Rasi Mnitas neu naiꞌ Yohanis 3:14 - Uisneno In Kabin ma Prenat: Rais Manba'an Fe'u nok Reta' Ahun-hunut

¹⁴ Onaim Mansian Batuur-Batuur naan antuut antein in uaban naan am nak, “Yohanis. Oras ia ho ro he mtui surat amunit. In haan ee, on nai: ‘Neu jemaꞌat abitan kota Laodikia: Surat reꞌ ia, naꞌko Au, Naiꞌ Yesus Kau, reꞌ sin nteek Ee nak, ‘Ro Batuur’. Au reꞌ ia, uꞌuab namneo ma namnoon Uisneno In Kabin ma Prenat piut-piut. Ma areꞌ saaꞌ-saaꞌ reꞌ Uisneno nmoeꞌ sin naan, naꞌuun ma naꞌbaꞌan nbin Kau.

Rasi Mnitas neu naiꞌ Yohanis 3:14 ပူးပေါင်းရင်းမြစ်များ

Retaꞌ Ahun-hunut 49:3

Neu ko, aam Ruben. Ho reꞌ ia, aan moen unu, asoit enoꞌ. Ho mjair on reꞌ au teas ma au ꞌnimak aꞌneꞌu. Areꞌ tuaf anhormaat ko.

Naiꞌ Yohanis 1:3

Uisneno nmoeꞌ areꞌ saaꞌ ii njair, npaek In Kabin ma Prenat naan. Ka nmuiꞌ fa baer es, reꞌ njari msaꞌ, karu Tuaf naan ka es reꞌ anmoeꞌ je fa.

Naiꞌ Yohanis 8:14

Naiꞌ Yesus nataah am nak, “On nai. Maski Au ꞌjair saksii ꞌeu Au tuak ii kuuk, mes Au uabak naan, ro batuur. Fin Au kuuk es uhiin batuur Au ꞌuum uꞌko mee, ma he ꞌnao ꞌeu mee. Hi ka mihiin fa Au uꞌko mee, ma hi ka mihiin fa au he ꞌnao ꞌeu mee msaꞌ.

2 Korintus 1:20

Areꞌ kanan rasi reꞌ Uisneno nbaꞌan anrair sin naan, In of anmoeꞌ sin anjarin. Es naan ate, karu Naiꞌ Yesus anbaꞌan rais jes nak, “tua,” hit bisa tataah am tak, “Batuur. On reꞌ naan, tua! Amin!” Natuin hit tahiin tain saaꞌ reꞌ Naiꞌ Yesus he nmoꞌe. Hai mitoon rasi ia he miruruꞌ ma mikriraꞌ Uisneno In pinan ma krahan.

Kolose 1:15

Kristus naan, humaꞌ meseꞌ nok Uisneno, reꞌ mansian ii ka bisa niit Ee fa. In nbi nain naan nahuun naꞌko areꞌ kanan saaꞌ, ma In njari ꞌNakaf ma Usif neu areꞌ kanan saaꞌ reꞌ Uisneno anmoeꞌ sin.

Kolose 1:18

In es reꞌ anjari ꞌNakaf neu apirsait ein ok-okeꞌ, ma apirsait ein anjarin on reꞌ In aon. Fin In es reꞌ nanaob sin ok-okeꞌ. Naꞌko areꞌ kanan amates reꞌ anmoni nfanin, In es reꞌ pentiing anneis-neisi, maut he In es reꞌ naꞌraat anneis-neis naꞌko areꞌ kanan saaꞌ-saaꞌ ii ok-okeꞌ.

Kolose 2:1

Hi arki reꞌ mitua et kota Kolose, rarit sin reꞌ abitan kota Laodikia, ma reꞌ tuaf-tuaf reꞌ ka nateef niit kau fa. Au ꞌroim he hi arki mihiin au ꞌmeup maꞌtaniꞌ ꞌeu ki, ma ꞌeu sin.

Kolose 4:16

Karu hi abit Kolose arki amrees amrair surat reꞌ ia te, amsoun ee nkoon meu apirsait ein kota Laodikia he sin bisa nresan amsaꞌ. Ma hi ro he mrees surat reꞌ au ꞌsonuꞌ ꞌiit ee ꞌeu sin amsaꞌ.

Rasi Mnitas neu naiꞌ Yohanis 1:11

Hanaf naan anreek kau mnak, “Yohanis! Au he ukriraꞌ ko rais jes. Saaꞌ-saaꞌ reꞌ ho miit sin, ho ro he mtui sin. Rarit ho msonuꞌ sin meu jemaꞌat hiut, esan reꞌ jemaaꞌt ein abitan kota Efesus, kota Smirna, kota Pergamus, kota Tiatira, kota Sardis, kota Filadelfia, ma kota Laodikia.”

