Dawˬmehˬ 28:15 - Akha

¹⁵ “Ehˇ kʼawꞈ, iˬ nah ngaˇ nawˬ-ahˇ biꞈ-euˬ nawˬ-euˬ Miˬyehˇ pyeuꞈ-eu Sahˬpaˬ Miˬyehˇ-euˬ zahˇ dawˬ kʼoꞈ dawˬ deuˬ hawˇ-eu aˬ yawꞈ neh biꞈ-euˬ dawˬ deuˬ -ahˇ nawˇ saˇ jaˇ ziꞈ-eu laꞈ kʼoeˇ maˬ caw teh naˇ, maˬ muiˬ maˬ jaˬ-eu heu deuˬ dawˬ tawˆ luꞈ nawˬ-euˬ kʼoeˇ taˆ keuˆ le tehꞈ-a.

Dawˬmehˬ 28:15 ပူးပေါင်းရင်းမြစ်များ

Aˇ dahˬ 3:14

Kʼoeˇ ngeh, Miˬyehˇ pyeuꞈ-eu Sahˬpaˬ Miˬyehˇ aˇ lawˇ kʼoeˇ mawˇ-ahˇ heu loꞈ-ehˇ ehˇ nehˬ-euˬ meh. “Nawˇ kʼoeˇ loꞈ-ehˇ mˇ-euˬ baˬ da neh kʼehˬ nehˬ kʼaˆ nehˬ-eu jeˬ-ahˇ ya daˬ tehꞈ-a. Jeˬ zaˬ dawˬ tawˆ luꞈ laꞈ kʼoeˇ, nawˇ tehꞈ-ehˇ heu loꞈ-ehˇ yaˬ kʼehˇ yaˬ nehˬ-euˬ gaˇ ya daˬ tehꞈ-a. Nymˬ-mˇ neh aˇ dahˬ beh-awˇ, nawˬ-euˬ uˬ maˆ miˇ tsaˬ-ahˇ ciˬ daˬ-awˇ joe joe-ehˇ cah-awˬ. Maˬ shiˇ tiˬ ziˇ nawˇ miˇ tsaˬ ya dzaˬ tehꞈ-a.

Aˇ dahˬ 4:11

Nawˇ-aˬ, yaˬ kʼehˇ yaˬ nehˬ-eu jeˬ-ahˇ ya daˬ-eu tsawˇ haˬ tiˬ gʼaˬ pyeuꞈ-awˇ, miˇ tsaˬ-ahˇ nawˇ maˬ paˇ tsehˬ dzaˬ nya meh. Nawˬ-euˬ aˬ nyiˇ-ahˇ nawˇ sehꞈ ngeh, miˇ tsaˬ kʼaˬ meh mˇ nga-awˇ, nawˬ-euˬ aˬ nyiˇ-euˬ shiˬ dawˇ ahˇ-euˬ meh.

Aˇ dahˬ 4:12

Miˇ tsaˬ-ahˇ nawˇ aˬ geu jeˬ ka dzaˬ-eu maˬ kaˬ, miˇ tsaˬ nawˬ-ahˇ maˬ bi za le-ehˇ, nymˇ jiˇ maˬ baw ni miˇ tsaˬ kʼoeˇ taˆ doe doe-ehˇ cah cah-ehˇ ya jawˇ tehꞈ-a.”

