Aˇ dahˬ 50:24 - Akha

²⁴ Aˬ yawꞈ-euˬ mehˇ nmˇ deuˬ-ahˇ aˬ yawꞈ ehˇ nehˬ-eu, “Ngaˇ ziˇ jiˇ le shaw-iˬ miˇ-a. Ehˇ kʼawꞈ, Miˬyehˇ naw maꞈ-ahˇ yaw muiˬ paˬ-ehˇ ngehˬ gʼeh dah teˬ nehˬ-eu laꞈ kʼoeˇ, miˇ kʼahˬ heu kʼahˬ laꞈ kʼoeˇ neh naw maꞈ-ahˇ sheuˬ doˆ gʼeh-awˇ, Aˬbyaˬhaˬ, Iˇtsaˆ, Yaˬkoˆ aˬ ha maꞈ-ahˇ aˬ yawꞈ neh saˇ jaˇ dzaˬ tsehˆ taˬ-euˬ miˇ kʼahˬ-ahˇ sheuˬ gʼeh nehˬ laꞈ tehꞈ-a” lehˇ ehˇ nehˬ-euˬ meh.

Aˇ dahˬ 50:24 ပူးပေါင်းရင်းမြစ်များ

Aˇ dahˬ 12:7

Kʼoeˇ ngeh, Aˬbyaˬ-euˬ mehˬ shi Sahˬpaˬ Miˬyehˇ doˆ le-awˇ, “Miˇ kʼahˬ heu kʼahˬ-aˬ, nawˬ-euˬ zaˬ nawˬ-euˬ uˆ deuˬ-ahˇ biꞈ-eu gʼaˇ duˬ, ngaˬ neh lehˬ hmˬ taˬ-euˬ miˇ kʼahˬ pyeuꞈ-eu ma” lehˇ ehˇ nehˬ-euˬ meh. Aˬbyaˬ-aˬ, aˬ yawꞈ-euˬ mehˬ shi doˆ le-euˬ Sahˬpaˬ Miˬyehˇ-ahˇ lawˇ nehˬ shehˇ nehˬ-eu gʼaˇ duˬ, kʼoeˇ gaˇ lawˇ duˬ tiˬ tsahˇ tsoˆ-euˬ meh.

Aˇ dahˬ 13:15

Nawˬ neh kʼaˇ haw mawˇ jiˇ-euˬ miˇ kʼahˬ dawˬ tawˆ luꞈ, nawˇ hawˇ-eu nawˬ-euˬ zaˬ nawˬ-euˬ uˆ deuˬ-ahˇ biꞈ-eu lehˇ ngaˇ lehˬ hmˬ taˬ-euˬ ma. Miˇ kʼahˬ heu kʼahˬ-aˬ, mˬ maˬ maˬ byaˆ zaˇ ziˇ naw maꞈ-euˬ miˇ kʼahˬ pyeuꞈ tehꞈ-a.

Aˇ dahˬ 13:17

Nawˇ iˇ-awˇ, miˇ kʼahˬ kʼahˬ lah ni cah doe haw-iˇ-awˬ. Aˬ jeˬ miˇ neh ehˇ naˇ, miˇ kʼahˬ heu kʼahˬ kʼahˬ lah ni nawˬ-ahˇ biꞈ-eu lehˇ, ngaˇ lehˬ hmˬ taˬ-euˬ ma” lehˇ ehˇ nehˬ-euˬ meh.

Aˇ dahˬ 15:18

Kʼoeˇ ngeh, jawˇ duˬ kʼoeˇ tsahˇ-ahˇ Aˬbyaˬ nehˬ-ehˇ Sahˬpaˬ Miˬyehˇ dawˬ ma saˇ jaˇ dzaˬ taꞈ-euˬ meh. Sahˬpaˬ Miˬyehˇ ehˇ-eu, “Iˇjiˇtuˆ miˇ kʼahˬ-euˬ miˇ kaˬ-ahˇ neh Uˇpaˬlaˇ lawˇ baˬ-ahˇ keuˆ ni jaˆ-eu miˇ kʼahˬ kʼahˬ ma kʼoeˇ kʼahˬ, nawˇ hawˇ-eu nawˬ-euˬ zaˬ nawˬ-euˬ uˆ deuˬ-ahˇ biꞈ ma lehˇ ngaˇ saˇ jaˇ dzaˬ-eu ma.

