2 Laˬsaˬbaˬ 16:7 - Akha

⁷ Aˇ yamˬ kʼoeˇ yamˬ-ahˇ, Miˬyehˇ gʼaˇ duˬ ngehˬ dah-eu Haˬnaˬniˇ gʼaˬ sahˬ paˬ Aˬsaˬ jawˇ gaˇ iˇ-awˇ, heu loꞈ-ehˇ ehˇ nehˬ-euˬ meh. “Nawˬ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ nawˇ maˬ gʼoe-ehˇ, Suˇliˆ sahˬ paˬ-ahˇ nawˇ laꞈ jeuˬ shaˇ-euˬ miˇ neh, Iˇsaˬleˬlaˆ sahˬpaˬ-euˬ guiˇ maꞈ deuˬ nawˬ-euˬ laꞈ-ahˇ neh cehˆ dzeuˇ-euˬ meh.

2 Laˬsaˬbaˬ 16:7 ပူးပေါင်းရင်းမြစ်များ

1 Sahˬpaˬ 15:19

“Aˇ nyaꞈ-euˬ aˬ da tiˬ gʼaˬ tiˇ gʼaˬ nui ma taꞈ-euˬ loꞈ-ehˇ, aˇ nyaꞈ kʼawꞈ nui ma taꞈ kaˇ-euˇ. Pyuˇ hawˇ-eu shuiˇ heu deuˬ-aˬ, nawˬ-euˬ gʼaˇ duˬ laꞈ sawˬ ma. Bawˬshaˬ-euˬ guiˇ maꞈ deuˬ ngaˬ-euˬ miˇ kʼahˬ laꞈ kʼoeˇ neh ya doˆ-iˇ ni, Bawˬshaˬ-ahˇ nawˇ nui ma maˬ taꞈ ni byehˇ-awˬ.”

1 Sahˬpaˬ 16:1

Haˬnaˬniˇ-euˬ aˬ li Miˬyehˇ gʼaˇ duˬ ngehˬ dah-eu gʼaˬ pyeuꞈ-eu Yeˬhuˇ-ahˇ Sahˬpaˬ Miˬyehˇ dawˬ ngehˬ cawˬ-awˇ, Bawˬshaˬ-ahˇ heu loꞈ-ehˇ bi ehˇ nehˬ-euˬ meh.

1 Sahˬpaˬ 16:7

Bawˬshaˬ neh Sahˬpaˬ Miˬyehˇ-ahˇ mˇ lehˬ-euˬ iˬ baˇ baˬ da neh, Bawˬshaˬ hawˇ-eu aˬ yawꞈ-euˬ nymˇ jiˇ-ahˇ Sahˬpaˬ Miˬyehˇ neh ehˇ nehˬ-euˬ dawˬ deuˬ, Miˬyehˇ gʼaˇ duˬ ngehˬ dah-eu gʼaˬ pyeuꞈ-eu Yeˬhuˇ neh aˬ yawꞈ-ahˇ tsaꞈ gaˬ nehˬ leˇ-euˬ meh. Aˬ yawꞈ-euˬ mehˬ hu sahˬ paˬ Yeˬyawˇbamˬ neh mˇ dzeuˇ yaꞈ-euˬ loꞈ-ehˇ, yawˬ ha neh mˇ lehˬ shaˇ lehˬ-euˬ iˬ baˇ baˬ da neh tehꞈ-ehˇ Sahˬpaˬ Miˬyehˇ nui ma bi pehˇ-eu maˬ ngeuˇ-ehˇ, Yeˬyawˇbamˬ-euˬ miˬ sawˇ zaˬ dawˬ tawˆ luꞈ-ahˇ aˬ yawꞈ sehꞈ-euˬ baˬ da neh kʼawꞈ, Sahˬpaˬ Miˬyehˇ nui ma pehˇ ni jahˇ-euˬ meh.

2 Sahˬpaˬ 18:5

Heˬsaˬgiˇ-aˬ, Iˇsaˬleˬlaˆ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ jah ziꞈ dui dui-eu tsawˇ haˬ tiˬ gʼaˬ pyeuꞈ-eu meh. Aˬ yawꞈ-euˬ mehˬ hu mehˬ nah Yuˇdaˆ miˇ kʼahˬ-ahˇ kʼaˇ uˆ lahˇ-euˬ sahˬ paˬ deuˬ laꞈ kʼoeˇ, aˬ yawꞈ-ahˇ duˇ-eu tiˬ gʼaˬ-iˬ maˬ jawˇ-a.

