Ngaˇ hawˇ-eu naw maꞈ-euˬ yaw kaˬ-ahˇ dzaˬ taˬ-euˬ dawˬ ma saˇ jaˇ heu hmˬ gaˇ kawˆ saˇ kiˇ pyeuꞈ-eu gʼaˇ duˬ, naw maꞈ baˆ kʼoˆ mehˬ dzaˬ ya yehˬ meh. Aˬ kaˇ naˇ, kʼaˇ dehꞈ le-eu aˬ li yawˬ gʼaˬ na luꞈ-ahˇ, dehꞈ le gʼaˬ-awˇ yehꞈ nah byah laˇ naˇ, baˆ kʼoˆ mehˬ dzaˬ ya yehˬ nehˬ meh. Nawˬ-euˬ nymˇ laꞈ kʼoeˇ dehꞈ le-euˬ zaˬ kʼaˆ deuˬ hawˇ-eu, nawˬ neh zeuˇ tsehˆ taˬ-euˬ boeˇ miˬ siˬ kʼaˬ zaˬ kʼaˆ deuˬ kʼawꞈ, baˆ kʼoˆ mehˬ dzaˬ ya yehˬ meh.
Aˇ dahˬ 17:10 - Akha10 Nawˇ maˬ ehˇ, nawˬ-euˬ zaˬ nawˬ-euˬ uˆ deuˬ laꞈ kʼoeˇ kʼaˬ dzeˇ zaˬ kʼaˇ ngeuˇ-eu deuˬ dawˬ tawˆ luꞈ maˬ ehˇ, baˆ kʼoˆ mehˬ dzaˬ yehˬ ma lehˇ ya noeˬ tsehˆ meh. အခန်းကိုကြည့်ပါ။ |
Aˇ dahˬ 17:10
29 ပူးပေါင်းရင်းမြစ်များ
Kʼoeˇ ngeh nah laꞈ kʼoeˇ, Miˬyehˇ-euˬ ehˇ dawˬ-ahˇ Aˬbyaˬhaˬ naˇ haˬ geuꞈ-awˇ, aˬ yawꞈ-euˬ aˬ li Iˇshaˬmeˬlaˇ hawˇ-eu, aˬ yawꞈ-euˬ nymˇ laꞈ kʼoeˇ kʼaˇ jawˇ-eu kʼaˬ dzeˇ zaˬ dawˬ tawˆ luꞈ-ahˇ baˆ kʼoˆ mehˬ dzaˬ yehˬ-euˬ meh. Aˬ yawꞈ-euˬ nymˇ laꞈ kʼoeˇ dehꞈ le-euˬ zaˬ kʼaˆ deuˬ-ahˇ maˬ ehˇ, aˬ yawꞈ neh zeuˇ tsehˆ taˬ-euˬ zaˬ kʼaˆ deuˬ-ahˇ maˬ ehˇ, baˆ kʼoˆ mehˬ dzaˬ yehˬ nehˬ-euˬ meh.
Ehˇ kʼawꞈ, baˆ kʼoˆ mehˬ dzaˬ maˬ yehˬ-euˬ tsawˇ haˬ deuˬ, Bawˬ-iˬ heu hmˬ dzaˬ gaˇ maˬ ya uˇ leˇ-a. Aˬ cawˬ tsawˇ jeuˬ tiˬ gʼaˬ na, naw maꞈ nehˬ-ehˇ jawˇ myahˇ laꞈ-awˇ, Sahˬpaˬ Miˬyehˇ-ahˇ taˬ huiˬ taˬ mahˇ-eu gʼaˇ duˬ, Baˬsaˬkaˬ bawˬ-iˬ dzaˬ gaˇ uˇ leˇ mawꞈ naˇ, aˬ yawꞈ-euˬ nymˇ jiˇ laꞈ kʼoeˇ kʼaˇ jawˇ-eu kʼaˬ dzeˇ zaˬ dawˬ tawˆ luꞈ-ahˇ baˆ kʼoˆ mehˬ dzaˬ jeˬ huˬ yehˬ nehˬ-awˬ. Kʼoeˇ naˇ, naw maꞈ jawˇ gaˇ dehꞈ le-euˬ Iˇsaˬleˬlaˆ tsawˇ haˬ tiˬ gʼaˬ loꞈ-ehˇ aˬ yawꞈ-ahˇ sawˇ nehˬ-awˇ, bawˬ-iˬ dzaˬ gaˇ bi uˇ leˇ nya tehꞈ-a. Ehˇ kʼawꞈ, baˆ kʼoˆ mehˬ dzaˬ maˬ yehˬ-euˬ tsawˇ haˬ aˬ geu gʼaˬ maˬ kaˬ, bawˬ-iˬ heu hmˬ dzaˬ gaˇ maˬ ya uˇ leˇ-a.
