Doˆ-iˇ 1:17 - Akha

¹⁷ Ehˇ kʼawꞈ, zaˬ miˬ zaˬ kʼoeˇ nyiˬ gʼaˬ Miˬyehˇ-ahˇ guˆ-eu miˇ neh, sahˬ paˬ neh ehˇ taˬ-euˬ loꞈ-ehˇ maˬ mˇ-ehˇ, dehꞈ le-euˬ aˬ li deuˬ-ahˇ maˬ laˆ sehꞈ ni bi jawˇ-euˬ meh.

Doˆ-iˇ 1:17 ပူးပေါင်းရင်းမြစ်များ

Aˇ dahˬ 20:11

Aˬbyaˬhaˬ ehˇ-eu, “Heu gaˇ jawˇ-eu tsawˇ haˬ tiˬ gʼaˬ-iˬ Miˬyehˇ-ahˇ maˬ guˆ-eu miˇ neh, aˬ cawˬ ngaˬ-ahˇ sehꞈ-awˇ ngaˬ-euˬ miˬ zaˬ-ahˇ sheuˬ geuꞈ-eu baw le lehˇ ngaˇ noeˬ-euˬ ma.

Aˇ dahˬ 42:18

Smˬ nah byah laˇ ngeh, aˬ ha mehˇ nmˇ-ahˇ Yoˇsehˆ heu loꞈ-ehˇ ehˇ nehˬ-euˬ meh. “Ngaˇ-aˬ, Miˬyehˇ-ahˇ guˆ-eu tsawˇ haˬ ma. Teu miˇ neh, ngaˬ neh kʼaˇ ehˇ-euˬ loꞈ-ehˇ naw maꞈ jahˇ naˇ, shiˇ gaˇ maˬ keuˆ ni bi dzeuˇ-iˇ ma.

2 Saˬmeuˬlaˆ 24:4

Ehˇ kʼawꞈ, Yoˇbaˬ hawˇ-eu aˬ yawꞈ-euˬ gaˇ mˇ-eu yaw huiˬ yaw mahˇ deuˬ aˬ yawꞈ-euˬ ehˇ dawˬ maˬ naˇ haˬ kʼoeˇ keuˆ ni, sahˬ paˬ Daˬbiˇ maˬ juˬ-a. Kʼoeˇ miˇ neh, aˬ yawꞈ maꞈ aˬ yawꞈ jawˇ gaˇ neh doˆ-iˇ-awˇ, Iˇsaˬleˬlaˆ tsawˇ jeuˬ-euˬ tsawˇ seˬ gʼoˆ-iˇ-euˬ meh.

Neˬhaˬmiˇ 5:15

Ngaˬ-euˬ mehˬ hu Yuˇdaˆ miˇ kʼahˬ-ahˇ uˆ lahˇ-eu gaˇ mˇ yaꞈ-euˬ deuˬ-aˬ, miˇ kʼahˬ zaˬ deuˬ-ahˇ kʼaˆ behˆ yaw kah ciˬ pi-awˇ, tiˬ nah dzaˬ-eu dzaˬ dzaˬ dawˇ dawˇ, aˬ gaꞈ dzaˇ uiˇ hawˇ-eu pyuˇ maˇ byaˆ oeˬ tseˇ byaˆ taꞈ-euˬ meh. Aˬ yawꞈ maꞈ-euˬ zaˬ kʼaˆ deuˬ kʼawꞈ miˇ kʼahˬ zaˬ kʼoeˇ taˆ kʼaˆ dzaˬ-euˬ meh. Ehˇ kʼawꞈ, ngaˇ-aˬ, Miˬyehˇ-ahˇ guˆ-eu miˇ neh kʼoeˇ loꞈ-ehˇ maˬ jahˇ-aˬ.

Iˇsaˬtaˆ 3:3

“Aˬ jeˬ miˇ neh sahˬ paˬ-euˬ dawˬ-ahˇ maˬ naˇ haˬ te” lehˇ, sahˬ paˬ-euˬ gaˇ mˇ-eu yaw huiˬ yaw mahˇ kʼoeˇ deuˬ aˬ yawꞈ-ahˇ ehˇ-eu meh.

Jaceuq 31:19

Nawˬ-ahˇzeu-eu deuˬ-euˬkʼoeˇtaˆ, nawˬneh biꞈ-euˬguiˬlahˬkʼoeˇdeuˬ, aˇnaˆni byah-eu kuꞈ-eu nga. Nawˬ-ahˇgʼoe-eu tsawˇ haˬdeuˬ-ahˇ, nawˇaˇnaˆni muiˬ-eu gaˇkawˆ, miˇtsaˬzaˬdeuˬmawˇjiˇluꞈmeh.

