Aˬmoˆ 9:11 - Akha

¹¹ Sahˬpaˬ Miˬyehˇ ehˇ-eu, “Coˬ pyaˆ coˬ shaˆ taˬ-euˬ nymˇ tiˬ nymˇ-ahˇ duˇ-eu Daˬbiˇ-euˬ miˇ kʼahˬ-ahˇ ngaˇ paˇ ciˬ tuˇ nehˬ-eu aˇ nah keuˆ le tehꞈ-a. Meuˬ meuˬ lahˇ deuˬ-ahˇ ngaˇ gawˬ muiˬ-awˇ, meuˬ deuˬ paˇ tsoˆ muiˬ nehˬ-eu laꞈ kʼoeˇ, aˇ hu ba kʼaˇ jaˆ-euˬ loꞈ-ehˇ aˬ yawꞈ yaw oeˇ-ahˇ duˇ ni laˆ saˆ muiˬ nehˬ ma.

Aˬmoˆ 9:11 ပူးပေါင်းရင်းမြစ်များ

Yawˇbaˆ 1:10

Aˬ yawꞈ-ahˇ maˬ ehˇ, aˬ yawꞈ-euˬ nymˇ jiˇ-ahˇ maˬ ehˇ, aˬ yawꞈ kʼaˇ jaˆ-eu yawˬ jeˬ na luꞈ-ahˇ maˬ ehˇ, nawˇ yaw muiˬ paˬ-ehˇ haw piˇ nehˬ-euˬ meh. Aˬ yawꞈ kʼaˇ mˇ kʼaˇ shaˇ-eu yawˬ jeˬ na luꞈ laꞈ kʼoeˇ nawˇ guiˬ lahˬ biꞈ-awˇ, miˇ kʼahˬ kʼoeˇ kʼahˬ tiˬ byah ni jawˇ-eu jeˬ zaˬ kʼoeˇ deuˬ aˬ yawꞈ-ahˇ nawˇ biꞈ taˬ-euˬ meh.

Jaceuq 143:5

Dzeuˇ yaꞈ-euˬ aˇ nah aˇ yamˬ deuˬ-ahˇ noeˬ mawˇ laˇ miˇ-a. Nawˬ neh mˇ dzeuˇ shaˇ dzeuˇ yaꞈ-euˬ deuˬ-ahˇ ngaˇ shaˇ noeˬ-awˇ, gaˇ kawˆ kʼoeˇ deuˬ-ahˇ ngaˬ-euˬ nui ma laꞈ kʼoeˇ shaˇ sawˇ luꞈ-eu ma.

Jaceuq 80:12

Aˬ jeˬ miˇ neh baw duˆ kʼoeˇ duˆ-ahˇ mˇ jawˬ taˬ-euˬ yaˇ kmˇ-ahˇ nawˇ ngawˬ pyaˆ teˬ. Nymˬ-mˇ poˆ jawˇ kʼaˇ iˇ kʼaˇ laˇ tsehˆ-eu tsawˇ haˬ deuˬ aˬ gaꞈ aˇ siˬ pyaˆ kʼoeˬ dzaˬ nya-eu meh.

Jaceuq 89:40

Aˬ yawꞈ-euˬ meuˬ lahˇ-ahˇ nawˇ laˆ byaˆ-awˇ, aˬ yawꞈ-euˬ taˆ-ahˇ laˆ cawˆ nehˬ-euˬ meh.

Iˇsaˬyaˇ 16:5

Kʼoeˇ ngeh, Daˬbiˇ-euˬ zaˬ deuˬ uˆ deuˬ laꞈ kʼoeˇ, dzoeˬ dzaˬ sahˬ paˬ tiˬ gʼaˬ doˆ laˇ-awˇ, saˇ jaˇ ziꞈ-awˇ gʼoeˇ-eu gaˬ-eu laꞈ kʼoeˇ, aˬ yawꞈ-euˬ tsawˇ jeuˬ-ahˇ uˆ lahˇ tehꞈ-a. Yaw tsaˬ yaw dawˇ jeˬ mˇ-eu gʼaˇ duˬ aˬ yawꞈ maˬ nyi naˬ ni, yaw sui yaw dawˇ laꞈ kʼoeˇ yaˇ kʼaˬ daˇ nehˬ tehꞈ-a.)

