Rasi Mnitas neu naiꞌ Yohanis 2:14 - Uisneno In Kabin ma Prenat: Rais Manba'an Fe'u nok Reta' Ahun-hunut

¹⁴ Mes Au ꞌiit ꞌak, hi mmoufu mbi rais jes aꞌnua. Anmuiꞌ tuaf naꞌko ki reꞌ nroim he natuin Balaam in nonin. Unuꞌ te, Balaam nanoniꞌ naiꞌ Barak he naꞌokiꞌ atoin Israelas sin, tar antea sin ntanhai Uisneno In romin. In naꞌokiꞌ sin he sin nokan nfuan, ma nahan mnaah fuat, ma nnao nmakaken nok tuaf reꞌ sin ka moen ein fa, aiꞌ sin ka feek ein fa.

Rasi Mnitas neu naiꞌ Yohanis 2:14 ပူးပေါင်းရင်းမြစ်များ

Naiꞌ Mateos 18:7

Pah-pinan ia baer siraak batuur, natuin nmuiꞌ rasi mfaun reꞌ anmoeꞌ tuaf anmouf neu sanat. Mes tuaf reꞌ siraak anneis, es reꞌ tuaf reꞌ anmoeꞌ taos tafiꞌ-tafiꞌ, he tuaf bian nmoꞌe nsaan.

Haef ein sin Retaꞌ 15:29

Kais ammakaek ma mmakoin karu ka fee-mone fa. Kaisaꞌ meuk sis-fuat. Kaisaꞌ miah naaꞌ. Ma kaisaꞌ meuk sisi naꞌko muꞌit reꞌ nfuut niis on. Karu hi bisa mpanat hi tuam ein naꞌkon rasin naan, hi ka meik fa haiꞌnisit meu hi aom-bian nonot apirsait atoin Yahudis Kristen sin. Nok rasi naan ate, hi bisa mibua reko mok sin. Hai surat reꞌ ia, antuuꞌ on reꞌ naan, tua.”

Haef ein sin Retaꞌ 21:25

Mes neu atoni ka Yahudis fa, reꞌ sin anpirsain neun Usif Yesus, hai msonuꞌ mrair sin surat. Hai mitonan sin anmatoom nok hit atfekaꞌ neno naan nak, sin ka anperluu fa, he natuin hit atoran harat Yahudi sin ok-okeꞌ. Reꞌ sin he namnau he nmoeꞌ natuin sin, esan reꞌ: kaisaꞌ nmakaken ma nmakonin karu ka fee-mone fa. Kais anseor gok nok baer fuat. Ma kais anbukaen mnahat reꞌ sin aok-bian Yahudi sin anmaiꞌnisin sin. On reꞌ: kais nekun siis fuat. Kais nahan naaꞌ. Ma kais nekun sisi naꞌko muꞌit reꞌ tuaf anfuut goe ma nkeer niis ne, tar in naaꞌ ee ka nsai npoi fa.”

Roma 11:9

Usif naiꞌ Daut antui nmatoom nok uuf Yahudis anbi Uisneno In Suur Akninuꞌ msaꞌ am nak, “Maut he sin feest ein anbin sin mei ja kuuk. Fin sin feest ee kuuk es reꞌ nakreo nafaniꞌ sin, he sin natenab nak areꞌ saaꞌ ii reko nrair. Ma sin aꞌmuiꞌk ein kuuk es reꞌ anmoeꞌ sin he nastuun am naspaen.

Roma 14:13

Unuꞌ te, hi abitan Roma misaeb sanat meu hi aom-bian atoin asraint ein. Misnaas nai! Reko nneis, hit tafeek on nai: hit kais atmoeꞌ he hit aok-bian ii, nastuun. Hit kais takreo tamouf sin he sin nmoꞌen sanat.

Roma 14:21

Reko nneis maran ma mtahan ho tuam aan. Kais meuk sisi, aiꞌ miun tua min-kase, aiꞌ mbukae saaꞌ es, reꞌ nmoeꞌ ho aom-bian aan anmouf.

Roma 9:32

Nansaaꞌ am es sin ka bisa fa he naraem ok nok Uisneno? Natuin sin suma nromin he nmoꞌen natuin atoran, maut he In ntoup sin on reꞌ atoin neek amneot ma amnonot, mes sin ka npirsain fa neun Yesus Kristus. Rarit on reꞌ sin nastunan nbi “fatu stunaꞌ”. Rasi reꞌ ia es reꞌ Suur Akninuꞌ Uisneno In sairt ii nak, “Amkius iim ma mipeen iim feꞌ! Fin Au ꞌtao ꞌrair Tuaf es et aꞌtoꞌef Sion, et kota Yerusalem. Tuaf naan on reꞌ faut goes reꞌ nmoeꞌ tuaf nastuun. Mes sekau reꞌ npirsai Je te, kais namaeb on.” Fatu naan, es reꞌ Naiꞌ Yesus. Mes atoin Israelas sin antorak ma ka ntoup Goe fa. Naan on reꞌ sin nastunan, rarit sin ntaikobin natuin fatu naan.

1 Korintus 1:23

Maski on naan amsaꞌ, mes hai reꞌ amjair Uisneno In haef ein, suma mnao he mitoon meu tuaf am mak, “Uisneno nreek anrair Kristus, es reꞌ Tuaf reꞌ In nbaꞌan nain he nreek Ee neem. Rarit tuaf bian ankuus naꞌmaet Je nbi hau nehe.” Oras atoin Yahudis sin anneen retaꞌ naan, sin he ntorak ma nporin rasi naan, fin natuin sin tenab, Tuaf reꞌ Uisneno he nreek Ee neem, ka bisa nmaet fa on reꞌ naan. Oras atoin Yunanis sin anneen retaꞌ naan, sin nateenb ein am nak, “Retaꞌ naan ro mono batuur-batuur!”