2 Laˬsaˬbaˬ 12:5

Sahˬ paˬ Leˬhawˇbamˬ hawˇ-eu Shiˇshehˆ-euˬ laꞈ-ahˇ neh cehˆ buˬ-euˬ gʼaˇ duˬ Yeˬluˇsaˬlehˬ meuˬ-ahˇ uiˬ laˇ taˬ-euˬ Yuˇdaˆ miˇ kʼahˬ-euˬ aˬ yuiꞈ aˬ tsu deuˬ jawˇ gaˇ, Miˬyehˇ gʼaˇ duˬ ngehˬ dah-eu gʼaˬ pyeuꞈ-eu Sheˬmaˇyaˬ iˇ-euˬ meh. Aˬ yawꞈ maꞈ-ahˇ aˬ yawꞈ ehˇ nehˬ-eu, “Sahˬpaˬ Miˬyehˇ naw maꞈ-ahˇ heu loꞈ-ehˇ ehˇ-eu meh. Naw maꞈ ngaˬ-ahˇ byehˇ dzeh-euˬ meh. Kʼoeˇ miˇ neh, nymˬ-mˇ Shiˇshehˆ-euˬ laꞈ-ahˇ, naw maꞈ-ahˇ ngaˇ byehˇ dzeh nehˬ-eu ma lehˇ ehˇ-eu meh.”

2 Laˬsaˬbaˬ 34:24

Sahˬpaˬ Miˬyehˇ heu loꞈ-ehˇ ehˇ-eu meh. ‘Sahˬ paˬ-ahˇ gui mehˬ nehˬ-euˬ sahˬ boꞈ paˇ dmˬ kʼoeˇ dmˬ laꞈ kʼoeˇ boꞈ ahˇ taˬ-euˬ kʼehˬ-eu kʼaˆ-eu jeˬ Yeˬluˇsaˬlehˬ meuˬ hawˇ-eu kʼoeˇ gaˇ jawˇ-eu tsawˇ haˬ deuˬ kʼoeˇ taˆ ngaˇ bi keuˆ le ma.

2 Laˬsaˬbaˬ 7:19

Ehˇ kʼawꞈ, nawˇ hawˇ-eu nawˬ-euˬ tsawˇ haˬ deuˬ, ngaˬ-euˬ zahˇ dawˬ kʼoꞈ dawˬ deuˬ hawˇ-eu ngaˬ neh biꞈ taˬ-euˬ dawˬ deuˬ-ahˇ maˬ naˇ haˬ geuꞈ ni miˬ yehˇ nui deuˬ-ahˇ uˬ duˬ tahˬ naˇ,

Iˇsaˬyaˇ 3:11

Ehˇ kʼawꞈ, haiˬ-eu tsawˇ haˬ deuˬ kʼoeˇ taˆ, dawˇ keuˆ le tehꞈ-a. Aˬ cawˬ-ahˇ aˬ yawꞈ maꞈ jahˇ doeˇ nehˬ-euˬ loꞈ-ehˇ, aˬ yawꞈ maꞈ nymˬ-mˇ ya daˬ poˆ tehꞈ-a.

Yeˬlaˬmiˇ 11:8

Ehˇ kʼawꞈ, aˬ yawꞈ maꞈ maˬ naˇ haˬ-ehˇ, aˇ hu aˇ nah loꞈ-ehˇ tehꞈ-ehˇ nui ma gʼahˇ-awˇ, yaw haiˬ jeˬ tehꞈ-ehˇ mˇ-eu meh. Dawˬ ma saˇ jaˇ mehˬ nah ya caw teh meh lehˇ aˬ yawꞈ maꞈ-ahˇ ngaˇ dawˬ biꞈ-euˬ kʼawꞈ, aˬ yawꞈ maꞈ maˬ naˇ haˬ geuꞈ-a. Kʼoeˇ baˬ da neh, dawˬ ma saˇ jaˇ laꞈ kʼoeˇ kʼaˇ ehˇ taˬ-euˬ kʼehˬ-eu kʼaˆ-eu jeˬ dawˬ tawˆ luꞈ, aˬ yawꞈ maꞈ kʼoeˇ taˆ ngaˇ bi keuˆ le-euˬ ma.”

