ kʼoeˬ oe-eu loꞈ-ehˇ nawˇ jawˇ gaˇ ngaˇ oe-awˇ, ngaˇ oe-eu aˇ yamˬ nawˇ maˬ ya siˬ-aˇ.