Aˬmoˆ 4:11 - Akha

¹¹ “Sawˇdoˬ meuˬ hawˇ-eu Gawˇmawˇlaˆ meuˬ-ahˇ ngaˇ laˆ cawˆ nehˬ-euˬ loꞈ-ehˇ, naw maꞈ tiˬ paˆ na deuˬ-ahˇ ngaˇ laˆ cawˆ nehˬ-euˬ ma. Naw maꞈ laꞈ kʼoeˇ kʼaˇ dzeuˇ-iˇ-euˬ deuˬ-aˬ, miˬ dzaˬ puiˆ luꞈ gaˇ gʼeu doˆ-euˬ doꞈ luꞈ-eu daˇ kawˬ-ahˇ duˇ-eu meh. Ehˇ kʼawꞈ, naw maꞈ ngaˇ jawˇ gaˇ maˬ gʼoꞈ poˆ laˇ-a” lehˇ Sahˬpaˬ Miˬyehˇ ehˇ-eu meh.

Aˬmoˆ 4:11 ပူးပေါင်းရင်းမြစ်များ

Iˇsaˬyaˇ 13:19

Miˇ kʼahˬ dawˬ tawˆ luꞈ kʼoeˇ taˆ, Baˬbuˇloˬ miˇ kʼahˬ yaw shehꞈ kʼahˬ sehˇ huiˬ-eu miˇ neh, aˬ yawꞈ-euˬ tsawˇ haˬ deuˬ kʼahˬ sehˇ jaˆ kʼawꞈ Sawˇdoˬ meuˬ hawˇ-eu Gawˇmawˇlaˆ meuˬ loꞈ-ehˇ, Sahˬpaˬ Miˬyehˇ pyeuꞈ-eu ngaˇ laˆ luˬ laˆ seˇ nehˬ ma.

Iˇsaˬyaˇ 7:4

Nui noeˬ yaw beuˇ beuˇ-ehˇ jawˇ-awˇ, nui ma coꞈ ngehˇ ni taˬ-eu laꞈ kʼoeˇ, aˇ dzehˬ-ehˇ maˬ guˆ-ehˇ maˬ noeˬ shaˬ ni jawˇ-awˬ lehˇ ehˇ nehˬ-awˬ. Suˇliˆ sahˬ paˬ Leˬzeˬ hawˇ-eu Leˬmaˬliˇ-euˬ aˬ li sahˬ paˬ Peˬkah aˬ nyaꞈ-euˬ nui pehˇ-aˬ, miˬ dzaˬ doꞈ miˆ-euˬ kawˬ pyaˇ-ahˇ uˬ kʼoeˬ du-eu loˆ ni tehꞈ meh.

Iˇsaˬyaˇ 9:12

Nahˇ ma doˆ kʼehˬ paw jawˇ-eu Suˇliˆ tsawˇ haˬ deuˬ hawˇ-eu, nahˇ ma ga kʼehˬ paw jawˇ-eu Piˇliˇtiˆ tsawˇ haˬ deuˬ, Iˇsaˬleˬlaˆ miˇ kʼahˬ-ahˇ kawꞈ dzaˬ-eu lehˇ, kʼaˬ meh mˇ nga taˬ tehꞈ-a. Kʼoeˇ naˆ ni jahˇ nehˬ gʼaˬ-euˬ kʼawꞈ, Sahˬpaˬ Miˬyehˇ nui pehˇ maˬ jiˇ-ehˇ, Iˇsaˬleˬlaˆ-ahˇ kʼehˬ-eu gʼaˇ duˬ cawˬ ja taˬ-euˬ aˬ laꞈ maˬ baꞈ ka ni bi jaˆ tehꞈ-a.

Yeˬlaˬmiˇ 23:14

Ehˇ kʼawꞈ Yeˬluˇsaˬlehˬ meuˬ-ahˇ ngaˬ-euˬ gʼaˇ duˬ ngehˬ dah-eu deuˬ, kʼoeˇ naˆ maˬ tseˇ doeˇ gaˇ ngaˇ mawˇ-euˬ ma. Aˬ cawˬ-euˬ miˬ zaˬ-ahˇ aˬ yawꞈ maꞈ bahˬ gʼa muˆ gʼa-awˇ, jaˬ myawꞈ mehˇ shuiˇ dawˬ ngehˬ-eu meh. Tsawˇ haˬ yawˬ gʼaˬ na luꞈ yaw haiˬ jeˬ maˬ byehˇ ni mˇ-eu gʼaˇ duˬ, yaw lehˬ mˇ gaˇ aˬ yawꞈ maꞈ gʼaˬ baꞈ baꞈ-eu meh. Aˬ yawꞈ maꞈ dawˬ tawˆ luꞈ ngaˬ-euˬ mehˬ shi, Sawˇdoˬ hawˇ-eu Gawˇmawˇlaˆ meuˬ loꞈ-ehˇ, doeˇ dui dui-eu tsawˇ haˬ deuˬ pyeuꞈ-eu meh.”

