Aˇ dahˬ 37:8 - Akha

⁸ Aˬ yawꞈ-euˬ aˇ doˆ deuˬ ehˇ-eu, “Aˬ kaˇ nga maꞈ kʼoeˇ taˆ nawˇ sahˬ paˬ ya geuꞈ tehꞈ-a lehˇ noeˬ luꞈ te loˇ.” Aˬ yawꞈ yuꞈ maˆ kʼoeˇ loꞈ-ehˇ maˆ-euˬ miˇ neh maˬ ehˇ, yuꞈ maˆ maˆ-euˬ gaˇ kawˆ kʼoeˇ aˬ yawꞈ maꞈ-ahˇ dzawˇ nehˬ leˇ-euˬ miˇ neh maˬ ehˇ, Yoˇsehˆ-ahˇ aˬ yawꞈ maꞈ paˇ bye dzehˬ laˇ-euˬ meh.

Aˇ dahˬ 37:8 ပူးပေါင်းရင်းမြစ်များ

Aˇ dahˬ 27:41

Iˇtsaˆ neh Yaˬkoˆ-ahˇ dawˬ ngehˬ gʼeh nehˬ-euˬ miˇ neh, Yaˬkoˆ-ahˇ Iˇsawˇ muiˇ-eu meh. Iˇsawˇ-euˬ nui ma laꞈ kʼoeˇ, “Ngaˬ da ziˇ jiˇ-eu dawˬ peh peh laˇ-euˬ meh. Haw taˬ lawˬ. Zaˬ heu gʼaˬ-ahˇ ngaˇ sehꞈ ma” lehˇ noeˬ luꞈ-eu meh.

Aˇ dahˬ 37:4

Aˬ da gʼaˬ Yoˇsehˆ-ahˇ gaˬ dzehˬ gaˇ Yoˇsehˆ-euˬ aˇ doˆ deuˬ ya mawˇ ngeh, Yoˇsehˆ-ahˇ bye-awˇ, dawˬ yaw muiˬ paˬ-ehˇ maˬ ngehˬ cawˬ nehˬ ni jawˇ-euˬ meh.

Aˇ dahˬ 37:9

Aˬ yawꞈ yuꞈ maˆ tiˬ poˆ paˇ maˆ-awˇ, aˬ yawꞈ-euˬ aˇ doˆ deuˬ-ahˇ paˇ dzawˇ nehˬ-euˬ meh. “Ngaˇ yuꞈ maˆ tiˬ poˆ paˇ maˆ-eu laꞈ kʼoeˇ, nahˇ ma, ba la hawˇ-eu, aˬ guiˇ tseˇ tiꞈ siˬ ngaˬ-ahˇ uˬ duˬ tahˬ le-euˬ meh” lehˇ dzawˇ nehˬ-euˬ meh.

Aˇ dahˬ 42:10

Aˬ ha mehˇ nmˇ ehˇ-eu, “Sahˬ paˬ-oˇ, nga maꞈ naw maꞈ-euˬ miˇ kʼahˬ-ahˇ kʼoeˬ sho haw le-euˬ tsawˇ haˬ maˬ ngeuˇ. Nga maꞈ-aˬ, nawˬ-euˬ zaˬ kʼaˆ loꞈ-ehˇ gʼeh-eu tsawˇ haˬ pyeuꞈ-awˇ, cehˇ zeuˇ dzaˬ le-eu oe-euˬ tehꞈ ma.

Aˇ dahˬ 44:18

Yoˇsehˆ-euˬ dawˬ peh Yuˇdaˆ jiˆ peh leˇ-awˇ, heu loꞈ-ehˇ ehˇ nehˬ-euˬ meh. “Sahˬ paˬ-oˇ, ngaˬ-ahˇ gʼawˬ shaˬ gaˬ nehˬ laꞈ-eu laꞈ kʼoeˇ, nawˬ nehˬ-ehˇ bya cehˆ ni dawˬ tiˬ poˆ bi ngehˬ cawˬ nehˬ laꞈ sheˇ. Nawˇ-aˬ, Iˇjiˇtuˆ sahˬpaˬ loꞈ-ehˇ huiˬ-eu tsawˇ haˬ tiˬ gʼaˬ pyeuꞈ-eu meh. Ehˇ kʼawꞈ, ngaˬ-ahˇ nui ma taˬ pehˇ nehˬ laꞈ.