Aˇ dahˬ 15:7

“Ngaˇ-aˬ, miˇ kʼahˬ heu kʼahˬ nawˬ-ahˇ biꞈ-eu gʼaˇ duˬ, Baˬbuˇloˬ miˇ kʼahˬ Uˇlaˆ meuˬ-ahˇ neh nawˬ-ahˇ sheuˬ doˆ laꞈ-euˬ Sahˬpaˬ Miˬyehˇ ma” lehˇ, Aˬbyaˬ-ahˇ Sahˬpaˬ Miˬyehˇ ehˇ nehˬ-euˬ meh.

Aˇ dahˬ 15:8

Ehˇ kʼawꞈ, “Dawˬ tawˆ luꞈ kʼoeˇ taˆ uˆ lahˇ-eu Sahˬpaˬ Miˬyehˇ-oˇ, miˇ kʼahˬ heu kʼahˬ-ahˇ ngaˇ za-euˬ gaˇ kawˆ aˬ joˆ-ehˇ ya siˬ nmˇ” lehˇ, Sahˬpaˬ Miˬyehˇ-ahˇ Aˬbyaˬ naˇ haˬ-euˬ meh.

Aˇ dahˬ 17:8

Iˬ nah boeˇ miˬ siˬ kʼaˬ tiˬ gʼaˬ loꞈ-ehˇ nawˇ ya dehꞈ ya jawˇ luꞈ-eu miˇ kʼahˬ heu kʼahˬ, nawˇ hawˇ-eu nawˬ-euˬ zaˬ nawˬ-euˬ uˆ deuˬ-ahˇ ngaˇ biꞈ ma. Kaˬnaˬ miˇ kʼahˬ heu kʼahˬ kʼahˬ lah ni, mˬ maˬ maˬ byaˆ zaˇ ziˇ nawˬ-euˬ zaˬ nawˬ-euˬ uˆ deuˬ-euˬ miˇ kʼahˬ pyeuꞈ-awˇ, ngaˇ aˬ yawꞈ maꞈ-euˬ Miˬyehˇ ya pyeuꞈ tehꞈ-a.”

Aˇ dahˬ 21:1

Sahˬpaˬ Miˬyehˇ-aˬ, aˬ yawꞈ neh saˇ jaˇ dzaˬ taˬ-euˬ loꞈ-ehˇ, Saˬlaˇ-ahˇ guiˬ lahˬ biꞈ-euˬ meh.

Aˇ dahˬ 26:3

Nawˇ heu gaˇ jawˇ naˇ, nawˬ nehˬ-ehˇ ngaˇ jawˇ-awˇ nawˬ-ahˇ ngaˇ guiˬ lahˬ biꞈ nehˬ ma. Miˇ kʼahˬ heu kʼahˬ kʼahˬ lah ni nawˇ hawˇ-eu nawˬ-euˬ zaˬ nawˬ-euˬ uˆ deuˬ-ahˇ ngaˇ biꞈ ma. Nawˬ da Aˬbyaˬhaˬ nehˬ-ehˇ ngaˬ neh dzaˬ taˬ-euˬ saˇ jaˇ-ahˇ ngaˇ mˇ byah ma.

Aˇ dahˬ 28:13

Sahˬpaˬ Miˬyehˇ aˬ yawꞈ dawˬ peh yawꞈ-awˇ ehˇ-eu, “Ngaˇ-aˬ, Aˬbyaˬhaˬ hawˇ-eu Iˇtsaˆ-euˬ Miˬyehˇ pyeuꞈ-eu Sahˬpaˬ Miˬyehˇ ma. Nawˇ yuꞈ luꞈ-eu miˇ tsaˬ heu tsahˇ, nawˇ hawˇ-eu nawˬ-euˬ zaˬ deuˬ-ahˇ ngaˇ biꞈ ma.

