Doˆ-iˇ 25:20 - Akha

²⁰ Jeˬluˇbeˬ aˇ baˇ kʼoeˇ nyiˬ hmˬ, tiˬ hmˬ tiˇ hmˬ mehˬ shi bi pyawˇ-awˇ, aˬ dahˇ cawˬ ja-awˇ, bahˬ keuˆ kʼawˬ pymˬ-ahˇ bi dehˬ kaˬ taˬ-awˬ.

Doˆ-iˇ 25:20 ပူးပေါင်းရင်းမြစ်များ

Aˇ dahˬ 28:12

Yuꞈ maˆ maˆ-eu laꞈ kʼoeˇ, mˬ hawˇ-eu miˇ-ahˇ tsoꞈ tawꞈ taˬ-euˬ dawˬ dzm dzm ma tiˬ dzm-ahˇ aˬ yawꞈ ya mawˇ-euˬ meh. Mˬ taˆ gʼaˬ kʼehˇ deuˬ dawˬ dzm kʼoeˇ dzm kʼoeˇ taˆ, mˬ hawˇ-eu miˇ yaw kaˬ-ahˇ yaˇ gaˇ gaˇ tawꞈ luꞈ-eu meh.

1 Sahˬpaˬ 6:23

Nyiˬ lmˇ nui paˆ goˇ-eu jeˬ luˇ beˬ mawˇ kawˇ nyiˬ kawˇ-ahˇ, saˬ loˬ daˇ kawˬ neh pyaꞈ-awˇ, Muiˬ dui shawˇ dui dui-eu jawˇ duˬ-ahˇ bi jaˆ-euˬ meh.

1 Sahˬpaˬ 6:27

Mawˇ kawˇ kʼoeˇ nyiˬ kawˇ-ahˇ, Muiˬ dui shawˇ dui dui-eu jawˇ duˬ laꞈ kʼoeˇ tiˬ paw tiˬ kawˇ bi jaˆ-euˬ meh. Mawˇ kawˇ tiˬ kawˇ-euˬ aˬ dahˇ mehˬ dzaˬ tiˬ paw dzaˬ-aˬ, yawˬ kawˇ yawˬ-euˬ aˬ dahˇ mehˬ dzaˬ-ahˇ tuˆ-awˇ, aˬ dahˇ mehˬ dzaˬ yawˬ dzaˬ yawˬ kaˇ pyawˇ-ahˇ tuˆ ni bi jaˆ-euˬ meh. Kʼoeˇ miˇ neh, aˬ dahˇ mehˬ dzaˬ nyiˬ dzaˬ tiˬ gaˇ tuˆ-awˇ, aˬ dahˇ mehˬ dzaˬ nyiˬ dzaˬ-aˬ, kaˇ pyawˇ nyiˬ pyawˬ-ahˇ tuˆ-eu meh.

1 Sahˬpaˬ 8:7

Cawˬ ja taˬ-euˬ Jeˬ luˇ beˬ-euˬ aˬ dahˇ kʼoeˇ, bahˬ keuˆ kʼoeˇ hawˇ-eu bahˬ keuˆ-euˬ baꞈ kawˬ-ahˇ joe shmˇ taˬ-euˬ meh.

1 Laˬsaˬbaˬ 28:18

yaw saw jeˬ doꞈ damˬ-eu lawˇ duˬ jahˇ gaˇ hawˇ-eu, Sahˬpaˬ Miˬyehˇ-euˬ Dawˬ ma saˇ jaˇ Bahˬ keuˆ kʼoeˇ taˆ aˬ dahˇ cawˬ ja taˬ-euˬ jeˬluˇbeˬ mawˇ kawˇ gʼaˇ duˬ laˆ lawˬ jahˇ gaˇ, maˇ jawˆ ni gʼeh-eu shuiˇ aˇ myaˆ ni ya zmˬ-eu maˬ ehˇ, aˬ yawꞈ mehˬ duˬ nehˬ-euˬ meh.

2 Laˬsaˬbaˬ 3:10

Jeˬluˇbeˬ mawˇ kawˇ bi tehˆ-awˇ, shuiˇ yaw-awˇ, muiˬ dui shawˇ dui dui-eu lawˆ-ahˇ bi jaˆ-euˬ meh.

Doˆ-iˇ 25:18

Shuiˇ yuˇ-awˇ, Jeˬluˇbeˬ mawˇ kawˇ nyiˬ hmˬ jahˇ-awˬ.

Doˆ-iˇ 25:19

Bahˬ keuˆ kʼawˬ pymˬ-euˬ tiˬ paw dzeˇ dzaˬ-ahˇ tiˬ hmˬ jahˇ tsoꞈ-awˬ.