Aˇ dahˬ 49:26

Aˇ siˬ hawˇ-eu aˇ yehˆ guiˬ lahˬ biꞈ laꞈ tehꞈ-a. Aˇ hu ba neh jaˆ-eu gawˬ jawˬ gawˬ duˇ deuˬ pyeuꞈ-eu, Mˬ maˬ maˬ byaˆ zaˇ ziˇ ziꞈ-eu gawˬ jawˬ gawˬ duˇ deuˬ laꞈ kʼoeˇ jaˆ luꞈ-eu muiˬ-eu guiˬ lahˬ deuˬ hawˇ-eu Nui kʼahˇ shiˇ dui dui paˬ-ehˇ gʼeh-eu jeˬ dawˬ tawˆ luꞈ biꞈ nehˬ laꞈ tehꞈ-a. Guiˬ lahˬ yaw dzahˇ heu deuˬ dawˬ tawˆ luꞈ, Aˬ yawꞈ-euˬ mehˇ nmˇ deuˬ-ahˇ maˬ taꞈ-eu Yoˇsehˆ-euˬ uˬ duˬ naˇ kʼawˇ kʼoeˇ taˆ keuˆ le luꞈ-uˇ.

Aˇ dahˬ 50:18

Kʼoeˇ naˇ, aˬ yawꞈ-euˬ aˇ doˆ deuˬ oe-awˇ, aˬ yawꞈ-euˬ mehˬ shi awˆ byaˆ-eu laꞈ kʼoeˇ, “Nawˬ-euˬ zaˬ kʼaˆ pyeuꞈ-eu ngaˬ ha mehˇ nmˇ nawˬ-euˬ mehˬ shi oe keuˆ taˬ-euˬ ma.”

Jaceuq 118:22

Nymˇ tsoˆ-eu deuˬ neh tseˇ dzeh-euˬ kʼaˬ lo tsaˬ byaˆ, laꞈ coeˇ-ahˇ gawˬ gaˇ zmˬ-eu, aˇ poeˬ kʼaˆ dzehˬ-eu kʼaˬ lo pyeuꞈ laˇ-euˬ meh.

Doˆ-iˇ 2:14

Tsawˇ haˬ kʼoeˇ gʼaˬ ehˇ-eu, “Nga maꞈ kʼoeˇ taˆ aˬ yuiꞈ aˬ tsu geuꞈ-awˇ, yaˇ kʼaˬ bi daˇ-eu gʼaˇ duˬ, aˬ suˇ gʼaˬ nawˬ-ahˇ tseˇ doˆ taˬ ta. Iˇjiˇtuˆ tsawˇ haˬ kʼoeˇ gʼaˬ-ahˇ sehꞈ-euˬ loꞈ-ehˇ, ngaˬ-ahˇ nawˇ paˇ sehꞈ-eu gʼeh te loˇ.” Kʼoeˇ ngeh, Moˇseˬ guˆ laˇ-awˇ, “Ngaˬ neh mˇ-euˬ jeˬ aˬ cawˬ siˬ nya jiˇ-euˬ ngaˇ” lehˇ yawˬ haˇ yawˬ ha ehˇ-euˬ meh.

Luˇkaꞈ 19:14

Ehˇ kʼawꞈ, aˬ yawꞈ-euˬ miˇ kʼahˬ zaˬ deuˬ aˬ yawꞈ-ahˇ bye-awˇ, aˬ yawꞈ-euˬ mehˬ nah tsawˇ haˬ pyehˬ gʼeh-awˇ heu loꞈ-ehˇ bi tsaꞈ gaꞈ-iˇ-euˬ meh. ‘Tsawˇ haˬ heu gʼaˬ-ahˇ nga maꞈ kʼoeˇ taˆ sahˬ paˬ geuꞈ-awˇ maˬ bi uˆ lahˇ mawꞈ nya.’

Luˇkaꞈ 20:17

Yeˬsuˇ aˬ yawꞈ maꞈ-ahˇ haw-awˇ ehˇ-eu, “Toˆ-ehˇ maˇ-iˬ, Jaˇliꞈ laꞈ kʼoeˇ heu loꞈ-ehˇ boꞈ taˬ-euˬ kʼoeˇ, aˬ jeˬ-ahˇ ehˇ mawꞈ ta. ‘Nymˇ gawˬ-eu deuˬ maˬ geuꞈ nahˇ-ehˇ, baꞈ dzeh taˬ-euˬ kʼaˬ lo kʼoeˇ siˬ, kʼaˬ lo dawˬ tawˆ maˬ tseˇ poeˬ-eu, laꞈ coeˇ lo ziꞈ pyeuꞈ laˇ-euˬ meh.’

Gʼaˬkʼehˇ 7:35

“‘Nga maꞈ kʼoeˇ taˆ uˆ lahˇ-awˇ yaˇ kʼaˬ bi daˇ-eu lehˇ, aˬ suˇ gʼaˬ nawˬ-ahˇ kʼehˇ taˬ ta’ lehˇ, aˬ yawꞈ maꞈ neh ehˇ nehˬ-awˇ byehˇ dzeh nehˬ-euˬ Moˇseˬ kʼoeˇ gʼaˬ-aˬ, aˬ yawꞈ-euˬ mehˬ shi baw duˆ laꞈ kʼoeˇ ya mawˇ-euˬ mˬ taˆ gʼaˬ kʼehˇ neh bi caw ba-eu laꞈ kʼoeˇ, aˬ yawꞈ maꞈ-ahˇ bi uˆ lahˇ-awˇ bi ka kʼoꞈ-eu gʼaˇ duˬ Miˬyehˇ neh kʼehˇ leꞈ-euˬ Moˇseˬ pyeuꞈ-eu meh.

