Yeremia 35:14 - An Bibel Kernewek 20234 (Kernewek Kemmyn)

¹⁴ Geryow Yonadab mab Rekab a worhemmynnis dh'y vebyon, na effens gwin, re beu kowlwrys; ha ny evons byth bys y'n jydh ma, rag i re beu gostydh dhe worhemmynn aga thas. Mes my ow honan re gewsis orthowgh heb lett, ha ny woslewsowgh orthiv.

Yeremia 35:14 ပူးပေါင်းရင်းမြစ်များ

Nehemia 9:26

‘Byttegyns diwostydh ens, hag i a rebellyas er dha bynn ha tewlel dha lagha a-dryv aga heyn ha ladha dha brofoesi, a wrussons aga gwarnya, dh'aga threylya dhis arta; hag i a wrug blasfemiow bras.

Nehemia 9:30

Ty a's perthi lies blydhen, ha ty a's gwarnyas gans dha spyrys dre dha brofoesi; hwath ny woslowsons. Ytho ty a's ros yn leuv poblow tiryow erell.

Ysay 30:9

Rag homm yw pobel dhiwostydh, mebyon wowek, mebyon na vynn klewes lagha an Arloedh;

Ysay 50:2

Prag nag esa denvyth ena pan dheuth vy? Prag na worthybis denvyth pan elwis vy? Yw ow dorn berrhes bys ma na yll hi dasprena? A nyns eus dhymmo vy galloes dhe dhelivra? Gans ow heredh my a sygh an mor, my a wra avonyow difeyth; aga fuskes a fler rag difyk dowr, hag a verow rag syghes.

Yeremia 11:7

Rag my a warnyas aga thasow yn solem y'n jydh ma's dres yn-mes a bow Ejyp, bys y'n jydh ma, ow sevel a-varr ha'ga gwarnya yn ter, ow leverel, Goslowewgh orth ow lev.

Yeremia 26:5

dhe glewes geryow ow servysi an brofoesi re dhannvenis dhywgh, orth aga dannvon arta hag arta, mes ny woslewsowgh;

Yeremia 29:19

drefenn na glewsons ow geryow, yn-medh an Arloedh, a dhannvenis dhedha gans ow servysi an brofoesi, orth aga dannvon arta hag arta, mes ny woslowsons, yn-medh an Arloedh.

Yeremia 32:33

I re dreylyas dhymm aga heyn, a-der aga fasow; kyn y's dyskis heb lett, hwath ny woslowsons dhe gemmeres dyskybleth.

Yeremia 35:16

Mebyon Yonadab mab Rekab re gollenwis an gorhemmynn a ros aga thas dhedha, mes ny woslowas orthiv an bobel ma.

Yeremia 35:6

Mes i a worthybis, ‘Ny evyn gwin vytholl, rag agan tas Yonadab mab Rekab a worhemmynnis dhyn, “Nevra ny evowgh gwin, na hwi na'gas fleghes;

Yeremia 7:13

Ha lemmyn, drefenn hwi dhe wul oll an taklow ma, yn-medh an Arloedh, ha my a gewsis dhywgh, ow sevel a-varr hag ow kewsel, mes ny glewsowgh; ha my a elwis dhywgh, mes ny worthybsowgh;