Doˆ-iˇ 4:5 - Akha

⁵ “Aˬ yawꞈ maꞈ-euˬ aˬ poeˬ aˬ bawˇ deuˬ-euˬ Miˬyehˇ pyeuꞈ-eu, Aˬbyaˬhaˬ, Iˇtsaˆ hawˇ-eu Yaˬkoˆ-euˬ Sahˬpaˬ Miˬyehˇ nawˬ-euˬ mehˬ shi doˆ le-euˬ gaˇ aˬ yawꞈ maꞈ jah laˇ ni, kʼoeˇ loꞈ-ehˇ jahˇ mehˬ nehˬ-awˬ” lehˇ, Moˇseˬ-ahˇ Sahˬpaˬ Miˬyehˇ ehˇ nehˬ-euˬ meh.

Doˆ-iˇ 4:5 ပူးပေါင်းရင်းမြစ်များ

Aˇ dahˬ 12:7

Kʼoeˇ ngeh, Aˬbyaˬ-euˬ mehˬ shi Sahˬpaˬ Miˬyehˇ doˆ le-awˇ, “Miˇ kʼahˬ heu kʼahˬ-aˬ, nawˬ-euˬ zaˬ nawˬ-euˬ uˆ deuˬ-ahˇ biꞈ-eu gʼaˇ duˬ, ngaˬ neh lehˬ hmˬ taˬ-euˬ miˇ kʼahˬ pyeuꞈ-eu ma” lehˇ ehˇ nehˬ-euˬ meh. Aˬbyaˬ-aˬ, aˬ yawꞈ-euˬ mehˬ shi doˆ le-euˬ Sahˬpaˬ Miˬyehˇ-ahˇ lawˇ nehˬ shehˇ nehˬ-eu gʼaˇ duˬ, kʼoeˇ gaˇ lawˇ duˬ tiˬ tsahˇ tsoˆ-euˬ meh.

Aˇ dahˬ 17:1

Aˬbyaˬ gʼoeˬ tseˇ gʼoeˬ kʼoꞈ kʼawˆ ngeh, aˬ yawꞈ-euˬ mehˬ shi Sahˬpaˬ Miˬyehˇ doˆ le-awˇ, heu loꞈ-ehˇ ehˇ-eu meh. “Ngaˇ-aˬ, yawˬ jeˬ na luꞈ mˇ nya-eu Baoˬ huiˬ-eu Miˬyehˇ ma. Ngaˬ-euˬ ehˇ dawˬ naˇ haˬ-awˇ yaw tsaˬ yaw dawˇ jeˬ mˇ-awˬ.

Aˇ dahˬ 18:1

Muiˬ-eu shawˇ-eu Mamˬliˬ aˇ bawˇ bawˇ yaˇ-ahˇ, Aˬbyaˬhaˬ jawˇ gaˇ Sahˬpaˬ Miˬyehˇ oe-euˬ meh. Nah gʼahˇ paw nahˇ tsaˇ kʼaˆ ngeh yamˬ-ahˇ, sehˬ gʼawˆ gʼoˆ kʼehˬ-ahˇ Aˬbyaˬhaˬ nuiˇ luꞈ-eu meh.

Aˇ dahˬ 26:2

Sahˬpaˬ Miˬyehˇ Iˇtsaˆ jawˇ gaˇ oe-awˇ ehˇ-eu, “Iˇjiˇtuˆ miˇ kʼahˬ-ahˇ taˬ iˇ. Miˇ kʼahˬ heu kʼahˬ laꞈ kʼoeˇ ngaˇ nawˬ-ahˇ kʼaˇ bi jawˇ-eu tsahˇ-ahˇ jawˇ-awˬ.

Aˇ dahˬ 28:13

Sahˬpaˬ Miˬyehˇ aˬ yawꞈ dawˬ peh yawꞈ-awˇ ehˇ-eu, “Ngaˇ-aˬ, Aˬbyaˬhaˬ hawˇ-eu Iˇtsaˆ-euˬ Miˬyehˇ pyeuꞈ-eu Sahˬpaˬ Miˬyehˇ ma. Nawˇ yuꞈ luꞈ-eu miˇ tsaˬ heu tsahˇ, nawˇ hawˇ-eu nawˬ-euˬ zaˬ deuˬ-ahˇ ngaˇ biꞈ ma.