Aˇ dahˬ 3:19

Miˇ tsaˬ yuˇ-awˇ nawˬ-ahˇ beh taˬ-euˬ loꞈ-ehˇ, miˇ tsaˬ-ahˇ nawˇ maˬ ya gʼoꞈ uˇ-iˇ kʼoeˇ keuˆ ni, nawˇ kʼaˇ ka dzaˬ-eu jeˬ-ahˇ miˇ tsaˬ neh bi dehꞈ doˆ laˇ-awˇ aˇ siˬ aˇ nuiˆ bi nuiˆ laˇ-eu gʼaˇ duˬ, kuˬ pyuˇ kuˬ tsaˇ tsiˇ ni nawˇ ya mˇ sehꞈ leꞈ tehꞈ-a. Miˇ tsaˬ shaˬ jehˆ yuˇ-awˇ nawˬ-ahˇ tehˆ taˬ-euˬ loꞈ-ehˇ, nawˇ miˇ tsaˬ paˇ ya pyeuꞈ kʼoꞈ-iˇ tehꞈ-a” lehˇ ehˇ nehˬ-euˬ meh.

Aˇ dahˬ 35:12

Aˬbyaˬhaˬ hawˇ-eu Iˇtsaˆ-ahˇ ngaˬ neh biꞈ-euˬ miˇ kʼahˬ kʼoeˇ kʼahˬ, nawˇ hawˇ-eu aˬ kaˇ dehꞈ le jawˇ le-eu nawˬ-euˬ zaˬ nawˬ-euˬ uˆ deuˬ-ahˇ ngaˇ biꞈ ma.”

Aˇ dahˬ 46:4

Iˇjiˇtuˆ miˇ kʼahˬ laꞈ kʼoeˇ nawˬ nehˬ-ehˇ ngaˇ iˇ-awˇ, nawˬ-euˬ zaˬ nawˬ-euˬ uˆ deuˬ-ahˇ miˇ kʼahˬ heu kʼahˬ laꞈ kʼoeˇ paˇ sheuˬ kʼoꞈ laꞈ ma. Nawˇ ziˇ jiˇ leˇ ngeh, Yoˇsehˆ nawˬ-ahˇ myaˆ nuiˆ sawˆ miˆ nehˬ laꞈ tehꞈ-a.”

Aˇ dahˬ 47:29

Aˬ yawꞈ ziˇ jiˇ-eu dawˬ peh peh laˇ ngeh, aˬ yawꞈ-euˬ aˬ li Yoˇsehˆ-ahˇ kuˇ-awˇ, heu loꞈ-ehˇ ehˇ nehˬ-euˬ meh. “Nawˬ-euˬ aˬ laꞈ ngaˬ-euˬ shaˬ pyaˬ yaw kaˬ-ahˇ cawˬ ahˇ-awˇ, nawˇ ngaˬ-ahˇ Iˇjiˇtuˆ miˇ kʼahˬ laꞈ kʼoeˇ maˬ baꞈ pahˬ lehˇ saˇ jaˇ dzaˬ-awˬ.

Aˇ dahˬ 48:21

Kʼoeˇ naˇ, Yoˇsehˆ-ahˇ Yaˬkoˆ ehˇ nehˬ-eu, “Nawˇ mawˇ luꞈ-eu loꞈ-ehˇ, ngaˇ ziˇ jiˇ-eu dawˬ peh peh laˇ-euˬ miˇ-a. Ehˇ kʼawꞈ, nawˬ-euˬ aˬ poeˬ aˬ bawˇ deuˬ-euˬ miˇ kʼahˬ-ahˇ, Miˬyehˇ nawˬ-ahˇ sheuˬ kʼoꞈ gʼeh nehˬ laꞈ tehꞈ-a.

Aˇ dahˬ 50:5

‘Ngaˬ da shiˇ-eu lehˇ gʼeh ngeh, Kaˬnaˬ miˇ kʼahˬ laꞈ kʼoeˇ aˬ yawꞈ neh laˆ saˆ taˬ-euˬ lmˬ bymˇ-ahˇ, aˬ yawꞈ-ahˇ baꞈ pahˬ nehˬ-eu gʼaˇ duˬ, ngaˬ-ahˇ saˇ jaˇ bi dzaˬ laꞈ-euˬ meh. Kʼoeˇ miˇ neh, ngaˬ da-ahˇ kʼoeˇ gaˇ bi baꞈ pahˬ leˇ laꞈ-awˬ. Baꞈ pahˬ gʼaˬ naˇ paˇ gʼoꞈ le ma’ lehˇ ehˇ nehˬ leˇ-awˬ.”