Yeˬlaˬmiˇ 49:18

Sawˇdoˬ meuˬ, Gawˇmawˇlaˆ meuˬ hawˇ-eu, dawˬ peh jaˆ-eu meuˬ deuˬ-ahˇ laˆ cawˆ nehˬ ngeh keuˆ le-euˬ loꞈ-ehˇ, Eˬdoˬ miˇ kʼahˬ kʼoeˇ taˆ keuˆ le tehꞈ-a. Tsawˇ haˬ tiˬ gʼaˬ-iˬ maˬ jawˇ ni pyeuꞈ-iˇ tehꞈ-a lehˇ, Sahˬpaˬ Miˬyehˇ pyeuꞈ-eu ngaˇ ehˇ-eu ma.

Yeˬlaˬmiˇ 5:3

Saˇ jaˇ ziꞈ-eu jeˬ-ahˇ Sahˬpaˬ Miˬyehˇ aˬ diˇ poˆ-awˇ, naw maꞈ-ahˇ diˬ kʼawꞈ maˬ diˬ paˇ nya ehˇ, nawˬ pahˬ nehˬ kʼawꞈ naw maꞈ-ahˇ maˬ dzaw paˇ nya-a. Nawˬ-euˬ nui ma gʼahˇ-awˇ iˬ baˇ-ahˇ maˬ byehˇ-a.

Yeˬlaˬmiˇ 50:40

Sawˇdoˬ hawˇ-eu Gawˇmawˇlaˆ meuˬ-ahˇ, dawˬ peh jaˆ-eu meuˬ deuˬ nehˬ-ehˇ tiˬ kawˆ loꞈ-ehˇ ngaˇ laˆ cawˆ nehˬ ngeh keuˆ le-euˬ jeˬ, Baˬbuˇloˬ meuˬ kʼoeˇ taˆ keuˆ le tehꞈ-a. Tsawˇ haˬ tiˬ gʼaˬ-iˬ kʼoeˇ gaˇ maˬ paˇ jawˇ-aˇ lehˇ, Sahˬpaˬ Miˬyehˇ pyeuꞈ-eu ngaˇ ehˇ-eu ma.

Yeˬsaˬgeˬlaˇ 24:13

Yeˬluˇsaˬlehˬ-oˇ, nawˬ neh dehꞈ doeˇ-euˬ jeˬ nawˬ-ahˇ laˆ jawꞈ-euˬ meh. Ngaˇ aˇ naˆ ni leh jeh kʼawꞈ, maˬ laˆ shawˇ jiˇ nya-a. Ngaˇ nui ma pehˇ-eu jeˬ-ahˇ tiˬ li maˬ ya daˬ kʼoeˇ keuˆ ni, nawˇ maˬ shawˇ laˇ luꞈ-a.

Hawˇseˬ 11:5

“Iˇjiˇtuˆ miˇ kʼahˬ paw iˇ-awˇ, aˬ yawꞈ maꞈ gʼoꞈ jawˇ-iˇ tehꞈ-a. Aˬshuˇliˆ dzoeˬ dzaˬ-eu uˬ moˆ, aˬ yawꞈ maꞈ gʼoꞈ jawˇ leˇ tehꞈ-a. Aˬ jeˬ miˇ neh ehˇ naˇ, ngaˇ jawˇ gaˇ maˬ gʼoꞈ laˇ mawꞈ-a.

Hawˇseˬ 11:8

“Iˇsaˬleˬlaˆ-oˇ, nawˬ-ahˇ ngaˇ, aˬ joˆ-ehˇ gʼeh-awˇ byehˇ coeˇ nmˇ. Aˬdaˬmaˬ-ahˇ kʼehˬ-euˬ loꞈ-ehˇ, nawˬ-ahˇ ngaˇ aˬ joˆ-ehˇ kʼehˬ nmˇ. Zeˬbymˬ-ahˇ jahˇ nehˬ-euˬ loꞈ-ehˇ, nawˬ-ahˇ ngaˇ aˬ joˆ-ehˇ jahˇ nmˇ. Nawˬ-ahˇ gaˬ dui dui-eu miˇ neh, kʼoeˇ loꞈ-ehˇ jahˇ nehˬ-eu gʼaˇ duˬ, ngaˬ-euˬ nui ma maˬ gʼaˬ leˇ nya.