Aˇ dahˬ 48:15

Kʼoeˇ naˇ, Yaˬkoˆ neh Yoˇsehˆ-ahˇ heu loꞈ-ehˇ dawˬ ngehˬ gʼeh nehˬ-euˬ meh. “Ngaˬ bawˇ Aˬbyaˬhaˬ hawˇ-eu ngaˬ da Iˇtsaˆ uˬ duˬ tahˬ-euˬ Miˬyehˇ, aˬ li heu nyiˬ li-ahˇ guiˬ lahˬ biꞈ luꞈ-uˇ. Iˬ nah keuˆ ni ngaˬ-ahˇ sheuˬ gʼeh luꞈ-eu Miˬyehˇ, aˬ yawꞈ nyaꞈ-ahˇ dawˬ ngehˬ gʼeh nehˬ luꞈ-uˇ.

Aˇ dahˬ 48:3

Kʼoeˇ ngeh, Yoˇsehˆ-ahˇ Yaˬkoˆ ehˇ nehˬ-eu, “Kaˬnaˬ miˇ kʼahˬ laꞈ kʼoeˇ jaˆ-eu Luˇzaˆ meuˬ-ahˇ, Baoˬ huiˬ-eu Miˬyehˇ ngaˬ-euˬ mehˬ shi doˆ le-awˇ, ngaˬ-ahˇ guiˬ lahˬ biꞈ nehˬ laꞈ-euˬ meh.

1 Sahˬpaˬ 18:36

Nahˇ ma nahˇ dahˬ yawˬ-iˇ-awˇ, lawˇ-eu shehˇ-eu jeˬ mˇ-eu aˇ yamˬ tsaˬ laˇ ngeh, Miˬyehˇ gʼaˇ duˬ ngehˬ dah-eu Eˇliˇyaˆ gʼaˬ lawˇ duˬ dawˬ peh le-awˇ, heu loꞈ-ehˇ guiˬ lahˬ shaˇ-euˬ meh. “Aˬbyaˬhaˬ, Iˇtsaˆ hawˇ-eu Yaˬkoˆ-euˬ Miˬyehˇ pyeuꞈ-eu Sahˬpaˬ Miˬyehˇ-oˇ, nawˇ-aˬ, Iˇsaˬleˬlaˆ-euˬ Miˬyehˇ pyeuꞈ-awˇ, ngaˇ nawˬ-ahˇ uˬ duˬ tahˬ-awˇ, nawˬ neh kʼaˇ bi mˇ-euˬ loꞈ-ehˇ nymˬ-mˇ ngaˇ mˇ luꞈ-eu gaˇ kawˆ bi siˬ bi mawˇ-awˬ.

2 Laˬsaˬbaˬ 20:20

Yawˬ nah yawˬ uˬ shawˬ yaw naꞈ-ehˇ, Teˬkawˬ meuˬ dawˬ peh jaˆ-eu bawˇ tsahˬ bawˇ dahˇ-ahˇ aˬ yawꞈ maꞈ iˇ-euˬ meh. Aˬ yawꞈ maꞈ doˆ-iˇ ngeh, aˬ yawꞈ maꞈ-ahˇ Yeˬhawˇshaˬpaˇ heu loꞈ-ehˇ ehˇ nehˬ-euˬ meh. “Yuˇdaˆ miˇ kʼahˬ hawˇ-eu Yeˬluˇsaˬlehˬ meuˬ-ahˇ jawˇ-eu tsawˇ haˬ deuˬ-oˇ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ naw maꞈ gʼoe-awˇ, nui ma ziꞈ dah ni taˬ-awˬ. Aˬ yawꞈ-euˬ gʼaˇ duˬ ngehˬ dah-eu gʼaˬ neh ehˇ-euˬ dawˬ-ahˇ naw maꞈ jah-awˬ. Kʼoeˇ loꞈ-ehˇ jah naˇ, naw maꞈ gʼaˬ leˇ tehꞈ-a.”

Doˆ-iˇ 19:9

Moˇseˬ-ahˇ Sahˬpaˬ Miˬyehˇ ehˇ nehˬ-eu, “Ngaˇ nawˬ-ahˇ dawˬ ngehˬ cawˬ gaˇ tsawˇ haˬ heu deuˬ ya gaˬ-awˇ, aˬ kaˇ naˇ, aˬ yawꞈ maꞈ nawˬ-ahˇ jah laˇ ni, zahˇ tsui ni gʼeh-eu mˬ dmˇ laꞈ kʼoeˇ nawˇ jawˇ gaˇ ngaˇ oe ma.” Tsawˇ haˬ kʼoeˇ deuˬ neh ehˇ-euˬ dawˬ kʼoeˇ dawˬ, Sahˬpaˬ Miˬyehˇ-ahˇ Moˇseˬ tsaꞈ nehˬ leˇ-euˬ meh.

