Gʼaˬkʼehˇ 13:19 - Akha

¹⁹ Kaˬnaˬ miˇ kʼahˬ laꞈ kʼoeˇ jawˇ-euˬ tsawˇ jeuˬ shiꞈ jeuˬ-ahˇ aˬ yawꞈ laˆ cawˆ nehˬ-awˇ, aˬ yawꞈ-euˬ tsawˇ haˬ deuˬ-ahˇ miˇ kʼahˬ kʼoeˇ kʼahˬ biꞈ-euˬ meh.

Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

¹⁹ Aqyawf, Kaqnaq mirkhanq-anr jawr-eu tsawrjeuq shif jeuq-anr lavcawv-awr, mirkhanq heukhanq aqyawf maf-anr biof-euq mae.

Gʼaˬkʼehˇ 13:19 ပူးပေါင်းရင်းမြစ်များ

Aˇ dahˬ 12:5

Aˬbyaˬ-aˬ, aˬ yawꞈ-euˬ miˬ zaˬ Saˬlehˇ hawˇ-eu aˬ yawꞈ-euˬ aˬ duˇ Lawˇtaˬ-ahˇ sheuˬ-awˇ, Kaˬnaˬ miˇ kʼahˬ-ahˇ iˇ-euˬ meh. Haˬlaˬ meuˬ-ahˇ jawˇ ngeh, aˬ yawꞈ neh mˇ jaˆ-euˬ pyuˇ shuiˇ myawˬ gahˬ dawˬ tawˆ luꞈ yuˇ gʼeh-awˇ, zaˬ kʼaˆ dawˬ tawˆ luꞈ sheuˬ gʼeh-euˬ meh. Aˬ yawꞈ maꞈ Kaˬnaˬ miˇ kʼahˬ-ahˇ iˇ keuˆ ngeh,

Aˇ dahˬ 17:8

Iˬ nah boeˇ miˬ siˬ kʼaˬ tiˬ gʼaˬ loꞈ-ehˇ nawˇ ya dehꞈ ya jawˇ luꞈ-eu miˇ kʼahˬ heu kʼahˬ, nawˇ hawˇ-eu nawˬ-euˬ zaˬ nawˬ-euˬ uˆ deuˬ-ahˇ ngaˇ biꞈ ma. Kaˬnaˬ miˇ kʼahˬ heu kʼahˬ kʼahˬ lah ni, mˬ maˬ maˬ byaˆ zaˇ ziˇ nawˬ-euˬ zaˬ nawˬ-euˬ uˆ deuˬ-euˬ miˇ kʼahˬ pyeuꞈ-awˇ, ngaˇ aˬ yawꞈ maꞈ-euˬ Miˬyehˇ ya pyeuꞈ tehꞈ-a.”

1 Sahˬpaˬ 6:1

Iˇsaˬleˬlaˆ tsawˇ jeuˬ Iˇjiˇtuˆ miˇ kʼahˬ laꞈ kʼoeˇ neh doˆ laˇ-euˬ oeˬ yaˇ yehꞈ tseˇ kʼoꞈ byah laˇ-awˇ, Sawˇlaˬmoˬ Iˇsaˬleˬlaˆ miˇ kʼahˬ-ahˇ uˆ lahˇ-euˬ oeˬ kʼoꞈ byah ngeh kʼoꞈ, ba la nyiˬ siˬ tiˬ siˬ pyeuꞈ-eu Ziˇbaˆ ba la-ahˇ, Sawˇlaˬmoˬ Uˬ duˬ tahˬ nymˇ nymˇ ma tsoˆ dahˬ beh-euˬ meh.

Neˬhaˬmiˇ 9:24

Kaˬnaˬ miˇ kʼahˬ-ahˇ aˬ yawꞈ maꞈ deuˆ gʼaˬ-euˬ meh. kʼoeˇ gaˇ jawˇ-eu tsawˇ haˬ deuˬ-ahˇ nawˇ gʼaˬ-euˬ meh. Kaˬnaˬ sahˬ paˬ hawˇ-eu miˇ kʼahˬ zaˬ deuˬ kʼoeˇ taˆ, kʼaˇ jahˇ mawꞈ-eu jeˬ jahˇ nehˬ nya-eu baoˬ, nawˬ-euˬ tsawˇ haˬ deuˬ-ahˇ nawˇ biꞈ-euˬ meh.

Jaceuq 135:11

Aˬmawˇ liˆ sahˬ paˬ Siˇhoˬ, Baˬshaˬ sahˬ paˬ Awˇgaˆ hawˇ-eu, Kaˬnaˬ miˇ kʼahˬ-ahˇ jawˇ-eu sahˬ paˬ dawˬ tawˆ luꞈ-ahˇ, aˬ yawꞈ sehꞈ jiˇ-euˬ meh.