Iˇsaˬyaˇ 5:5

Ngaˬ-euˬ aˬ gaꞈ yaˇ kmˇ-ahˇ ngaˇ jahˇ nehˬ-eu lehˇ gʼeh-eu gaˇ kawˆ, nymˬ-mˇ naw maꞈ-ahˇ ngaˇ ehˇ nehˬ nyaˇ. Aˬ gaꞈ baw duˆ mˇ lahˇ taˬ-euˬ pyaˆ dzeh nehˬ-awˇ, bawˇ tsahˬ jeˬ zaˬ neh bi dzaˬ jiˇ ma. Aˬ gaꞈ yaˇ kmˇ mˇ jawˬ taˬ-euˬ ngawˬ paˆ doˆ-awˇ, jeˬ zaˬ neh bi nawˬ byoˆ leꞈ ma.

Iˇsaˬyaˇ 58:12

Aˇ hu ba neh cawˆ-iˇ dzeuˇ-euˬ jeˬ-ahˇ, dawˬ pehˬ yaw oeˇ aˬ yawꞈ kʼoeˇ taˆ, nawˬ-euˬ tsawˇ haˬ deuˬ paˇ tsoꞈ ziꞈ leˇ tehꞈ-a. Byaˆ-iˇ taˬ-euˬ meuˬ lahˇ paˇ gawˬ ziꞈ-awˇ, nymˇ yaw cawˆ deuˬ paˇ tsoˆ muiˬ-eu tsawˇ haˬ nga lehˇ, aˬ cawˬ naw maꞈ-ahˇ kuˇ tehꞈ-a.”

Iˇsaˬyaˇ 63:11

Kʼoeˇ naˇ, aˇ hu ba-euˬ aˇ nah aˇ yamˬ pyeuꞈ-eu, Sahˬpaˬ Miˬyehˇ zaˬ kʼaˆ Moˇseˬ-euˬ ziˇ-ahˇ noeˬ keuˆ-awˇ, aˬ yawꞈ maꞈ heu loꞈ-ehˇ ehˇ-eu meh. “Aˬ yawꞈ tsawˇ haˬ aˬ yuiꞈ aˬ tsu deuˬ-ahˇ, iˬ ma laˆ shaˆ laꞈ kʼoeˇ ka kʼoꞈ nehˬ-eu, Sahˬpaˬ Miˬyehˇ kʼoeˇ gʼaˬ nymˬ-mˇ aˬ gaˇ jawˇ ta. Aˬ yawꞈ-euˬ muiˬ-eu shawˇ-eu yaw sahˇ-ahˇ, Moˇseˬ kʼoeˇ taˆ bi keuˆ le-euˬ Sahˬpaˬ Miˬyehˇ kʼoeˇ gʼaˬ, aˬ geu paw iˇ-euˬ ta.

Iˇsaˬyaˇ 65:9

Yuˇdaˆ tsawˇ jeuˬ pyeuꞈ-eu Iˇsaˬleˬlaˆ tsawˇ haˬ deuˬ-ahˇ, ngaˇ guiˬ lahˬ biꞈ nehˬ ma. Aˬ yawꞈ maꞈ-euˬ zaˬ deuˬ uˆ deuˬ-ahˇ, ngaˬ-euˬ miˇ kʼahˬ gawˬ jawˬ gawˬ duˇ oꞈ leˇ tehꞈ-a. Ngaˬ-euˬ nui kʼahˇ poˆ-eu ngaˬ neh tseˇ doˆ-euˬ tsawˇ haˬ deuˬ kʼoeˇ gaˇ ya jawˇ tehꞈ-a.

