Dawˬmehˬ 5:15 - Akha

¹⁵ Naw maꞈ Iˇjiˇtuˆ miˇ kʼahˬ laꞈ kʼoeˇ aˬ cawˬ zaˬ kʼaˆ geuꞈ-awˇ, naw maꞈ-euˬ Miˬyehˇ, Sahˬpaˬ Miˬyehˇ pyeuꞈ-eu ngaˇ gʼaˬ, ngaˬ-euˬ huiˬ-eu baoˬ hawˇ-eu gʼaˬ-ahˇ gʼoe-awˇ, naw maꞈ-ahˇ ka kʼoꞈ le-euˬ gaˇ noeˬ keuˆ-awˬ. Kʼoeˇ miˇ neh, jawˇ nah-ahˇ lah daw-awˬ lehˇ naw maꞈ-ahˇ ngaˇ dawˬ biꞈ-eu ma.

Dawˬmehˬ 5:15 ပူးပေါင်းရင်းမြစ်များ

Aˇ dahˬ 15:13

Aˬ yawꞈ-ahˇ Sahˬpaˬ Miˬyehˇ ehˇ nehˬ-eu, “Nawˬ-euˬ zaˬ nawˬ-euˬ uˆ deuˬ, aˬ cawˬ miˇ kʼahˬ laꞈ kʼoeˇ boeˇ miˬ siˬ kʼaˬ loꞈ-ehˇ ya jawˇ tehꞈ-a. Oeˬ yaˇ kʼoꞈ keuˆ ni aˬ yawꞈ maꞈ aˬ cawˬ zaˬ kʼaˆ ya geuꞈ-awˇ, aˬ cawˬ kʼehˬ nehˬ kʼaˆ nehˬ gaˇ ya daˬ tehꞈ-a.

Aˇ dahˬ 19:16

Kʼoeˇ loꞈ-ehˇ ehˇ nehˬ gʼaˬ-euˬ kʼawꞈ, Lawˇtaˬ nyi naˬ nyi naˬ-ehˇ jawˇ-eu meh. Ehˇ kʼawꞈ, Sahˬpaˬ Miˬyehˇ aˬ yawꞈ-ahˇ gʼawˬ shaˬ gaˬ-eu miˇ neh, aˬ yawꞈ-ahˇ maˬ ehˇ, aˬ yawꞈ-euˬ miˬ zaˬ hawˇ-eu aˬ yawꞈ-euˬ aˬ buˇ nyiˬ buˇ-ahˇ maˬ ehˇ, mˬ taˆ gʼaˬ kʼehˇ deuˬ neh aˬ laꞈ-ahˇ bi nyehꞈ tehˬ-awˇ, meuˬ-euˬ laꞈ nyiˇ paw bi tsahˇ doˆ gʼeh-euˬ meh.

Jaceuq 116:16

Sahˬpaˬ Miˬyehˇ-oˇ, ngaˇ nawˬ-euˬ zaˬ kʼaˆ ma. Nga maꞈ loꞈ-ehˇ nawˬ-ahˇ ngaˇ saˇ jaˇ ziꞈ ma.

Jaceuq 136:12

Aˬ yawꞈ-euˬ gʼaˬ kʼaˆ-eu aˬ laꞈ hawˇ-eu baoˬ huiˬ-eu laꞈ du neh sheuˬ doˆ nehˬ laꞈ-euˬ meh. Aˬ yawꞈ gʼoeˇ-eu gaˬ-eu jeˬ mˬ maˬ maˬ byaˆ zaˇ ziˇ ziꞈ-eu meh.