Yawˇbaˆ 30:23

Yawˬ gʼaˬ na luꞈ tiˬ poˆ ya uˇ-iˇ-eu jawˇ duˬ pyeuꞈ-eu shiˇ-eu miˇ kʼahˬ-ahˇ nawˇ ngaˬ-ahˇ yuˇ gʼeh luꞈ-eu ngaˇ siˬ nya ma.

Doˆ-iˇ 12:41

Oeˬ yaˇ smˬ tseˇ kʼoꞈ byah laˇ ngeh nah, Sahˬpaˬ Miˬyehˇ-euˬ tsawˇ haˬ pyeuꞈ-eu Iˇsaˬleˬlaˆ tsawˇ jeuˬ tsawˇ ca dawˬ tawˆ luꞈ, Iˇjiˇtuˆ miˇ kʼahˬ laꞈ kʼoeˇ neh doˆ-iˇ-euˬ meh.

Doˆ-iˇ 12:51

Kʼoeˇ ngeh nah laꞈ kʼoeˇ, Sahˬpaˬ Miˬyehˇ Iˇsaˬleˬlaˆ tsawˇ haˬ deuˬ-ahˇ Iˇjiˇtuˆ miˇ kʼahˬ laꞈ kʼoeˇ neh sheuˬ doˆ nehˬ-euˬ meh.

Doˆ-iˇ 13:19

Yoˇsehˆ neh Iˇsaˬleˬlaˆ tsawˇ haˬ deuˬ-ahˇ, aˬ yawꞈ neh ehˇ-euˬ loꞈ-ehˇ mˇ ma lehˇ saˇ jaˇ bi dzaˬ-euˬ loꞈ-ehˇ, Moˇseˬ-aˬ, Yoˇsehˆ-euˬ gʼawˇ mawˇ-ahˇ aˬ yawꞈ nehˬ-ehˇ yuˇ gʼeh-euˬ meh. “Miˬyehˇ naw maꞈ-ahˇ ka kʼoꞈ le ngeh, ngaˬ-euˬ gʼawˇ mawˇ-ahˇ, miˇ kʼahˬ heu kʼahˬ laꞈ kʼoeˇ neh naw maꞈ ya yuˇ doˆ gʼeh meh” lehˇ, Yoˇsehˆ neh ehˇ taˬ yaꞈ-euˬ jaˆ-eu meh.

Doˆ-iˇ 3:8

Kʼoeˇ miˇ neh, aˬ yawꞈ maꞈ-ahˇ Iˇjiˇtuˆ miˇ kʼahˬ laꞈ kʼoeˇ neh sheuˬ doˆ-awˇ, Kaˬnaˬ tsawˇ jeuˬ, Heˬtaˆ tsawˇ jeuˬ, Aˬmawˇliˆ tsawˇ jeuˬ, Paˬyehˆ tsawˇ jeuˬ, Hiˇbiˇ tsawˇ jeuˬ hawˇ-eu Yeˬbuˇ tsawˇ jeuˬ heu deuˬ jawˇ luꞈ-eu miˇ tsaˬ miˇ muiˬ muiˬ dui dui-awˇ baw le za le-eu, byaˬ byaˬ uiˇ hawˇ-eu mawˇ neˇ aˬ coeˇ maˬ tsehˆ-iˇ ni yoeˇ luꞈ-eu jeˇ lo ni gʼeh-eu miˇ kʼahˬ-ahˇ, aˬ yawꞈ maꞈ-ahˇ sheuˬ doˆ gʼeh-eu gʼaˇ duˬ, ngaˇ zaꞈ ka le-euˬ ma.