Doˆ-iˇ 3:15

Aˬ yawꞈ maꞈ-euˬ aˬ poeˬ aˬ bawˇ deuˬ-euˬ Sahˬpaˬ Miˬyehˇ pyeuꞈ-eu, Aˬbyaˬhaˬ, Iˇtsaˆ hawˇ-eu Yaˬkoˆ-euˬ Miˬyehˇ neh, nawˬ-ahˇ aˬ yawꞈ maꞈ jawˇ gaˇ bi oe-euˬ meh lehˇ, Iˇsaˬleˬlaˆ tsawˇ haˬ deuˬ-ahˇ ehˇ nehˬ-awˬ. Heu-aˬ, mˬ maˬ maˬ byaˆ zaˇ ziˇ ziꞈ-eu ngaˬ-euˬ tsawˇ myahˇ pyeuꞈ-eu ma. Tiˬ ziˇ saˇ-iˬ tiˬ ziˇ, ngaˬ-euˬ tsawˇ myahˇ-ahˇ heu loꞈ-ehˇ ya kuˇ tehꞈ-a.

Doˆ-iˇ 3:16

Iˇ-awˬ. Iˇsaˬleˬlaˆ tsawˇ haˬ aˬ yuiꞈ aˬ tsu deuˬ kuˇ uiˬ-awˇ, aˬ yawꞈ maꞈ-euˬ aˬ poeˬ aˬ bawˇ deuˬ-euˬ Sahˬpaˬ Miˬyehˇ pyeuꞈ-awˇ, Aˬbyaˬhaˬ, Iˇtsaˆ hawˇ-eu Yaˬkoˆ-euˬ Miˬyehˇ pyeuꞈ-eu ngaˇ gʼaˬ, nawˬ-euˬ mehˬ shi doˆ le-euˬ meh lehˇ ehˇ nehˬ-awˬ. Aˬ yawꞈ maꞈ jawˇ gaˇ ngaˇ oe-awˇ, Iˇjiˇtuˆ tsawˇ haˬ deuˬ aˬ yawꞈ maꞈ-ahˇ aˬ joˆ-ehˇ kʼehˬ nehˬ-euˬ gaˇ kawˆ, ngaˇ ya mawˇ gʼaˬ-euˬ meh lehˇ ehˇ nehˬ-awˬ.

Doˆ-iˇ 3:18

“Nawˬ neh kʼaˇ ehˇ-euˬ jeˬ-ahˇ, ngaˬ-euˬ tsawˇ haˬ deuˬ naˇ haˬ tehꞈ-a. Kʼoeˇ naˇ, Iˇsaˬleˬlaˆ tsawˇ haˬ aˬ yuiꞈ aˬ tsu deuˬ nehˬ-ehˇ, Iˇjiˇtuˆ sahˬ paˬ jawˇ gaˇ nawˇ iˇ-awˇ, heu loꞈ-ehˇ ehˇ nehˬ-iˇ-awˬ. ‘Heˬbyehˇ tsawˇ haˬ deuˬ-euˬ Sahˬpaˬ Miˬyehˇ nga maꞈ-ahˇ pah mehˬ le-euˬ meh. Bawˇ tsahˬ bawˇ dahˇ-ahˇ nga maꞈ iˇ-awˇ, nga maꞈ-euˬ Sahˬpaˬ Miˬyehˇ-ahˇ lawˇ-eu shehˇ-eu gʼaˇ duˬ, nga maꞈ-ahˇ aˇ yamˬ smˬ nah biꞈ nehˬ laꞈ’ lehˇ ehˇ nehˬ-awˬ.

Doˆ-iˇ 3:4

Moˇseˬ dawˬ peh laˇ peh luꞈ gaˇ Sahˬpaˬ Miˬyehˇ ya mawˇ ngeh, baw duˆ kʼoeˇ duˆ-euˬ gʼahˇ ceh jawˇ-awˇ, “Moˇseˬ-oˇ, Moˇseˬ-oˇ” lehˇ kuˇ-euˬ meh. Moˇseˬ gʼeh, “Ngaˇ heu gaˇ jawˇ ma” lehˇ oˬ toˬ kʼoꞈ nehˬ-euˬ meh.

Doˆ-iˇ 3:6

Ngaˇ-aˬ, nawˬ-euˬ aˬ poeˬ aˬ bawˇ deuˬ-euˬ Miˬyehˇ pyeuꞈ-awˇ Aˬbyaˬhaˬ, Iˇtsaˆ hawˇ-eu Yaˬkoˆ-euˬ Miˬyehˇ ma” lehˇ ehˇ nehˬ-euˬ meh. Moˇseˬ Miˬyehˇ-ahˇ maˬ haw peuˬ-eu miˇ neh, yawˬ ha-euˬ myaˆ pyawˬ-ahˇ dehˬ kaˬ taˬ-euˬ meh.

