Eˇpeˇsu 6:5 - Akha

⁵ Zaˬ kʼaˆ deuˬ-oˇ, miˇ tsaˬ zaˬ pyeuꞈ-eu naw maꞈ-euˬ baw leˬ deuˬ-ahˇ guˆ-awˇ yaw dzuˬ dzuˬ-eu laꞈ koeˇ, ehˇ dawˬ naˇ haˬ geuꞈ-awˬ. Ka li-euˬ gaˇ mˇ gaˇ duˇ ni, aˬ yawꞈ maꞈ kʼaˇ kʼehˇ-eu jeˬ-ahˇ mˇ-awˬ.

Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

⁵ Kuirlaf zaqkhav geufluf-eu deuq-or! Kali-euq aerdawq narhaq geuf-eu lof-aer, shiqshaq paw nawmaf-euq yawsanr-euq aerdawq-anr nuima shawrjaevni taq-awr, guv-awr yawdzuq dzuq-eu lafkhoer narhaq geuf-awq.

Eˇpeˇsu 6:5 ပူးပေါင်းရင်းမြစ်များ

Aˇ dahˬ 16:9

“Aˬ yawꞈ jawˇ gaˇ gʼoꞈ leˇ-awˇ, aˬ yawꞈ-euˬ zaˬ kʼaˆ paˇ geuꞈ kʼoꞈ leˇ-awˬ” lehˇ, Sahˬpaˬ Miˬyehˇ-euˬ gʼaˬ kʼehˇ kʼoeˇ gʼaˬ Haˬgaˬlaˇ-ahˇ ehˇ nehˬ-euˬ meh.

1 Laˬsaˬbaˬ 29:17

Tsawˇ haˬ yawˬ gʼaˬ na luꞈ-euˬ nui ma-ahˇ nawˇ lawˬ haw-awˇ, nui ma tiˬ siˬ tehꞈ-ehˇ taˬ luꞈ-eu miˇ neh, nawˇ laˬ kʼaˬ cehˇ meh lehˇ ngaˇ siˬ nya ma. Nui ma dawˇ coe ni jaˆ-awˇ, nui ma keuˆ dui dui-eu laꞈ kʼoeˇ, heu deuˬ dawˬ tawˆ luꞈ nawˬ-ahˇ ngaˇ damˬ nehˬ-eu ma. Heu gaˇ uiˬ laˇ taˬ-euˬ nawˬ-euˬ tsawˇ haˬ deuˬ kʼawꞈ, laˬ kʼaˬ cehˇ-eu laꞈ kʼoeˇ nawˬ-ahˇ damˬ-eu jeˬ yuˇ laꞈ-euˬ gaˇ ngaˇ ya mawˇ-euˬ ma.

Jaceuq 123:2

Zaˬ kʼaˆ tiˬ gʼaˬ aˬ yawꞈ-euˬ baw leˬ-ahˇ haw-eu loꞈ-ehˇ, zaˬ miˬ zaˬ zaˬ kʼaˆ tiˬ gʼaˬ aˬ yawꞈ-euˬ meh leˬ-ahˇ haw-eu loꞈ-ehˇ, nga maꞈ-euˬ Miˬyehˇ pyeuꞈ-euˬ Sahˬpaˬ Miˬyehˇ nawˇ nga maꞈ-ahˇ gʼawˬ shaˬ gaˬ nehˬ laꞈ ni, nawˬ-ahˇ nga maꞈ haw tsoˆ taˬ-euˬ ma.

Jaceuq 86:11

Sahˬpaˬ Miˬyehˇ-oˇ, nawˇ bi mˇ mawꞈ-eu jeˬ mˇ nya ni, ngaˬ-ahˇ mehˬ nehˬ tsoˆ nehˬ laꞈ-awˬ. Nawˬ-euˬ dawˬ-ahˇ saˇ jaˇ ziꞈ-eu laꞈ kʼoeˇ naˇ haˬ geuꞈ ma. Nawˬ-ahˇ nui ma gʼawˇ mawˇ a nehˬ nya ni mehˬ nehˬ tsoˆ nehˬ laꞈ-awˬ.