Yeˬsaˬgeˬlaˇ 1:20

Jeˬluˇbeˬ kʼoeˇ deuˬ kʼaˇ iˇ mawꞈ-eu paw iˇ-awˇ, aˇ beuˆ kʼoeˇ deuˬ kʼawꞈ aˬ yawꞈ maꞈ kʼaˇ iˇ-eu paw iˇ-eu meh. Aˬ jeˬ miˇ neh ehˇ naˇ, Jeˬluˇbeˬ kʼoeˇ deuˬ-euˬ nui ma aˇ beuˆ kʼoeˇ deuˬ-ahˇ uˆ lahˇ-eu meh.

Yeˬsaˬgeˬlaˇ 28:14

Jeˬluˇbeˬ nawˬ-ahˇ loꞈ piˇ-awˇ, Miˬyehˇ-euˬ shawˇ-eu gawˬ jawˬ-ahˇ, nawˬ-ahˇ bi jawˇ-euˬ meh. Yaw shehꞈ bya-eu sehˇ deuˬ gʼahˇ ceh, nawˇ cah cah-ehˇ ya jawˇ-euˬ meh.

Maꞈtehˬ 24:31

Daˇ heh baw-eu teˇ saˇ yaw kʼaˆ-ehˇ mahˇ doˆ laˇ-awˇ, aˬ yawꞈ-euˬ mˬ taˆ gʼaˬ kʼehˇ deuˬ-ahˇ miˇ ma oeˬ coeˇ oeˬ pyawˬ-ahˇ aˬ yawꞈ pyehˬ gʼeh-awˇ, mˬ dzeˇ miˇ dzeˇ heu coeˇ kʼoeˇ coeˇ doˆ ni jawˇ luꞈ-eu aˬ yawꞈ neh tseˇ doˆ-euˬ tsawˇ haˬ deuˬ bi sheuˬ uiˬ laꞈ tehꞈ-a.

Yoˇhaˬ 1:51

Kʼoeˇ naˇ, aˬ ha maꞈ-ahˇ aˬ yawꞈ ehˇ nehˬ-eu, “Ngaˇ naw maꞈ-ahˇ maˇ jawˆ ni ehˇ nehˬ nyaˇ. Mˬ pah le-awˇ, Miˬyehˇ-euˬ mˬ taˆ gʼaˬ kʼehˇ deuˬ Tsawˇ haˬ-euˬ Zaˬ maˇ kʼoeˇ taˆ tsawˬ toeˬ tsawˬ daˆ-ehˇ yaˇ gaˇ gaˇ tawꞈ le gaˇ naw maꞈ ya mawˇ tehꞈ-a.”

1 Gawˇliˬtu 11:10

Zaˬ miˬ zaˬ deuˬ mˬ taˆ gʼaˬ kʼehˇ baˬ da neh yawˬ ha-euˬ kʼaˬ dzeˇ zaˬ uˆ lahˇ-eu uˬ moˆ jawˇ luꞈ-eu gaˇ kawˆ bya cehˆ ni bi siˬ bi mawˇ-eu gʼaˇ duˬ, uˬ boeˬ boeˬ-eu tsaˬ meh.

1 Gawˇliˬtu 4:9

Mˬ taˆ gʼaˬ kʼehˇ dawˬ tawˆ luꞈ hawˇ-eu miˇ tsaˬ zaˬ dawˬ tawˆ luꞈ bi haw niˇ gʼa-eu gʼaˇ duˬ, Miˬyehˇ-euˬ gʼaˬ kʼehˇ pyeuꞈ-eu nga maꞈ-ahˇ miˇ kʼahˬ zaˬ mehˬ shi bi sehꞈ-eu lehˇ, Miˬyehˇ neh aˬ cawˬ jeˬ nah nah saˬ bi jawˇ laꞈ-euˬ jeˬ nga lehˇ noeˬ miˇ-a.

Eˇpeˇsu 3:10

Kʼoeˇ loꞈ-ehˇ dehˬ kaˬ taˬ-euˬ kʼoeˇ-aˬ, nymˬ-mˇ-euˬ aˇ yamˬ-ahˇ Ka li zaˬ aˇ muˇ-ahˇ gʼoe-eu laꞈ kʼoeˇ, mˬ kʼoeˇ taˆ uˆ lahˇ luꞈ-eu mˬ taˆ gʼaˬ kʼehˇ deuˬ hawˇ-eu baoˬ jaˆ-eu deuˬ-ahˇ Miˬyehˇ-euˬ zaˬ siˬ tsawˇ gahˇ gʼawˬ mya jeˬ bi siˬ bi mawˇ-eu gʼaˇ duˬ pyeuꞈ-eu meh.