Yeˬlaˬmiˇ 26:4

“Tsawˇ haˬ kʼoeˇ deuˬ-ahˇ heu loꞈ-ehˇ ehˇ nehˬ-awˬ” lehˇ, Sahˬpaˬ Miˬyehˇ ngaˬ-ahˇ ehˇ-eu meh. “Sahˬpaˬ Miˬyehˇ pyeuꞈ-eu ngaˇ, naw maꞈ-ahˇ heu loꞈ-ehˇ ehˇ taˬ-euˬ jaˆ-eu ma. Ngaˬ neh naw maꞈ-ahˇ mehˬ nehˬ tsoˆ nehˬ taˬ-euˬ jeˬ mehˬ nah caw teh-awˇ, naw maꞈ jawˇ gaˇ maˬ tsehˆ leˇ ni pyehˬ gʼeh leꞈ-euˬ, Miˬyehˇ gʼaˇ duˬ ngehˬ dah-eu deuˬ-euˬ dawˬ-ahˇ yaw zeu baw-eu laꞈ kʼoeˇ, ngaˬ-euˬ ehˇ dawˬ-ahˇ naw maꞈ ya naˇ haˬ geuꞈ meh lehˇ ehˇ taˬ-euˬ jaˆ-eu ma. Ehˇ kʼawꞈ, aˬ yawꞈ maꞈ neh ngehˬ-euˬ dawˬ-ahˇ naw maꞈ tiˬ jawˇ-iˬ maˬ naˇ haˬ-a.

Yeˬlaˬmiˇ 32:23

Ehˇ kʼawꞈ, miˇ kʼahˬ heu kʼahˬ aˬ yawꞈ maꞈ za-awˇ jawˇ luꞈ ngeh, nawˬ-euˬ dawˬ-ahˇ aˬ yawꞈ maꞈ maˬ naˇ haˬ geuꞈ-ehˇ, nawˬ neh mehˬ nehˬ tsoˆ nehˬ-euˬ loꞈ-ehˇ maˬ dehꞈ ni, nawˬ neh bi mˇ-euˬ jeˬ-ahˇ aˬ yawꞈ maꞈ maˬ mˇ-a. Kʼoeˇ miˇ neh heu loꞈ-ehˇ gʼeh-eu luˬ-iˇ seˇ-iˇ-eu jeˬ, aˬ yawꞈ maꞈ kʼoeˇ taˆ nawˇ bi keuˆ le-euˬ meh.

Yeˬlaˬmiˇ 36:31

Naw maꞈ neh mˇ-euˬ iˬ baˇ baˬ da neh, nawˬ-ahˇ maˬ ehˇ, nawˬ-euˬ zaˬ deuˬ uˆ deuˬ-ahˇ maˬ ehˇ, nawˬ-euˬ gaˇ mˇ-eu yaw huiˬ yaw mahˇ deuˬ-ahˇ maˬ ehˇ, ngaˇ kʼehˬ nehˬ kʼaˆ nehˬ ma. Nawˇ hawˇ-eu Yeˬluˇsaˬlehˬ meuˬ-ahˇ jawˇ-eu tsawˇ haˬ deuˬ maˬ ehˇ, Yuˇdaˆ miˇ kʼahˬ laꞈ kʼoeˇ jawˇ-eu tsawˇ haˬ deuˬ maˬ ehˇ, ngaˬ neh mehˬ nehˬ-euˬ jeˬ-ahˇ maˬ naˇ haˬ geuꞈ-euˬ miˇ neh, ngaˬ neh ehˇ taˬ-euˬ loꞈ-ehˇ, naw maꞈ dawˬ tawˆ luꞈ kʼoeˇ taˆ luˬ-iˇ seˇ-iˇ-eu jeˬ bi keuˆ le ma lehˇ ehˇ nehˬ-awˬ” lehˇ ehˇ-eu meh.

Yeˬlaˬmiˇ 36:7

Guˆ laˇ paˬ-ehˇ gʼeh-eu Sahˬpaˬ Miˬyehˇ-euˬ nui ma pehˇ-eu jeˬ ehˇ taˬ-euˬ miˇ neh, aˬ yawꞈ maꞈ Sahˬpaˬ Miˬyehˇ-ahˇ guiˬ lahˬ shaˇ-awˇ, yaw haiˬ jeˬ maˬ paˇ mˇ ni byehˇ-eu baw le” lehˇ mehˬ nehˬ-euˬ ma.