Doˆ-iˇ 4:1

Kʼoeˇ naˇ, Sahˬpaˬ Miˬyehˇ-ahˇ Moˇseˬ ehˇ nehˬ-eu, “Ehˇ kʼawꞈ, Iˇsaˬleˬlaˆ tsawˇ haˬ deuˬ ngaˬ-ahˇ maˬ jah-ehˇ, ngaˬ-euˬ ehˇ dawˬ maˬ naˇ haˬ ni, ‘Nawˬ-euˬ mehˬ shi Sahˬpaˬ Miˬyehˇ doˆ le--euˬ maˬ ngeuˇ-aˇ’ lehˇ ehˇ laˇ naˇ, ngaˇ aˬ joˆ-ehˇ ya jahˇ nmˇ.”

Doˆ-iˇ 4:31

Kʼoeˇ ngeh, tsawˇ haˬ kʼoeˇ deuˬ jah laˇ-awˇ, Iˇsaˬleˬlaˆ tsawˇ haˬ deuˬ jawˇ gaˇ Sahˬpaˬ Miˬyehˇ oe-awˇ, aˬ yawꞈ maꞈ ya daˬ luꞈ-eu jeˬ-ahˇ mawˇ gʼaˬ-euˬ gaˇ kawˆ ya gaˬ ngeh, aˬ yawꞈ maꞈ miˇ tsaˬ-ahˇ awˆ byaˆ-awˇ, Sahˬpaˬ Miˬyehˇ-ahˇ uˬ duˬ tahˬ-euˬ meh.

Doˆ-iˇ 4:4

Kʼoeˇ ngeh, “Awˆ kʼoꞈ-awˇ aˇ lawˇ-euˬ dawˬ miˬ-ahˇ nyehꞈ-awˬ” lehˇ, Moˇseˬ-ahˇ Sahˬpaˬ Miˬyehˇ ehˇ nehˬ-euˬ meh. Moˇseˬ awˆ kʼoꞈ-awˇ, aˇ lawˇ kʼoeˇ mawˇ-euˬ dawˬ miˬ-ahˇ nyehꞈ ngeh, gawˬ yoeˬ paˇ pyeuꞈ-iˇ-euˬ meh.

Iˇsaˬyaˇ 7:9

Iˇsaˬleˬlaˆ miˇ kʼahˬ kʼawꞈ, aˬ yawꞈ maꞈ-euˬ meuˬ meuˬ ma pyeuꞈ-eu Saˬmaˬliˆ meuˬ taꞈ-ehˇ maˬ paˇ kʼaˆ dzehˬ-ehˇ, Saˬmaˬliˆ meuˬ kʼawꞈ sahˬ paˬ Peˬkah aˬ yawꞈ-euˬ mawˇ do taꞈ-ehˇ maˬ paˇ kʼaˆ dzehˬ nya-aˇ. “Nawˇ jah-eu nui ma maˬ ziꞈ naˇ, aˇ yamˬ gʼawˬ myahˇ ni maˬ gmˬ-aˇ”

Yeˬlaˬmiˇ 31:3

Gaˇ mahˇ kaˬ-eu jawˇ duˬ-ahˇ neh Sahˬpaˬ Miˬyehˇ oe-awˇ, nga maꞈ-ahˇ heu loꞈ-ehˇ ehˇ le-euˬ meh. “Mˬ maˬ maˬ byaˆ zaˇ ziˇ ziꞈ-eu gʼoeˇ-eu gaˬ-eu jeˬ neh, naw maꞈ-ahˇ ngaˇ gaˬ-awˇ, naw maꞈ-ahˇ gʼawˬ shaˬ gaˬ-eu jeˬ laꞈ kʼoeˇ, iˬ nah keuˆ ni ngaˇ saˇ jaˇ ziꞈ luꞈ ma.

Yoˇhaˬ 11:15

Ngaˇ Laˬzaˬluˇ nehˬ-ehˇ maˬ jawˇ zaˬ-euˬ miˇ neh, naw maꞈ gʼaˇ duˬ laˬ kʼaˬ cehˇ miˇ-a. Aˬ jeˬ miˇ neh ehˇ naˇ, gaˇ kawˆ heu hmˬ baˬ da neh naw maꞈ ngaˬ-ahˇ jah laˇ tehꞈ-a. Aˬ dui maꞈ aˬ yawꞈ jawˇ gaˇ iˇ kaˇ-euˇ.”