Rasi Mnitas neu naiꞌ Yohanis 1:5

Au ꞌtoti msaꞌ he Yesus Kristus nakriraꞌ In nekan arekot neu ki, he hi bisa mmoni mbi mamut, rameꞌ es nok es, ma taininaꞌ. In naꞌuab piut-piut ma maat-maat anmatoom nok saaꞌ-saaꞌ reꞌ Uisneno natoon neu Ne. Unuꞌ te, In nmaet batuur-batuur, mes Uisneno namonib nafainꞌ Ee, he In njair tua unu reꞌ anmoni nfain naꞌko ꞌmaten. In anjair Aꞌnaak Usif amsaꞌ neu areꞌ kanan usif anbi pah-pinan. Natuin Naiꞌ Yesus anneek kit, es naan ate In natꞌopab In naaꞌ ee nasai neu kit. Nok ranan In aꞌmaten naan, In anfei ranan he nsoi nafetin naan kit naꞌko hit saant ein sin kuasan.

Rasi Mnitas neu naiꞌ Yohanis 19:11

Rarit au uꞌaitiꞌ au matak, onaim au ꞌkius ꞌiit sonaf neno tunan natfeꞌi. Nok askeken ate, au ꞌkius ꞌiit bikaes muit es npoi neem. Tuaf reꞌ ansae bikaseꞌ naan, kaan ee, “Tuaf reꞌ Annaaꞌ Rais Manbaꞌan” ma “Tuaf reꞌ Amneot ma Amnonot”. Oras In nafeek rasi, ro natai. Karu In nnao nmakeen, In nnao nok neek amneꞌo.

Rasi Mnitas neu naiꞌ Yohanis 2:1

Rarit Mansian Batuur-Batuur naan naprenat kau mnak, “Yohanis, ho ro he mtui surat noo goes. In haan ee, on nai: ‘Neu jemaꞌat abitan kota Efesus: Surat reꞌ ia, naꞌko Au, Naiꞌ Yesus Kau. Au es aꞌnaaꞌ kfuun hiut etan Au ꞌnimak aꞌneꞌu. Au es aꞌnao ꞌfuun utef-tefan ma ꞌnoon pauk noni fuaꞌ hiut ein naan meseꞌ-meseꞌ. Amneen Au uabak reꞌ ia.

Rasi Mnitas neu naiꞌ Yohanis 21:6

Rarit In natoon antein kau mnak, “Areꞌ saaꞌ-saaꞌ reꞌ Au ꞌbaꞌan ꞌain sin naꞌko afi unuꞌ naan, njarin nrarin. Natuin Au reꞌ ia, Alfa ntea Omega. Ma Au reꞌ ia, A ntea Z, Areꞌ saaꞌ-saaꞌ ii naꞌuun ma naꞌbaꞌan nbin Kau, anmurai naꞌko ahunut ntea amunit. Areꞌ kanan mansian ameon oe, Au of aꞌfeen sin oe ma ninun kuuk ruum-ruum aah, naꞌko oe mataꞌ reꞌ neiki ꞌhonis, maut he mansian ein anmonin batuur.

Rasi Mnitas neu naiꞌ Yohanis 22:13

Au reꞌ ia, Alfa ntea Omega. Au reꞌ ia, A ntea Z. Areꞌ kanan saaꞌ-saaꞌ ii naꞌuun ma naꞌbaꞌan nbin Kau, anmurai naꞌko ahunut tar amunit.

Rasi Mnitas neu naiꞌ Yohanis 22:6

Rarit ameput naan natoon kau mnak, “Areꞌ saaꞌ-saaꞌ reꞌ au utoon ko sin reꞌ ia, ro batuur. Areꞌ mansian bisa npirsain saaꞌ-saaꞌ reꞌ au uꞌuab sin naan. Afi unuꞌ, Uisneno npaek In Asmaan ee he natoon In Kabin ma Prenat sin neu In mafefa kniunꞌ ein. Mes oras ia, In npaek In ameput naꞌko sonaf neno tunan he natoon neu In aanh ein anmatoom nok areꞌ kanan rasi reꞌ ka ꞌroo fa ntein ate, ro he njarin.”

Rasi Mnitas neu naiꞌ Yohanis 3:7

Rarit Mansian Batuur-Batuur naan ntuut antein In uaban am nak, “Yohanis. Oras ia, ho ro he mtui surat es antein. In haan ee, on nai: ‘Neu jemaꞌat abitan kota Filadelfia: Surat reꞌ ia, naꞌko Au, Naiꞌ Yesus Kau. Au reꞌ ia, Tuaf Akninuꞌ ma Batuur. Au es reꞌ aꞌnaaꞌ usif naiꞌ Daut in aꞌretu ꞌfoꞌe. Karu Au usoin enoꞌ, ka tiit fa tuaf reꞌ bisa naꞌeek. Karu Au uꞌeek, ka tiit fa tuaf reꞌ bisa nasoin.