1 Laˬsaˬbaˬ 20:1 - Akha

¹ Jawˇ la doˆ le-awˇ, sahˬ paˬ deuˬ guiˇ deuˆ-eu aˇ yamˬ paˇ keuˆ laˇ ngeh, Yoˇbaˬ gʼaˬ guiˇ maꞈ sheuˬ-awˇ, Aˬmoˬ miˇ kʼahˬ-ahˇ guiˇ deuˆ-iˇ-euˬ meh. Ehˇ kʼawꞈ, sahˬ paˬ Daˬbiˇ gʼaˬ-aˬ, Yeˬluˇsaˬlehˬ meuˬ-ahˇ jawˇ yaꞈ-euˬ meh. Aˬ yawꞈ maꞈ Laˬbah meuˬ-ahˇ loꞈ jawˬ-awˇ deuˆ-awˇ, laˆ cawˆ nehˬ-euˬ meh.

1 Laˬsaˬbaˬ 20:1 ပူးပေါင်းရင်းမြစ်များ

2 Saˬmeuˬlaˆ 11:1

Tsahˬ gaˆ ahˇ le-awˇ, miˇ kʼahˬ sahˬ paˬ deuˬ guiˇ mˇ-eu aˇ yamˬ keuˆ laˇ ngeh, Daˬbiˇ-aˬ, aˬ yawꞈ-euˬ guiˇ maꞈ kʼoeˇ taˆ aˬ yuiꞈ geuꞈ-eu deuˬ hawˇ-eu Yoˇbaˬ-ahˇ, Iˇsaˬleˬlaˆ guiˇ maꞈ bi sheuˬ-awˇ pyehˬ gʼeh-euˬ meh. Aˬmoˬ tsawˇ haˬ deuˬ-ahˇ aˬ yawꞈ maꞈ guiˇ deuˆ gʼaˬ-awˇ, Laˬbah meuˬ-ahˇ loꞈ jawˬ-euˬ meh. Ehˇ kʼawꞈ, Daˬbiˇ aˬ yawꞈ gʼaˬ-aˬ, Yeˬluˇsaˬlehˬ meuˬ-ahˇ jawˇ yaꞈ-euˬ meh.

2 Saˬmeuˬlaˆ 17:27

Maˬhaˬneˬ meuˬ-ahˇ Daˬbiˇ le keuˆ ngeh, Aˬmoˬ miˇ kʼahˬ Laˬbah meuˬ-ahˇ jawˇ-eu Naˬhaˇ-euˬ aˬ li Shoˇbiˬ maˬ ehˇ, Lawˇdeˬbaˬ meuˬ-ahˇ jawˇ-eu Aˬmeˬlaˆ-euˬ aˬ li Maˬkiˬlaˇ maˬ ehˇ, Yawˇgeˬlmˬ meuˬ-ahˇ jawˇ-eu Baˬziˇlehˇ maˬ ehˇ, aˬ yawꞈ jawˇ gaˇ laˇ-euˬ meh.

1 Sahˬpaˬ 20:22

Kʼoeˇ naˇ, Miˬyehˇ gʼaˇ duˬ ngehˬ dah-eu kʼoeˇ gʼaˬ sahˬ paˬ Aˬhaˆ jawˇ gaˇ iˇ-awˇ ehˇ-eu, “Gʼoꞈ-iˇ-awˇ, nawˬ-euˬ guiˇ maꞈ yaw muiˬ paˬ-ehˇ lehˬ hmˬ taˬ-awˇ, aˬ joˆ-ehˇ ya jahˇ-eu gaˇ kawˆ yaw muiˬ paˬ-ehˇ shaˇ noeˬ taˬ-awˬ. Aˬ jeˬ miˇ neh ehˇ naˇ, jawˇ la doˆ le ngeh Suˇliˆ sahˬ paˬ guiˇ paˇ deuˆ le tehꞈ-a.”

1 Sahˬpaˬ 20:26

Jawˇ la doˆ le ngeh, Beˬhaˬdaˇ gʼaˬ aˬ yawꞈ-euˬ tsawˇ haˬ deuˬ kuˇ uiˬ-awˇ, Aˬpyehˇ meuˬ-ahˇ Iˇsaˬleˬlaˆ tsawˇ haˬ deuˬ-ahˇ guiˇ deuˆ-iˇ-eu lehˇ doˆ-iˇ-euˬ meh.

2 Sahˬpaˬ 13:20

Kʼoeˇ naˇ, Eˇliˇshehˇ shiˇ-awˇ, baꞈ pahˬ nehˬ-euˬ meh. Aˬ yawꞈ kʼoꞈ yawꞈ, Mawˇbaˆ tsawˇ haˬ deuˬ aˇ muˇ muˇ muˇ-ehˇ, Iˇsaˬleˬlaˆ miˇ kʼahˬ-ahˇ ceh laˇ-eu meh.