Aˬmoˆ 4:6

Naw maꞈ-euˬ meuˬ dawˬ tawˆ luꞈ kʼoeˇ taˆ mehꞈ-eu shuꞈ-eu jeˬ keuˆ le ni mˇ-euˬ gʼaˬ ngaˇ ma. Ehˇ kʼawꞈ, naw maꞈ ngaˇ jawˇ gaˇ maˬ gʼoꞈ poˆ laˇ-a.

Haˬgaiˇ 2:17

Naw maꞈ neh kʼaˇ ka taˬ-euˬ jeˬ bi cawˆ-iˇ jiˇ-eu lehˇ, lahˇ dui dui-eu jaˬ lehˇ hawˇ-eu, uˬ yehˇ aˇ siˬ deuˬ ngaˇ pyehˬ gʼeh leꞈ kʼawꞈ, naw maꞈ nui ma maˬ paˇ laˇ-a.

Zaˬkaˬliˇ 3:2

Mˬ taˆ gʼaˬ kʼehˇ kʼoeˇ gʼaˬ Saˬdaˬ-ahˇ ehˇ-eu, “Saˬdaˬ-oˇ, Sahˬpaˬ Miˬyehˇ nawˬ- ahˇ kʼehˬ luꞈ-uˇ. Yeˬluˇsaˬlehˬ meuˬ-ahˇ gaˬ-eu Sahˬpaˬ Miˬyehˇ nawˬ-ahˇ kʼehˬ luꞈ-uˇ. Tsawˇ haˬ heu gʼaˬ-aˬ, miˬ dzaˬ doꞈ luꞈ-eu tsawˬ bu-ahˇ gʼeu doˆ-euˬ miˬ dzaˬ miˬ kawˬ-ahˇ duˇ-eu meh.”

Lormav 9:29

Naꞈ ngeh neh Iˇsaˬyaˇ neh ehˇ taˬ-euˬ heu loꞈ-ehˇ jaˆ-eu meh. “Baoˬ huiˬ-eu Sahˬpaˬ Miˬyehˇ neh, tsuiꞈ maˬ bi dahˬ-iˇ-eu gʼaˇ duˬ, zaˬ maˬ bi dzeuˇ-iˇ law nmˇ-aˬ, Sawˇdoˬ, Gawˇmawˇlaˆ meuˬ loꞈ-ehˇ, aˬ dui byoˆ-iˇ jiˇ-euˬ tehꞈ-a.”

1 Gawˇliˬtu 3:15

Ehˇ kʼawꞈ, tsawˇ haˬ tiˬ gʼaˬ na neh gawˬ taˬ-euˬ gaˇ miˬ dzaˬ neh puiˆ dzaˬ naˇ, aˬ yawꞈ neh mˇ taˬ-euˬ jeˬ smˬ-iˇ tehꞈ-a. Aˬ yawꞈ-euˬ gʼawˇ mawˇ law nmˇ-aˬ, miˬ dzaˬ puiˆ luꞈ gaˇ bi gʼeu doˆ-awˇ law-iˇ-euˬ loꞈ-ehˇ ya law-iˇ tehꞈ-a.

Dawˬmehˬ 28:24

Uˬ yehˇ bi yehˇ le-eu dah zaˇ, nawˇ ya luˬ ya seˇ-iˇ ngeh keuˆ ni, jaˬ lehˇ lehˇ ma bi baw laˇ-awˇ, kʼaˬ lehˇ hawˇ-eu kʼaˇ shuiꞈ bi hehˇ ahˇ laꞈ tehꞈ-a.