Doˆ-iˇ 13:14

Mehˬ hu paw dehꞈ daˆ leꞈ ngeh, ‘Bawˬ-iˬ heu hmˬ-euˬ dawˬ tsuiꞈ aˬ jeˬ-a’ lehˇ, naw maꞈ-euˬ aˬ li deuˬ naw maꞈ-ahˇ naˇ haˬ laˇ naˇ, heu loꞈ-ehˇ ehˇ kʼoꞈ nehˬ-awˬ. ‘Iˇjiˇtuˆ miˇ kʼahˬ laꞈ kʼoeˇ, nga maꞈ aˬ cawˬ zaˬ kʼaˆ geuꞈ luꞈ ngeh, Sahˬpaˬ Miˬyehˇ-aˬ, aˬ yawꞈ-euˬ huiˬ-eu baoˬ-ahˇ gʼoe-awˇ, nga maꞈ-ahˇ sheuˬ doˆ nehˬ laꞈ-euˬ meh.,

Doˆ-iˇ 13:16

Kʼoeˇ loꞈ-ehˇ mˇ-eu jeˬ-aˬ, aˬ dui-euˬ naˇ kʼawˇ-ahˇ maˬ ehˇ, laꞈ du-ahˇ maˬ ehˇ, laꞈ tuiˆ paꞈ taˬ-euˬ loꞈ-ehˇ, tiˬ jawˇ-iˬ maˬ ngehˇ leˇ ni bi noeˬ mawˇ-eu jeˬ pyeuꞈ-awˇ, Sahˬpaˬ Miˬyehˇ neh aˬ yawꞈ-euˬ huiˬ-eu baoˬ-ahˇ gʼoe-awˇ, Iˇjiˇtuˆ miˇ kʼahˬ laꞈ kʼoeˇ neh sheuˬ doˆ nehˬ laꞈ-euˬ gaˇ, aˬ dui-ahˇ paˇ bi noeˬ mawˇ laꞈ tehꞈ-a’ lehˇ ehˇ nehˬ-awˬ.”

Doˆ-iˇ 13:3

Iˇsaˬleˬlaˆ tsawˇ haˬ deuˬ-ahˇ Moˇseˬ ehˇ nehˬ-eu, “Naw maꞈ aˬ cawˬ-euˬ zaˬ kʼaˆ ya geuꞈ luꞈ-eu Iˇjiˇtuˆ miˇ kʼahˬ laꞈ kʼoeˇ neh doˆ le-euˬ aˇ nah heu nah-ahˇ noeˬ keuˆ-awˬ. Aˇ nah heu nah laꞈ kʼoeˇ, Sahˬpaˬ Miˬyehˇ-aˬ, huiˬ-eu aˬ yawꞈ-euˬ baoˬ-ahˇ gʼoe-awˇ, naw maꞈ-ahˇ sheuˬ doˆ nehˬ-euˬ meh. Dehˬ tseˬ ahˇ-eu kaˬ muˇ naw maꞈ maˬ ya dzaˬ-a.

Doˆ-iˇ 13:9

Bawˬ-iˬ heu hmˬ-aˬ, naw maꞈ-euˬ laꞈ du-ahˇ maˬ ehˇ, naˇ kʼawˇ-ahˇ maˬ ehˇ, laꞈ tuiˆ paꞈ taˬ-euˬ loꞈ-ehˇ, tiˬ jawˇ-iˬ maˬ ngehˇ leˇ ni noeˬ mawˇ-eu jeˬ pyeuꞈ tehꞈ-a. Bawˬ-iˬ heu hmˬ-aˬ, Sahˬpaˬ Miˬyehˇ-euˬ Zahˇ dawˬ kʼoꞈ dawˬ-ahˇ maˬ tsehˆ leˇ ni gui poˆ-awˇ dzaw geuꞈ-eu gʼaˇ duˬ, naw maꞈ maˬ ya ngehˇ ni, bi noeˬ mawˇ-eu jeˬ pyeuꞈ tehꞈ-a. Aˬ jeˬ miˇ neh ehˇ naˇ, Sahˬpaˬ Miˬyehˇ-aˬ, aˬ yawꞈ-euˬ huiˬ-eu baoˬ-ahˇ gʼoe-awˇ, naw maꞈ-ahˇ Iˇjiˇtuˆ miˇ kʼahˬ laꞈ kʼoeˇ neh sheuˬ doˆ nehˬ-euˬ meh.

