Yakobo 5:16 - The Holy Bible In Alur (Lur) Revised Orthography

¹⁶ Ka kumeno dong’ wutuc dubo mu ng’atuman utuc ni wadi man ni wadi, man wurwo ma ng’atuman urwo pi wadi man pi wadi, kara kumwu kei. Kwac pa ng’atu ma pwe yire dit i ticne.

Yakobo 5:16 ပူးပေါင်းရင်းမြစ်များ

Thangambere 19:29

Man etimbre, kinde ma Mungu nyotho adhura mi pambu, nia Mungu poi pir Ibrahim, man eoro Lot woko kud i kind ng’ielne, kinde m’eng’ielo adhura ma Lot ubedo i ie.

Thangambere 20:17

E Ibrahim urwo ni Mungu: man Mungu cangu Abimelek, ku dhaku pare, man bong’ pare; man ginyolo nyithindho.

Thangambere 20:7

Ka kumeno kawono dwok ci ng’atuno; kum en e jabila, man ebirwo piri, e ibibedo kwo: man tek idwoke ngo, e ing’ei nia ibitho andha, in, man ceke ma peri.

Thangambere 32:28

E ewacu kumae, Jubilwong’o nyingi Yakobo kendo ngo, ento Israel: kum inyego ku Mungu man ku dhanu, e isagu.

2 Samwil 19:19

Man ewacu ni ubimo kumae, Rwoth para kud ukwan kier ira, kadi kud ipoi kum gin ma jatic peri timo ku co i ceng’ ma rwoth para m’ubimo uwok i ie kud i Yerusalem ma nia ubimo keth lembene i adundene.

1 Ubimo 13:6

Man ubimo loko lembe ewacu de ni dhanu pa Mungu kumae, Kawono kwai bero pa Yehova Mungu peri, man irwo pira, kara cinga dwog ira kendo kakare. E dhanu pa Mungu kwayu Yehova, man cing ubimo dwogo kendo ire kakare, man edoko calu ma naka ebedo.

2 Lemkei 30:20

E Yehova winjo dwand Hezekia, man ecangu dhanu.

Kitabu Pa Yob 42:8

Ka kumeno kawono, wugam thwoni dhiang’ abiro iwu man nyogi rombe abiro, man wucidh ba jatic para ma Yob, man wuthier lam m’awang’a piwu giwu; man jatic para ma Yob bikwayu piwu; kum abiyio en, kara kud atim i kumwu calku kasegu mu; kum wuyero pira gin m’atira ngo, calu jatic para ma Yob uyero.

Zaburi 34:15

Wang’ Yehova ni yo ba weg bedopwe, Ithe de bedo acika ni ywak migi.

Ai 17:11

Man etimbre, kinde ma Musa ting’o cinge malu, nia Israel usagu; man kinde m’edwoko cinge piny, Amalek usagu.

Ai 9:33

E Musa ai woko kud i adhura ku ba Farao, man ethang’u cinge i wang’ Yehova: e morpolo ku pei jik, man koth ukonjre ngo wi ng’om.

Lembrieko 15:29

Yehova ni bor ku judubo; Ento ewinjo rwo pa ng’atu ma pwe.

Lembrieko 15:8

Lam pa jadubo en e ginmajudagu ni Yehova; Ento rwo pa ng’atu m’atira nyayu mutoro i ie.

Lembrieko 28:9

Ng’atu ma loko ithe cen kum winjo cik, Cil rwo pare en e ginmajudagu.

Yeremia 15:1

Yehova lund uwacu ira kumae, Kadok Musa giku Samwil gicungo i wang’a, ento kuno di pidoia bedo yo ba dhanu maeni ngo: baigi woko kud i wang’a, man wek gici cen.

Yeremia 33:3

Lwong’a, e abiloko iri lembe, man abinyutho iri gin ma dit, man ma tek, m’ing’eyo ngo.

Yeremia 42:2

man giwacu ni Yeremia ma jabila kumae, Wakwei, wek kwac mwa thiere i weng’i, man ikwai iwa ba Yehova Mungu peri, en e pi dong’ dhanu maeni ceke (kum wadong’ nok ma naka wa dupa, calu weng’i benenowa),

Kitabu Mir Ang’wende Pa Musa Wel 11:2

E dhanu kayu ywak ba Musa; e Musa kwayu Yehova, man mac ujik.

Matayo 21:22

Man gin ceke, ma tek wubikwayu i rwo, wuyio de, wubigamu.

Matayo 3:6

gimaku baputisi de i bang’e i kulo Yordan, ma gituco ko lemdubo migi de.