Dawˬmehˬ 33:16

Miˬ dzaˬ doꞈ-eu baw duˆ laꞈ kʼoeˇ, dawˬ ngehˬ-euˬ Sahˬpaˬ Miˬyehˇ neh, sehˬ-euˬ lawˇ-euˬ muiˬ-eu guiˬ lahˬ, yawꞈ maꞈ miˇ kʼahˬ-ahˇ byah luꞈ-uˇ. Mehˇ nmˇ dawˬ tawˆ luꞈ-euˬ kʼoeˇ taˆ, aˬ yawꞈ aˬ yuiꞈ geuꞈ-euˬ miˇ neh, Yoˇsehˆ tsawˇ jeuˬ heu jeuˬ kʼoeˇ taˆ, guiˬ lahˬ kʼoeˇ deuˬ keuˆ le luꞈ-uˇ.

HeˬByehˇ 10:29

Toˆ-ehˇ ngeuˇ naˇ, Miˬyehˇ-euˬ Zaˬ maˇ-ahˇ nawˬ tehˬ taˬ-awˇ, yawˬ ha-euˬ iˬ baˇ-ahˇ shawˇ nehˬ-euˬ Miˬyehˇ-euˬ dawˬ ma saˇ jaˇ shiˬ-ahˇ poeˬ sawˇ lawˬ maˬ baw-eu loꞈ-ehˇ sawˇ-awˇ, Miˬyehˇ gʼawˬ shaˬ gaˬ-eu guiˬ lahˬ yaw dzahˇ mehˬ nehˬ laꞈ-euˬ Yaw sahˇ Miˬyehˇ-ahˇ yehˬ bawˬ sehˇ lu-ehˇ ehˇ-eu tsawˇ haˬ-aˬ, aˇ naˆ ni doeˇ dzehˬ-eu kʼehˬ-eu kʼaˆ-eu jeˬ-ahˇ ya daˬ nmˇ lehˇ shaˇ noeˬ haw-awˬ.

1 Saˬmeuˬlaˆ 10:27

Ehˇ kʼawꞈ, gaˇ dahˇ maˬ tsoeˬ-eu tsawˇ haˬ tiˬ paˆ na deuˬ aˬ yawꞈ-ahˇ yaw zeu maˬ baw-ehˇ, “Tsawˇ haˬ heu gʼaˬ aˬ dui-ahˇ muiˬ laˇ ni tiˬ jeˬ-iˬ maˬ mˇ nya luꞈ-a” lehˇ ehˇ-awˇ, aˬ yawꞈ-ahˇ laꞈ sawˬ tiˬ jeˬ-iˬ maˬ biꞈ leˇ ni jawˇ-eu meh.

1 Saˬmeuˬlaˆ 17:28

Tsawˇ haˬ kʼoeˇ deuˬ nehˬ-ehˇ Daˬbiˇ kʼoeˇ loꞈ-ehˇ ngehˬ cawˬ luꞈ gaˇ, Daˬbiˇ-euˬ aˇ doˆ aˬ yuiꞈ yuiꞈ saˬ gʼaˬ pyeuꞈ-eu Eˇliˇbaˆ gʼaˬ ya gaˬ ngeh, Daˬbiˇ-ahˇ nui ma pehˇ laˇ-awˇ, heu loꞈ-ehˇ dehˬ-euˬ meh. “Nawˇ heu gaˇ aˬ jeˬ gʼeh laˇ teˬ. Bawˇ tsahˬ bawˇ dahˇ-ahˇ bi jawˇ-euˬ yawˇ kʼoeˇ deuˬ-ahˇ aˬ suˇ gʼaˬ bi haw yaꞈ teˬ. Zaˬ zaˬ uˬ zaˬ dawˆ nawˇ. Aˬ cawˬ guiˇ deuˆ gaˇ haw laˇ-eu lehˇ laˇ-euˬ maˬ ngeuˇ loˇ teu.”

1 Saˬmeuˬlaˆ 18:8

Kʼoeˇ loꞈ-ehˇ caˇ gaˇ Sawˇluˆ maˬ naˇ haˬ nahˇ-ehˇ, nui ma pehˇ laˇ-euˬ meh. Aˬ yawꞈ ehˇ-eu, “Daˬbiˇ-ahˇ aˇ muiˇ gʼaˬ lehˇ aˬ yawꞈ maꞈ ehˇ-awˇ, ngaˬ-ahˇ aˇ heˇ gʼaˬ lehˇ tehꞈ-ehˇ aˬ yawꞈ maꞈ ehˇ-eu meh. Aˬ yawꞈ maꞈ aˬ yawꞈ-ahˇ sahˬ paˬ bi geuꞈ-eu lehˇ gʼeh-eu nga.”