2 Kroniklys 34:4 - An Bibel Kernewek 20234 (Kernewek Kemmyn)

⁴ Yn y lok i a dennas yn-nans alteryow an Baalim; ev a dhiswrug an alteryow a ynkys a sevi a-ughta. Ev a dorras yn-nans an Asherim ha'n imajys gravys ha'n imajys teudhys; ev a wrug polter anedha ha'y skoellya war vedhow an re re sakrifisa dhedha.

2 Kroniklys 34:4 ပူးပေါင်းရင်းမြစ်များ

1 Myghternedh 13:2

Ev a grias erbynn an alter dre er an Arloedh, ha leverel. ‘A alter, alter, yndellma y lever an Arloedh: “Mab a vydh genys dhe ji Davydh, Yosia y hanow; hag ev a sakrifi warnas oferysi an tylleryow ughel a lesk offrynnow warnas, hag eskern denel a vydh leskys warnas.” ’

2 Kroniklys 14:5

Ynwedh ev a gemmeras dhe-ves, dhiworth oll sitys Yuda an tylleryow ughel ha'n alteryow a ynkys. Ha'n wlaskor a's tevo powes yn-danno.

2 Kroniklys 30:14

I a dhallathas oberi hag a dhug dhe-ves an alteryow esa yn Yerusalem, hag i a dhug dhe-ves oll an alteryow rag offrynna ynkys ha'ga thewlel y'n nans Kidron.

2 Kroniklys 31:1

Pan veu oll henna gorfennys, oll Ysrael esa ena eth yn-mes dhe sitys Yuda hag a droghas an peulveyn, ha terri dhe'n dor an Asherim, ha distrui an tylleryow ughel ha'n alteryow der oll Yuda ha Benyamin hag yn Efraym ha Manasse, bys pan y's diswrussens oll. Ena pobel Ysrael a dhehwelis dh'aga sitys, pubonan dh'y berghennogeth y honan.

2 Kroniklys 33:22

Ev a wrug an pyth o drog yn golok an Arloedh, par dell wrug y das, Manasse. Amon a sakrifia dhe oll an imajys gravys a wrussa Manasse, ha'ga servya.

2 Kroniklys 33:3

Rag ev a dhastrehevis an tylleryow ughel re beu tennys yn-nans gans y das Hezekia, hag ev a dhrehevis alteryow dhe'n Baalim, hag a wrug Asherim. Ev a wordhyas oll lu an nev, ha'ga servya.

2 Kroniklys 34:33

Yosia a gemmeras dhe-ves oll an taklow kasadow a diredh an Ysraelysi, hag y hwrug dhe oll esa yn Ysrael servya an Arloedh aga Duw. Oll y dhydhyow, ny fallsons holya an Arloedh, Duw aga thasow.

2 Kroniklys 34:7

ev a dorras dhe'n dor an alteryow, hag a vrewis an Asherim ha'n imajys gravys dhe bolter hag a dhistruis oll an alteryow ynkys der oll pow Ysrael. Ena ev a dhehwelis dhe Yerusalem.

Salmow 18:42

My a's brew munys avel doust a-dherag an gwyns; my a's trett yn-dann dreys avel leys an stretys.

Eksodus 23:24

Ny omblegydh a-rag aga duwow, na'ga servya, na gul herwydh aga oberow, mes ty a wra aga distrui yn tien ha terri aga feulveyn dhe demmyn.

Eksodus 32:20

Hag ev a gemmeras an leugh re wrussons, ha'y leski gans tan, ha'y velyas dhe bolter, ha'y skoellya war an dowr hag a wrug dhe vebyon Ysrael y eva.

Eksodus 34:13

Ty a derr dhe'n dor aga alteryow, ha terri dhe demmyn aga feulveyn, ha treghi aga Asherim,

Ysay 27:9

Rakhenna, yndellma anewnder Yakob a vydh prenys, ha hemma a vydh an frut leun ow treylya dhe-ves y begh: pan worr oll meyn an alter avel meyn krey dralyes, ny sev Asherim nag alteryow ynkys.

Levitikus 26:30

Ha my a dhiswra agas tylleryow ughel, ha terri dhe'n dor agas alteryow ynkys, ha tewlel agas korfow war gorfow agas idolys, ha'm spyrys a wra agas aborrya.

Mika 1:5

Yth yw hemma oll drefenn treuspassow Yakob ha drefenn peghadow chi Ysrael. Pyth yw treuspass Yakob? A nyns ywa Samaria? Ha pyth yw tylleryow ughel Yuda? A nyns yns i Yerusalem?

Dewteronomi 7:25

Imajys gravys aga duwow a leskowgh dre dan. Na dhesir an arghans na'n owr usi warnedha na'y gemmeres ragos, rag own ty dhe vos maglennys ynno, rag ev dhe vos kasadow dhe'n Arloedh dha Dhuw.

Dewteronomi 7:5

Mes yndella y hwrewgh dhedha: hwi a derr dhe'n dor aga alteryow, ha brewi aga feulveyn, ha treghi aga Asherim, ha leski aga imajys gravys gans tan.

Dewteronomi 9:21

Ena my a gemmeras agas peghes a wrussowgh, an leugh, ha'y leski y'n tan, orth y vrewi, orth y velyas yn teg bys may feu melys dhe dhoust; ha my a dewlis y dhoust y'n gover esa ow tiyskynna dhiworth an menydh.