Yeˬlaˬmiˇ 18:9

Yawˬ dawˬ yawˬ paˇ ehˇ naˇ, tsawˇ jeuˬ tiˬ jeuˬ-ahˇ ngaˇ ka dehꞈ-awˇ laˆ huiˬ laˆ mahˇ nehˬ ma lehˇ ngaˇ ehˇ kʼawꞈ,

Yeˬlaˬmiˇ 30:9

Aˬ yawꞈ maꞈ-euˬ Miˬyehˇ Sahˬpaˬ Miˬyehˇ pyeuꞈ-eu ngaˬ-euˬ nui kʼahˇ aˬ yawꞈ maꞈ mˇ-awˇ, Daˬbiˇ-euˬ zaˬ deuˬ uˆ deuˬ laꞈ kʼoeˇ, aˬ yawꞈ maꞈ gʼaˇ duˬ ngaˬ neh tseˇ doˆ nehˬ-euˬ sahˬ paˬ tiˬ gʼaˬ uˬ moˆ, aˬ yawꞈ maꞈ dehꞈ tehꞈ-a.

Yeˬlaˬmiˇ 46:26

Aˬ yawꞈ maꞈ-ahˇ sehꞈ mawꞈ-eu Baˬbuˇloˬ sahˬ paˬ Neˬbuˬkaˬneˬzaˬ hawˇ-eu aˬ yawꞈ-euˬ guiˇ maꞈ-euˬ aˬ laꞈ laꞈ kʼoeˇ, aˬ yawꞈ maꞈ-ahˇ ngaˇ a nehˬ ma. Ehˇ kʼawꞈ, aˇ yamˬ paˇ myahˇ laˇ ngeh jawˇ, dzeuˇ laˇ ngeh loꞈ-ehˇ, Iˇjiˇtuˆ miˇ kʼahˬ laꞈ kʼoeˇ tsawˇ haˬ paˇ jawˇ laˇ tehꞈ-a lehˇ Sahˬpaˬ Miˬyehˇ pyeuꞈ-eu ngaˇ ehˇ-eu ma.”

Ngoeˇ dawˬ 5:21

Sahˬpaˬ Miˬyehˇ-oˇ, nga maꞈ-ahˇ, nawˇ jawˇ gaˇ sheuˬ kʼoꞈ nehˬ laꞈ-awˬ. Aˇ hu ba-euˬ yaw shehꞈ kʼahˬ sehˇ, nga maꞈ paˇ bi geuꞈ kʼoꞈ laꞈ-awˬ.

Yeˬsaˬgeˬlaˇ 17:24

Ngaˇ Sahˬpaˬ Miˬyehˇ ngeuˇ meh lehˇ, miˇ kʼahˇ laꞈ kʼoeˇ dehꞈ-eu aˇ bawˇ, dawˬ tawˆ luꞈ siˬ duˬ jiˇ tehꞈ-a. Bawˇ goˇ deuˬ-ahˇ ngaˇ tuˇ cuˬ-awˇ, bawˇ awˆ deuˬ-ahˇ bi goˇ laˇ ma. Bawˇ nyoeˇ deuˬ-ahˇ bi nyoeˬ-iˇ-awˇ, baw guˇ deuˬ-ahˇ bi nyoeˇ laˇ ma. Sahˬpaˬ Miˬyehˇ pyeuꞈ-eu ngaˇ heu loꞈ-ehˇ ehˇ-eu ma. Ngaˬ neh kʼaˇ ehˇ taˬ-euˬ jeˬ ngaˇ mˇ ma.

Yeˬsaˬgeˬlaˇ 36:11

Tsawˇ haˬ jeuˬ le o le-awˇ, jeˬ zaˬ myaˬ laˇ behˇ laˇ ni ngaˇ jahˇ ma. Dzeuˇ laˇ ngeh naˆ maˬ tseˇ naw maꞈ tsawˇ haˬ myaˬ-awˇ, zaˬ oeˬ sahˇ dui dui tehꞈ-a. Aˇ hu kʼaˇ jawˇ-euˬ loꞈ-ehˇ naw maꞈ-ahˇ kʼoeˇ gaˇ bi jawˇ-awˇ, aˇ hu naˆ maˬ tseˇ bi dehꞈ dzaˬ laˇ ma. Kʼoeˇ ngeh, ngaˇ Sahˬpaˬ Miˬyehˇ meh lehˇ naw maꞈ ya siˬ duˬ tehꞈ-a.