1 Laˬsaˬbaˬ 19:19

Haˬdaˬdeˬzaˬ uˆ lahˇ-eu uˬ moˆ jawˇ-eu sahˬ paˬ kʼoeˇ deuˬ, Iˇsaˬleˬlaˆ tsawˇ haˬ deuˬ aˬ yawꞈ maꞈ-ahˇ guiˇ deuˆ gʼaˬ-euˬ gaˇ ya mawˇ ngeh, Daˬbiˇ nehˬ-ehˇ jahˇ tsaˬ geuꞈ-awˇ, aˬ yawꞈ uˆ lahˇ-eu uˬ moˆ jawˇ-euˬ meh. Kʼoeˇ naˇ, Suˇliˆ tsawˇ haˬ deuˬ Aˬmoˬ tsawˇ haˬ deuˬ-ahˇ tiˬ jawˇ-iˬ maˬ paˇ caw ba nehˬ mawꞈ ni pyeuꞈ-iˇ-euˬ meh.

Iˇsaˬyaˇ 54:16

“Baw baw-awˇ guiˇ deuˆ-eu keu ka tehˆ luꞈ-eu, ba jiˬ deuˬ-ahˇ ngaˬ neh beh taˬ-euˬ ma. Keu ka baꞈ-awˇ aˬ cawˬ-ahˇ sehꞈ-eu yehˇ deuˬ kʼawꞈ, ngaˬ neh beh taˬ-euˬ ma.

Iˇsaˬyaˇ 6:11

“Aˇ myah keuˆ ni kʼoeˇ loꞈ-ehˇ jahˇ nehˬ nmˇ” lehˇ, Sahˬpaˬ Miˬyehˇ-ahˇ ngaˇ naˇ haˬ ngeh, heu loꞈ-ehˇ ehˇ kʼoꞈ nehˬ laꞈ-euˬ meh. “Meuˬ deuˬ cawˆ-iˇ jiˇ-awˇ, tsawˇ haˬ tiˬ gʼaˬ-iˬ maˬ jawˇ-ehˇ pyeuꞈ-iˇ ngeh keuˆ ni, nymˇ laꞈ kʼoeˇ tsawˇ haˬ tiˬ gʼaˬ-iˬ maˬ ya mawˇ-ehˇ, miˇ kʼahˬ kʼahˬ lah-ehˇ ciˬ cuˇ ni pyeuꞈ-iˇ ngeh keuˆ ni, kʼoeˇ loꞈ-ehˇ jahˇ nehˬ ma.

Yeˬsaˬgeˬlaˇ 21:20

Gaˇ ma tiˬ kahˇ-aˬ, mi cehˇ kʼoeˇ kahˇ-ahˇ, Aˬmo tsawˇ jeuˬ-euˬ Laˬbah meuˬ-ahˇ toeˬ mehˬ-awˇ, yawˬ kahˇ yawˬ-aˬ, Yuˇdaˆ miˇ kʼahˬ hawˇ-eu paˇ tsoˆ muiˬ taˬ-euˬ Yeˬluˇsaˬlehˬ meuˬ-ahˇ bi toeˬ mehˬ-awˬ.

Yeˬsaˬgeˬlaˇ 25:5

Laˬ bah meuˬ-ahˇ law taw gaˆ duˬ bi pyeuꞈ-iˇ-awˇ, Aˬmoˬ miˇ kʼahˬ kʼahˬ lah ni yawˇ bo duˬ bi pyeuꞈ-iˇ ma. Ngaˇ Sahˬpaˬ Miˬyehˇ pyeuꞈ-eu naw maꞈ-ahˇ siˬ duˬ leˇ ni, kʼoeˇ loꞈ-ehˇ jahˇ ma.

Aˬmoˆ 1:14

Kʼoeˇ miˇ neh, Laˬbah meuˬ-euˬ meuˬ lahˇ kʼoeˇ taˆ ngaˇ miˬ dzaˬ pyehˬ doꞈ-awˇ, meuˬ laꞈ kʼoeˇ ziꞈ dah ni tsoˆ taˬ-euˬ nymˇ nymˇ ma deuˬ-ahˇ ngaˇ keuˬ dzeh ma. Kʼoeˇ naˇ, guiˇ deuˆ ngeh nah yaw kʼaˆ-ehˇ guˇ-eu teˇ saˇ ya gaˬ-awˇ, jaˬ lehˇ lehˇ ma baw-eu loꞈ-ehˇ guiˇ deuˆ dui dui tehꞈ-a.

Dawˬmehˬ 3:11

(Sahˬ paˬ Awˇgaˆ-aˬ, Leˬpeˬ tsawˇ jeuˬ-euˬ sahˬ paˬ deuˬ laꞈ kʼoeˇ aˇ saˬ saˬ-eu gʼaˬ pyeuꞈ-eu meh. Aˬ yawꞈ-ahˇ duˬ pahˬ-eu mawˇ dmˬ kʼaˬ lo neh taꞈ-awˇ, yaw mahˇ paw gʼoeˬ caˆ byah-awˇ, yaw jeˇ paw oeˬ caˆ byah-eu meh. Mawˇ dmˬ kʼoeˇ hmˬ-aˬ, Aˬmoˬ tsawˇ haˬ deuˬ-euˬ Laˬbah meuˬ-ahˇ iˬ nah keuˆ ni jaˆ luꞈ-eu meh.)