2 Tiˆmoˇseˬ 2:21 - Akha

²¹ Tsawˇ haˬ tiˬ gʼaˬ na, yaw haiˬ jeˬ kʼoeˇ deuˬ dawˬ tawˆ luꞈ-ahˇ yawˬ haˇ yawˬ ha shawˇ dzeh jiˇ naˇ, huiˬ-eu gaˇ gʼaˇ duˬ aˬ yawꞈ-ahˇ zmˬ tehꞈ-a. Aˬ jeˬ miˇ neh ehˇ naˇ, aˬ yawꞈ-aˬ, yaw sahˇ gʼaˬ-ahˇ gʼawˇ mawˇ aˬ nehˬ taˬ-euˬ gaˇ dahˇ tsoeˬ-eu jeˬ pyeuꞈ-awˇ, yaw muiˬ jeˬ mˇ-eu gʼaˇ duˬ bi zmˬ-eu lehˇ lehˬ hmˬ dah taˬ-euˬ jeˬ pyeuꞈ-eu meh.

Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

²¹ Tsawrhaq tiq ghaq maqtsaq maqdawr-eu khoerdeuq-anr yawqhar yawqha tsiqshawr nar-aq, yawsanr ghaq zmqnya-eu lavshawr-euq, poeq-awr lawq-eu keuka pyeuflar-awr, yawmuiq yawqjeq navluf mr-eu gharduq laeqhmqdan taq-eu jeq pyeuf-eu mae.

2 Tiˆmoˇseˬ 2:21 ပူးပေါင်းရင်းမြစ်များ

Jaceuq 119:9

Zaˬ guˬ tiˬ gʼaˬ yaw muiˬ yaw shawˇ shawˇ-ehˇ aˬ joˆ-ehˇ ya dehꞈ nmˇ lehˇ ehˇ ngeh, nawˬ-euˬ zahˇ dawˬ kʼoꞈ dawˬ-ahˇ caw teh-awˇ ya dehꞈ-eu meh.

Iˇsaˬyaˇ 1:25

Nawˬ-ahˇ ngaˇ do yuˇ ma. Pyuˇ baw guiˇ-awˇ laˆ shawˇ geuꞈ-eu loꞈ-ehˇ, nawˬ-euˬ iˬ baˇ ngaˇ laˆ shawˇ ma.

Iˇsaˬyaˇ 52:11

Uˬ duˬ tahˬ nymˇ nymˇ ma-ahˇ taꞈ-eu keu ka baꞈ-eu tsawˇ haˬ deuˬ, Baˬbuˇloˬ meuˬ-ahˇ neh maˬ oe doˆ ni taˬ byehˇ. Maˬ toeˬ ciˆ kʼmˬ-eu mˇ myawˬ-ahˇ taˬ toeˬ. Yawˬ ha-euˬ gʼawˇ mawˇ shawˇ-awˇ doˆ-iˇ-awˬ.

Yeˬlaˬmiˇ 15:19

Sahˬpaˬ Miˬyehˇ ngaˬ-ahˇ heu loꞈ-ehˇ paˇ ehˇ-eu meh. “Nawˇ ngaˇ jawˇ gaˇ gʼoꞈ kʼoꞈ laˇ naˇ, nawˬ-ahˇ ngaˇ paˇ ha geuꞈ-awˇ, ngaˬ-euˬ gaˇ paˇ bi mˇ ma. Gaˇ dahˇ maˬ tsoeˬ-eu dawˬ ngehˬ ngehˬ-ehˇ maˬ jawˇ ni, aˇ poeˬ kʼaˆ-eu dawˬ ngehˬ paˇ naˇ, ngaˬ-euˬ gʼaˇ duˬ ngehˬ dah-eu gʼaˬ paˇ bi geuꞈ ma. Kʼoeˇ loꞈ-ehˇ jahˇ naˇ, miˇ kʼahˬ zaˬ deuˬ nawˇ jawˇ gaˇ gʼoꞈ laˇ tehꞈ-a. Aˬ yawꞈ maꞈ jawˇ gaˇ nawˇ iˇ-eu maˬ loˬ-aˇ.