Doˆ-iˇ 1:18

Kʼoeˇ ngeh, zaˬ miˬ zaˬ kʼoeˇ nyiˬ gʼaˬ-ahˇ bi kuˇ laˬ-iˇ-awˇ, “Naw nyaꞈ aˬ jeˬ miˇ neh kʼoeˇ loꞈ-ehˇ mˇ teˬ. Aˬ jeˬ miˇ neh aˬ li deuˬ-ahˇ maˬ laˆ sehꞈ ni bi dehꞈ teˬ” lehˇ naˇ haˬ-euˬ meh.

Doˆ-iˇ 1:21

Zaˬ miˬ zaˬ kʼoeˇ nyiˬ gʼaˬ Miˬyehˇ-ahˇ yaw zeu baw-eu miˇ neh, aˬ yawꞈ nyaꞈ-ahˇ kʼawꞈ zaˬ gʼawˬ mya ni Miˬyehˇ bi jawˇ le-euˬ meh.

Dawqdaq 16:6

Saˇ jaˇ ziꞈ-eu jeˬ baˬ da neh iˬ baˇ pyehˬ nehˬ-eu guiˬ lahˬ za-awˇ, Sahˬpaˬ Miˬyehˇ-ahˇ guˆ-eu jeˬ baˬ da neh, iˬ baˇ-ahˇ gaˇ jaw jaw nya-eu meh.

Dawqdaq 8:13

Sahˬpaˬ Miˬyehˇ taˬ huiˬ taˬ mahˇ-eu jeˬ-aˬ, yaw haiˬ jeˬ-ahˇ bye-eu gaˇ kawˆ meh. Nui ma huiˬ-eu mahˇ-eu jeˬ hawˇ-eu jahˇ gʼeh-eu jeˬ-ahˇ ngaˇ muiˇ-awˇ, yaw haiˬ jeˬ hawˇ-eu maˬ tsaˬ maˬ dawˇ-eu dawˬ-ahˇ ngaˇ bye-eu ma.

Dawˬ tsoˆ 12:13

Dawˬ tawˆ luꞈ kʼoeˇ taˆ uˬ duˬ duˬ leˇ-eu, ehˇ paˬ-ehˇ gʼeh-eu tiˬ jeˬ jaˆ-eu tehꞈ meh. Miˬyehˇ-ahˇ guˆ-awˇ, aˬ yawꞈ-euˬ dawˬ naˇ haˬ geuꞈ-awˬ. Aˬ jeˬ miˇ neh ehˇ naˇ, tsawˇ haˬ zaˬ-ahˇ beh taˬ-euˬ-aˬ, kʼoeˇ loꞈ-ehˇ bi mˇ-eu gʼaˇ duˬ meh.

Dawˬ tsoˆ 8:12

Iˬ baˇ mˇ-eu tsawˇ haˬ tiˬ gʼaˬ aˇ yaˇ poˆ mˇ bahˬ kʼawꞈ, ziˇ baw-eu meh. Aˬ cawˬ heu loꞈ-ehˇ ehˇ-eu ngaˇ gaˬ haw-euˬ ma. “Miˬyehˇ-euˬ ehˇ dawˬ naˇ haˬ-eu tsawˇ haˬ dehꞈ dzaˬ laˇ tehꞈ-a.

Daˬyeˬlaˇ 6:13

Aˬ yawꞈ maꞈ sahˬ paˬ-ahˇ ehˇ-eu, “Yuˇdaˆ miˇ kʼahˬ-ahˇ neh nyehꞈ laꞈ-euˬ Daˬyeˬlaˇ kʼoeˇ gʼaˬ-aˬ, sahˬ paˬ nawˬ-ahˇ yaw zeu maˬ baw-eu uˬ taꞈ, nawˬ neh taˬ taˬ-euˬ zahˇ sahˇ kʼoꞈ-ahˇ maˬ caw teh ni, tiˬ nah smˬ poˆ guiˬ lahˬ shaˇ-eu ma byehˇ-a.”

Hawˇseˬ 5:11

Aˬ cawˬ kʼehˬ nehˬ kʼaˆ nehˬ-euˬ gaˇ, Iˇsaˬleˬlaˆ ya daˬ luꞈ ngeh, maˬ caw ba nehˬ nya-eu deuˬ-ahˇ, laꞈ jeuˬ shaˇ-iˇ-euˬ baˬ da neh, yawꞈ-ahˇ oꞈ-eu miˇ tsaˬ pehˇ tsahˇ, aˬ cawˬ neh bi kʼaˆ geuꞈ-euˬ meh.