1 Korintus 7:2

On nai: natuin anmuiꞌ mainuan fani-fani he tuaf bisa nmoufu nbi rasi ꞌbuꞌuf amreꞌut, es naan ate, reko nneis atoin es ansao in fee ja kuun. On naan amsaꞌ, bifee jes ansao in moen ja kuun.

Atoin Ibranis 13:4

Rais matsaos et bifee-atoniꞌ naan, kninuꞌ. Mes kais-kaisaꞌ matsao kninuꞌ naan, anjair ꞌoemetan. Uisneno of anfee hukun neu tuaf-tuaf reꞌ anmakoin nok es, reꞌ in ka fee ja fa, aiꞌ in ka moen ja fa.

1 Naiꞌ Petrus 2:8

Matuꞌi msaꞌ am nak, “Anmuiꞌ fatu reꞌ anmoeꞌ tuaf nastuun. Anmuiꞌ fatu reꞌ anmoeꞌ sin antaikobin.” Sin ntaikobin, natuin sin ka nromin fa he nmoeꞌ natuin ein Uisneno In Kabin ma Prenat sin. Fin Uisneno nꞌator nain he sin ntaikobin on naan.

2 Naiꞌ Petrus 2:15

Unuꞌ te, tunggur aputa-kriut ein naan, tuaf ein reꞌ natuin raan amneot, mes aꞌroo-ꞌroo te sin nbeon ok. Nok ranan naan, sin on reꞌ naiꞌ Balaam un-unuꞌ naan, es reꞌ Bosor in anah. In reꞌ naan Uisneno In mafefa kniun es. Mes in nroim naꞌsekeꞌ neu mnaim roit, onaim in nmoeꞌ rasin reꞌ ka namneo ma namnoon fa. Neot es, Balaam ansae bikaes keledai. Bikaes keledai sin ka bisa naꞌuab ein fa. Mes oras naan Uisneno nmoeꞌ bikaes keledai naan bisa naꞌuab on reꞌ mansian! Rarit bikaes keledai naan nakainaꞌ naiꞌ Balaam, natuin in nmoeꞌ maufinu. Bikaes keledai naan nroim he in nasnaas, he in kais anmoeꞌ maufinu ntein, on reꞌ amaunut.

Naiꞌ Judas 1:11

Ampaant om! Sin of napein kuuk sin sapaak ein. Fin sin nmoꞌen on reꞌ naiꞌ Kain, reꞌ anroor niis in oir honif. Sin nmoꞌen on reꞌ naiꞌ Balaam, reꞌ anmoeꞌ saaꞌ-saaꞌ aah, asar napein kuun noni-roit. Sin anmoꞌen on reꞌ naiꞌ Kora msaꞌ, reꞌ namreuꞌ ankoon, natuin in nraban Uisneno. Natuin sin rais maufinun naan, tuaf-tuaf ein reꞌ naan amsaꞌ of mabatis ma mabetis naꞌkon Uisneno.

Rasi Mnitas neu naiꞌ Yohanis 2:20

Mes hi mmoufu mbi rais jes: hi mtoup bi Isabeel, reꞌ naikas in tuan ee mnak, Uisneno In mafefaꞌ. Rarit hi mkoon ee he in nanoniꞌ nsaan neu Au ngguin. Natuin in noniꞌ reꞌ naꞌeꞌob naan, es Au ngguin, nahan amnaah fuat. Ma sin imsaꞌ nmakaken nok tuaf reꞌ sin ka moen ein fa, aiꞌ sin ka feek ein fa.

Rasi Mnitas neu naiꞌ Yohanis 2:4

Mes Au ꞌkius, hi mmoufu mbi rais jes. Natuin afi unuꞌ, oras hi feꞌ mmurai mpirsai meu Kau, hi mmaneek es nok es. Mes oras ia, hi ka on fa nana goen antein.

Rasi Mnitas neu naiꞌ Yohanis 21:8

Mes anmuiꞌ tuaf bian reꞌ of anporin napoitan sin, neun tais ai bariri, reꞌ npiin ka nasnaas niit fa. Nahuum on reꞌ atoin amtaus, tuaf reꞌ nkoit Naiꞌ Yesus, tuaf reꞌ anꞌoemeet, tuaf reꞌ anmakaken ma nmakonin nok tuaf reꞌ sin ka moen ja fa, aiꞌ ka fee ja fa, aroor mansian, afuat neu nitu, araut, ma aputa-kriut. Sin ar-arsin naan of nait inporin sin neu tais ai, reꞌ anteek ee nak, ‘bareꞌ ꞌmaten no nuan ii.’ ”

Rasi Mnitas neu naiꞌ Yohanis 22:15

Mes tua sonaꞌ ma ꞌtetaꞌ, ka bole fa he ntaman neun bare naan. Reꞌ ka Uisneno Iin na fa, ka bole fa he natuan nbin bare naan. Sin esan reꞌ tuaf-tuaf reꞌ ka npirsain fa neun Uisneno, amakaket, afuat, amarorot, araut, ma aputa-kriut. Sin arsin reꞌ naan, ka bole fa he ntaman. Sin arsin reꞌ naan, maut he sin nbin moneꞌ.