Ekklesiastes 11:9 - An Bibel Kernewek 20234 (Kernewek Kemmyn)

⁹ Bydh lowen, A wour yowynk, y'th flogholeth, ha gas dha golonn dhe'th wul lowen yn dydhyow dha yowynkneth, ha gwra kerdhes yn fordhow dha golonn, hag yn golok dha dhewlagas, ha godhvydh, y hwra Duw dha dhri yn breus drefenn oll an taklow ma.

Ekklesiastes 11:9 ပူးပေါင်းရင်းမြစ်များ

Jenesis 3:6

Ha'n venyn, pan welas bos an wydhenn da rag boes, ha'y bos teg dhe'n dewlagas, ha gwydhenn dhesiradow dhe wul den fur, hi a gemmeras nebes a'y frut ha dybri; ha hi a ros ynwedh dh'y gour esa gensi, hag ev a dhybris.

Jenesis 6:2

mebyon Duw a welas myrghes mab-den ha'ga bos teg, hag i a gemmeras dhedha aga honan gwragedh a vyns anedha a dhewissons.

1 Myghternedh 18:12

Kettell vydhav gyllys ahanas, spyrys an Arloedh a'th teg ny wonn py le; ytho pan dhov ha leverel dhe Ahab ha ny yll ev dha gavoes, ev a'm ladh. Dha was re borthas own a'n Arloedh a-dhia'm yowynkneth.

1 Myghternedh 18:27

Dhe hanter-dydh Elias a's skornyas, ow leverel, ‘Kriewgh ughella, rag ev yw duw; poken yma ev owth ombrederi, poken ev re omdennas, poken yma ev ow vyajya. Martesen yma ow koska ha res yw gul dhodho difuna.’

1 Myghternedh 22:15

Pan dheuth dhe'n myghtern, an myghtern a leveris dhodho, ‘Mikaya, en ni dhe Ramoth-gilead dhe vatalyas, po a hedhyn?’ Ev a worthybis dhodho, ‘Ke yn-bann ha tryghi; an Arloedh a's re yn leuv an myghtern.’

Job 31:7

mar treylis ow hamm a-denewen dhiworth an fordh, mars eth ow holonn war-lergh ow dewlagas, po mar lenas namm dhe'm diwleuv;

Salmow 81:12

Ytho my a's gasas dh'aga holonn worth, dhe gerdhes herwydh aga husulyow aga honan.

Ekklesiastes 12:1

Porth kov a'th Kreador yn dydhyow dha yowynkneth, kyns dos an drog dhydhyow, ha'n blydhynyow may leverydh, ‘Ny'm beus plesour ynna’;

Ekklesiastes 12:14

Rag Duw a dhre pub gwrians dhe vreus, hwath pup-tra yw kelys, po da po drog.

Ekklesiastes 2:10

Pypynag a bysis ow dewlagas, ny skonis vy a'y ri dhedha, na ny skonis a ri plesour vytholl dhe'm kolonn. Ytho lowen o ow holonn drefenn oll ow lavur, ha hemm o ow gober rag oll ow lavur.

Ekklesiastes 3:12

My re wodhva nag eus travyth da rag mebyon den marnas bos heudhik ha gul da hedre vons bew,

Ekklesiastes 3:17

My a leveris y'm kolonn, ‘Duw a vreus ha'n re wiryon ha'n debeles; rag yma termyn gwiw rag pub ober, ha prys breus rag pub gwrians.’

Ekklesiastes 6:9

Gwell yw bos lowen gans an taklow a yll gweles an dhewlagas, ages an golonn dhe hwansa moy. An hireth ma yw euveredh ha chasya war-lergh an gwyns.

Ekklesiastes 7:14

Yn dydh sewena bydh lowen! Hag yn dydh a dhrog, gwra prederi a-dro dhe hemma. Duw re wrug an eyl ha'y gila, ma na allo denvyth diskudha travyth a hwyrvydh y'n termyn a dheu.

Yeremia 23:17

I a lever dhe'n re a dhispres ger an Arloedh, ‘Hwi a'gas bydh kres’, ha dhe bubonan a siw gorthter y golonn, ‘Ny dheu terroes warnowgh.’

Yeremia 7:24

Mes ny woslowsons, na ny blegsons aga skovarn, mes i a gerdhas war-lergh kusulyow ha gorthter aga holonn dhrog, ha mos war-dhelergh yn le war-rag.

Kynvannow 3:27

Da yw, gour dhe berthi an yew yn y yowynkses.

Niverow 15:30

Mes an den neb a wra neppyth, ughel y dhorn, kyn fo genesik po alyon, a villik an Arloedh; ha'n den na a vydh treghys dhe-ves dhiworth y bobel.

Niverow 15:39

hag y fydh kribell ragowgh dhe vires warnedhi ha dhe berthi kov a worhemmynnow an Arloedh, dh'aga gul, ha na holyewgh war-lergh agas kolonn agas honan na'gas dewlagas dha honan, owth horya war aga lergh.

Niverow 22:32

Hag el an Arloedh a leveris dhodho, ‘Prag y hwesksys dha asen an teyr gweyth ma? Otta, my re dheuth yn-mes dhe'th enebi, rag dha fordh yw gorth a-ragov;

Matthew 5:28

Mes my a lever dhywgh, Neb a vir orth benyn gans drokhwans re wrug avoutri seulabrys gensi yn y golonn.

Luk 12:19

ha my a lever dhe'm enev, Ty enev, yma dhis pythow lower gorrys yn gwith rag lies blydhen; gwra powes, dybri, eva, ha bos lowen.”

Oberow 14:16

Y'n henedhow tremenys ev a asas an kenedhlow oll dhe vos yn aga fordhow aga honan;

Oberow 24:25

Hag ev ow kul areth a-dro dhe ewnder hag omrewl ha'n vreus ow tos, Feliks eth ha bos ownek, ha gorthybi, ‘Y'n tor' ma, ty ke; mes my a wra dannvon war dha lergh pan eus dhymm spas.’

Romanyon 14:10

Prag y freusydh dha vroder, po prag y skornydh dha vroder? Rag ni oll a wra sevel a-rag barr Duw.

1 Korinthianys 4:5

Na vreusewgh travyth, ytho, kyns an ewn-dermyn may teffo an Arloedh, neb a wra golowi traow kudhys y'n tewlder keffrys diskwedhes kusulyow an golonn; hag y'n eur na kettep onan a wra kavoes y wormola dhiworth Duw.

2 Korinthianys 5:10

Rag y telledh ni oll dhe omdhiskwedhes a-rag barr Krist, may tegemmerro kettep penn an pyth a goedh dhodho herwydh an traow gwrys, hag ev y'n korf, po da po drog.

Dewteronomi 29:19

Pan glew nebonan geryow an volleth ma, hag omvenniga yn y golonn, ow leverel, ‘Kres a vydh dhymm, kyn kerdhav yn gorthter ow holonn’, yndella ow tiswul an tir dowrhes war-barth gans an tir sygh,

Ebrowyon 9:27

Ha poran dell yw ordenys dhe dus merwel unnweyth, ha wosa henna breus,

Yoshua 7:21

pan welis y'n preydh mantell deg a Shinar, ha dew kans shekel a arghans, ha barr a owr deg ha dew-ugens shekel y boes, my a's hwansas ha'ga hemmeres. Kudhys yns y'n dor a-ji dhe'm tylda, gans an arghans a-woeles.’

2 Peder 3:7

Mes an nevow ha'n nor a'n termyn ma re beu gwithys der an keth ger rag tan, synsys bys dydh breus, ha diswrians an re dhidhuw.