Maˬlaˬkiˇ 3:3

Pyuˇ kʼoˇ baw guiˇ-awˇ laˆ shawˇ-eu loꞈ-ehˇ, yaˇ kʼaˬ daˇ-eu gʼaˇ duˬ aˬ yawꞈ oe tehꞈ-a. Piˇ ma deuˬ Sahˬpaˬ Miˬyehˇ-ahˇ tsaˬ-eu dawˇ-eu lawˇ-eu jeˬ lawˇ nehˬ laˇ ni, baw baw-eu tsawˇ haˬ pyuˇ hawˇ-eu shuiˇ baw guiˇ-awˇ laˆ shawˇ-eu loꞈ-ehˇ, Sahˬpaˬ Miˬyehˇ-euˬ dawˬ tsaꞈ dawˬ dzawˇ mˇ-eu gʼaˬ piˇ ma kʼoeˇ deuˬ-ahˇ shawˇ tehꞈ-a.

Gʼaˬkʼehˇ 9:15

Sahˬpaˬ Yeˬsuˇ ehˇ-eu, “Iˇ-awˬ. Aˬ jeˬ miˇ neh ehˇ naˇ, Yuˇdaˆ tsawˇ haˬ maˬ ngeuˇ-eu deuˬ maˬ ehˇ, miˇ kʼahˬ sahˬ paˬ deuˬ maˬ ehˇ, Iˇsaˬleˬlaˇ tsawˇ haˬ deuˬ maˬ ehˇ, ngaˬ-euˬ tsawˇ myahˇ-ahˇ siˬ nya laˇ ni bi mˇ-eu gʼaˇ duˬ, aˬ yawꞈ-ahˇ ngaˇ tseˇ doˆ taˬ-euˬ ma.

1 Gawˇliˬtu 5:7

Naw maꞈ mawˇ lah ni bi shawˇ laˇ-eu gʼaˇ duˬ, iˬ baˇ pyeuꞈ-eu dehˬ tseˬ yaw oeˇ kʼoeˇ laˆ shawˇ dzeh jiˇ-awˬ. Kʼoeˇ ngeh jawˇ, naw maꞈ dehˬ tseˬ tiˬ pawꞈ-iˬ maˬ ahˇ-eu kaˬ muˇ yaw shuiꞈ tiˬ siˬ pyeuꞈ laˇ tehꞈ-a. Naw maꞈ-aˬ, maˇ maˇ ni dehˬ tseˬ maˬ ahˇ-eu kaˬ muˇ-ahˇ duˇ meh lehˇ ngaˇ siˬ nya ma. Aˬ jeˬ miˇ neh ehˇ naˇ, aˬ dui Baˬsaˬkaˬ Bawˬ-iˬ gʼeh yamˬ tsaˬ laˇ taˬ-euˬ meh. Baˬsaˬkaˬ Bawˬ-iˬ gʼeh ngeh ya lawˇ-eu yawˇ zaˬ pyeuꞈ-eu Ka li-ahˇ lawˇ gʼaˬ-euˬ meh.

2 Gawˇliˬtu 7:1

Ngaˇ gaˬ dui dui-eu cawˬ deuˬ-oˇ, Miˬyehˇ aˬ dui-ahˇ kʼoeˇ loꞈ-ehˇ saˇ jaˇ dzaˬ taˬ-euˬ miˇ neh, aˬ dui-euˬ gʼawˇ mawˇ hawˇ-eu saꞈ laˇ-ahˇ bi jawꞈ-iˇ nya-eu yawˬ jeˬ na luꞈ-ahˇ tsiˬ shawˇ dzeh-awˇ, Miˬyehˇ-ahˇ yaw zeu baw-awˇ guˆ-eu laꞈ kʼoeˇ yaw muiˬ yaw shawˇ shawˇ-ehˇ byah byah ni dehꞈ kaˇ-euˇ.

2 Gawˇliˬtu 9:8

Naw maꞈ yawˬ ha gʼaˇ duˬ kʼaˇ loˬ-eu jeˬ tiˬ byah ni jaˆ laˇ-awˇ, aˬ cawˬ-ahˇ caw ba nehˬ nya-eu gʼaˇ duˬ aˇ dzehˬ kʼawꞈ tiˬ byah ni jaˆ laˇ ni, Miˬyehˇ naw maꞈ-ahˇ guiˬ lahˬ biꞈ nehˬ nya-eu meh.