1 Laˬsaˬbaˬ 5:20

Aˬ yawꞈ maꞈ Miˬyehˇ-ahˇ jah-eu laꞈ kʼoeˇ “Caw ba nehˬ laꞈ-awˬ” lehˇ guiˬ lahˬ shaˇ-euˬ loꞈ-ehˇ, aˬ yawꞈ maꞈ-euˬ shaˇ dawˬ-ahˇ Miˬyehˇ naˇ haˬ nehˬ-awˇ, Haˬgaˬliˇ tsawˇ jeuˬ hawˇ-eu aˬ yawꞈ maꞈ nehˬ-ehˇ kʼaˇ gm leˇ-euˬ deuˬ kʼoeˇ taˆ guiˇ bi deuˆ gʼaˬ-euˬ meh.

2 Laˬsaˬbaˬ 13:18

Kʼoeˇ loꞈ-ehˇ, Yuˇdaˆ tsawˇ haˬ deuˬ Iˇsaˬleˬlaˆ tsawˇ haˬ deuˬ-ahˇ deuˆ gʼaˬ-euˬ meh. Aˬ jeˬ miˇ neh ehˇ naˇ, Yuˇdaˆ tsawˇ haˬ deuˬ-aˬ, aˬ yawꞈ maꞈ-euˬ aˬ poeˬ aˬ bawˇ deuˬ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ gʼoe-euˬ meh.

2 Laˬsaˬbaˬ 14:11

Kʼoeˇ ngeh, Aˬsaˬ-aˬ, aˬ yawꞈ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ heu loꞈ-ehˇ guiˬ lahˬ shaˇ-euˬ meh. “Sahˬpaˬ Miˬyehˇ-oˇ, gʼaˬ baˬ-eu guiˇ maꞈ tiˬ maꞈ-ahˇ gʼaˬ kʼaˆ dui dui-eu guiˇ maꞈ tiˬ maꞈ loꞈ-ehˇ nawˇ caw ba nya-eu meh. Nga maꞈ-eu Miˬyehˇ pyeuꞈ-eu Sahˬpaˬ Miˬyehˇ-oˇ, nga maꞈ-ahˇ nymˬ-mˇ caw ba le-awˬ. Aˬ jeˬ miˇ neh ehˇ naˇ, nga maꞈ nawˬ-ahˇ gʼoe-awˇ, nawˬ-euˬ tsawˇ myahˇ uˬ moˆ myaˬ dui dui-eu guiˇ maꞈ heu maꞈ-ahˇ deuˆ -eu lehˇ oe-euˬ ma. Sahˬpaˬ Miˬyehˇ-oˇ, nawˇ-aˬ nga maꞈ-euˬ Miˬyehˇ ma. Nawˬ-ahˇ deuˆ gʼaˬ ma lehˇ tsawˇ haˬ tiˬ gʼaˬ-iˬ maˬ noeˬ doˆ peuˬ-a.”

2 Laˬsaˬbaˬ 16:6

Kʼoeˇ naˇ, Yuˇdaˆ miˇ kʼahˬ laꞈ kʼoeˇ kʼaˇ jawˇ-eu tsawˇ haˬ dawˬ tawˆ luꞈ-ahˇ sahˬ paˬ Aˬsaˬ kuˇ uiˬ-awˇ, Bawˬshaˬ neh Laˬmahˇ meuˬ tsoˆ muiˬ gaˇ geuꞈ-euˬ kʼaˬ lo hawˇ-eu daˇ kawˬ deuˬ baꞈ doˆ-eu gʼaˇ duˬ dawˬ biꞈ-euˬ meh. Kʼaˬ lo hawˇ-eu daˇ kawˬ kʼoeˇ deuˬ-ahˇ, Geˬbaˬ meuˬ hawˇ-eu Miˇzaˬpaˬ meuˬ tsoˆ muiˬ gaˇ aˬ yawꞈ maꞈ geuꞈ-euˬ meh.

2 Laˬsaˬbaˬ 19:2

Haˬnaˬniˇ-euˬ aˬ li Yeˬhuˇ lehˇ myahˇ-euˬ Miˬyehˇ gʼaˇ duˬ ngehˬ dah-eu tiˬ gʼaˬ aˬ yawꞈ jawˇ gaˇ iˇ-awˇ, heu loꞈ-ehˇ ehˇ nehˬ-euˬ meh. “Nui ma maˬ dawˇ-eu tsawˇ haˬ-ahˇ caw ba-awˇ, Sahˬpaˬ Miˬyehˇ-ahˇ bye-eu tsawˇ haˬ nehˬ-ehˇ mˇ taꞈ shaˇ taꞈ-eu tsaˬ meh lehˇ nawˇ noeˬ te loˇ. Nawˬ neh mˇ-euˬ gaˇ baˬ da neh Sahˬpaˬ Miˬyehˇ nui ma pehˇ-eu jeˬ nawˬ-euˬ kʼoeˇ taˆ keuˆ le luꞈ meh.