Kʼoeˇ ngeh, aˬ yawꞈ-euˬ nymˇ dahˬ Ziˬpoˇlaˬ-aˬ, mi cehˇ mi seuˬ loꞈ-ehˇ taˆ-eu kʼaˬ lo lo pyehˬ neh aˬ yawꞈ-euˬ aˬ li-ahˇ baˆ kʼoˆ mehˬ dzaˬ yehˬ-awˇ, Moˇseˬ-euˬ aˬ kuiˇ-ahˇ baˆ kʼoˆ mehˬ dzaˬ kʼoeˇ neh toeˬ ciˆ-awˇ, “Aˬ diˇ aˬ maˇ nawˇ-aˬ, shiˬ-ahˇ taꞈ leˇ-eu ngaˬ-euˬ kʼaˬ dzeˇ zaˬ pyeuꞈ-eu ma” lehˇ ehˇ-eu meh. Kʼoeˇ naˇ, Sahˬpaˬ Miˬyehˇ Moˇseˬ-ahˇ maˬ sehꞈ ni byehˇ-euˬ meh.
Yuˇdaˆ miˇ kʼahˬ hawˇ-eu Yeˬluˇsaˬlehˬ meuˬ-ahˇ jawˇ-eu deuˬ-oˇ, naw maꞈ-euˬ Sahˬpaˬ Miˬyehˇ pyeuꞈ-eu ngaˬ nehˬ-ehˇ, dawˬ ma saˇ jaˇ dzaˬ-awˇ gʼawˇ mawˇ a nehˬ laꞈ-awˬ. Naw maꞈ kʼoeˇ loꞈ-ehˇ maˬ jahˇ naˇ, naw maꞈ neh mˇ-euˬ yaw haiˬ jeˬ baˬ da, ngaˇ nui ma pehˇ-eu jeˬ miˬ dzaˬ doꞈ doˆ laˇ-awˇ, laˆ miˆ nya-eu gʼaˬ maˬ jawˇ-a.”
(Baˆ kʼoˆ mehˬ dzaˬ yehˬ-eu zahˇ-ahˇ Moˇsehˬ neh mˇ dahˬ beh-euˬ maˬ ngeuˇ-ehˇ, aˬ yawꞈ-euˬ mehˬ hu dehꞈ dzeuˇ yaꞈ-euˬ naw maꞈ-euˬ aˬ poeˬ aˬ bawˇ deuˬ neh mˇ dahˬ beh-euˬ kʼawꞈ,) naw maꞈ-euˬ aˬ li deuˬ-ahˇ baˆ kʼoˆ mehˬ dzaˬ yehˬ-eu gʼaˇ duˬ Moˇseˬ neh dawˬ biꞈ taˬ yaꞈ-euˬ miˇ neh, Jawˇ nah ngeh nah naw maꞈ-euˬ aˬ li deuˬ-ahˇ naw maꞈ baˆ kʼoˆ mehˬ dzaˬ yehˬ-eu meh.
Kʼoeˇ naˇ, Miˬyehˇ neh Aˬbyaˬhaˬ-ahˇ baˆ kʼoˆ mehˬ dzaˬ yehˬ-eu zahˇ bi jahˇ-eu laꞈ kʼoeˇ, dawˬ ma saˇ jaˇ dzaˬ-euˬ meh. Kʼoeˇ miˇ neh, Iˇtsaˆ dehꞈ le-awˇ tiˬ jaw byah laˇ ngeh, Aˬbyaˬhaˬ neh aˬ yawꞈ-euˬ aˬ li Iˇtsaˆ-ahˇ baˆ kʼoˆ mehˬ dzaˬ yehˬ nehˬ-euˬ meh. Kʼoeˇ loꞈ-ehˇ duˇ ni, Iˇtsaˆ gʼeh, aˬ yawꞈ-euˬ aˬ li Yaˬkoˆ-ahˇ baˆ kʼoˆ mehˬ dzaˬ yehˬ nehˬ-euˬ meh. Yaˬkoˆ gʼeh, aˬ yawꞈ-euˬ aˬ li tseˇ nyiꞈ li-ahˇ baˆ kʼoˆ mehˬ dzaˬ yehˬ nehˬ-euˬ meh. Aˬ li kʼoeˇ tseˇ nyiꞈ liˬ-aˬ, aˬ dui tsawˇ jeuˬ-euˬ tsawˇ myahˇ doˆ-eu aˬ poeˬ deuˬ pyeuꞈ-eu meh.