Doˆ-iˇ 20:11

Aˇ yamˬ koꞈ nah laꞈ kʼoeˇ, miˇ tsaˬ maˬ ehˇ, mˬ maˬ ehˇ, iˬ ma laˆ shaˆ maˬ ehˇ, heu deuˬ dawˬ tawˆ luꞈ laꞈ kʼoeˇ kʼaˇ jawˇ kʼaˇ jaˆ-eu yawˬ jeˬ na luꞈ maˬ ehˇ, ngaˇ beh-euˬ ma. Kʼoeˇ miˇ neh, Sahˬpaˬ Miˬyehˇ pyeuꞈ-eu ngaˇ-aˬ, jawˇ nah pyeuꞈ-eu aˇ nah kʼoeˇ nah-ahˇ dawˬ ngehˬ gʼeh nehˬ-awˇ, muiˬ-eu shawˇ-eu aˇ nah bi pyeuꞈ laˇ-euˬ ma.

Doˆ-iˇ 6:6

Kʼoeˇ miˇ neh, ngaˇ heu loꞈ-ehˇ ehˇ-eu meh lehˇ, Iˇsaˬleˬlaˆ tsawˇ haˬ deuˬ-ahˇ ehˇ nehˬ-awˬ. Ngaˇ-aˬ, Sahˬpaˬ Miˬyehˇ ma. Iˇjiˇtuˆ tsawˇ haˬ deuˬ-euˬ laꞈ oˆ zaˬ kʼaˆ ya geuꞈ-eu laꞈ kʼoeˇ ngaˇ naw maꞈ-ahˇ bi buˬ-iˇ ma. Baoˬ ahˇ-eu ngaˬ-euˬ aˬ laꞈ cawˬ doˆ-awˇ, aˬ yawꞈ maꞈ kʼoeˇ taˆ guˆ dui dui laˇ paˬ-ehˇ gʼeh-eu kʼehˬ-eu kʼaˆ-eu jeˬ bi keuˆ le-eu laꞈ kʼoeˇ, naw maꞈ-ahˇ ngaˇ ka kʼoꞈ ma.

Iˇsaˬyaˇ 63:9

Aˬ yawꞈ maꞈ ya daˬ-eu shaˬ zahˬ dawˬ tawˆ laꞈ kʼoeˇ, aˬ yawꞈ maꞈ-ahˇ aˬ yawꞈ ka kʼoꞈ-euˬ meh. Mˬ taˆ gʼaˬ kʼehˇ aˬ yawꞈ maꞈ-ahˇ ka kʼoꞈ-euˬ maˬ ngeuˇ-a. Sahˬpaˬ Miˬyehˇ mawˇ do oe-awˇ ka kʼoꞈ-euˬ meh. Aˬ yawꞈ maꞈ-ahˇ aˬ yawꞈ maˬ haw ni byehˇ dzeh-euˬ, tiˬ jawˇ-iˬ maˬ jaˆ-a.

Daˬyeˬlaˇ 9:15

“Nawˬ-euˬ baoˬ-ahˇ gʼoe-awˇ nawˬ-euˬ tsawˇ haˬ deuˬ-ahˇ Iˇjiˇtuˆ miˇ kʼahˬ laꞈ kʼoeˇ neh sheuˬ doˆ laꞈ nehˬ-awˇ, kʼoeˇ baˬ da neh iˬ nah keuˆ ni tsawˇ myahˇ doˆ luꞈ-eu nga maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-oˇ, nga maꞈ iˬ baˇ mˇ-euˬ ma.