2 Laˬsaˬbaˬ 20:32

Aˬ yawꞈ-euˬ mehˬ hu sahˬ paˬ geuꞈ-awˇ uˆ lahˇ yaꞈ-euˬ aˬ yawꞈ-euˬ aˬ da Aˬsaˬ loꞈ-ehˇ, Sahˬpaˬ Miˬyehˇ mehˬ shi yaw tsaˬ yaw dawˇ jeˬ tehꞈ-ehˇ aˬ yawꞈ mˇ-euˬ meh.

2 Laˬsaˬbaˬ 20:34

Yeˬhawˇshaˬpaˇ neh kʼaˇ mˇ kʼaˇ shaˇ yaꞈ-euˬ yawˬ jeˬ na luꞈ aˇ dahˬ beh gaˇ neh aˇ saˬ saˬ gaˇ keuˆ ni, Haˬnaˬniˇ-euˬ aˬ li Yeˬhuˇ neh boꞈ-euˬ Laˬsaˬbaˬ sahˬ boꞈ laꞈ kʼoeˇ boꞈ ahˇ taˬ-euˬ meh. Sahˬ boꞈ kʼoeˇ taꞈ-aˬ, Iˇsaˬleˬlaˆ tsawˇ jeuˬ-euˬ sahˬ paˬ deuˬ gaˇ kawˆ boꞈ taˬ-euˬ Laˬsaˬbaˬ sahˬ boꞈ laꞈ kʼoeˇ ahˇ-eu aˇ deuˆ tiˬ deuˆ pyeuꞈ-eu meh.

2 Laˬsaˬbaˬ 24:24

Suˇliˆ guiˇ maꞈ yaw cuiˆ kʼawꞈ, myaˬ dui dui-eu Yuˇdaˆ guiˇ maꞈ-ahˇ deuˆ gʼaˬ-euˬ meh. Aˬ jeˬ miˇ neh ehˇ naˇ, Yuˇdaˆ tsawˇ haˬ deuˬ-aˬ, aˬ yawꞈ maꞈ-euˬ aˬ poeˬ aˬ bawˇ deuˬ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ byehˇ dzeh-euˬ miˇ neh, kʼoeˇ loꞈ-ehˇ bi deuˆ gʼaˬ ni Sahˬpaˬ Miˬyehˇ jahˇ-euˬ meh. Kʼoeˇ loꞈ-ehˇ jahˇ-awˇ, sahˬ paˬ Yawˇshaˆ-ahˇ kʼehˬ nehˬ kʼaˆ nehˬ-euˬ meh.

Iˇsaˬyaˇ 31:1

Iˇjiˇtuˆ miˇ kʼahˬ-ahˇ laꞈ jeuˬ shaˇ-iˇ-eu tsawˇ haˬ deuˬ, yaw kʼaˆ-ehˇ ya noeˬ shaˬ tehꞈ-a. Iˇsaˬleˬlaˆ-euˬ muiˬ-eu shawˇ-eu Miˬyehˇ pyeuꞈ-eu, Sahˬpaˬ Miˬyehˇ-ahˇ maˬ gʼoe-ehˇ, mahˬ deuˬ-ahˇ nui kʼaˬ tsmˬ-awˇ, mahˬ laˆ lawˬ myaˬ gaˇ nui ma huiˬ-eu, mahˬ dziˬ-eu yehˇ deuˬ-euˬ gʼaˬ-ahˇ gʼoe-eu deuˬ, yaw kʼaˆ-ehˇ ya noeˬ shaˬ tehꞈ-a.

Iˇsaˬyaˇ 32:2

Aˬ yawꞈ maꞈ aˬ yawꞈ gʼaˬ yawꞈ, jaˬ lehˇ baw ngeh naˬ duˬ loꞈ-ehˇ pyeuꞈ-awˇ, mˬ jeˬ jaˬ lehˇ huiˬ ngeh awˆ duˬ-ahˇ duˇ tehꞈ-a. Gui coˇ ni gʼeh-eu kʼaˇ shuiꞈ deh yaˇ-ahˇ, yoeˇ doˆ le-euˬ lawˇ gawˆ hawˇ-eu, shiˬ deuˬ ni gʼeh-eu lo guˇ-ahˇ duˇ tehꞈ-a.

Iˇsaˬyaˇ 39:3

Kʼoeˇ naˇ, sahˬ paˬ Heˬsaˬgiˇ jawˇ gaˇ Iˇsaˬyaˇ le-awˇ, “Tsawˇ haˬ heu deuˬ aˬ geu gaˇ neh oe-awˇ, nawˬ-ahˇ aˬ jeˬ ehˇ le taˬ” lehˇ naˇ haˬ ngeh, “Aˬ yawꞈ maꞈ gaˇ mahˇ kaˬ dui dui-eu Baˬbuˇloˬ miˇ kʼahˬ-ahˇ neh oe-euˬ meh” lehˇ, Heˬsaˬgiˇ ehˇ kʼoꞈ nehˬ-euˬ meh.