Gawˇlawˇsehˇ 2:10

Naw maꞈ-ahˇ aˬ yawꞈ laꞈ kʼoeˇ tiˬ byah tiˬ loꞈ ya jawˇ-eu jeˬ biꞈ taˬ-euˬ meh. Mˬ hawˇ-eu miˇ yaw kaˬ-ahˇ uˆ lahˇ-eu yaw sahˇ deuˬ hawˇ-eu baoˬ deuˬ kʼoeˇ taˆ aˬ yawꞈ huiˬ dzehˬ-eu meh.

HeˬByehˇ 1:14

Toˆ-ehˇ ngeuˇ naˇ, mˬ taˆ gʼaˬ kʼehˇ deuˬ aˬ jeˬ-a. Aˬ yawꞈ maꞈ-aˬ, ka kʼoꞈ-eu jeˬ za-eu tsawˇ haˬ deuˬ-ahˇ bi caw ba-eu gʼaˇ duˬ Miˬyehˇ neh kʼehˇ gʼeh leꞈ-euˬ, aˬ yawꞈ-euˬ gaˇ mˇ-eu yaw sahˇ deuˬ pyeuꞈ-eu meh.

HeˬByehˇ 9:5

Dawˬ ma saˇ jaˇ Bahˬ keuˆ kʼoeˇ taˆ, Jeˬluˇbeˬ mawˇ kawˇ bi jaˆ-euˬ meh. Jeˬluˇbeˬ mawˇ kawˇ-euˬ aˬ dahˇ kʼoeˇ, iˬ baˇ pyehˬ nehˬ-eu jawˇ duˬ kʼoeˇ taˆ aˬ dahˇ cawˬ ja taˬ-euˬ meh. Ehˇ kʼawꞈ, jawˇ duˬ heu tsahˇ aˬ joˆ-ehˇ gʼeh-eu jawˇ duˬ pyeuꞈ-eu gaˇ kawˆ nymˬ-mˇ yaw duˬ duˬ-ehˇ maˬ dzawˇ duˬ nya-a siˬ.

1 Beˬtuˆluˆ 1:12

Aˇ hu Miˬyehˇ gʼaˇ duˬ ngeh dah-eu kʼoeˇ deuˬ neh mˇ-euˬ gaˇ-aˬ, aˬ yawꞈ maꞈ-euˬ gʼaˇ duˬ maˬ ngeuˇ-ehˇ, naw maꞈ-euˬ gʼaˇ duˬ pyeuꞈ-eu gaˇ kawˆ aˬ yawꞈ maꞈ-ahˇ Miˬyehˇ pah mehˬ nehˬ-euˬ meh. Aˇ hu aˬ yawꞈ maꞈ neh ngehˬ dah-euˬ gaˇ kawˆ kʼoeˇ deuˬ-aˬ, nymˬ-mˇ mˬ kʼoeˇ taˆ neh bi oe-euˬ Muiˬ-eu Shawˇ-eu Yaw sahˇ Miˬyehˇ-euˬ baoˬ-ahˇ gʼoe-awˇ Laˬ kʼaˬ cehˇ-eu Guiˬ lahˬ dawˬ mehˬ-eu deuˬ mehˬ luꞈ-eu, naw maꞈ ya gaˬ luꞈ-eu gaˇ kawˆ heu deuˬ meh. Gaˇ kawˆ heu-aˬ, mˬ taˆ gʼaˬ kʼehˇ deuˬ-ahˇ keuˆ ni siˬ mawꞈ dui dui-eu gaˇ kawˆ meh.

1 Beˬtuˆluˆ 3:22

Gʼoꞈ dehꞈ laˇ-euˬ Ka li-aˬ, mˬ kʼoeˇ taˆ daˆ gʼoꞈ leˇ-awˇ Miˬyehˇ-euˬ aˇ maˇ paw nuiˇ-eu laꞈ kʼoeˇ, mˬ taˆ gʼaˬ kʼehˇ dawˬ tawˆ luꞈ kʼoeˇ taˆ maˬ ehˇ, mˬ taˆ-euˬ sahˬ paˬ sahˬ ma deuˬ hawˇ-eu baoˬ ahˇ-eu deuˬ dawˬ tawˆ luꞈ kʼoeˇ taˆ maˬ ehˇ, uˆ lahˇ luꞈ-eu meh.