Maˬlaˬkiˇ 1:6

Piˇ ma deuˬ-ahˇ Sahˬpaˬ Miˬyehˇ heu loꞈ-ehˇ ehˇ-eu meh. “Zaˬ deuˬ aˬ da-ahˇ yaw zeu baw-eu siˬ nya-awˇ, zaˬ kʼaˆ deuˬ baw leˬ-ahˇ yaw zeu baw-eu siˬ nya meh. Ngaˇ naw maꞈ-euˬ aˬ da ma. Aˬ jeˬ miˇ neh ngaˬ-ahˇ yaw zeu maˬ baw te. Naw maꞈ ngaˬ-ahˇ yehˬ bawˬ sehˇ lu-ehˇ gʼeh-eu uˬ taꞈ, ‘Nga maꞈ nawˬ-ahˇ aˬ joˆ-ehˇ jahˇ-awˇ yehˬ bawˬ sehˇ lu-ehˇ gʼeh taˬ-euˬ jaˆ ta’ lehˇ, naw maꞈ paˇ ehˇ-eu meh.

Maꞈtehˬ 6:22

“Myaˆ nuiˆ-aˬ gʼawˇ mawˇ-euˬ tsiˇ kʼmˬ pyeuꞈ-eu meh. Kʼoeˇ miˇ neh, nawˬ-euˬ myaˆ nuiˆ yaw muiˬ naˇ, nawˬ-euˬ gʼawˇ mawˇ mawˇ lah-ehˇ yaw shehꞈ bya tehꞈ-a.

Maꞈtehˬ 6:24

“Tsawˇ haˬ tiˬ gʼaˬ-iˬ sahˬ paˬ nyiˬ gʼaˬ-euˬ zaˬ kʼaˆ maˬ geuꞈ nya-a. Tiˬ gʼaˬ-ahˇ bye naˇ, tiˬ gʼaˬ-ahˇ gaˬ tehꞈ-a. Tiˬ gʼaˬ-ahˇ yaw zeu baw naˇ, tiˬ gʼaˬ-ahˇ yaw zeu maˬ baw-aˇ. Naw maꞈ-aˬ, Miˬyehˇ-euˬ zaˬ kʼaˆ hawˇ-eu pyuˇ shuiˇ myawˬ gahˬ-euˬ zaˬ kʼaˆ, nyiˬ jeˬ luꞈ tiˬ kawˆ loꞈ-ehˇ maˬ geuꞈ nya-a.

Maꞈtehˬ 8:9

Aˬ jeˬ miˇ neh ehˇ naˇ, ngaˇ kʼawꞈ, ngaˇ naˆ maˬ tseˇ huiˬ-eu yaw huiˬ yaw mahˇ deuˬ-euˬ laꞈ oˆ gaˇ ya mˇ luꞈ-eu loꞈ-ehˇ, ngaˬ-euˬ laꞈ oˆ gaˇ mˇ-eu yehˇ deuˬ kʼawꞈ jawˇ ma. Ngaˬ neh ‘Iˇ-awˬ’ lehˇ kʼaˇ ehˇ nehˬ-euˬ gʼaˬ ya iˇ-awˇ, ‘Laˇ-awˬ’ lehˇ kʼaˇ ehˇ nehˬ-euˬ gʼaˬ ya laˇ meh. ‘Heu jeˬ mˇ sheˇ’ lehˇ ngaˬ-euˬ zaˬ kʼaˆ-ahˇ ngaˇ kʼehˇ naˇ, ngaˬ neh kʼaˇ kʼehˇ-euˬ jeˬ ya mˇ meh.”

Gʼaˬkʼehˇ 2:46

Aˬ yawꞈ nah yawꞈ Uˬ duˬ tahˬ nymˇ nymˇ ma laꞈ kʼoeˇ tahˬ dzoeˇ-awˇ, aˬ yawꞈ maꞈ-euˬ nymˇ laꞈ kʼoeˇ laˬ kʼaˬ cehˇ-awˇ nui gaˬ shaˬ coeˇ byah-eu laꞈ kʼoeˇ dzaˬ taꞈ dawˇ taꞈ-euˬ meh.