Doˆ-iˇ 33:1

Moˇseˬ-ahˇ Sahˬpaˬ Miˬyehˇ ehˇ nehˬ-eu, “Nawˇ hawˇ-eu nawˬ neh Iˇjiˇtuˆ miˇ kʼahˬ laꞈ kʼoeˇ neh sheuˬ doˆ laꞈ-euˬ tsawˇ haˬ deuˬ, jawˇ duˬ heu tsahˇ-ahˇ neh doˆ-iˇ-awˇ, Aˬbyaˬhaˬ, Iˇtsaˆ, Yaˬkoˆ hawˇ-eu aˬ yawꞈ maꞈ-euˬ zaˬ deuˬ uˆ deuˬ-ahˇ biꞈ ma lehˇ ngaˬ neh saˇ jaˇ dzaˬ taˬ-euˬ miˇ kʼah kʼoeˇ kʼahˬ-ahˇ le-awˬ.

Doˆ-iˇ 4:31

Kʼoeˇ ngeh, tsawˇ haˬ kʼoeˇ deuˬ jah laˇ-awˇ, Iˇsaˬleˬlaˆ tsawˇ haˬ deuˬ jawˇ gaˇ Sahˬpaˬ Miˬyehˇ oe-awˇ, aˬ yawꞈ maꞈ ya daˬ luꞈ-eu jeˬ-ahˇ mawˇ gʼaˬ-euˬ gaˇ kawˆ ya gaˬ ngeh, aˬ yawꞈ maꞈ miˇ tsaˬ-ahˇ awˆ byaˆ-awˇ, Sahˬpaˬ Miˬyehˇ-ahˇ uˬ duˬ tahˬ-euˬ meh.

Dawˬ tsoˆ 12:5

Yaw goˇ-ahˇ nawˇ maˬ daˆ peuˬ-ehˇ, nawˇ gaˇ ma cah-eu kʼahˬ lahˇ paˬ-ehˇ pyeuꞈ-iˇ tehꞈ-a. Nawˬ-euˬ uˬ duˬ pyuˇ le-awˇ, yawˬ ha-euˬ gʼawˇ mawˇ maˬ laˆ luˆ coeˇ-eu uˬ taꞈ, nui kʼahˇ dawˬ tawˆ luꞈ byoˆ jiˇ tehꞈ-a. Aˇ saˬ saˬ-eu naˬ duˬ-ahˇ aˬ dui le luꞈ-awˇ, poˆ kaˬ lehˆ kawˆ-ahˇ tsawˇ ngoeˇ ngoeˇ-eu teˇ saˇ gaˬ doˆ laˇ tehꞈ-a.

Dawˬ tsoˆ 12:7

Aˬ dui-euˬ gʼawˇ mawˇ miˇ tsaˬ-ahˇ gʼoꞈ kʼoꞈ-iˇ-awˇ, aˬ duiˬ-euˬ saꞈ laˇ-aˬ, dehꞈ-eu saꞈ laˇ biꞈ-eu yaw sahˇ pyeuꞈ-eu Miˬyehˇ jawˇ gaˇ gʼoꞈ leˇ tehꞈ-a. Aˇ yamˬ kʼoeˇ yamˬ maˬ keuˆ le mi naˆ-ehˇ, Miˬyehˇ-euˬ guiˬ lahˬ-ahˇ noeˬ keuˆ-awˬ.

Bawˇtsahˬ 32:11

Aˬ yawꞈ maꞈ ngaˬ-ahˇ saˇ jaˇ maˬ ziꞈ-eu miˇ neh, Iˇjiˇtuˆ miˇ kʼahˬ laꞈ kʼoeˇ neh kʼaˇ doˆ le-euˬ tsawˇ haˬ deuˬ laꞈ kʼoeˇ, nyiˬ tseˇ kʼoꞈ-ahˇ neh laꞈ taˆ paw-euˬ tsawˇ haˬ deuˬ tiˬ gʼaˬ-iˬ, Aˬbyaˬhaˬ, Iˇtsaˆ hawˇ-eu Yaˬkoˆ-ahˇ ngaˬ neh saˇ jaˇ dzaˬ taˬ-euˬ miˇ kʼahˬ laꞈ kʼoeˇ maˬ ya le uˇ-a lehˇ ngaˇ kamˬ-eu ma lehˇ ehˇ tsehˆ-euˬ meh.