Yeˬlaˬmiˇ 40:2

Guiˇ maꞈ kʼoeˇ taˆ uˆ lahˇ-eu kʼoeˇ gʼaˬ, ngaˬ-ahˇ sheuˬ ceuˆ doˆ-awˇ, heu loꞈ-ehˇ ehˇ nehˬ laꞈ-euˬ meh. “Miˇ kʼahˬ heu kʼahˬ-ahˇ laˆ cawˆ nehˬ ma lehˇ, nawˬ-euˬ Miˬyehˇ pyeuꞈ-eu Sahˬpaˬ Miˬyehˇ ehˇ taˬ-euˬ meh.

Ngoeˇ dawˬ 2:17

Sahˬpaˬ Miˬyehˇ noeˬ taˬ-euˬ jeˬ, aˬ yawꞈ jahˇ ma lehˇ ehˇ-euˬ jeˬ, nymˬ-mˇ bi keuˆ le gʼaˬ-euˬ meh. Aˇ hu neh ehˇ taˬ-euˬ loꞈ-ehˇ, gʼawˬ shaˬ gaˬ-eu jeˬ maˬ ahˇ ni, yaw cawˆ jeˬ bi keuˆ le-euˬ meh. Muiˇ-eu deuˬ neh bi gʼaˬ leˇ-awˇ, nawˇ cawˆ-iˇ-awˇ ya shaˬ luꞈ gaˇ, haw-awˇ laˬ kʼaˬ bi cehˇ-euˬ meh.

Hawˇseˬ 7:12

Ehˇ kʼawꞈ, ngaˇ baw gʼaꞈ kʼmˇ tsehˆ-awˇ, aˇ jiˇ kʼmˇ mi dzaˬ-eu loꞈ-ehˇ, aˬ yawꞈ maꞈ-ahˇ nyehꞈ mi jiˇ-awˇ, yaw haiˬ mˇ dzeuˇ yaꞈ-euˬ aˇ poeˬ, aˬ yawꞈ maꞈ-ahˇ ngaˇ kʼehˬ nehˬ ma.

Maˬlaˬkiˇ 2:2

Naw maꞈ kʼaˇ mˇ kʼaˇ shaˇ-eu jeˬ laꞈ kʼoeˇ, ngaˬ-ahˇ yaw zeu ya baw meh. Naw maꞈ ngaˬ-euˬ ehˇ dawˬ maˬ naˇ haˬ naˇ, yaˬ kʼehˇ yaˬ gaˇ ya daˬ tehꞈ-a. Naw maꞈ neh gaˇ mˇ-euˬ aˇ poeˬ naw maꞈ-ahˇ biꞈ taˬ-euˬ jeˬ kʼoeˇ taˆ, ngaˇ yaˬ kʼehˇ yaˬ ma. Aˬ diˇ aˬ maˇ ehˇ naˇ, naw maꞈ ngaˬ-euˬ dawˬ-ahˇ yaw muiˬ paˬ-ehˇ maˬ naˇ haˬ geuꞈ-eu miˇ neh, kʼoeˇ deuˬ kʼoeˇ taˆ ngaˇ yaˬ kʼehˇ yaˬ dzeuˇ gʼaˬ-euˬ ma.

Gaˬlaˬtiˆ 3:10

Zahˇ dawˬ kʼoꞈ dawˬ-ahˇ mˇ byah gaˇ gʼoe gʼoe-ehˇ dehꞈ-eu tsawˇ haˬ deuˬ-aˬ, yaˬ kʼehˇ yaˬ-eu jeˬ-ahˇ ya daˬ-eu meh. Aˬ jeˬ miˇ neh ehˇ naˇ, “Zahˇ dawˬ kʼoꞈ dawˬ sahˬ boꞈ laꞈ kʼoeˇ kʼaˇ boꞈ taˬ-euˬ yawˬ jeˬ na luꞈ-ahˇ aˬ myah luꞈ maˬ byehˇ ni maˬ caw teh geuꞈ-eu tsawˇ haˬ-aˬ, Miˬyehˇ neh yaˬ kʼehˇ yaˬ-euˬ jeˬ-ahˇ ya daˬ meh” lehˇ, Jaˇliꞈ laꞈ kʼoeˇ ehˇ taˬ-euˬ meh.