Marko 1:5

Ng’ommi Yahudi ngung’ gicidho i bang’e, ku ju ma Yerusalem ceke; man emio igi baputisi i kulo Yordan, ma gituco ko dubo migi.

Luka 9:6

E giai, gicidho ku ba pacu, ku yero lembanyong’a ma juboth ko, ku keyo kum i kaka ceke.

Yohana 9:31

Wang’eyo nia Mungu winjo weg dubo ngo: ento tek ng’atu moko jarwo ni Mungu, etimo yeny ma ie yenyo de, e ewinje.

Tic Mi Jukwenda 10:38

en e Yesu ma Nazareti, maram Mungu wire ko ku Tipo Maleng’ ku tego bende: m’ebedewotho ko awotha ku timo ber, ku keyo kum dhanu ceke ma wonabali voyogi; kum Mungu ni kude.

Tic Mi Jukwenda 19:18

Man dhanu dupa bende ma giyio gibino, gituco, giyero pi tic migi de.

Tic Mi Jukwenda 8:24

E Simon udwoko lembe ewacu kumae, Wurwo pira ba Rwoth, kara gin ma wuwacu no moko kud uwok i kuma.

Jurumi 3:10

calu egore kumae, Moko mbe ma won bedopwe, umbe, acel de mbe;

Jurumi 5:19

Kum ni kum camuco pa ng’atu acel judwoko dhanu dupa ni judubo, cil kumeno ni kum woro pa ng’atu acel jubidwoko dhanu dupa pwe.

Jukolosai 1:9

Kum lembe nini wan bende, ugambre i ceng’ ma wawinjo, waweko ki ngo nirwo ku kwayu kwac piwu, kara ng’eyong’ec mi yeny ma ie yenyo uromwu i rieko ceke ku ng’eyong’ec mi tipo bende,

1 Jutesaloniki 5:17

wurwo areri;

1 Jutesaloniki 5:23

Man Mungu mi kwiocwiny en edwokwu leng’ njwa; man dong’ cwinywu ku kwo mu ku kumwu gibed kubang’gi: ma adote mbe i bino pa Rwoth mwa Yesu Kristu.

1 Jutesaloniki 5:25

Umego, wurwo i kumwa.

Juebrania 11:4

Ni kum yioyic Habil u wodho lam ma ber hai ni Mungu m’usagu pa Kain, man ni kum maeno junyutho pire nia en e ng’atu ma bedo pare cungo pwe, Mungu nyutho nyuth pi giramia pare man ni kum maeno kadok etho fodi ebeyero.

Juebrania 11:7

Ni kum yioyic Noa, ma Mungu poye pi gin ma fodi jukuneno ngo, ma lworo ma ayi Mungu ni i kume nege, eyiko avur kara ebodh ot pare; ni kum maeni egonjo ng’om, man edoko jacampacu mi bedopwe ma en e calku yioyic.

Juebrania 12:13

man wutim yo ma atira ni tiendwu, kara maeno ma won abala kud ukier kud i yo, ento ma sagu ecangi.

Juebrania 13:18

Wurwo piwa: kum wageno andha nia wabedo ku pidocwiny ma ber, ma wabeyenyo wabed ko ber i gin ceke.

Yocuwa 10:12

Yocuwa lund uweco ku Yehova i ceng’ ma Yehova mio ie Juamori i wang’ nyithindho mir Israel; man ewacu i wang’ Israel kumae, Ceng’, cung tii wi Gibeon; In i Dwi ke, i poga mir Ajalon.

1 Petro 2:24

ma en gire eyeyo dubo mwa i kume wi yen, kara wan, ma watho ni dubo, wabed kwo ni bedopwe; ku goc pare wun wucangu.

1 Yohana 3:22

man gin ma tek wakwayu wagamu i bang’e, kum waworo cik pare watimo de gin ma nyayu mutoro i wang’e.

1 Samwil 1:12

Man etimbre, kan eberwo i wang’ Yehova, nia Eli neno dhoge.

1 Samwil 12:17

En e palacam mi nganu tin ungo? Abilwong’o Yehova, kara eor morpolo ku koth; e wubing’eyo wubineno de nia dubo mu e dit, ma wutimo i wang’ Yehova, i penji ma wupenjo ko ubimo iwu.

1 Samwil 12:18

Kum kumeno Samwil ulwong’o Yehova; man Yehova oro morpolo ku koth i ceng’ maeca: man lworo nego dhanu ceke dit kum Yehova man kum Samwil.