Lormav 9:3

Aˬ yawꞈ maꞈ-euˬ gʼaˇ duˬ Miˬyehˇ yaˬ kʼehˇ yaˬ nehˬ laꞈ-eu jeˬ-ahˇ ngaˇ daˬ-awˇ, Ka li-ahˇ gʼawˬ tsehˆ ya tsehˆ kʼawꞈ nui kʼahˇ shiˇ ma.

1 Gawˇliˬtu 2:3

Kʼoeˇ miˇ neh, naw maꞈ jawˇ gaˇ ngaˇ oe ngeh, ngaˇ nui ma baˬ dui dui-awˇ, guˆ dui dui-eu laꞈ kʼoeˇ yaw dzuˬ dzuˬ-euˬ ma.

1 Gawˇliˬtu 7:22

Aˬ jeˬ miˇ neh ehˇ naˇ, Sahˬpaˬ Miˬyehˇ neh kuˇ-euˬ zaˬ kʼaˆ tiˬ gʼaˬ-aˬ, Sahˬpaˬ Miˬyehˇ-euˬ buˬ-iˇ-euˬ tsawˇ haˬ pyeuꞈ-eu meh. Kʼoeˇ loꞈ-ehˇ duˇ ni, Ka li neh bi kuˇ-euˬ buˬ-iˇ-euˬ tsawˇ haˬ tiˬ gʼaˬ-aˬ, Ka liˬ-euˬ zaˬ kʼaˆ pyeuꞈ-eu meh.

2 Gawˇliˬtu 1:12

Miˇ tsaˬ heu kʼoeˇ taˆ nga maꞈ yaw dehꞈ dehꞈ luꞈ-eu heu hawˇ-eu, kʼaˆ kʼaˆ ni naw maꞈ nehˬ-ehˇ cawˬ ya cawˬ taꞈ luꞈ-eu heu-aˬ, Miˬyehˇ neh biꞈ leꞈ-euˬ myaˆ pyawˬ bya cehˆ ni taˬ nya-eu jeˬ hawˇ-eu, nui ma dawˇ coe ni gʼeh-eu jeˬ laꞈ kʼoeˇ ya dehꞈ luꞈ-eu baˬ da neh maˬ ehˇ, tsawˇ haˬ zaˬ-euˬ zaˬ siˬ tsawˇ gahˇ-ahˇ maˬ gʼoe-ehˇ Miˬyehˇ-euˬ guiˬ lahˬ yaw dzahˇ-euˬ baoˬ-ahˇ gʼoe-awˇ ya dehꞈ luꞈ-eu baˬ da neh maˬ ehˇ, nga maꞈ kʼahˬ sehˇ jehˆ kʼaˇ za-eu ma.

2 Gawˇliˬtu 7:15

Aˬ yawꞈ neh naw maꞈ-ahˇ mehˬ nehˬ tsoˆ nehˬ-euˬ jeˬ-ahˇ naw maꞈ naˇ haˬ geuꞈ mawꞈ-eu nui ma ahˇ-awˇ, Miˬyehˇ mehˬ shi naw maꞈ guˆ-awˇ yaw dzuˬ dzuˬ-eu laꞈ kʼoeˇ aˬ yawꞈ-ahˇ ha geuꞈ nehˬ-euˬ gaˇ aˬ yawꞈ paˇ noeˬ mawˇ leˇ ngeh, aˬ yawꞈ-euˬ nui ma laꞈ kʼoeˇ naw maꞈ-ahˇ gaˬ-eu jeˬ bi lehˬ lehˬ laˇ-euˬ meh.

Eˇpeˇsu 5:22

Miˬ zaˬ deuˬ-oˇ, Sahˬpaˬ Yeˬsuˇ-euˬ ehˇ dawˬ naˇ haˬ-eu loꞈ-ehˇ, yawˬ ha kʼaˬ dzeˇ zaˬ-euˬ ehˇ dawˬ naˇ haˬ-awˬ.