Dawˬmehˬ 11:28

Ehˇ kʼawꞈ, zahˇ dawˬ kʼoꞈ dawˬ heu deuˬ-ahˇ maˬ naˇ haˬ geuꞈ ni byehˇ dzeh yaꞈ-awˇ, naw maꞈ tiˬ jawˇ-iˬ uˬ duˬ maˬ tahˬ haw-euˬ miˬ yehˇ nui deuˬ-ahˇ uˬ duˬ tahˬ naˇ, yaˬ kʼehˇ yaˬ-eu jeˬ-ahˇ naw maꞈ za tehꞈ-a.

Dawˬmehˬ 28:2

Nawˬ-euˬ Miˬyehˇ pyeuꞈ-eu Sahˬpaˬ Miˬyehˇ-euˬ ehˇ dawˬ-ahˇ nawˇ naˇ haˬ geuꞈ naˇ, guiˬ lahˬ heu deuˬ dawˬ tawˆ luꞈ nawˇ za tehꞈ-a.

Dawˬmehˬ 28:45

“Nawˇ luˬ-iˇ seˇ-iˇ ngeh keuˆ ni, shaˬ zahˬ maˬ tsehˆ leˇ ni keuˆ le tehꞈ-a. Aˬ jeˬ miˇ neh ehˇ naˇ, nawˬ-euˬ Miˬyehˇ pyeuꞈ-eu Sahˬpaˬ Miˬyehˇ-euˬ ehˇ dawˬ nawˇ maˬ naˇ haˬ-ehˇ, aˬ yawꞈ neh biꞈ taˬ-euˬ zahˇ dawˬ kʼoꞈ dawˬ dawˬ tawˆ luꞈ-ahˇ nawˇ maˬ caw teh-a.

Dawˬmehˬ 29:19

Iˬ nah heu gaˇ yawꞈ luꞈ-eu tsawˇ haˬ deuˬ laꞈ kʼoeˇ, dawˬ ma saˇ jaˇ heu-ahˇ ya gaˬ gʼaˬ-euˬ kʼawꞈ, nui ma gʼahˇ-eu laꞈ kʼoeˇ, yawˬ ha kʼaˇ dehꞈ mawꞈ-eu loꞈ-ehˇ dehꞈ kʼawꞈ yaw muiˬ paˬ-ehˇ ya dehꞈ dzaˬ tehꞈ-a lehˇ tsawˇ haˬ tiˬ gʼaˬ-iˬ maˬ ya noeˬ ni yaw kʼaˆ kʼaˆ-ehˇ yahˇ-awˬ. Kʼoeˇ loꞈ-ehˇ noeˬ-eu jeˬ-aˬ, naw maꞈ dawˬ tawˆ luꞈ-ahˇ yaw muiˬ yaw doeˇ maˬ tseˇ ni, laˆ luˬ laˆ seˇ-eu jeˬ bi keuˆ le tehꞈ-a.

Dawˬmehˬ 29:20

Kʼoeˇ loꞈ-ehˇ gʼeh-eu tsawˇ haˬ-ahˇ Sahˬpaˬ Miˬyehˇ iˬ baˇ maˬ pyehˬ nehˬ-ehˇ, Sahˬpaˬ Miˬyehˇ-euˬ nui ma pehˇ-eu miˬ dzaˬ aˬ yawꞈ-ahˇ zaw leˇ-awˇ, geuꞈ-eu jeˬ maˬ ahˇ gaˇ keuˆ ni aˬ yawꞈ-ahˇ laˆ luˬ laˆ seˇ nehˬ ngeh keuˆ ni, sahˬ boꞈ heu taꞈ laꞈ kʼoeˇ kʼaˇ boꞈ taˬ-euˬ luˬ-iˇ seˇ-iˇ-eu jeˬ aˬ yawꞈ kʼoeˇ taˆ keuˆ le tehꞈ-a.

