Eˇpeˇsu 4:7 - Akha

⁷ Aˬ dui yawˬ gʼaˬ na luꞈ aˬ cawˬ-ahˇ maˬ duˇ-eu laꞈ sawˬ za taˬ-euˬ ma. Kʼoeˇ-aˬ, yawˬ ha-ahˇ kʼaˇ geuˇ-eu loꞈ-ehˇ Ka li neh biꞈ laꞈ-euˬ meh.

Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

⁷ Kali-euq lafsawq-anr geuxni, aqdui yawqghaq navluf guiqlanq yawdzanr zataq-euq ma.

Eˇpeˇsu 4:7 ပူးပေါင်းရင်းမြစ်များ

Maꞈtehˬ 25:15

Yawˬ gʼaˬ na luꞈ-ahˇ, yawˬ ha-ahˇ kʼaˇ geuˇ-eu myaˆ ni a nehˬ yaꞈ-awˇ bi haw-euˬ meh. Tiˬ gʼaˬ-ahˇ-aˬ, shuiˇ maˇ byaˆ ngaˬ heˇ byaˆ, tiˬ gʼaˬ-ahˇ-aˬ, nyiˬ heˇ byaˆ, tiˬ gʼaˬ-ahˇ-aˬ, tiˬ heˇ byaˆ lehˇ a nehˬ yaꞈ-awˇ, gaˇ ma doˆ-iˇ-euˬ meh.

Yoˇhaˬ 3:34

Miˬyehˇ neh kʼehˇ gʼeh leꞈ-euˬ gʼaˬ-aˬ, Miˬyehˇ-euˬ dawˬ ngehˬ-eu meh. Aˬ jeˬ miˇ neh ehˇ naˇ, aˬ yawꞈ-ahˇ Miˬyehˇ-euˬ Yaw sahˇ tiˬ byah ni biꞈ taˬ-euˬ meh.

Lormav 12:3

Miˬyehˇ neh ngaˬ-ahˇ gʼawˬ shaˬ gaˬ-eu laꞈ kʼoeˇ biꞈ laꞈ-euˬ laꞈ sawˬ baˬ da neh, naw maꞈ yawˬ gʼaˬ na luꞈ-ahˇ ngaˇ heu loꞈ-ehˇ ehˇ-eu ma. Naw maꞈ yawˬ haˇ yawˬ ha aˇ dzehˬ dzeuˇ ni taˬ noeˬ huiˬ. Tsaˬ tsaˬ ni tehꞈ-ehˇ noeˬ-awˬ. Miˬyehˇ neh biꞈ laꞈ-euˬ jah-eu jeˬ aˇ myaˆ ni ahˇ-eu nya lehˇ shaˇ sawˇ-awˇ, yawˬ haˇ yawˬ ha siˬ nya-awˬ.

2 Gawˇliˬtu 6:1

Naw maꞈ neh za taˬ-euˬ Miˬyehˇ-euˬ guiˬ lahˬ yaw dzahˇ kʼoeˇ yawꞈ ngehꞈ-ehˇ maˬ bi pyeuꞈ-iˇ-eu gʼaˇ duˬ, nga maꞈ Miˬyehˇ nehˬ-ehˇ tiˬ kawˆ loꞈ-ehˇ gaˇ mˇ luꞈ-eu laꞈ kʼoeˇ naw maꞈ-ahˇ shaˇ-eu ma.

Eˇpeˇsu 3:2

Miˬyehˇ gʼawˬ shaˬ gaˬ-eu guiˬ lahˬ baˬ da neh naw maꞈ gʼaˇ duˬ muiˬ ni gaˇ heu hmˬ ngaˬ-ahˇ bi mˇ laꞈ-euˬ gaˇ kawˆ, naw maꞈ ya gaˬ duˬ taˬ-euˬ meh.

Eˇpeˇsu 3:8

Miˬyehˇ-euˬ tsawˇ haˬ deuˬ laꞈ kʼoeˇ aˬ cawˬ taꞈ-ehˇ nyiˇ teˬ dzehˬ-eu gʼaˬ ngaˇ ma. Ehˇ kʼawꞈ, maˬ ehˇ jiˇ coeˇ gaˇ keuˆ ni byah dui kuꞈ dui dui-eu Ka li-euˬ guiˬ lahˬ gaˇ kawˆ aˬ cawˬ tsawˇ jeuˬ-ahˇ mehˬ-eu gʼaˬ bi geuꞈ laꞈ-euˬ meh.

HeˬByehˇ 2:4

Miˬyehˇ aˬ yawꞈ kʼawꞈ, aˬ yawꞈ nui ma kʼaˇ tsaˬ-eu loꞈ-ehˇ, zahˬ leˇ paˬ-ehˇ gʼeh-eu jeˬ hawˇ-eu kʼaˆ jeˬ-ehˇ gʼeh-eu gʼawˬ mya jeˬ mˇ-eu uˬ taꞈ, Yaw sahˇ Miˬyehˇ neh biꞈ-euˬ laꞈ sawˬ deuˬ-ahˇ bi za-eu laꞈ kʼoeˇ, aˬ yawꞈ maꞈ nehˬ-ehˇ saˇ kiˇ caw kamˬ luꞈ-eu meh.

1 Beˬtuˆluˆ 4:10

Tiˬ gʼaˬ tiˇ gʼaˬ za taˬ-euˬ Miˬyehˇ neh biꞈ laꞈ-euˬ laꞈ sawˬ deuˬ-ahˇ yaw muiˬ paˬ-ehˇ jeˬ hmˬ-awˇ, aˬ cawˬ gʼaˇ duˬ gaˇ dahˇ tsoeˬ ni zmˬ-awˬ.