Eˇpeˇsu 2:10

Nymˬ-mˇ aˬ dui kʼaˇ ngeuˇ-eu loꞈ-ehˇ Miˬyehˇ neh aˬ dui-ahˇ beh taˬ-euˬ meh. Aˬ yawꞈ neh aˬ dui-ahˇ bi mˇ-eu lehˇ lehˬ hmˬ taˬ-euˬ yaw muiˬ jeˬ-ahˇ aˬ dui mˇ nya ni, Yeˬsuˇ Ka li laꞈ kʼoeˇ aˬ dui-ahˇ beh taˬ-euˬ meh.

1 Tiˆmoˇseˬ 6:11

Ehˇ kʼawꞈ, Miˬyehˇ-euˬ tsawˇ haˬ pyeuꞈ-eu nawˇ-aˬ, heu deuˬ dawˬ tawˆ luꞈ-ahˇ gaˇ jaw jaw-awˬ. Yaw tsaˬ yaw dawˇ jeˬ, Miˬyehˇ-ahˇ yaw zeu baw-eu jeˬ, jah-eu jeˬ, gʼoeˇ-eu gaˬ-eu jeˬ, daˬ coeˇ oˇ coeˇ-eu jeˬ, nui nahˬ nui yu ahˇ-eu jeˬ, heu deuˬ-ahˇ leh jeh dui dui-awˬ.

2 Tiˆmoˇseˬ 2:16

Gaˇ dahˇ maˬ tsoeˬ-eu gaˇ kawˆ ja uˇ-eu jeˬ-ahˇ gaˇ jaw jaw-awˬ. Kʼoeˇ-aˬ, tsawˇ haˬ zaˬ deuˬ Miˬyehˇ-ahˇ gaˇ mahˇ kaˬ-iˇ ni jahˇ gaˇ duˇ-eu meh.

2 Tiˆmoˇseˬ 2:20

Nymˇ nymˇ ma tiˬ nymˇ laꞈ kʼoeˇ kʼmˬ maˬ oeˬ tsaꞈ gʼawˬ mya ni jaˆ-eu meh. Tiˬ deuˬ na-aˬ, pyuˇ hawˇ-eu shuiˇ neh tehˆ taˬ-awˇ, tiˬ deuˬ na-aˬ, daˇ kawˬ hawˇ-eu miˇ tsaˬ neh jahˇ taˬ-euˬ meh. Tiˬ deuˬ na-aˬ, bawˬ-iˬ gʼeh ngeh zmˬ-eu gʼaˇ duˬ pyeuꞈ-awˇ, tiˬ deuˬ na-aˬ, aˬ myah myah zmˬ-eu gʼaˇ duˬ pyeuꞈ-eu meh.

2 Tiˆmoˇseˬ 3:17

Kʼoeˇ baˬ da neh, Miˬyehˇ gaˇ mˇ-eu tsawˇ haˬ-aˬ, byah dui nya dui dui-eu tsawˇ haˬ pyeuꞈ-awˇ, yaw muiˬ jeˬ dawˬ tawˆ luꞈ-ahˇ mˇ nya ni Jaˇliꞈ dawˬ kawˬ-ahˇ gʼoe-awˇ dzaw bym taˬ-euˬ tsawˇ haˬ pyeuꞈ-eu meh.

2 Tiˆmoˇseˬ 4:11

Luˇkaꞈ tiˬ gʼaˬ tehꞈ-ehˇ ngaˬ nehˬ-ehˇ jawˇ yaꞈ-euˬ meh. Nawˇ laˇ ngeh Maˬkuˆ-ahˇ sheuˬ laꞈ-awˬ. Aˬ jeˬ miˇ neh ehˇ naˇ, ngaˇ gaˇ mˇ gaˇ aˬ yawꞈ caw ba nya-eu meh.

