Nehemia 9:5 - The Holy Bible In Alur (Lur) Revised Orthography

⁵ Julawi, en e Yecuwa, man Kadmiel, ku Bani, man Hacabneya, ku Kerebia, man Hodia, ku Cebania, man Pethahia, gilund giwacu kumae, Wucungi man wumi mugisa ni Yehova Mungu mu m’ugambre nja cil nja; e mugisa bed kum nyingi mi dwong’, m’edodre malu wi mugisa ku pak ceke.

Nehemia 9:5 ပူးပေါင်းရင်းမြစ်များ

1 Ubimo 8:14

Man ubimo loko wang’e, e emio mugisa ni cokri ceke mir Israel: man cokri ceke mir Israel ucungo.

1 Ubimo 8:15

E ewacu kumae, Mugisa bed ni Yehova, Mungu mir Israel, m’eyero ku dhoge ni Daudi ma vwa, man eketho etimbre kakare ku cinge, m’ewacu kumae,

1 Ubimo 8:22

Man Suleman ucungo i wang’ pemblam pa Yehova i vut cokri ceke mir Israel, man ethang’u cinge yor i polo:

1 Ubimo 8:27

Ento Mungu bibedo wi ng’om andha? nen, polo man polo m’i polo copo romi ngo; e ka ot maeni m’agomo biromi nenedi!

I Lemkei 16:36

Mugisa ni Yehova, Mungu mir Israel, Ugambre nja cil nja. Man dhanu ceke giwacu kumae, Amen, man gipaku Yehova.

I Lemkei 29:11

E Yehova, dit, man tego, man yung, man aloci, ku dwong’ en e peri: kum gin ceke ma ni i polo ku ma ni i ng’om en e peri; ker en e peri, E Yehova, man judodi calu wie wi gin ceke.

I Lemkei 29:13

Ka kumeno kawono, Mungu mwa, wafoi, man wapaku nyingi mi dwong’.

I Lemkei 29:20

Man Daudi wacu ni cokri ceke kumae, Kawono wumi mugisa ni Yehova Mungu mu. Man cokri ceke gimio mugisa ni Yehova, Mungu pa kwarugi, man gikulo wigi e girwo ni Yehova, man ubimo.

2 Lemkei 20:13

E Yuda ceke cungo i wang’ Yehova, ku nyithindho migi ma thindho, ku mon migi, man nyithindhgi.

2 Lemkei 20:19

Man Julawi, mi nyithindho mi Jukohathi, man mi nyithindho mi Jukorahi, gicungo kara gipak Yehova, Mungu mir Israel, ku dwal ma tek apila.

Ezra 3:11

E giwero wer ng’atuman ni wadi man ni wadi i pakupak man i foyofoc ni Yehova, giwacu kumae, Kum en e ber, kum mer mi bero pare bedo nja yo bang’ Israel. Man dhanune ceke gikok ku kok ma dit, ka gipaku Yehova, kum juguro the ot pa Yehova.

Nehemia 9:4

Gilund gicungo wi pem mi Julawi, en e Yecuwa, man Bani, ku Kadmiel, man Cebania, ku Buni, man Cerebia, ku Bani, man Kenani, e gikok ku dwandgi ma tek ba Yehova Mungu migi.

Nehemia 9:6

In i Yehova, in i kendi; itimo polo, polo m’i polo, kud udul migi ceke, ng’om de ku gin ceke ma ni i wie, ku nam man gin ceke ma ni i igi, e igwokogi ceke; man udul m’i polo berwo iri.

Kitabu Pa Yob 1:21

e ewacu kumae; Awok kud i ma muneru, e abidok de muneru: Yehova mio, e Yehova kabu woko; mugisa bed kum nying’ Yehova.

Zaburi 106:2

Ng’a ma copo yero pi tic ma tek pa Yehova, Kadi m’unyuth pak pare ceke?

Zaburi 134:1

Nen, wumi mugisa ni Yehova, wu jutic ceke pa Yehova, M’ucungo i ot pa Yehova ku diewor.

Zaburi 145:2

Ku ba rupiny ku ba rupiny abimio mugisa iri; Man abipaku nyingi nja ku nja.

Zaburi 145:5

Ia bipido pi bero mi dwong’ mi yung peri, Man pi tic peri ma wang’u ijo.

Zaburi 146:2

Kinde m’abedo kwo abipaku Yehova: Abiwero pak ni Mungu para kinde m’abedo kwo.

Zaburi 16:2

E ng’eyong’ec para, iwacu ni Yehova kumae, In i Rwoth para: Bero mbe kuda ndhu i beng’i.

Zaburi 66:2

Wuwer pi dwong’ mi nyinge: Wuketh pak pare bed mi yung.

Zaburi 99:3

Wek gipak nyingi ma dwong’ ma ng’oyo ndiri de: E leng’.

Ai 15:11

Ng’a ma calu in i kind mungu, E Yehova? Ng’a ma calu in, ma dwong’ i leng’ne, Ma janyai ndiri i pak, m’ibetimo musana?

Ai 15:6

Cingi ma yor acwic, E Yehova, dwong’ i tego, Cingi ma yor acwic, E Yehova, ng’enyo jadegi nziki nziki.

Daniel 2:20

Daniel ulund uloko lembe man ewacu kumae, Mugisa ni nying’ Mungu rondo ku rondo; kum rieko ku tego en e pare.

Matayo 11:25

I nindo maeno Yesu loko lembe ewacu kumae, Afoi, E Vwa, Rwoth m’i polo ku ng’om, nia ipanu gin maeni ni jurieko ku jung’eilembe bende, inyuthogi de ni mukere:

2 Jukorinto 4:6

Kum en e Mungu m’uwacu kumae, Der birieny kud i mudho, m’edaru rieny i adundewa, kara emi der mi ng’eyong’ec mi dwong’ pa Mungu i wang’ Yesu Kristu.

Poi Mi Cik 28:58

Tek ibiketho cwinyi kum timo lembe ceke mi cik maeni ma jukiewo i kitabu maeni ngo, kara ilwor nying’ maeni mi yung man mi ndiri, en e YEHOVA MUNGU PERI;

1 Petro 1:3

Mugisa ubed ni Mungu ma Won Rwoth mwa Yesu Kristu, m’enyolowa kendo calku kisa pare ma dit mi genogen i ma kwo ni kum cer pa Yesu Kristu ma i kind ju m’utho,

Jupoklembe 13:18

Man malaika pa Yehova wacu ire kumae, Nedi ipenjo nyinga, kum en e nying’ mi wang’uici?