1 Gawˇliˬtu 14:4 - Akha

⁴ Dawˬ gʼawˬ mya jeˬ ngehˬ-eu kʼoeˇ-aˬ, yawˬ ha gʼaˇ duˬ tehꞈ-ehˇ gaˇ dahˇ tsoeˬ-awˇ, Miˬyehˇ dawˬ kawˬ mehˬ-eu kʼoeˇ-aˬ, Ka li zaˬ aˇ muˇ muˇ lah ni gʼaˇ duˬ gaˇ dahˇ tsoeˬ-eu meh.

Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

⁴ Dawqbav bav-eu tsawrhaq-aq, yawqhar yawqha taef-aer bihuiq bi manrlar-eu mae. Aerkhawf, Miqyaer gharduq ngaeqdan-eu tsawrhaq-aq, Kalizaq armur-anr bihuiq bi manrlar-eu mae.

1 Gawˇliˬtu 14:4 ပူးပေါင်းရင်းမြစ်များ

Maˬkuˆ 16:17

Jah-eu tsawˇ haˬ deuˬ-aˬ, zahˬ leˇ paˬ-ehˇ gʼeh-eu jeˬ mˇ nya-eu baoˬ za tehꞈ-a. Ngaˬ-euˬ tsawˇ myahˇ uˬ moˆ awˬ yawꞈ maꞈ nehꞈ teh doˆ tehꞈ-a. Maˬ gaˬ haw-euˬ dawˬ gʼawˬ mya jeˬ aˬ yawꞈ maꞈ ngehˬ nya tehꞈ-a.

Lormav 14:19

Kʼoeˇ miˇ neh, tiˬ gʼaˬ tiˇ gʼaˬ tsaˬ leˇ dzoeˇ leˇ-eu jeˬ hawˇ-eu, tiˬ gʼaˬ tiˇ gʼaˬ caw dehˬ caw toˆ-eu jeˬ-ahˇ aˬ dui noeˬ tsoˆ taˬ-eu tsaˬ meh.

1 Gawˇliˬtu 12:10

Tiˬ gʼaˬ-ahˇ zahˬ leˇ paˬ-ehˇ gʼeh-eu jeˬ mˇ nya-eu baoˬ biꞈ taˬ-awˇ, tiˬ gʼaˬ-ahˇ Miˬyehˇ dawˬ kawˬ mehˬ nya-eu laꞈ sawˬ biꞈ taˬ-euˬ meh. Tiˬ gʼaˬ-ahˇ Yaw sahˇ Miˬyehˇ neh biꞈ-euˬ laꞈ sawˬ ngeuˇ-eu maˬ ngeuˇ-eu tseˇ paˆ duˬ nya-eu nui gahˇ biꞈ taˬ-euˬ meh. Tiˬ gʼaˬ-ahˇ dawˬ gʼawˬ mya jeˬ ngehˬ nya-eu laꞈ sawˬ biꞈ taˬ-awˇ, tiˬ gʼaˬ-ahˇ dawˬ gʼawˬ mya jeˬ ngehˬ-eu kʼoeˇ-euˬ dawˬ tsuiꞈ yuˇ doˆ nya-eu laꞈ sawˬ biꞈ taˬ-euˬ meh.

1 Gawˇliˬtu 12:28

Ka li zaˬ aˇ muˇ laꞈ kʼoeˇ, Miˬyehˇ neh jawˇ duˬ biˇ tsaˬ taˬ-euˬ meh. Gʼaˬ kʼehˇ deuˬ-ahˇ jeˬ hu hu saˬ bi jawˇ-awˇ, kʼoeˇ-euˬ jeˬ nah Miˬyehˇ gʼaˇ duˬ ngeh dah-eu deuˬ-ahˇ bi jawˇ-euˬ meh. Kʼoeˇ-euˬ jeˬ nah mehˬ-eu tsoˆ-eu saˬ laˬ deuˬ-ahˇ bi jawˇ-euˬ meh. Kʼoeˇ naˇ, zahˬ leˇ paˬ-ehˇ gʼeh-eu jeˬ mˇ nya-eu baoˬ biꞈ taˬ-euˬ deuˬ, naˇ gawˇ laˆ taˬ nya-eu baoˬ biꞈ taˬ-euˬ deuˬ, aˬ cawˬ-ahˇ caw ba nehˬ nya-eu deuˬ, Ka li zaˬ aˇ muˇ-euˬ gaˇ-ahˇ haw-eu pyaˆ-eu deuˬ hawˇ-eu, dawˬ gʼawˬ mya jeˬ ngehˬ nya-eu deuˬ-ahˇ tiˬ tiˆ saˇ-iˬ tiˬ tiˆ bi jawˇ ka leꞈ-euˬ meh.

1 Gawˇliˬtu 13:1

Ngaˇ-aˬ, tsawˇ haˬ zaˬ-euˬ dawˬ deuˬ hawˇ-eu mˬ taˆ gʼaˬ kʼehˇ-euˬ dawˬ-ahˇ keuˆ ni ngehˬ nya jiˇ-eu kʼawꞈ, gʼoeˇ-eu gaˬ-eu jeˬ maˬ ahˇ naˇ, boe loe diˬ-eu teˇ saˇ hawˇ-eu cehˇ lehˇ ciˆ-eu teˇ saˇ loꞈ-ehˇ tehꞈ meh.