Dawˬmehˬ 5:1

Iˇsaˬleˬlaˆ tsawˇ haˬ dawˬ tawˆ luꞈ-ahˇ Moˇseˬ kuˇ uiˬ-awˇ ehˇ nehˬ-eu, “Iˇsaˬleˬlaˆ tsawˇ haˬ deuˬ-oˇ, iˬ nah ngaˇ naw maꞈ-ahˇ biꞈ-euˬ zahˇ dawˬ kʼoꞈ dawˬ heu deuˬ dawˬ tawˆ luꞈ-ahˇ naˇ haˬ-awˇ dzaw geuꞈ-eu laꞈ kʼoeˇ, yaw muiˬ paˬ-ehˇ caw teh-awˬ.

Yawˇshuˆ 23:15

Ehˇ kʼawꞈ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ neh saˇ jaˇ dzaˬ taˬ-euˬ yaw muiˬ jeˬ dawˬ tawˆ luꞈ, naw maꞈ kʼoeˇ taˆ mˇ byah nehˬ-euˬ loꞈ-ehˇ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ neh naw maꞈ-ahˇ biꞈ-euˬ muiˬ dui dui-eu miˇ kʼahˬ heu kʼahˬ laꞈ kʼoeˇ, naw maꞈ luˬ-iˇ seˇ-iˇ jiˇ ngeh keuˆ ni, yaw doeˇ jeˬ dawˬ tawˆ luꞈ naw maꞈ kʼoeˇ taˆ Sahˬpaˬ Miˬyehˇ bi keuˆ le tehꞈ-a.

Yawˇshuˆ 23:16

Naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-euˬ dawˬ ma saˇ jaˇ laꞈ kʼoeˇ naw maꞈ maˬ ziꞈ-ehˇ, miˬ yehˇ nui deuˬ-ahˇ naw maꞈ caw teh-awˇ uˬ duˬ tahˬ naˇ, aˬ yawꞈ nui ma pehˇ-eu laꞈ kʼoeˇ naw maꞈ-ahˇ kʼehˬ nehˬ kʼaˆ nehˬ laꞈ-awˇ, tiˬ kʼehˇ laˇ kʼehˬ laꞈ kʼoeˇ tehꞈ-ehˇ, aˬ yawꞈ neh biꞈ laꞈ-euˬ muiˬ dui dui-eu miˇ kʼahˬ heu kʼahˬ laꞈ kʼoeˇ naw maꞈ tiˬ gʼaˬ-iˬ maˬ jawˇ-ehˇ piˬ-iˇ byoˆ-iˇ jiˇ tehꞈ-a.”

Yaˇ kʼaˬ daˇ 2:15

Sahˬpaˬ Miˬyehˇ neh ehˇ taˬ-euˬ loꞈ-ehˇ, aˬ yawꞈ maꞈ guiˇ kʼaˇ deuˆ-iˇ ngeh, Sahˬpaˬ Miˬyehˇ aˬ yawꞈ maꞈ jawˇ paw maˬ pyawˬ-a. Kʼoeˇ ngeh, aˬ yawꞈ maꞈ nui ma cawˆ dui dui laˇ taˬ-euˬ meh.

1 Saˬmeuˬlaˆ 4:10

Kʼoeˇ naˇ, Piˇliˇtiˆ tsawˇ haˬ deuˬ leh jeh dui dui-awˇ guiˇ deuˆ-eu laꞈ kʼoeˇ, Iˇsaˬleˬlaˆ tsawˇ haˬ deuˬ-ahˇ deuˆ gʼaˬ-awˇ, Iˇsaˬleˬlaˆ tsawˇ haˬ deuˬ cehˆ gʼoꞈ-euˬ meh. Tsawˇ haˬ shiˇ dui dui-awˇ, Iˇsaˬleˬlaˆ yehˇ smˬ muiˇ gʼaˬ bi deuˆ sehꞈ-euˬ meh.