Hawˇseˬ 3:5

Ehˇ kʼawꞈ, Iˇsaˬleˬlaˆ tsawˇ haˬ deuˬ aˬ yawꞈ maꞈ-euˬ Miˬyehˇ pyeuꞈ-eu Sahˬpaˬ Miˬyehˇ hawˇ-eu, aˬ yawꞈ maꞈ-euˬ sahˬ paˬ Daˬbiˇ-euˬ tsuiꞈ laꞈ oˆ dehꞈ le-euˬ tsawˇ haˬ tiˬ gʼaˬ jawˇ paw paˇ gʼoꞈ kʼoꞈ laˇ-eu aˇ nah tiˬ nah jaˆ tehꞈ-a. Kʼoeˇ ngeh jawˇ, aˬ yawꞈ maꞈ Sahˬpaˬ Miˬyehˇ-ahˇ guˆ-awˇ, aˬ yawꞈ neh biꞈ-euˬ muiˬ-eu guiˬ lahˬ deuˬ za tehꞈ-a.

Aaˇbaˬdiˇ 1:17

“Ehˇ kʼawꞈ, Ziˇoˬ gawˬ jawˬ kʼoeˇ taˆ, tiˬ paˆ na deuˬ ya cehˆ buˬ-awˇ, gawˬ jawˬ kʼoeˇ jawˬ muiˬ-eu shawˇ-eu, jawˇ duˬ tiˬ tsahˇ pyeuꞈ laˇ tehꞈ-a. Yaˬkoˆ-euˬ zaˬ deuˬ uˆ deuˬ-aˬ, aˬ yawꞈ maꞈ-ahˇ oꞈ-eu miˇ kʼahˬ, aˬ yawꞈ maꞈ paˇ za kʼoꞈ tehꞈ-a.

Miˇkaˬ 5:2

Sahˬpaˬ Miˬyehˇ ehˇ-eu, “Eˇpaˬlaˬdaˬ miˇ kʼahˬ-ahˇ jaˆ-eu Behˬlehˬhehˬ meuˬ-oˇ, nawˇ-aˬ Yuˇdaˆ miˇ kʼahˬ laꞈ kʼoeˇ jaˆ-eu nyiˇ dui teˬ dui dui-eu meuˬ tiˬ meuˬ pyeuꞈ-eu meh. Ehˇ kʼawꞈ, nawˬ-euˬ laꞈ kʼoeˇ, Iˇsaˬleˬlaˆ miˇ kʼahˬ-ahˇ uˆ lahˇ-eu sahˬ paˬ tiˬ gʼaˬ ngaˇ bi doˆ laˇ ma. Aˬ yawꞈ-euˬ tsuiꞈ-aˬ, aˇ hu ba-euˬ ziˇ-ahˇ keuˆ ni jaˆ luꞈ-eu meh.”

Miˇkaˬ 7:11

Yeˬluˇsaˬlehˬ meuˬ-ahˇ jawˇ-eu tsawˇ haˬ deuˬ-oˇ, naw maꞈ meuˬ meuˬ lahˇ paˇ ya gawˬ muiˬ-eu aˇ yamˬ keuˆ le luꞈ meh. Aˇ yamˬ kʼoeˇ yamˬ keuˆ le ngeh naw maꞈ-euˬ miˇ kʼahˬ jeˇ dzehˬ laˇ tehꞈ-a.

Miˇkaˬ 7:14

Sahˬpaˬ Miˬyehˇ-oˇ, yawˇ bo-eu yaw sahˇ yawˇ zaˬ deuˬ-ahˇ haw piˇ-eu loꞈ-ehˇ, nawˬ neh tseˇ doˆ-euˬ nawˬ-euˬ tsawˇ jeuˬ-ahˇ haw piˇ-awˬ. Aˬ yawꞈ maꞈ bawˇ tsahˬ-ahˇ jawˇ ceuˆ taˬ-euˬ kʼawꞈ, aˬ yawꞈ maꞈ-euˬ jawˬ jawˬ-ehˇ miˇ muiˬ muiˬ-eu miˇ tsaˬ jaˆ-eu meh. Aˇ hu ba aˬ yawꞈ maꞈ neh mˇ dzaˬ kʼawꞈ dawˇ yaꞈ-euˬ miˇ tsaˬ miˇ muiˬ muiˬ dui dui-eu Baˬshaˬ hawˇ-eu Giˇlaˆ gahˬ kaˬ-ahˇ, aˬ yawꞈ maꞈ-ahˇ bi mˇ dzaˬ bi kʼawꞈ dawˇ poˆ-iˇ-awˬ.