Miˇkaˬ 6:16

Sahˬ paˬ Awˇmaˬliˇ hawˇ-eu aˬ yawꞈ-euˬ aˬ li sahˬ paˬ Aˬhaˆ aˬ nyaꞈ maˬ tsaˬ maˬ dawˇ-eu jeˬ mˇ gaˇ naw maꞈ caw teh-euˬ miˇ neh, naw maꞈ kʼoeˇ taˆ kʼoeˇ loꞈ-ehˇ keuˆ le tehꞈ-a. Aˬ yawꞈ nyaꞈ kʼaˇ dehꞈ yaꞈ-euˬ loꞈ-ehˇ naw maꞈ caw teh-awˇ dehꞈ-eu miˇ neh, luˬ-iˇ seˇ-iˇ-eu jeˬ naw maꞈ kʼoeˇ taˆ ngaˇ bi keuˆ le-awˇ, yawˬ gʼaˬ na luꞈ naw maꞈ-ahˇ yehˬ bawˬ sehˇ lu-ehˇ ehˇ niˇ gʼa tehꞈ-a. Aˬ cawˬ tsawˇ jeuˬ deuˬ naw maꞈ-ahˇ ja bu ja doeˇ tehꞈ-a.”

Maꞈtehˬ 10:28

Gʼawˇ mawˇ-ahˇ sehꞈ nya kʼawꞈ, saꞈ laˇ-ahˇ maˬ sehꞈ nya-eu tsawˇ haˬ-ahˇ taˬ guˆ. Ehˇ kʼawꞈ, gʼawˇ mawˇ hawˇ-eu saꞈ laˇ heu nyiˬ jeˬ luꞈ-ahˇ, shiˬ buiˇ lah ma laꞈ kʼoeˇ laˆ cawˆ nya-eu gʼaˬ pyeuꞈ-eu Miˬyehˇ-ahˇ guˆ-awˬ.

Luˇkaꞈ 12:5

Aˬ suˇ gʼaˬ-ahˇ guˆ-eu tsaˬ ta lehˇ, naw maꞈ-ahˇ ngaˇ mehˬ nehˬ nyaˇ. Gʼawˇ mawˇ-ahˇ sehꞈ-eu uˬ taꞈ, shiˬ buiˇ lah ma-ahˇ biˬ ahˇ nya-eu baoˬ jaˆ-eu Miˬyehˇ-ahˇ guˆ-awˬ. Ngaˇ ehˇ gaˇ jah-awˬ. Naw maꞈ aˬ yawꞈ-ahˇ ya guˆ meh.

Gʼaˬkʼehˇ 5:29

Kʼoeˇ ngeh, Beˬtuˆluˆ hawˇ-eu gʼaˬ kʼehˇ deuˬ heu loꞈ-ehˇ ehˇ kʼoꞈ nehˬ-euˬ meh. “Tsawˇ haˬ-euˬ dawˬ-ahˇ naˇ haˬ-eu naˆ maˬ tseˇ, Miˬyehˇ-euˬ dawˬ-ahˇ nga maꞈ ya naˇ haˬ meh.

1 Saˬmeuˬlaˆ 22:17

Kʼoeˇ naˇ, kʼoeˇ gaˇ yawꞈ luꞈ-eu aˬ yawꞈ-ahˇ loꞈ piˇ-eu guiˇ maꞈ-ahˇ ehˇ nehˬ-eu, “Sahˬpaˬ Miˬyehˇ-euˬ piˇ ma heu deuˬ-ahˇ sehꞈ-awˬ. Aˬ jeˬ miˇ neh ehˇ naˇ, aˬ yawꞈ maꞈ Daˬbiˇ-ahˇ nui ma taꞈ-awˇ, Daˬbiˇ cehˆ doˆ-euˬ gaˇ kawˆ aˬ yawꞈ maꞈ siˬ nya jiˇ kʼawꞈ, ngaˬ-ahˇ maˬ ehˇ nehˬ laꞈ ni zaꞈ taˬ-euˬ meh.” Ehˇ kʼawꞈ, sahˬ paˬ-ahˇ loꞈ piˇ-eu guiˇ maꞈ kʼoeˇ maꞈ, Sahˬpaˬ Miˬyehˇ-euˬ piˇ ma kʼoeˇ deuˬ-ahˇ maˬ sehꞈ-a.