Lormav 5:12

Tsawˇ haˬ tiˬ gʼaˬ baˬ da neh miˇ tsaˬ kʼoeˇ taˆ iˬ baˇ keuˆ le-awˇ, iˬ baˇ kʼoeˇ baˬ da neh shiˇ-eu jeˬ keuˆ le-euˬ meh. Shiˇ-eu jeˬ kʼoeˇ, tsawˇ haˬ zaˬ dawˬ tawˆ luꞈ kʼoeˇ taˆ keuˆ le-euˬ meh. Aˬ jeˬ miˇ neh ehˇ ehˇ naˇ, tsawˇ haˬ zaˬ yawˬ gʼaˬ na luꞈ iˬ baˇ mˇ-euˬ meh.

Dawˬmehˬ 1:8

Miˇ kʼahˬ heu dawˬ tawˆ luꞈ, naw maꞈ-euˬ aˬ poeˬ aˬ bawˇ deuˬ pyeuꞈ-eu Aˬbyaˬhaˬ, Iˇtsaˆ hawˇ-eu Yaˬkoˆ-ahˇ maˬ ehˇ, aˬ yawꞈ maꞈ-euˬ zaˬ deuˬ uˆ deuˬ-ahˇ maˬ ehˇ, biꞈ ma lehˇ Sahˬpaˬ Miˬyehˇ pyeuꞈ-eu ngaˇ saˇ jaˇ dzaˬ taˬ-euˬ ma. Naw maꞈ iˇ-awˇ kʼoeˇ gaˇ jawˇ-iˇ-awˬ’ lehˇ ehˇ-eu meh.”

Dawˬmehˬ 6:10

“Naw maꞈ-euˬ aˬ poeˬ aˬ bawˇ deuˬ pyeuꞈ-eu Aˬbyaˬhaˬ, Iˇtsaˆ, Yaˬkoˆ, aˬ ha maꞈ-ahˇ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ neh saˇ jaˇ dzaˬ taˬ-euˬ loꞈ-ehˇ, naw maꞈ neh maˬ tsoˆ-euˬ, dzaˬ ngeh maˬ jiˇ dawˇ ngeh maˬ shuꞈ-eu meuˬ meuˬ ma deuˬ jaˆ-eu miˇ kʼahˬ, naw maꞈ-ahˇ aˬ yawꞈ biꞈ nehˬ laꞈ tehꞈ-a.

HeˬByehˇ 11:22

Yoˇsehˆ saꞈ maˬ gʼawˇ li mi naˆ-ehˇ, Iˇsaˬleˬlaˆtsawˇ haˬ deuˬ Iˇjiˇtuˆ miˇ kʼahˬ laꞈ kʼoeˇ neh ya doˆ-iˇ-eu gaˇ kawˆ ehˇ taˬ yaꞈ-awˇ, aˬ yawꞈ-ahˇ aˬ joˆ-ehˇ ya baꞈ pahˬ-eu gaˇ kawˆ mehˬ taˬ yaꞈ-euˬ kʼoeˇ-aˬ, jah-eu jeˬ baˬ da neh meh.

HeˬByehˇ 9:27

Tsawˇ haˬ yawˬ gʼaˬ na luꞈ tiˬ poˆ ya shiˇ-awˇ, shiˇ gʼaˬ ngeh Miˬyehˇ neh yaˇ kʼaˬ ya bi daˇ tehꞈ-a.

Yawˇshuˆ 24:32

Iˇjiˇtuˆ miˇ kʼahˬ-ahˇ neh, Iˇsaˬleˬlaˆ tsawˇ haˬ deuˬ neh baꞈ laꞈ-euˬ Yoˇsehˆ-euˬ gʼawˇ mawˇ-ahˇ, Sheˬkmˬ-euˬ aˬ da Haˬmawˬ-euˬ aˬ li deuˬ-euˬ laꞈ-ahˇ neh, pyuˇ maˇ byaˆ tiˬ yaˇ byaˆ biꞈ-awˇ Yaˬkoˆ neh zeuˇ-euˬ Sheˬkmˬ meuˬ-ahˇ jaˆ-eu miˇ tsaˬ kʼoeˇ tsahˇ-ahˇ baꞈ pahˬ-euˬ meh. Miˇ tsaˬ kʼoeˇ tsahˇ-aˬ, Yoˇsehˆ-euˬ zaˬ deuˬ uˆ deuˬ za-euˬ jeˬ biˇ pyeuꞈ-eu meh.