Miˇkaˬ 7:8

Muiˇ-eu deuˬ aˬ dui-ahˇ aˬ jaꞈ maˬ paˇ jaꞈ nya meh. Aˬ dui coˬ-iˇ gʼaˬ-euˬ kʼawꞈ tiˬ poˆ paˇ tuˇ laˇ tehꞈ-a. Nymˬ-mˇ aˬ dui yaw zahˇ laꞈ kʼoeˇ ya jawˇ kʼawꞈ, Sahˬpaˬ Miˬyehˇ aˬ dui-ahˇ yaw shehꞈ biꞈ laꞈ tehꞈ-a.

Zaˬkaˬliˇ 12:7

“Daˬbiˇ-euˬ zaˬ deuˬ uˆ deuˬ hawˇ-eu, Yeˬluˇsaˬlehˬ meuˬ-ahˇ jawˇ-eu tsawˇ haˬ deuˬ Yuˇdaˆ miˇ kʼahˬ naˆ maˬ tseˆ yaw shehꞈ kʼahˬ sehˇ maˬ bi huiˬ dzehˬ-eu gʼaˇ duˬ, Yuˇdaˆ guiˇ maꞈ deuˬ aˬ cawˬ jeˬ hu guiˇ deuˆ gʼaˬ ni, Sahˬpaˬ Miˬyehˇ pyeuꞈ-eu ngaˇ jahˇ ma.

Zaˬkaˬliˇ 14:10

Laꞈ taˆ paw jaˆ-eu Geˬdaˬ meuˬ-ahˇ neh, laꞈ oˆ paw jaˆ-eu Leˬmoˬ meuˬ-ahˇ keuˆ ni, miˇ kʼahˬ kʼahˬ lah ni saˇ lehˆ ni laˆ pyeuꞈ tehꞈ-a. Yeˬluˇsaˬlehˬ meuˬ-aˬ, dawˬ peh jaˆ-eu miˇ gahˬ deuˬ kʼoeˇ taˆ goˇ ca ni jaˆ tehꞈ-a. Meuˬ-euˬ jawˇ zaˇ-aˬ, Beˬyaˬmiˬ lahˇ kʼehˬ-ahˇ neh, yaw beh lahˇ kʼehˬ tiˬ kʼehˬ jaˆ-euˬ laꞈ coeˇ lahˇ kʼehˬ-ahˇ keuˆ ni hawˇ-eu, Haˬnaˬneˬlaˇ nymˇ goˇ-ahˇ neh, sahˬ paˬ-euˬ aˬ gaꞈ dzaˇ uiˇ lehˬ duˬ-ahˇ keuˆ ni jeˇ tehꞈ-a.

Zaˬkaˬliˇ 6:12

Baoˬ huiˬ-eu Sahˬpaˬ Miˬyehˇ heu loꞈ-ehˇ ehˇ-eu meh lehˇ aˬ yawꞈ-ahˇ ehˇ nehˬ-awˬ. ‘Uˬ laꞈ lehˇ myahˇ-euˬ tsawˇ haˬ kʼoeˇ gʼaˬ-aˬ, aˬ yawꞈ kʼaˇ jawˇ gaˇ huiˬ dui mahˇ dui dui-awˇ, Sahˬpaˬ Miˬyehˇ-euˬ Uˬ duˬ tahˬ nymˇ nymˇ ma tsoˆ muiˬ tehꞈ-a.

Bawˇtsahˬ 24:18

Eˬdoˬ miˇ kʼahˬ-ahˇ jawˇ-eu aˬ yawꞈ-ahˇ muiˇ-eu deuˬ-ahˇ aˬ yawꞈ deuˆ gʼaˬ-eu laꞈ kʼoeˇ, aˬ yawꞈ maꞈ-euˬ miˇ kʼahˬ deuˆ geuꞈ-awˇ, Iˇsaˬleˬlaˆ tsawˇ haˬ deuˬ maˬ tsehˆ leˇ ni guiˇ deuˆ gʼaˬ nawˆ nawˆ tehꞈ-a.