Dawˬmehˬ 15:15

Iˇjiˇtuˆ miˇ kʼahˬ laꞈ kʼoeˇ nawˇ aˬ cawˬ-euˬ zaˬ kʼaˆ ya geuꞈ-awˇ, nawˬ-euˬ Miˬyehˇ pyeuꞈ-eu Sahˬpaˬ Miˬyehˇ nawˬ-ahˇ pyehˬ nehˬ laꞈ-euˬ gaˇ noeˬ keuˆ-awˬ. Kʼoeˇ baˬ da neh, naw maꞈ-ahˇ ngaˇ heu loꞈ-ehˇ dawˬ biꞈ-eu jeˬ pyeuꞈ-eu ma.

Dawˬmehˬ 16:12

Zahˇ dawˬ kʼoꞈ dawˬ heu deuˬ-ahˇ nawˇ maˬ ngehˇ ni caw teh-awˬ. Iˇjiˇtuˆ miˇ kʼahˬ laꞈ kʼoeˇ nawˇ aˬ cawˬ zaˬ kʼaˆ ya geuꞈ yaꞈ-euˬ gaˇ kawˆ-ahˇ taˬ ngehˇ.

Dawˬmehˬ 26:8

Aˬ yawꞈ-euˬ huiˬ dui dui-eu baoˬ hawˇ-eu gʼaˬ-ahˇ gʼoe-awˇ, Iˇjiˇtuˆ miˇ kʼahˬ laꞈ kʼoeˇ neh nga maꞈ-ahˇ ka kʼoꞈ doˆ nehˬ laꞈ-euˬ meh. Kʼaˆ jeˬ-ehˇ gʼeh-eu jeˬ hawˇ-eu zahˬ leˇ paˬ-ehˇ gʼeh-eu jeˬ aˬ yawꞈ mˇ-awˇ, guˆ dui dui laˇ paˬ-ehˇ gʼeh-eu jeˬ bi pyeuꞈ doˆ laˇ-euˬ meh.

Dawˬmehˬ 5:6

“Ngaˇ-aˬ, naw maꞈ aˬ cawˬ zaˬ kʼaˆ ya geuꞈ luꞈ-eu Iˇjiˇtuˆ miˇ kʼahˬ laꞈ kʼoeˇ neh naw maꞈ-ahˇ ka kʼoꞈ-euˬ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ ma.

Dawˬmehˬ 9:12

“Kʼoeˇ naˇ, Sahˬpaˬ Miˬyehˇ ngaˬ-ahˇ ehˇ-eu, ‘Gawˬ jawˬ dawˬ dahˬ-ahˇ yaw kawˇ-ehˇ zaꞈ ka-iˇ-awˬ. Aˬ jeˬ miˇ neh ehˇ naˇ, Iˇjiˇtuˆ miˇ kʼahˬ laꞈ kʼoeˇ neh nawˬ neh sheuˬ doˆ laꞈ-euˬ nawˬ-euˬ tsawˇ haˬ deuˬ maˬ muiˬ maˬ shawˇ-ehˇ pyeuꞈ-iˇ-awˇ, maˬ muiˬ maˬ jaˬ-euˬ jeˬ mˇ luꞈ meh.

Tiˇtuˆ 2:14

Maˬ muiˬ maˬ jaˬ-eu jeˬ dawˬ tawˆ luꞈ laꞈ kʼoeˇ aˬ dui-ahˇ aˬ yawꞈ ka kʼoꞈ-awˇ, aˬ yawꞈ-ahˇ tehꞈ-ehˇ taꞈ-eu muiˬ-eu shawˇ-eu tsawˇ haˬ hawˇ-eu, yaw muiˬ jeˬ mˇ mawꞈ-eu nui ma ahˇ-eu tsawˇ haˬ bi pyeuꞈ laˇ-eu gʼaˇ duˬ, aˬ yawꞈ-euˬ gʼawˇ mawˇ aˬ dui-ahˇ biꞈ nehˬ laꞈ-euˬ meh.