Tiˇtuˆ 3:1

Sahˬ paˬ sahˬ ma deuˬ hawˇ-eu uˆ lahˇ-eu deuˬ-euˬ laꞈ oˆ yaw muiˬ-ehˇ jawˇ-awˇ, aˬ yawꞈ maꞈ-euˬ ehˇ dawˬ naˇ haˬ-eu laꞈ kʼoeˇ, yaw muiˬ jeˬ dawˬ tawˆ luꞈ-ahˇ mˇ-eu lehˇ lehˬ hmˬ taˬ-eu gʼaˇ duˬ nawˬ-euˬ tsawˇ haˬ deuˬ maˬ ya ngehˇ ni ja noeˬ nehˬ-awˬ.

Tiˇtuˆ 3:14

Maˇ maˇ ni loˬ gaˇ caw ba nehˬ nya-eu gʼaˇ duˬ, aˬ dui-euˬ tsawˇ haˬ deuˬyaw muiˬ jeˬ-ahˇ mˇ nya laˇ ni bi leh jeh-eu loˬ meh. Gaˇ dahˇ maˬ tsoeˬ ni maˬ ya bi dehꞈ-a.

Tiˇtuˆ 3:8

Heu-aˬ, tsaˬ dui dui-eu dawˬ pyeuꞈ-eu meh. Miˬyehˇ-ahˇ jah-eu tsawˇ haˬ deuˬ, tsawˇ haˬ yawˬ gʼaˬ na luꞈ gʼaˇ duˬ muiˬ-awˇ, gaˇ dahˇ tsoeˬ-eu jeˬ pyeuꞈ-eu aˬ cawˬ gʼaˇ duˬ yaw muiˬ jeˬ mˇ nehˬ-eu jeˬ-ahˇ shaˇ noeˬ-awˇ leh jeh laˇ ni, gaˇ kawˆ heu deuˬ-ahˇ nawˇ yaw kʼaˆ kʼaˆ-ehˇ bi mehˬ mawꞈ-eu ma.

1 Beˬtuˆluˆ 1:22

Nymˬ-mˇ naw maꞈ yaw tsaˬ yaw dawˇ dawˬ-ahˇ naˇ haˬ geuꞈ-eu laꞈ kʼoeˇ yawˬ haˇ yawˬ ha bi muiˬ bi shawˇ laˇ-awˇ, Ka li-ahˇ jah-eu tsawˇ haˬ cawˬ cawˬ gʼoeˇ nya gaˬ nya-eu aˇ tiˆ-ahˇ dehꞈ keuˆ laꞈ-euˬ-aˬ, tiˬ gʼaˬ tiˇ gʼaˬ nui ma laꞈ kʼoeˇ keuˆ ni ziꞈ dah ni gaˬ-awˬ.

1 Beˬtuˆluˆ 1:7

Lawˬ haw-eu kʼoeˇ-aˬ, naw maꞈ-euˬ jah-eu jeˬ maˇ jawˆ ni gʼeh-eu gaˇ kawˆ bi siˬ duˬ laˇ-eu gʼaˇ duˬ meh. Laˆ piˬ laˆ byoˆ nya-eu jeˬ pyeuꞈ-eu shuiˇ-ahˇ kʼawꞈ miˬ dzaˬ neh ya lawˬ haw-eu-aˬ, shuiˇ naˆ maˬ tseˇ poeˬ dui lawˬ dui dui-eu naw maꞈ-euˬ jah-eu jeˬ-ahˇ kʼawꞈ ya bi lawˬ haw tehꞈ-a. Kʼoeˇ naˇ, Yeˬsuˇ Ka li-ahˇ bya cehˆ ni ya mawˇ ngeh nah Miˬyehˇ naw maꞈ-ahˇ ja ceuˬ nehˬ laꞈ-awˇ, yaw shehꞈ kʼahˬ sehˇ bi za-eu uˬ taꞈ, ciˬ huiˬ ciˬ mahˇ nehˬ laꞈ tehꞈ-a.

1 Yoˇhaˬ 3:3

Ka li laꞈ kʼoeˇ, kʼoeˇ loꞈ-ehˇ kʼaˇ noeˬ tmˬ taˬ-euˬ tsawˇ haˬ deuˬ-aˬ, Ka li muiˬ-eu shawˇ-eu loꞈ-ehˇ, yawˬ ha kʼawꞈ ya bi muiˬ ya bi shawˇ meh.