Dawˬmehˬ 3:20 - Akha

²⁰ (Naw maꞈ jeˬ zaˬ jawˇ myaˬ-eu ngaˇ siˬ nya ma.) Sahˬpaˬ Miˬyehˇ neh naw maꞈ-ahˇ miˇ kʼahˬ heu kʼahˬ biꞈ laꞈ-awˇ coꞈ ngehˇ ni bi jawˇ laꞈ-euˬ loꞈ-ehˇ, naw maꞈ-euˬ cawˬ Iˇsaˬleˬlaˆ tsawˇ jeuˬ deuˬ-ahˇ Sahˬpaˬ Miˬyehˇ biꞈ-eu lehˇ gʼeh-eu Yawˇdaˬ lawˇ baˬ-euˬ nahˇ ma ga kʼehˬ paw jaˆ-eu miˇ kʼahˬ kʼoeˇ kʼahˬ-ahˇ aˬ yawꞈ maꞈ deuˆ gʼaˬ-awˇ, Sahˬpaˬ Miˬyehˇ aˬ yawꞈ maꞈ-ahˇ kʼoeˇ gaˇ bi jawˇ ngeh keuˆ ni, guiˇ caw deuˆ leˇ neh-awˬ. Kʼoeˇ sahˇ miˇ tsa, ngaˬ neh naw maꞈ-ahˇ biꞈ-euˬ miˇ kʼahˬ heu kʼahˬ-ahˇ naw maꞈ gʼoꞈ le-awˬ’ lehˇ ehˇ nehˬ-euˬ ma.

Dawˬmehˬ 3:20 ပူးပေါင်းရင်းမြစ်များ

Bawˇtsahˬ 32:18

Iˇsaˬleˬlaˆ tsawˇ haˬ dawˬ tawˆ luꞈ yawˬ ha za paˬ-ahˇ gʼeh-eu miˇ kʼahˬ maˬ za kʼoeˇ keuˆ ni, nga maꞈ maˬ gʼoꞈ le.

Bawˇtsahˬ 32:22

Miˇ kʼahˬ kʼoeˇ kʼahˬ deuˆ za ngeh, naw maꞈ gʼoꞈ le nya meh. Aˬ jeˬ miˇ neh ehˇ naˇ, Sahˬpaˬ Miˬyehˇ-ahˇ maˬ ehˇ, naw maꞈ-euˬ cawˬ Iˇsaˬleˬlaˆ tsawˇ haˬ deuˬ-ahˇ maˬ ehˇ, mˇ nehˬ paˬ-ehˇ gʼeh-eu jeˬ, naw maꞈ mˇ byah gʼaˬ-euˬ meh. Kʼoeˇ naˇ, Yawˇdaˬ lawˇ baˬ nahˇ ma doˆ kʼehˬ paw baˬ-ahˇ jaˆ-eu miˇ kʼahˬ heu kʼahˬ, Sahˬpaˬ Miˬyehˇ naw maꞈ-ahˇ biꞈ tsehˆ nehˬ laꞈ tehꞈ-a.

Dawˬmehˬ 12:9

Aˬ jeˬ miˇ neh ehˇ naˇ, naw maꞈ-euˬ Sahˬpaˬ Miˬyehˇ neh naw maꞈ-ahˇ biꞈ-euˬ, nui ma saˇ lehˆ ni ya jawˇ-eu miˇ kʼahˬ kʼoeˇ kʼahˬ-ahˇ naw maꞈ maˬ jawˇ keuˆ leˇ-aˬ si.

Dawˬmehˬ 3:21

“Kʼoeˇ naˇ, Yawˇshuˆ-ahˇ ngaˇ heu loꞈ-ehˇ mehˬ nehˬ tsoˆ nehˬ-euˬ ma. ‘Nawˬ-euˬ Miˬyehˇ pyeuꞈ-eu Sahˬpaˬ Miˬyehˇ neh, sahˬ paˬ Siˇhoˬ hawˇ-eu sahˬ paˬ Awˇgaˆ aˬ nyaꞈ-ahˇ kʼaˇ jahˇ nehˬ-euˬ jeˬ dawˬ tawˆ luꞈ, nawˇ ya mawˇ-euˬ meh. Naw maꞈ guiˇ kʼaˇ deuˆ uˇ gʼeh-eu miˇ kʼahˬ-ahˇ aˬ yawꞈ kʼoeˇ loꞈ-ehˇ jahˇ nehˬ tehꞈ-a.