Jaceuq 78:55

Aˬ yawꞈ-euˬ tsawˇ haˬ deuˬ le uˇ gʼeh-eu nehˬ-ehˇ, kʼoeˇ gaˇ jawˇ luꞈ-eu tsawˇ haˬ deuˬ-ahˇ teh dzeh-awˇ, tsawˇ haˬ kʼoeˇ deuˬ-euˬ miˇ kʼahˬ Iˇsaˬleˬlaˆ tsawˇ jeuˬ deuˬ-ahˇ biˇ nehˬ-eu laꞈ kʼoeˇ, aˬ yawꞈ maꞈ-euˬ nymˇ kʼoeˇ deuˬ aˬ yawꞈ-euˬ tsawˇ haˬ deuˬ-ahˇ aˬ yawꞈ biꞈ-euˬ meh.

Iˇsaˬyaˇ 34:17

Jeˬ zaˬ kʼoeˇ deuˬ gʼaˇ duˬ Sahˬpaˬ Miˬyehˇ miˇ tsaˬ biˇ-awˇ, yawˬ jeˬ na luꞈ-ahˇ biˇ oꞈ nehˬ tehꞈ-a. Miˇ kʼahˬ kʼoeˇ kʼahˬ laꞈ kʼoeˇ aˬ yawꞈ maꞈ ziꞈ dah ni jawˇ-awˇ, mˬ maˬ maˬ byaˆ zaˇ ziˇ aˬ yawꞈ maꞈ-ahˇ oꞈ tehꞈ-a.

Gʼaˬkʼehˇ 7:45

Aˬ dui maꞈ-euˬ aˬ poeˬ aˬ bawˇ kʼoeˇ deuˬ, aˬ yawꞈ maꞈ-euˬ aˬ da deuˬ-euˬ laꞈ-ahˇ neh sehˬ gʼawˆ kʼoeˇ hmˬ za-awˇ, aˬ yawꞈ maꞈ mehˬ hu paw le gʼeh leꞈ-eu nehˬ-ehˇ Miˬyehˇ neh bi teh doˆ-euˬ tsawˇ jeuˬ deuˬ-euˬ miˇ kʼahˬ yuˇ geuꞈ-eu lehˇ Yawˇshuˆ nehˬ-ehˇ aˬ yawꞈ maꞈ le ngeh jawˇ, sehˬ gʼawˆ kʼoeˇ gʼawˆ baꞈ gʼeh-euˬ meh. Kʼoeˇ naˇ, sehˬ gʼawˆ kʼoeˇ Daˬbiˇ-euˬ ziˇ-ahˇ keuˆ ni kʼoeˇ gaˇ jaˆ-euˬ meh.

Dawˬmehˬ 7:1

“Naw maꞈ jawˇ leˇ-eu lehˇ gʼeh-eu miˇ kʼahˬ kʼoeˇ kʼahˬ-ahˇ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ naw maꞈ-ahˇ sheuˬ uˇ gʼeh-awˇ, kʼoeˇ gaˇ jawˇ-eu tsawˇ jeuˬ gʼawˬ mya jeuˬ-ahˇ aˬ yawꞈ teh doˆ tehꞈ-a. Naw maꞈ le-eu nehˬ-ehˇ, naw maꞈ myaˆ maˬ tseˇ myaˬ dzehˬ-awˇ gʼaˬ kʼaˆ dzehˬ-eu tsawˇ jeuˬ shiꞈ jeuˬ-ahˇ aˬ yawꞈ teh doˆ tehꞈ-a. Tsawˇ jeuˬ kʼoeˇ deuˬ-aˬ, Heˬtaˆ tsawˇ jeuˬ, Geuˬgaˬshaˆ tsawˇ jeuˬ, Aˬmoˬ tsawˇ jeuˬ, Kaˬnaˬ tsawˇ jeuˬ Paˬyehˆ tsawˇ jeuˬ, Hiˇbiˇ tsawˇ jeuˬ hawˇ-eu Yeˬbuˇ tsawˇ jeuˬ meh.

Yawˇshuˆ 14:1

Heu-aˬ, Iˇsaˬleˬlaˆ tsawˇ jeuˬ-ahˇ Yawˇ daˬ lawˇ baˬ nahˇ ma ga kʼehˬ paw jaˆ-eu miˇ kʼahˬ biˇ nehˬ-euˬ gaˇ kawˆ meh. Piˇ ma Eˇlaˬzaˬ, Nuˬ-euˬ aˬ li Yawˇshuˆ hawˇ-eu, Iˇsaˬleˬlaˆ tsawˇ jeuˬ deuˬ-euˬ aˬ yuiꞈ aˬ tsu deuˬ, Iˇsaˬleˬlaˆ tsawˇ jeuˬ deuˬ-ahˇ, tsawˇ haˬ yaw cuiˆ yaw myaˬ-ahˇ haw-awˇ, miˇ kʼahˬ kʼoeˇ kʼahˬ biˇ nehˬ-euˬ meh.

