Yakobo 1:12 - The Holy Bible In Alur (Lur) Revised Orthography

¹² Ng’atu m’uciro abidhe mugisa kwanye; kum ka judaru mulo ie, ebinwang’u jamkermiwic mi kwo, ma Rwoth ung’olo ni ju m’umare.

Yakobo 1:12 ပူးပေါင်းရင်းမြစ်များ

Thangambere 22:1

Man etimbre yo ng’ei gin maeni, nia Mungu mulo i Ibrahim, man ewacu ire kumae, Ibrahim; man ewacu kumae, Anuti.

Nehemia 1:5

man awacu kumae, Akwei, E Yehova, Mungu m’i polo, Mungu ma dwong’ ma jang’oi ndiri, ma gwoko lembariba man mer mi bero ku ju m’umare m’uworo lembariba pare:

Kitabu Pa Yob 2:10

Ento ewacu ire kumae, Iweco calu kind mon ma jukusegu acel weco. Ang’o? wabijolo gin ma ber kud i cing’ Mungu, man wabijolo gin ma rac ungo? I maeni ceke Yob udubo ngo ku dendhoge.

Kitabu Pa Yob 5:17

Nen, ng’atu ma Mungu juko en e jamutoro: Ka kumeno kud icai ponji pa Jategokpo.

Zaburi 11:5

Yehova mulo i weg bedopwe; Ento judubo ku ju m’umaru rop ng’eyong’ec pare dagu.

Zaburi 119:67

Ma fodi jukusenda ngo akier; Ento kawono aketho cwinya kum lembe peri.

Zaburi 119:71

E ber ira kum jusenda; Kara amak ng’eyo cik peri.

Zaburi 119:75

Ang’eyo nia lembapoka peri e pwe, E Yehova, Man nia isenda i bedo mandha.

Zaburi 5:11

Ento wek anyong’a neg dhanu ceke m’upondo i beng’i, Wek gikok thiri thiri ku mutoro, kum icungo i kumgi: Wek ju m’umaru nyingi bende anyong’a neggi ni kumi.

Zaburi 94:12

Mugisa ni ng’atu m’iponjo, E Yehova, M’iponje kud i cik peri;

Ai 20:6

m’anyutho kisa ni rubanga mi ju m’umara m’uworo lembang’ola para.

Lembrieko 17:3

Agulu mi dwoko piny leng’ en e pi mola ma tar, man uka pi mola ma kwar; Ento Yehova ponjo adunde.

Isaya 64:4

Kum ugambre con dhanu winjo ngo, kadi ging’eyo ku ith de ngo, kadok wang’ de neno Mungu mange ngo m’umedi, ma timo ni ng’atu m’ukure.

Zekaria 13:9

Man abikelo ng’ete mir adege i mac, e abidwokogi leng’ calu judwoko mola ma tar leng’, man abiponjogi calu juponjo mola ma kwar. Gibilwong’o nyinga, man abiwinjogi: abiwacu kumae, En e dhanu para; man gibiwacu kumae, Yehova en e Mungu para.

Matayo 10:22

Man dhanu ceke gibidaguwu kum nyinga: ento ng’atu m’uciro cil i kajikne, ng’atuni e ma biboth.

Matayo 25:34

Ubimo bilund wacu ni ju ma yo ku cinge ma yor acwic kumae, Wubin wu ju ma Vwa dwokowu jumugisa, wucam pacu mi ker m’ubedo ayika iwu ugambre i thekri mi ng’om:

Luka 6:22

Mugisa iwu, ka dhanu bidaguwu, ka gibikoyowu kud i kindgi, gicayuwu de, man gibayu nyingwu woko calu gi rac, pi Wod dhanu.

Jurumi 5:4

man twiocwiny nyayu girafoya; man girafoya nyayu genogen:

Jurumi 8:28

Man wang’eyo nia gin ceke timbre karacelo mi bero ni ju ma gimaru Mungu, ni ju ma julwong’ogi calku yeny ma ie yenyo

1 Jukorinto 2:9

ento calu egore kumae, Gin ma wang’ fokuneno ngo, ku ma ith de fokuwinjo ngo, Ma fokumondo de i adunde dhanu ngo, Gin ceke ma Mungu yiko ni ju m’umare.

1 Jukorinto 8:3

endre tek ng’atu moko maru Mungu, e ng’atuno Mungu ng’eye.

1 Jukorinto 9:25

Man ku ba dhanu nzu m’uponjo ya esag i kwaya ma jubolo edhiro wi ava gin ceke. Nie gitime kara ginwang’ jamkermiwic ma nyothre; ento mwa re ma nyothre ngo.