Eˇpeˇsu 6:24

Aˬ dui-euˬ Sahˬpaˬ Yeˬsuˇ ka li-ahˇ tiˬ jawˇ-iˬ maˬ piˬ maˬ byoˆ-iˇ nya-eu gʼoeˇ-eu gaˬ-eu jeˬ neh kʼaˇ gaˬ-eu tsawˇ haˬ dawˬ tawˆ luꞈ kʼoeˇ taˆ, Miˬyehˇ gʼawˬ shaˬ gaˬ-eu guiˬ lahˬ yaw dzahˇ jaˆ luꞈ-uˇ.

Piˇliˇpiˆ 2:12

Kʼoeˇ miˇ neh ngaˇ gaˬ-eu cawˬ deuˬ-oˇ, ngaˇ naw maꞈ nehˬ-ehˇ jawˇ ngeh ngaˬ-euˬ dawˬ-ahˇ naw maꞈ aˬ myah luꞈ naˇ haˬ geuꞈ-euˬ meh. Nymˬ-mˇ ngaˇ naw maꞈ nehˬ-ehˇ maˬ jawˇ ngeh kʼawꞈ, ngaˬ-euˬ dawˬ-ahˇ kʼoeˇ naˆ maˬ tseˇ naˇ haˬ geuꞈ-awˬ. Naw maꞈ ka kʼoꞈ-eu jeˬ-ahˇ za nya ni, Miˬyehˇ-ahˇ guˆ-awˇ yaw dzuˬ dzuˬ-eu laꞈ kʼoeˇ leh jeh dui dui-awˬ.

Piˇleˇmoˬ 1:16

Nymˬ-mˇ-aˬ, aˬ yawꞈ zaˬ kʼaˆ tiˬ gʼaˬ loˆ ni tehꞈ maˬ paˇ ngeuˇ meh. Ka li laꞈ kʼoeˇ aˬ yuiꞈ aꞈ nyiˇ tiˬ gʼaˬ loꞈ-ehˇ pyeuꞈ laˇ-euˬ meh. Aˬ yawꞈ-aˬ, ngaˬ-euˬ gʼaˇ duˬ gaˇ dahˇ tsoeˬ dui dui-eu meh. Ngaˬ-euˬ gʼaˇ duˬ gaˇ dahˇ tsoeˬ-eu naˆ maˬ tseˇ, nawˬ-euˬ gʼaˇ duˬ zaˬ kʼaˆ tiˬ gʼaˬ loꞈ-ehˇ maˬ ehˇ, Sahˬpaˬ Yeˬsuˇ laꞈ kʼoeˇ aˬ yuiꞈ aꞈ nyiˇ tiˬ gʼaˬ loꞈ-ehˇ maˬ ehˇ, gaˇ dahˇ tsoeˬ dzehˬ tehꞈ-a.

Yawˇshuˆ 24:14

Kʼoeˇ naˇ, Yawˇshuˆ paˇ ehˇ-eu, “Teu miˇ neh nymˬ-mˇ Sahˬpaˬ Miˬyehˇ-ahˇ taˬ huiˬ taˬ mahˇ-awˇ, yaw tsaˬ yaw dawˇ hawˇ-eu saˇ jaˇ ziꞈ-euˬ laꞈ kʼoeˇ aˬ yawꞈ-ahˇ uˬ duˬ tahˬ-awˬ. Maˬsoˬpoˬtaˬmiˇ miˇ kʼahˬ hawˇ-eu Iˇjiˇtuˆ miˇ kʼahˬ laꞈ kʼoeˇ naw maꞈ-euˬ aˬ poeˬ aˬ bawˇ deuˬ uˬ duˬ tahˬ-euˬ miˬ yehˇ kʼoeˇ deuˬ-ahˇ byehˇ dzeh-awˇ, Sahˬpaˬ Miˬyehˇ-ahˇ tehꞈ-ehˇ uˬ duˬ tahˬ-awˬ.

1 Beˬtuˆluˆ 3:2

Naw maꞈ-euˬ nui ma aˇ naˆ ni shawˇ-awˇ kʼaˬ dzeˇ zaˬ-ahˇ yaw zeu aˇ naˆ ni baw-eu gaˇ kawˆ, aˬ yawꞈ maꞈ ya mawˇ tehꞈ-a.