Yawˇshuˆ 18:10

Kʼoeˇ naˇ, Yawˇshuˆ shehˆ tsaˬ tsaˬ-eu laꞈ kʼoeˇ, Sahˬpaˬ Miˬyehˇ nehˬ-ehˇ mehˬ bawˬ mˇ-awˇ, dzeˇ luꞈ-eu tsawˇ jeuˬ aˬ yawꞈ jeuˬ yawꞈ-ahˇ miˇ kʼahˬ biˇ nehˬ-euˬ meh.

Yawˇshuˆ 19:51

Piˇ ma Eˇlaˬzaˬ, Nuˬ-euˬ aˬ li Yawˇshuˆ hawˇ-eu, Iˇsaˬleˬlaˆ tsawˇ haˬ aˬ yuiꞈ aˬ tsu deuˬ, Shiˇloˬ meuˬ-ahˇ Sahˬpaˬ Miˬyehˇ jawˇ-eu Sehˬ gʼawˆ gʼoˆ kʼehˬ dawˬ peh shehˆ tsaˬ tsaˬ-eu laꞈ kʼoeˇ, Sahˬpaˬ Miˬyehˇ-ahˇ mehˬ bawˬ mˇ-awˇ, miˇ kʼahˬ heu deuˬ biˇ nehˬ-euˬ meh. Aˬ yawꞈ maꞈ kʼoeˇ loꞈ-ehˇ jahˇ-awˇ, miˇ kʼahˬ biˇ-euˬ meh.

Yawˇshuˆ 23:4

Nahˇ ma doˆ kʼehˬ paw Yawˇ daˬ lawˇ baˬ-ahˇ neh, nahˇ ma ga kʼehˬ paw Gʼahˇ ceh-eu iˬ ma laˆ shaˆ-ahˇ keuˆ ni jaˆ luꞈ-eu ngaˬ neh deuˆ gʼaˬ-euˬ tsawˇ jeuˬ deuˬ-euˬ miˇ kʼahˬ maˬ ehˇ, maˬ deuˆ gʼaˬ dah-euˬ tsawˇ jeuˬ deuˬ-euˬ miˇ kʼahˬ maˬ ehˇ, Iˇsaˬleˬlaˆ tsawˇ jeuˬ pyeuꞈ-eu naw maꞈ-ahˇ ngaˇ biꞈ gʼaˬ-euˬ ma.

Yawˇshuˆ 24:11

Kʼoeˇ naˇ, naw maꞈ Yawˇdaˬ lawˇ baˬ tsehˆ doˆ-awˇ, Yeˬliˇkoˇ meuˬ-ahˇ laˇ-euˬ meh. Kʼoeˇ ngeh, Yeˬliˇkoˇ meuˬ-ahˇ jawˇ-eu tsawˇ haˬ deuˬ naw maꞈ-ahˇ guˆ dui dui-eu meh. Kʼoeˇ loꞈ-ehˇ duˇ ni, Aˬmawˇliˆ tsawˇ jeuˬ, Paˬyehˆ tsawˇ jeuˬ, Kaˬnaˬ tsawˇ jeuˬ, Heˬtaˆ tsawˇ jeuˬ, Geuˬgaˬshaˆ tsawˇ jeuˬ, Hiˇbiˇ tsawˇ jeuˬ hawˇ-eu, Yeˬbuˇ tsawˇ jeuˬ deuˬ kʼawꞈ, naw maꞈ-ahˇ guˆ dui dui-euˬ meh. Ehˇ kʼawꞈ, naw maꞈ-ahˇ aˬ yawꞈ maꞈ dawˬ tawˆ luꞈ kʼoeˇ taˆ bi gʼaˬ leˇ-euˬ ma.

Yaˇ kʼaˬ daˇ 11:26

Heˬshaˬboˬ meuˬ hawˇ-eu Aˬyawˬ meuˬ-ahˇ maˬ ehˇ, kʼoeˇ nyiˬ meuˬ-euˬ jawˬ jawˬ-ehˇ jaˆ-eu meuˬ meuˬ zaˬ deuˬ-ahˇ maˬ ehˇ, Aˬnoˬ lawˇ baˬ lawˇ deh caw caw-ehˇ jaˆ-eu meuˬ dawˬ tawˆ luꞈ-ahˇ maˬ ehˇ, Iˇsaˬleˬlaˆ tsawˇ haˬ deuˬ jawˇ luꞈ-eu smˬ yaˇ kʼoꞈ keuˆ laˇ-euˬ meh. Aˇ yamˬ heu myah ni gʼeh-eu laꞈ kʼoeˇ, aˬ jeˬ miˇ neh meuˬ kʼoeˇ deuˬ nawˇ maˬ yuˇ kʼoꞈ geuꞈ te.