Yawˇshuˆ 1:15

Naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ neh Iˇsaˬleˬlaˆ tsawˇ haˬ kʼoeˇ deuˬ-ahˇ biꞈ taˬ-euˬ Yawˇdaˬ lawˇ baˬ nahˇ ma ga kʼehˬ paw jaˆ-eu miˇ kʼahˬ kʼoeˇ kʼahˬ-ahˇ aˬ yawꞈ maꞈ za gʼaˬ ngeh keuˆ ni, aˬ yawꞈ maꞈ-ahˇ ya caw ba meh. Iˇsaˬleˬlaˆ tsawˇ jeuˬ dawˬ tawˆ luꞈ jawˇ duˬ dah leˇ gʼaˬ jiˇ naˇ, Sahˬpaˬ Miˬyehˇ-euˬ zaˬ kʼaˆ Moˇseˬ neh naw maꞈ-ahˇ biꞈ-euˬ, Yawˇdaˬ lawˇ baˬ nahˇ ma doˆ kʼehˬ paw jaˆ-eu naw maꞈ-euˬ miˇ kʼahˬ heu kʼahˬ-ahˇ gʼoꞈ le-awˇ jawˇ-awˬ.”

Yawˇshuˆ 22:2

Aˬ yawꞈ maꞈ-ahˇ aˬ yawꞈ ehˇ nehˬ-eu, “Sahˬpaˬ Miˬyehˇ-euˬ zaˬ kʼaˆ Moˇseˬ neh kʼaˇ bi mˇ-euˬ yawˬ jeˬ na luꞈ naw maꞈ mˇ gʼaˬ jiˇ-awˇ, ngaˬ neh dawˬ kʼaˇ biꞈ-euˬ jeˬ dawˬ tawˆ luꞈ-ahˇ naw maꞈ naˇ haˬ geuꞈ gʼaˬ-euˬ meh.

Yawˇshuˆ 22:4

Naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ neh saˇ jaˇ dzaˬ taˬ-euˬ loꞈ-ehˇ, naw maꞈ-euˬ cawˬ Iˇsaˬleˬlaˆ tsawˇ haˬ deuˬ-ahˇ, nui saˇ za-eu jeˬ aˬ yawꞈ biꞈ gʼaˬ-euˬ meh. Kʼoeˇ miˇ neh, naw maꞈ geuꞈ ma lehˇ shaˇ-euˬ loꞈ-ehˇ, Sahˬpaˬ Miˬyehˇ-euˬ zaˬ kʼaˆ Moˇseˬ neh naw maꞈ-ahˇ biꞈ gʼaˬ-euˬ miˇ kʼahˬ pyeuꞈ-eu, Yawˇdaˬ lawˇ baˬ-euˬ nahˇ ma doˆ kʼehˬ paw baˬ-ahˇ jaˆ-eu naw maꞈ-euˬ miˇ kʼahˬ-ahˇ gʼoꞈ-iˇ-awˬ.

Yawˇshuˆ 22:9

Kʼoeˇ naˇ, Luˇbeˬ tsawˇ jeuˬ, Gaˆ tsawˇ jeuˬ hawˇ-eu, nahˇ ma doˆ kʼehˬ paw baˬ-ahˇ jawˇ-eu Maˬnaˇseˬ tsawˇ jeuˬ heu deuˬ, aˬ yawꞈ maꞈ-euˬ miˇ kʼahˬ paw gʼoꞈ-iˇ-euˬ meh. Iˇsaˬleˬlaˆ tsawˇ jeuˬ nui deuˬ-ahˇ, Kaˬnaˬ miˇ kʼahˬ Shiˇloˬ meuˬ-ahˇ bi jawˇ yaꞈ-awˇ, Sahˬpaˬ Miˬyehˇ neh Moˇseˬ-ahˇ gʼoe-awˇ aˬ yawꞈ maꞈ-ahˇ biꞈ taˬ-euˬ loꞈ-ehˇ, aˬ yawꞈ maꞈ neh za-euˬ miˇ kʼahˬ pyeuꞈ-eu Giˇlaˆ miˇ kʼahˬ-ahˇ aˬ yawꞈ maꞈ gʼoꞈ-iˇ-euˬ meh.