Poi Mi Cik 13:3

kud iwinj lembe pa jabilane, kadi pa jalek lek de: kum Yehova Mungu mu mulo iwu, kara eng’ei tek wumaru Yehova Mungu mu ku cwinywu ceke man ku ng’eyong’ec mu ceke.

Poi Mi Cik 7:9

Ka kumeno ng’ei nia Yehova Mungu peri, en e Mungu, Mungu mandha, ma gwoko lembariba ku mer mi bero ni ju m’umare man ma gwoko lembang’ola pare cil kum dhanum’ utuk rubanga,

Poi Mi Cik 8:2

Man ipoi kum yo ceke ma Yehova Mungu peri telo ie wii rundi pier ang’wen maeni i langa, kara ejwigi, emul ko ii, kara eng’ei gin ma ni i adundeni, tek ibigwoko lembang’ola pare, kadi ungo.

2 Timoteo 2:15

Dong’ itim kud amora m’inyuthri ko ni Mungu, ya in i ng’atu m’efoyo, jatic ma lewic umbe i wie, m’upoko lembe mandha cu.

2 Timoteo 4:8

ugambre ka wono jamkermiwic mi bedopwe, judaru kanu ira, ma Rwoth, ma japoklembe ma pwe, bimio ira i ceng’ maeca; endre ira a kenda ngo, ento ni dhanu ceke bende m’umaru nyuth pare m’ebinyuthre ko.

Juebrania 10:32

Ento iwu poi pi ceng’ ma kwong’a, nwang’u der ucaru iwu, ma wuciro ie piem ma dit mi masendi;

Juebrania 11:17

Ni kum yioyic, Ibrahim uwodho Isak, nwang’u jumule; eyo ng’atu m’ujolo lembang’ola kud anyong’a ewodho wode kulong’;

Juebrania 12:5

man wiwu wil kum jukojuk m’ubeponjowu calku wot kumae, Woda, kud icai ponji ma Rwoth uponji ko, Kadi cwinyi kud uai kinde m’ejuki;

Juebrania 6:15

Man kumeno, kan edaru ciro ku twiocwinye, enwang’u lembang’olane.

Yakobo 2:5

Wuwinji, juwada ma jumerna; Mungu foyo ju ma gi jucan m’i ng’om ungo ya gilony i yioyici, ma gibed ni jucampacu mi ker m’eng’olo ni ju m’umare?

Yakobo 5:11

Nen, walwong’ogi jumugisa gi ju ma giciro cir: wudaru winjo pi twiocwiny pa Yob, man wudaru neno kajik lembe pa Rwoth, maram Rwoth e won ngisi, ku kisa bende.

1 Petro 3:14

Ento tek wusendru kum bedopwe, mugisa kwanyuwu: man lworo migi kud unegwu, kadok ang’aba de cwinywu kud ung’abre;

1 Petro 4:13

ento kum wu jurib mi sendri pa Kristu, anyong’a negwu; kara i nyuth mi dwong’ pare bende anyong’a negwu kud anyong’a ma dit apila.

1 Petro 4:14

Tek jucayuwu kum nying’ Kristu, mugisa kwanyuwu; kum Tipo mi dwong’ ku Tipo pa Mungu ebedo i wiwu.

1 Petro 5:10

Man Mungu mi bero ceke, m’elwong’owu ni dwong’ pare ma nja i Kristu, ka wudaru sendru nyanok, en ku kite ebidwokowu cu ma ndhu, ebiketho wunyang’ de, ebiketho wudoko tek.

1 Petro 5:4

E ka Jakwac ma dit binyuthre, wubigamu jamkermiwic mi dwong’ ma duny woko ngo.

1 Yohana 4:19

Wamaru, kum elar emaruwa.

Lembanyutha 2:10

Lworo kud unegi kum gin ma fodi nyanok ibisendri kudo: nen, wonabali ni ceng’ni bayu kindwu moko i odkol, kara jumul ko iwu; man wubibedo ku masendi ceng’ apar. Dong’ ibed mandha cil i tho, man abimio iri jamkermiwic.

Lembanyutha 3:19

Ku ba ju m’amaru ceke, ajukogi man aponjogi: ka kumeno bed k’amora, man ilok cwinyi.

Lembanyutha 3:21

Ng’atu m’uloyo, abimie ejany kuda i komker para, calu an bende aloyo, man ajany waku Vwa i komker pare.