Aˬ yawꞈ shiˇ dah-euˬ baˬ da neh tsawˇ haˬ zaˬ deuˬ aˬ yawꞈ-ahˇ jah-eu laꞈ kʼoeˇ Miˬyehˇ iˬ baˇ pyehˬ nehˬ-eu jeˬ-ahˇ za nya ni, Miˬyehˇ neh aˬ yawꞈ-ahˇ tsawˇ haˬ zaˬ deuˬ gʼaˇ duˬ biꞈ leꞈ-euˬ meh. Kʼoeˇ-aˬ, Miˬyehˇ-euˬ yaw tsaˬ yaw dawˇ jeˬ bi mawˇ ni mˇ-euˬ jeˬ pyeuꞈ-eu meh. Dzeuˇ laˇ ngeh aˬ yawꞈ nui ma gʼawˬ mahˇ ni taˬ-awˇ, tsawˇ haˬ zaˬ-euˬ iˬ baˇ-ahˇ haw dzeuˇ nehˬ-euˬ meh.
Kʼoeˇ miˇ neh, dehꞈ le ngeh neh Yuˇdaˆ tsawˇ haˬ maˬ ngeuˇ-eu naw maꞈ-ahˇ, Yuˇdaˆ tsawˇ haˬ deuˬ neh “baˆ kʼoˆ mehˬ dzaˬ maˬ yehˬ-euˬ tsawˇ haˬ” lehˇ bi kuˇ-awˇ, Yuˇdaˆ tsawˇ haˬ deuˬ yawˬ haˇ yawˬ ha “baˆ kʼoˆ mehˬ dzaˬ yehˬ-euˬ tsawˇ haˬ deuˬ” lehˇ kuˇ-euˬ gaˇ taˬ ngehˇ. (Dawˬ kʼoeˇ dawˬ-aˬ, tsawˇ haˬ zaˬ neh shiˬ shaˬ jiˇ gʼawˇ mawˇ-ahˇ mˇ-euˬ jeˬ-ahˇ ehˇ mawꞈ-eu meh.)
Dawˇ coe ni ya ehˇ naˇ, maˇ maˇ ni baˆ kʼoˆ mehˬ dzaˬ yehˬ-euˬ tsawˇ haˬ deuˬ-aˬ, aˬ yawꞈ maꞈ maˬ ngeuˇ-a. Aˬ dui maꞈ ma. Aˬ jeˬ miˇ neh ehˇ naˇ, Yaw sahˇ Miˬyehˇ-ahˇ gʼoe-eu laꞈ kʼoeˇ Miˬyehˇ-ahˇ aˬ dui u duˬ tahˬ-awˇ, Yeˬsuˇ Ka li laꞈ kʼoeˇ yaw dehꞈ dehꞈ-eu jeˬ-ahˇ aˬ dui laˬ kʼaˬ cehˇ-eu ma. Laꞈ nyiˇ paw mˇ mawˇ nya-eu zahˇ sahˇ kʼoꞈ deuˬ-ahˇ aˬ dui gʼoe-eu maˬ ngeuˇ.
Iˇsaˬleˬlaˆ tsawˇ haˬ deuˬ Iˇjiˇtuˆ miˇ kʼahˬ-ahˇ neh doˆ laˇ ngeh, kʼaˬ dzeˇ zaˬ dawˬ tawˆ luꞈ baˆ kʼoˆ mehˬ dzaˬ yehˬ gʼaˬ-euˬ meh. Ehˇ kʼawꞈ, Iˇsaˬleˬlaˆ tsawˇ haˬ deuˬ bawˇ tsahˬ bawˇ dahˇ-ahˇ cah luꞈ-eu oeˬ tseˇ kʼoꞈ aˇ yamˬ laꞈ kʼoeˇ dehꞈ le-euˬ aˬ li tiˬ gʼaˬ-iˬ baˆ kʼoˆ mehˬ dzaˬ maˬ yehˬ-aˬ siˬ. Aˇ yamˬ kʼoeˇ yamˬ jiˇ le ngeh, Iˇjiˇtuˆ miˇ kʼahˬ-ahˇ neh doˆ laˇ ngeh guiˇ kʼaˇ deuˆ nya laˇ-euˬ kʼaˬ dzeˇ zaˬ deuˬ shiˇ dzeuˇ jiˇ-euˬ meh. Aˬ jeˬ miˇ neh ehˇ naˇ, Sahˬpaˬ Miˬyehˇ-euˬ ehˇ dawˬ-ahˇ aˬ yawꞈ maꞈ maˬ naˇ haˬ geuꞈ-aˬ. Sahˬpaˬ Miˬyehˇ neh kamˬ taˬ-euˬ loꞈ-ehˇ, aˬ yawꞈ maꞈ-euˬ aˬ poeˬ aˬ bawˇ deuˬ-ahˇ saˇ jaˇ dzaˬ taˬ-euˬ miˇ tsaˬ miˇ muiˬ muiˬ dui dui-awˇ baw le za le-eu miˇ kʼahˬ kʼoeˇ kʼahˬ laꞈ kʼoeˇ aˬ yawꞈ maꞈ-ahˇ maˬ bi uˇ leˇ-a.
ကြော်ငြာတွေ