Dawˬmehˬ 29:23

Naw maꞈ-euˬ miˇ kʼahˬ kʼahˬ lah ni, miˬ dzaˇ dzaˇ shuiˇ hawˇ-eu saˬ deuꞈ tehꞈ-ehˇ byah jiˇ-awˇ, gaˇ dahˇ maˬ tsoeˬ ni pyeuꞈ-iˇ tehꞈ-a. Tiˬ jeˬ-iˬ maˬ ka dzaˬ nya-eu uˬ taꞈ, yaˇ moꞈ kʼawꞈ maˬ dehꞈ ni pyeuꞈ-iˇ tehꞈ-a. Naw maꞈ-euˬ miˇ kʼahˬ-aˬ, Sahˬpaˬ Miˬyehˇ nui ma pehˇ dui dui-eu laꞈ kʼoeˇ laˆ luˬ laˆ seˇ nehˬ-euˬ Sawˇdoˬ meuˬ, Gawˇmawˇlaˆ meuˬ, Aˬdaˬmaˬ meuˬ hawˇ-eu, Zeˬbaiˬ meuˬ heu deuˬ loꞈ-ehˇ pyeuꞈ-iˇ tehꞈ-a.

2 Beˬtuˆluˆ 2:6

Sawˇdoˬ meuˬ hawˇ-eu Gawˇmawˇlaˆ meuˬ-ahˇ kʼawꞈ, miˬ dzaˬ bi puiˆ byoˆ-euˬ meh. Kʼoeˇ-aˬ, Miˬyehˇ-ahˇ yaw zeu maˬ baw-eu tsawˇ haˬ deuˬ kʼoeˇ taˆ aˬ joˆ-ehˇ keuˆ le-eu gaˇ kʼawˆ, aˬ yawꞈ maꞈ bi dzaw geuꞈ-eu gʼaˇ duˬ mˇ mehˬ-euˬ jeˬ pyeuꞈ-eu meh.

Yuˇdaˆ 1:23

Tiˬ paˆ na deuˬ-ahˇ-aˬ, miˬ dzaˬ laꞈ kʼoeˇ neh gʼeu doˆ-awˇ ka kʼoꞈ nehˬ-awˬ. Tiˬ paˆ na deuˬ-ahˇ-aˬ, guˆ-eu nui ma ahˇ-eu laꞈ kʼoeˇ gʼawˬ shaˬ gaˬ nehˬ-awˬ. Ehˇ kʼawꞈ, shiˬ shaˬ jiˇ-euˬ nui kʼahˇ mˇ-eu jeˬ laˆ lehꞈ taˬ-euˬ aˬ yawꞈ maꞈ-euˬ mehˬ tsoeˬ-ahˇ nui daˆ daˆ-awˬ.

Yuˇdaˆ 1:7

Sawˇdoˬ meuˬ, Gawˇmawˇlaˆ meuˬ hawˇ-eu dawˬ peh jaˆ-eu meuˬ kʼoeˇ deuˬ-euˬ gaˇ kawˆ shaˇ noeˬ haw sheˇ. Kʼoeˇ gaˇ jawˇ-euˬ tsawˇ haˬ kʼoeˇ deuˬ mˬ taˆ gʼaˬ kʼehˇ kʼoeˇ deuˬ loꞈ-ehˇ dehꞈ-awˇ, maˬ tsaˬ maˬ dawˇ-eu laꞈ kʼoeˇ kʼaˬ miˬ sheu-eu jeˬ hawˇ-eu bahˬ dui jawꞈ dui dui-eu jeˬ mˇ-euˬ meh. Tsawˇ haˬ zaˬ dawˬ tawˆ luꞈ-ahˇ bi siˬ leˇ-eu gʼaˇ duˬ, mˬ maˬ maˬ byaˆ zaˇ ziˇ miˬ dzaˬ neh aˬ yawꞈ maꞈ-ahˇ kʼehˬ nehˬ kʼaˆ nehˬ-euˬ meh.

Panmaeq 9:20

Kʼoeˇ smˇ jeˬ neh maˬ bi sehꞈ jiˇ-ehˇ dzeˇ-eu miˇ tsaˬ tsawˇ haˬ zaˬ deuˬ-aˬ, aˬ yawꞈ maꞈ neh mˇ dzeuˇ shaˇ dzeuˇ yaꞈ-euˬ jeˬ-ahˇ maˬ byehˇ dzeh-a. Nehꞈ deuˬ-ahˇ uˬ duˬ tahˬ-eu jeˬ-ahˇ maˬ ehˇ, shuiˇ, pyuˇ, guiˬ shuiˇ, kʼaˬ lo, daˇ kawˬ, heu deuˬ neh jahˇ taˬ-euˬ, maˬ mawˇ nya, maˬ gaˬ nya, maˬ cah nya-eu tahˬ pahˬ aˬ ma mawˇ kawˇ deuˬ-ahˇ uˬ duˬ tahˬ-eu jeˬ-ahˇ maˬ ehˇ, aˬ yawꞈ maꞈ maˬ byehˇ dzeh-a.