1 Gawˇliˬtu 13:2

Ngaˇ-aˬ, Miˬyehˇ gʼaˇ duˬ ngehˬ dah nya-eu baoˬ za-euˬ tsawˇ haˬ pyeuꞈ-awˇ, zaˬ siˬ tsawˇ gahˇ dawˬ tawˆ luꞈ hawˇ-eu zaꞈ taˬ-euˬ jeˬ-ahˇ siˬ nya-eu tsawˇ gahˇ ahˇ-eu uˬ taꞈ, gawˬ jawˬ teh jiˆ nya gaˇ keuˆ ni jah-eu jeˬ ahˇ kʼawꞈ, gʼoeˇ-eu gaˬ-eu jeˬ maˬ ahˇ naˇ, tiˬ jeˬ-iˬ gaˇ dahˇ maˬ tsoeˬ-a.

1 Gawˇliˬtu 14:12

Yaw sahˇ Miˬyehˇ neh biꞈ leꞈ-euˬ laꞈ sawˬ deuˬ-ahˇ naw maꞈ za mawꞈ dui dui-eu loꞈ-ehˇ, yawˬ jeˬ na luꞈ kʼoeˇ taˆ Ka li zaˬ aˇ muˇ bi huiˬ bi mahˇ laˇ nya ni gaˇ dahˇ tsoeˬ leˇ dzehˬ-eu jeˬ-ahˇ naw maꞈ leh jeh dzehˬ paˬ-ehˇ gʼeh-eu meh.

1 Gawˇliˬtu 14:22

Kʼoeˇ miˇ neh, dawˬ gʼawˬ mya jeˬ ngehˬ nya-eu laꞈ sawˬ za-euˬ kʼoeˇ-aˬ, Ka li-ahˇ maˬ jah-eu tsawˇ haˬ deuˬ gʼaˇ duˬ zahˬ leˇ paˬ-ehˇ gʼeh-eu bi siˬ bi mawˇ-eu jeˬ pyeuꞈ-eu meh. Jah-eu tsawˇ haˬ deuˬ gʼaˇ duˬ maˬ ngeuˇ-a. Miˬyehˇ dawˬ kawˬ mehˬ-eu laꞈ sawˬ za-euˬ kʼoeˇ-aˬ, Ka li-ahˇ jah-eu tsawˇ haˬ deuˬ gʼaˇ duˬ bi siˬ bi mawˇ-eu jeˬ pyeuꞈ-eu meh. Maˬ jah-eu tsawˇ haˬ deuˬ gʼaˇ duˬ maˬ ngeuˇ-a.

1 Gawˇliˬtu 14:26

Aˬ yuiꞈ aˬ nyiˇ Ka li zaˬ deuˬ-oˇ, ngaˇ ehˇ mawꞈ-eu-aˬ heu loꞈ-ehˇ ma. Naw maꞈ uˬ duˬ tahˬ-eu lehˇ uiˬ leˇ ngeh, caˇ dawˬ caˇ-eu gʼaˬ, mehˬ-eu tsoˆ-eu gʼaˬ, Miˬyehˇ neh pah mehˬ nehˬ-euˬ jeˬ za-euˬ gʼaˬ, dawˬ gʼawˬ mya jeˬ ngehˬ-awˇ mehˬ-eu gʼaˬ, kʼoeˇ loꞈ-ehˇ mehˬ-euˬ gaˇ dawˬ tsuiꞈ yuˇ doˆ nehˬ-eu gʼaˬ lehˇ, gʼawˬ mya jeˬ baw-eu meh. Yawˬ jeˬ na luꞈ Ka li zaˬ aˇ muˇ gʼaˇ duˬ gaˇ dahˇ tsoeˬ-eu jeˬ ya bi pyeuꞈ meh.

1 Gawˇliˬtu 14:3

Ehˇ kʼawꞈ, Miˬyehˇ dawˬ kawˬ mehˬ-eu tsawˇ haˬ-aˬ, tsawˇ haˬ zaˬ-ahˇ ngehˬ cawˬ-eu jeˬ pyeuꞈ-eu miˇ neh, aˬ cawˬ-ahˇ caw ba-eu, gʼaˬ biꞈ-eu, nui ma saˇ laˇ ni gʼaˬ biꞈ-eu dawˬ ngehˬ-eu tmˇ-eu, heu deuˬ mˇ nehˬ nya-eu meh.

1 Gawˇliˬtu 14:5

Naw maꞈ dawˬ tawˆ luꞈ dawˬ bi ngehˬ nya mawꞈ miˇ-a. Ehˇ kʼawꞈ, kʼoeˇ naˆ maˬ tseˇ Miˬyehˇ dawˬ kawˬ mehˬ nya-eu laꞈ sawˬ naw maꞈ bi za mawꞈ miˇ-a. Dawˬ gʼawˬ mya jeˬ ngehˬ gaˇ dawˬ tsuiꞈ yuˇ doˆ nehˬ nya-eu gʼaˬ jawˇ-awˇ, Ka li zaˬ aˇ muˇ muˇ lah-ehˇ gʼoˆ shaw-awˇ gaˇ dahˇ tsoeˬ leˇ ni maˬ ja mehˬ nehˬ nya naˇ, dawˬ gʼawˬ mya jeˬ ngehˬ-eu gʼaˬ naˆ maˬ tseˇ, Miˬyehˇ dawˬ kawˬ mehˬ-eu gʼaˬ gaˇ dahˇ tsoeˬ dzehˬ meh.