Yoˇhaˬ 11:42

Nawˇ ngaˬ-euˬ shaˇ dawˬ-ahˇ aˬ myah luꞈ naˇ haˬ nehˬ laꞈ meh lehˇ ngaˇ siˬ nya ma. Ehˇ kʼawꞈ, ngaˇ shaˇ-eu heu-aˬ, heu gaˇ jawˇ-eu tsawˇ haˬ deuˬ gʼaˇ duˬ ma. Ngaˬ-ahˇ nawˬ neh kʼehˇ gʼeh leꞈ-euˬ meh lehˇ aˬ yawꞈ maꞈ jah laˇ ni shaˇ-eu ma.”

Yoˇhaˬ 20:27

Kʼoeˇ ngeh, Toˇmaˆ-ahˇ aˬ yawꞈ ehˇ nehˬ-eu, “Nawˬ-euˬ laꞈ noeˇ neh toeˬ haw-awˇ ngaˬ-euˬ aˬ laꞈ-ahˇ haw duˬ laˇ sheˇ. Kʼoeˇ naˇ, nawˬ-euˬ aˬ laꞈ cawˬ ja-awˇ, ngaˬ-euˬ byaˇ gʼaˇ-ahˇ sawˆ haw-awˇ, poˆ poˆ laˆ laˆ-ehˇ maˬ paˇ noeˬ ni jah-awˬ.”

Yoˇhaˬ 20:31

Ehˇ kʼawꞈ, heu gaˇ kʼaˇ boꞈ taˬ-euˬ heu deuˬ-aˬ, Yeˬsuˇ-aˬ Meˬsiˇya hawˇ-eu Miˬyehˇ-euˬ Zaˬmaˇ pyeuꞈ-eu naw maꞈ jah laˇ ni maˬ ehˇ, naw maꞈ aˬ yawꞈ-ahˇ jah-eu laꞈ kʼoeˇ dehꞈ-eu jeˬ za nya ni maˬ ehˇ, boꞈ taˬ-euˬ jeˬ pyeuꞈ-eu ma.

Yoˇhaˬ 5:36

Ehˇ kʼawꞈ, Yoˇhaˬ neh saˇ kiˇ kamˬ-euˬ naˆ maˬ tseˇ huiˬ dzehˬ-eu ngaˬ-euˬ gaˇ kawˆ saˇ kiˇ kamˬ taˬ-euˬ jaˆ ma. Ngaˬ Da neh ngaˬ-ahˇ bi mˇ laꞈ-euˬ ngaˬ neh mˇ-euˬ gaˇ kʼoeˇ deuˬ ngaˬ-euˬ dah zaˇ dawˬ ngehˬ gaˇ duˇ ni, Aˬda neh ngaˬ-ahˇ kʼehˇ gʼeh leꞈ-euˬ meh lehˇ saˇ kiˇ kamˬ-eu jeˬ pyeuꞈ-eu meh.

Gʼaˬkʼehˇ 7:2

Saˬteˬpaˬ ehˇ-eu, “Aˬ yuiꞈ aˬ nyiˇ aˬ da aˬ ma deuˬ-oˇ, ngaˇ ehˇ gaˇ naˇ haˬ sheˇ. Aˬ dui-euˬ aˬ da yaw dzahˇ Aˬbyaˬhaˬ Haˬlaˬ meuˬ-ahˇ maˬ jawˇ-iˇ mi naˆ-ehˇ, Maˬsoˬpaˬtaˬmiˇ miˇ kʼahˬ laꞈ kʼoeˇ yaw shehꞈ kʼahˬ sehˇ huiˬ-eu Miˬyehˇ aˬ yawꞈ-euˬ mehˬ shi doˆ le-awˇ,

HeˬByehˇ 11:16

Kʼoeˇ naˆ maˬ tseˇ muiˬ dzehˬ-eu mˬ taˆ miˇ kʼahˬ-ahˇ aˬ yawꞈ maꞈ noeˬ tsoˆ taˬ-euˬ meh. Kʼoeˇ miˇ neh, tsawˇ haˬ kʼoeˇ deuˬ Miˬyehˇ-ahˇ aˬ yawꞈ maꞈ-euˬ Miˬyehˇ ma lehˇ kuˇ gaˇ Miˬyehˇ maˬ shaꞈ dawˇ-a. Aˬ jeˬ miˇ neh ehˇ naˇ, aˬ yawꞈ maꞈ gʼaˇ duˬ meuˬ tiˬ meuˬ aˬ yawꞈ lehˬ hmˬ taˬ-euˬ meh.